کۆکردنەوە و ئامادەکردنی: ڕەحمان نەقشی [1]

پەسەندکراوی کۆنگرەی سێیەمی حیزب
ڕەزبەری 1352 - سێپتامبری 1973 [1]

ڕۆژی 7ی ڕەشەمەی داهاتوو، دەیەمین خولی هەڵبژاردنی مەجلیسی شووڕای ئیسلامی‌و پێنجەمین خولی هەڵبژاردنی مەجلیسی خوبرەگانی ڕەهبەری، لە ئێران بەڕێوە دەچێ. حیزبی دیموکراتی کوردستان لە چەند مانگی ڕابردوو‌دا، لە زمانی سکرتیری گشتی‌و بەرپرسانییەوە، ڕوانین‌و بۆچوونەکانی خۆی بە شێوەیەکی گشتی لە بارەی هەڵبژاردن لە ئێران‌داو ئەرکی خەڵکی کوردستان لە ڕووبەڕوونەوە لە گەڵ هەڵبژاردنەکاندا ڕاگەیاندوە. ئێستاش کە قۆناغی بڕیاردانی دامەزراوەکانی کۆماری ئیسلامی لە سەر سەلاحیەتی پاڵێوراوانی ئەو دوو هەڵبژاردنە کۆتایی پێ هاتوە، بە پێویستی دەزانین هەڵوێستی یەکجارەکیی ئەم حیزبە لە سەر ئەم هەڵبژاردنانە، بە شێوەی خوارەوە، بە ئاگاداریی خەڵکەمان‌و بیروڕای گشتیی بگەیەنین:
- لە ئێرانی ژێر دەسەڵاتی کۆماری ئیسلامی‌دا، پرۆسەی هەڵبژاردن هەر لە دەسپێکەوە تا ئەنجامەکانی بە هۆی ئەو مەرج‌و میکانیزمانەی دەسەڵاتی سیاسیی وڵات بە سەری‌دا زاڵ کردووە هەم لە نێوەرۆکی دیموکراتیکی خۆی بە تاڵ کراوە، هەم ئەنجامەکانی هەڵبژاردن هەر جۆرێک‌و هەر چییەک بێ، کاریگەرییەکانی لە ڕێگای بەربەست‌و بڕیاری دامەزراوە ناهەڵبژێردراوەکان، دەگەیەنرێتە لانیکەمی خۆی. بەم جۆرە دەنگدەران‌و نوێنەرانی هەڵبژێردراوی ئەوان لە باشترین‌و ڕێگەپێدراوترین هەلومەرجیش‌دا، لە ئاستێکی زۆربەرتەسک‌و سنوورداردا دەتوانن لە سەر دانان‌و پێداچوونەوەی قانوونەکانی وڵات‌و جۆری ڕێبەری‌و بەڕێوەبەریی سیستەمی سیاسیی وڵات، ڕۆڵیان هەبێ.
- سەرەڕای ئازادنەبوونی هەڵبژاردن‌وهەموو ئەو بەربەست‌و کەموکووڕییانەی لە وڵاتی ئێران لە سەر ڕێی هەڵبژاردنی ئازاد هەن، خەڵکی ئێران‌و ڕۆژهەڵاتی کوردستان، زۆر جار هەوڵیان داوە دەرفەتی هەڵبژاردن بۆ گەیاندنی پەیامی خۆیان بە دەسەڵاتداران بە کار بێنن. هێندێک جار بە پێشوازی نەکردن لە هەڵبژاردن‌و خۆبوارن لە چوون بۆ سەر سندووقەکانی دەنگ، جاری واش بووە بە دەنگدان بەو پالێوراوانەی کە لە خۆیان بە نزیکتریان زانیون، یا پێیان وابووە کەمتر سەر بە دامەزراوە بڕیاربەدەستەکانی کۆماری ئیسلامیین. بێجگە لەمەش خەڵکی ڕۆژهەڵاتی کوردستان لە چەند هەڵبژاردنی ئەم ساڵانەی دوایی‌دا، کەشوهەوای سیاسیی سەروبەندی هەڵبژاردنیان بە شێوەیەکی وریایانە بۆ خستنەڕووی بندەستی‌و بێمافی نەتەوەی کورد لە ئێران‌و سیاسەتی سەرکوتکەرانە‌و پڕلە هەڵاواردنی دەسەڵاتداران‌، قۆستووەتەوە.‌‌
- کۆماری ئیسلامیی ئێران بۆ خۆ دەربازکردن لە گوشار‌و گەمارووە سیاسی‌و ئابوورییە نێودەوڵەتییەکان ملی بۆ هاتنەسەرکاری سەرکۆمارێک بە گوتارێکی تا ڕادەیەک جیاوازلەوانی پێشووو پاشەکشە لە سیاسەت‌و هەڵوێستە دەرەکییەکانی ڕابردووی خۆی ڕاکێشا. چاوەڕوان دەکرا لە ئاستی نێوخۆیی‌و بۆ کەمکردنەوەی ناڕەزایەتییەکانی خەڵک لە بواری سیاسی‌و ئابوورییشدا‌ مل بۆ جۆرێک کرانەوە بداو تا ڕادەیەکی بەرچاو ڕێگا بۆ بەشداریی ڕیفۆرمخوازان‌و دەنگی جیاوازی دیکە لە دەسەڵاتی سیاسی‌دا‌ بکاتەوە. بەڵام وەک لە ڕەوتی پێداچوونەوەی کاندیداکانی ئەم دەورەیەی هەڵبژاردن دا دیتمان لە ئاستی ئێران‌دا، شانسێکی ئەوتۆی بۆ چوونی ڕیفۆرمخوازان‌و کەسانی سەربەخۆ لە قۆڵەکانی نێودەسەڵات بۆ نێو هەر دوو مەجلیس نەهێشتووەتەوە، لەپارێزگەکانی ڕۆژهەڵاتی کوردستانیش، سەلاحیەتی زۆربەی نزیک بە تەواوی ئەو کاندیدایانەی ڕەت کردووەتەوە کە لە ڕووی پێگەو کارنامەی سیاسی، ناسراو‌و جێگای پشتیوانیی خەڵک بوون‌و چاوەڕوانیی ئەوەیان لێ دەکرا هەڵگری ویست‌و داخوازە جیددییەکانی خەڵک بن. دەزگا‌و دامەزراوە سەرکوتکەرەکان لە ڕۆژهەڵاتی کوردستان هەر بەوەندەشەوە نەوێستاون‌و هەر چی لە ڕۆژی دەنگدان نزیکتر دەبنەوە، پتر چالاکانی سیاسی‌و مەدەنی بە تایبەتی ئەو کەسانەی هەوڵیان داوە دەرفەتی بەرتەسکی هەڵبژاردن لە ڕوانگەیەکی نەتەوەییەوە‌و بە قازانجی هەڵبژێرانی کەسانی سەر بە خەڵک بقۆزنەوە، بەرەوڕووی گوشار‌وهەڕەشەو ڕاوەدوونان بکەنەوە.
بە سەرنجدان بە هەمووی ئەو ڕاستییانە:
1- حیزبی دیموکراتی کوردستان سپاس‌و پێزانینی خۆی بە چالاکانی سیاسی‌و مەدەنیی نێوخۆ‌‌و خەڵکی وشیارو بە هەڵوێستی ڕۆژهەڵاتی کوردستان ڕادەگەیەنێ، چونکە سەرەڕای هەموو بەربەست‌و ئاستەنگەکان لە چەند مانگی ڕابردوودا کەشوهەوای سیاسیی پێش هەڵبژاردنیان بۆ هێنانەبەرباسی کێشەکانی گەلی کورد لە ئێران، خستنەڕووی ستەم‌و هەڵاواردنی دەسەڵاتی سیاسی بەرامبەر بەو گەلە، لەقاودانی گەندەڵی‌وهاودەستیی ژمارەیەک لە نوێنەرانی دەورەکانی پێشووی مەجلیس لە گەڵ دەزگا سەرکوتکەرەکان‌و گرنگترین چاوەڕوانییە کانی خۆیان لە پالێوراوان، قۆستەوە.
2- دەنگدان یا بایکۆتکردنی هەڵبژاردن، هەر دوویان مافی بێ ئەملاو ئەولای خەڵکن‌. ئەگەر لە حەوزەیەکی هەڵبژاردن کە هیچ کاندیدایەکی دڵخوازو هەڵگری داخوازەکانی خەڵکی لێ نییە، بایکۆتی سندووقەکانی دەنگ بە هەڵوێستێکی سیاسیی شیاو‌و دژبە کۆماری ئیسلامی دەژمێردرێ، لە حەوزەیەکیش کە کاندیدایەکی بەستراوە بەخەڵک، خۆشناو‌، بوێر، خاوەن پێشینە‌و کارنامەی خاوێن لە گەڵ مۆرەیەک یا چەند مۆرەی گەندەڵ‌و هاودەستی دام‌و دەزگا سەرکوتکەرەکان لە ململانێ دان، دەنگدان بە قازانجی کاندیدا باشەکە، دەتوانێ گونجاوترین‌و کاریگەرترین هەڵوێست بێ. لەو شارو ناوچانەش کە لە ڕووی دیموگرافییەوە تایبەتمەندیی خۆیان هەیەو، کورد لە گەڵ نەتەوەی دیکە پێکەوە دەژین، زۆر پێویستە دەنگدەرانی کورد دوور بڕوانن، زۆرترین هاوکاری، یەکگرتوویی‌و هاودەنگییان هەبێ بۆ ئەوەی پشتی کاندیدای شیاوی کورد بگرن‌و بەم جۆرە سەنگ‌و قورسایی خۆیان لە هەر ڕوویەکەوە بسەلمێنن. چاوەڕوانیی ئێمە ئەوەیە خەڵک لە هەر دوو حالەتدا لە گەڵ چالاکانی سیاسی‌و مەدەنیی نێوخۆ پرس‌و ڕاوێژ‌و هاوفکری بکەن بۆ ئەوەی کەسانی هەلپەرست، نەتوانن دۆخەکە لە بەرژەوەندی خۆیان بەکار بێنن.
3- ئاکامی هەڵبژاردن لە کوردستان هەر چۆنێک بێ‌و هەر کەسانێک، بە دەنگ یا بە ناوی خەڵکی شارو ناوچەکانی ڕۆژهەڵاتی کوردستانەوە بچنە مەجلیس، خەڵک دەبێ ببن بە هێزی گوشار لە سەریان‌و جێبەجێکردنی داخوازەکان‌و دابینکردنی مافەکانی خۆیانیان لێ بوێن. گوشاری خەڵکی کوردستان بۆ سەرناوەندەکانی یاسادانان‌و دامەزراوەکانی دیکەی کۆماری ئیسلامی‌و هەوڵدانیان بۆ هێنانە گۆڕی داواکانیان، پێویستە لە دوای هەڵبژاردن بە شێوەیەکی ڕێکخراوتر‌و یەکگرتووانەتر درێژەی هەبێ.
حیزبی دیموکراتی کوردستان
دەفتەری سیاسی
30ی ڕێبەندانی 1394
19-02-2016

بەداخەوە هەواڵی دڵتەزێنی تیرۆری کادرێکی حیزبی دیموکراتی کوردستان بە ناوی کاک #قادر قادری#مان بیست، وەک یەکێتیی دیموکراتی کوردستان هاوخەمیی خۆمان بۆ لە دەستدانی ئەو شەهیدە دەردەبڕین و سەرەخۆشی لە بنەماڵەی شەهید قادر قادری و حیزبی دیموکراتی کوردستان دەکەین. کردەوەی تیرۆر لە ژێر هەر ناو و پاساوێکدا، کردەوەیەکی قیزەون و نامرۆڤانەیە، کۆماری ئیسلامی ئێران بە هۆی سیاسەتە نەگریس و ستەمکارییەکانیەوە، بۆ سەپاندنی ستەم و ترس و هەڕەشە، تیرۆر وەک چارەسەر بەکار دێنێت و هیچ سڵ لە کەڵک وەرگرتن لەو کردەوە قیزەونانە ناکاتەوە و چوار دەیە لە دەسەلاتی کۆماری ئیسلامی پڕە لە کردەوەی تیرۆر و وەک دەوڵەت ماهییەتێکی تیرۆریستیی هەیە.
وەک یەکێتیی دیموکراتی کوردستان، هەموو جۆرە کردەوەیەکی تیرۆریستی و لە ژێر هەر ناو بە هەر پاساوێک مەحکووم و ئیدانە دەکەین و داواکارین کە لایەنە سیاسییەکانی کوردستانی ڕۆژهەڵات هەڵوێستێکی جیددی وەرگرن و بەرپەرچی کردەوە تیرۆریستییەکانی کۆماری ئیسلامی ئێران بدەنەوە و لە حکوومەتی هەرێمی کوردستانیش داواکارین کە مەترسیی سەر لایەنە سیاسییەکانی کوردستانی ڕۆژهەڵات بە جیددی وەرگرن چوونکو ئەرکی پاراستنی لایەنە سیاسییەکانی کوردستانی ڕۆژهەڵات بە قورسایی لە ئەستۆی حکوومەتی هەرێمی کوردستانە و پێویستە تیرۆرەکانی ئەم دواییە ڕوون بکرێتەوە و ئاکامەکانیشی بۆ ڕای گشتی بڵاو بکرێتەوە.
#07-03-2018#

خەڵکی ئازادیخوازی کوردستان!
هێز و ڕێکخراوە سیاسییە کوردستانی و ئێرانییەکان!
ناوەند و کۆڕ و کۆمەڵە مرۆڤدۆستەکان!
کۆماری ئیسلامیی ئێران هەر چی زیاتر لە نێوخۆی وڵات لە گەڵ پەرەگرتنی ناڕەزایەتییەکانی خەڵک و، لە دەرەوە لە گەڵ گوشارە سیاسی و ئابوورییە نێودەوڵەتییەکان بەرەوڕوو دەبێ، پتر پەنا بۆ سەرکوت و دەستدرێژی و تاوان و تیرۆر لە دژی ئازادیخوازانی کوردستان و ئێران لە نێوخۆ و دەرەوەی وڵات دەبا.
هەر وەک لە ڕاگەیەندراویی خەبەریی نیوەڕۆی ئەمڕۆمان دا هاتبوو، کاتژمێر 10:45 ی ئەمڕۆ شەممە 8ی سیپتامبر(17ی خەرمانانی 1397) قەڵای دیموکرات، بنکەی دەفتەری سیاسیی حیزبی دیموکراتی کوردستان، لە حاڵێک دا پلینۆمی کۆمیتەی ناوەندیی حیزبی لێ بەڕێوە دەچوو، کەوتە بەر پەلاماری هەوایی و مووشەکیی سوپای پاسدارانی کۆماری ئیسلامیی ئێران. پێویستە بگوترێ بنکەی دەفتەری سیاسیی حیزب کە لە نزیک شاری #کۆیە# و لە قووڵایی خاکی هەرێمی کوردستان دا هەڵکەوتووە، هەر ئەو شوێنەیە کە لە شەوی یەلدای1395 (21ی دیسامبری 2016)، بوو بە ئامانجی هیرشی تیرۆریستیی کۆماری ئیسلامی کە بە داخەوە شەهید بوونی 7 کەسی لێ کەوتەوە.
هاوکات لە گەڵ ئەم پەلامارە مووشەکی و هەواییەی ئەمڕۆ بۆ سەر بنکەی دەفتەری سیاسیی حیزبی دیموکراتی کوردستان، فڕۆکەی بی سەرنشینی سوپای پاسداران لە ئاسمانی ئەو ناوچەیە دا دەخولایەوە. بە هۆی ئەو پەلامارە مووشەکییە، بە داخێکی گرانەوە 14 تێکۆشەری حیزبی دیموکراتی کوردستان شەهید و پتر لە 30 کەسیشیان بریندار بوون. (ناو و زانیاریی پیوەندیدار بە شەهیدەکان هەر لە درێژەی ئەم بەیاننامەیە دا هەیە.) بەو هۆیەوە کە بنکەی دەفتەری سیاسیی حیزب ناوەندی چالاکیی کۆمەڵێک ڕێکخراو و دامەزراوەی مەدەنییە، ژمارەیەک لە ژنان و منداڵان، کەسانی پیر و بەساڵداچوو و کەم ئەندام بە هۆی ئەم پەلامارەوە بریندار بوون و بنکە و دامەزراوەکانی تایبەت بەوانیش زیانی ماڵی و وێرانییەکی زۆریان بەر کەوت.
پەلاماری دڕندانەی کۆماری ئیسلامیی ئێران بۆ سەر بنکەی دەفتەری سیاسیی حیزبی دیموکراتی کوردستان لە کاتێک دا ڕێکخرابوو کە شەوی ڕابردووش 3 بەندیی سیاسیی کورد بە ناوەکانی زانیار و لوقمان مرادی و ڕامین حوسێن پەناهی، سەرەڕای داواکاریی کۆڕوکۆمەلە مرۆڤدۆستەکان بۆ هەڵوەشانەوەی حوکمی ئێعدامیان، بە هۆی جەللادەکانی ئەو ڕێژیمە خوێنڕێژە ئێعدام کران. شایانی وەبیر هێنانەوەیە کە دەستدرێژیی کۆماری ئیسلامی بۆ سەر خاکی هەرێم لە ڕۆژانی ڕابردووەوە بە شێوەی تۆپبارانی ناوچە سنوورییەکانی نێوان #سۆران# و #پیرانشار#، دەستی پێ کردبوو.
دەفتەری سیاسیی حیزبی دیموکراتی کوردستان، وێڕای مەحکوومکردنی دەستدرێژی و پەلاماری مووشەکیی کۆماری ئیسلامی بۆ سەر بنکەکانی حیزب لە خاکی هەرێمی کوردستاندا و هەر وەها نوێترین تاوانی ئەو ڕێژیمە بەرامبەر 3 بەندیی سیاسیی کورد، سەرەخۆشی و هاوخەمیی قووڵی خۆی بە بنەماڵە وهاوسەنگەرانی شەهیدەکان وسەرجەم خەڵکی کوردستان ڕادەگەیەنێ و چاکبوونەوەی هەر چی زووتری بریندارەکان بە ئاوات دەخوازێ.
ئەگەر چی شەهید بوونی پۆلێکی گەورە لە ئەندامانی ڕێبەری و ژنان و پیاوانی #پێشمەرگە# و تیکۆشەری دێرین وبەوەج، بۆ حیزبی دیموکراتی کوردستان و بزووتنەوەی ئازادیخوازی لە ڕۆژهەڵاتی کوردستان، زیانێکی گەورە و زەبرێکی بە ژانە، بەڵام حیزبی دیموکراتی کوردستان دڵنیایی بە هەموو دلسۆزانی خۆی و سەرجەم خەڵکی کوردستان دەدا کە ئەم جۆرە تاوانانە، ئەم حیزبە لە سەر خەبات بۆ ئامانجە لەمێژینەکانی و بەربەرەکانی لە گەڵ ڕێژیمی دیکتاتۆر و خوێنڕێژی کۆماری ئیسلامیی ئێران شێلگیرتر دەکا. حیزبی دیموکراتی کوردستان، ڕاهاتوە کە زەبر و پەلاماری کۆماری ئیسلامی بۆ سەر ڕێبەران و تێکۆشەرانی- هەر چەندیش گەورە و بە ژان بن- بە چۆکی دانەهێنن و لە خەبات ساردی نەکەنەوە. ڕۆڵە بە هەست و دلسۆزەکانی گەلی کوردیش وەک هەمیشە نیشانیان داوە کە ناهێڵن چەکی خەباتکارەکانی کورد بکەوێتە سەر ئەرز و ڕێگەی تیکۆشەرانی شەهید بی ڕێبوار ناهێڵنەوە.
ئێمە وێڕای دەربڕینی پێزانینی خۆمان بەرامبەر بە بە دەنگەوەهاتنی خەڵکی دلسۆز و دامو دەزگا تەندروستی و خزمەتگوزارییەکانی شاری کۆیە بۆ بە فریاکەوتنی بریندارەکان و خەڵکی ئاوارەبووی کەمپەکانی دیموکرات بە دوای ئەو پەلامارە مووشەکیەدا، ڕادەگەیەنین کە دەیان برینداری ئەو ڕووداوە وسەدان بنەمالەی دانیشتووی کەمپەکانی سەر بەحیزبی دیموکرات کە بە هۆی ئەو پەلامارە مووشەکی و هەواییەوە، مال و حاڵی خۆیان بە جێ هێشتوە، پێویستییان بە هاوکاری و پێڕاگەیشتنی مرۆڤدۆستانەی بە پەلە هەیە.
چاوەڕوانین نوێترین تاوانی کۆماری ئیسلامی لە دژی حیزبی دیموکرات و ڕۆلە بەندکراوەکانی کورد، ببێتە هەوێنی مانگرتنی گشتی و نارەزایەتیدەربڕینی یەکگرتووانەی خەڵک لە نێوخۆی ڕۆژهەڵاتی کوردستان. لە هیزولایەنە سیاسی و خەباتکارەکانی کورد و ئێرانی لە هەرێمی کوردستان و دەرەوەی وڵاتیش داوا دەکەین بە ڕێپێوان و کۆبوونەوە و ئاکسیۆنی جۆراوجۆری دیکە، دژی نوێترین تاوانەکانی کۆماری ئیسلامیی ئێران دەنگ هەڵبڕن
داوا لە ناوەند و کۆڕ و کۆمەڵە نێودەوڵەتییەکان و بیروڕای گشتی جیهانیش دەکەین بەرامبەر بە دەستدرێژی و تاوانەکانی کۆماری ئیسلامی لە دژی ئازادیخوازانی کورد لە نێوخۆی ئێران و لە دەرەوەی سنوورەکان بە تایبەتی بەرامبەر کۆمەڵکوژیی ئەمڕۆ لە قەلای دیموکرات بە دەستی ئەو ڕێژیمە، بیدەنگ و بێهەلویست نەبن.
ئەوە کە کۆماری ئیسلامی لە دوو تاوانی نوێ دا، هاوکات گیانی چەندین تێکۆشەر و خەباتکاری کورد لە حیزب و ڕێکخراوی سیاسیی جۆراوجۆری ڕۆژهەلاتی کوردستانی کردوەتە ئامانجی کردەوەی جینایەتکارانەی خۆی، جێی خۆیەتی هاندەری هەموو لایەکمان بێ بۆ یەکگرتوویی، هاوپشتی وهاوخەباتی لە گەڵ یەکتر و، بەهێزکردنی خەبات تا کۆتایی هێنان بە تەمەنی پڕ لە سەرکوت و تاوانی ئەو ڕێژیمە.
سڵاو لە گیانی نوێترین شەهیدانی حیزبی دیموکرات و گەلی کورد لە ڕۆژهەلاتی کوردستان،
ڕسوایی و مردن بۆ ڕێژیمی دیکتاتۆر و خوینڕێژی کۆماری ئیسلامیی ئێران.
حیزبی دیموکراتی کوردستان
دەفتەری سیاسی
ئیوارەی سەمە 17ی خەرمانانی 1397
8ی سیپتامبری 2018
لە پەلاماری مووشەکیی ئەمڕۆی کۆماری ئیسلامی بۆ سەر قەلای دیموکرات بە داخەوە 14 کادر و تیکۆشەری بە وەجی دیموکرات شەهید بوون و نزیک بە 40 کەسیش بریندار بوون. شەهیدەکان بریتیین لە:
کەریم مەهدەوی(کەریم #سەقز#ی)، ئەندامی کۆمیتەی ناوەندیی حیزب،
ابراهیم ابراهیمی(برایم زیوەیی)، ئەندامی کۆمیتەی ناوەندیی حیزب،
نەسرین حەداد، ئەندامی کۆمیتەی ناوەندیی حیزب،
رەحمان پیرۆتی، ئەندامی کۆمیتەی ناوەندیی حیزب،
سوهەیلا قادری، ئەندامی جێگری کۆمیتەی ناوەندیی حیزب،
– هاشم عەزیزی، ئەندامی جێگری کۆمیتەی ناوەندیی حیزب،
عوسمان عوسمانی، تێکۆشەری لە مێژینەی حیزب،
کەریم ڕەسووڵزادە(مام شێرکۆ)، تێکۆشەری لە میژینەی حیزب،
هاوڕێ کارساز(هاوڕێ شێخانی)، کادری بەوەجی حیزب،
پێشەوا سەید عومەر، پێشمەرگە،
جەماڵ ئەکبەری، پێشمەرگە،
مەنسوور ئەکبەری پوور، پێشمەرگە،
13 -14 – دوو پێشمەرگەی حیزبی دیموکراتی کوردستانی ئێران لە فێرگەی ئەم حیزبە کە هاوکات لە گەڵ قەلای دیموکرات کەوتە بەر هێرشی مووشەکی (ناوەکانیان بە ڕەسمی هێشتا ڕانەگەیەندراوە).
#08-09-2018#

خەڵکی تێکۆشەری کوردستان!
تێکۆشەران، ئەندامان و لایەنگرانی حیزبی دیموکرات!
هۆگرانی ڕێگا و بیر و ئامانجەکانی د. قاسملوو لە کوردستان، ئێران و جیهان!
22ی پووشپەڕی هەموو ساڵێک وەبیرهێنەرەوەی زامێکی قووڵە کە بە دەستی ڕێبەران و دەسەڵاتبەدەستانی ڕێژیمی کۆماری ئیسلامی لە جەستەی گەلی کورد درا. 24 ساڵ لە مەوبەر لە22ی پووشپەڕی سالی 1368ی هەتاوی(13ی ژوئیەی 1989ی زایینی)دا، سکرتێری گشتیی حیزبی دیموکرات هاوڕێ لەگەڵ عەبدوڵلا قادریئازهر ئەندامی کۆمیتەی ناوەندی و بەرپرسی پێوەندییەکانی دەرەوەی وڵاتی حیزب و د. فازڵ ڕەسووڵ له وییەن پێتەختی وڵاتی ئوتریش شەهید کران.
دوکتور قاسملوو بەمەبەستی دۆزینەوەی ڕێگاچارەیەکی ئاشتیانە بۆ چارەسەری مەسەلەی کورد لە ڕۆژهەڵاتی کوردستان بەردەوام لە هەوڵ و تێکۆشاندا بوو. ڕێبەرانی کۆماری ئیسلامی لە ئاشتیخوازی و نیەتپاکیی د. قاسملوو کەلکیان وەرگرت و وتووێژو دانوستانیان کردە وەسیلەیەک بۆ گەیشتن بە ئامانجە دزێوەکەیان کە تیرۆری ئەو ڕێبەرە مەزنە بوو. ئەوان لە نەخش و دەوری کاریگەری د. قاسملوو لە بزووتنەوەی کورد و تێکۆشانی دیپلۆماسیی ئەو بۆ ناساندنی جووڵانەوەی کورد نیگەران و هەراسان بوون. هەر بۆیە دوکتور قاسملوویان کرد بە ئامانجی لە نێوبردن و بۆ جێبەجێکردنی پیلانەکەیان چەند تیرۆریستێکیان بە ناوی دیپلۆمات بۆ شەهیدکردنی سیاسەتمەداری بە توانای نێو گۆڕەپانی بزووتنەوەی نەتەوایەتیی کورد، و سیمای هەرە دیاری خەباتی دژی دیکتاتۆری لە ئێران، ڕاسپارد. ئەوان به و خەیاڵه بوون کە بە شەهید کردنی د. قاسملوو، خەباتی نەتەوایەتی و حەقخوازانەی گەلەکەمان لە ڕۆژهەڵاتی کوردستان کۆتایی دێ. بەڵام لە گەڵ ئەوەی پیلانە تیرۆریستیەکەیان سەرکەوتوو بوو، خەیاڵ و خەونەکەیان نەهاتە دی. بە شەهید کردنی د. قاسملوو، خەباتی گەلی کوردو حیزبی دیموکرات کۆتایی نەهات، بەڵکوو ڕێبواران و خەباتکارانی ڕێگای ئەو ڕێبەرە لێهاتووە، شیلگیرانەتر لە جاران درێژەیان بە ڕیگاکەی دا.
ئێمە لە کاتێکدا یادی ئەو تاوانە گەورەیەی کۆماری ئیسلامی لە دژی خەڵکی کوردستان دەکەینەوە کە زیاتر لە 34 ساڵ بە سەر تەمەنی ئەو ڕێژیمە دا ڕابردوە و 24 ساڵیش لە شەهیدکرانی د. قاسملووی ڕێبەرمان ڕادەبرێ. بە داخەوە ئەو ڕێژیمە، هەر وا درێژەدەر و هەڵگری بیرکردنەوە و ڕوانین و سیاسەتێکە کە لە سەردەمی تیرۆرکردنی د. قاسملوو دا هەیبوو، کە ئەویش بریتیە لە ئینکاری مەسەلەیەک بە ناوی مەسەلەی کورد و سەرکوتکردنی خەباتی تێکۆشەرانی ئەو نەتەوەیە لە پێناوی بە دەستهێنانی مافە ڕەواکانیاندا.
لە بوارەکانی دیکەش دا ئاڵوگۆڕێکی باش لەم ڕێژیمە دا پێک نەهاتوە. وەزعی سیاسی، ئابووری، کۆمەڵایەتی و زۆر بواری دیکەی ئێران لە ژێر دەسەڵاتی کۆماری ئیسلامی دا ساڵ بە ساڵ قەیرانیتر بووە و زیاتر بەره و شپرزەیی ڕۆیشتوە. پێوەندییە سیاسی و دیپلۆماسییەکانی ئەو ڕێژیمە لەگەڵ دنیای دەرەوه، بە پێی ویستی تاقمێکی کۆنەپارێز بەڕێوە چووە که تەنیا بەرژەوەندەکانی نیزامەکەیان، نەک بەرژەوەندی گشتیی خەڵکی ئێرانیان، بەلاوە گرنگە. هەر بۆیەش وڵاتی ئێران لە سۆنگەی سیاسەتەکانی ئەو تاقمە، بەرەوڕووی گەمارۆ و گوشاری جۆراوجۆری نێودەوڵەتی بۆتەوە و پێوەندییەکانی کۆماری ئیسلامی لە گەڵ دنیای دەرەوە، گەیشتوونە نزمترین ئاست. ئابووریی وڵات بە تەواوی پووکاوەتەوه، گەمارۆ ئابوورییەکانی ڕۆژئاوا کە بەرهەمی سوور بوونی ئەو ڕێژیمە لە سەر درێژەدانی بەرنامه ناوکییەکانیەتی، ڕۆژ بە ڕۆژ ئاسەواری خراپتر لە دوای خۆیان بە جێ دێڵن. دابەزینی بێوێنەی بایی تمەن لە بەرامبەر دراوه بیانیەکان دا بۆتە هۆی گرانیی سەر سوڕهێنەر. بێکاری، گرانی، نەبوون و نایاببوونی سەرەتاییترین کەلوپەل و پێویستییەکانی ژیان و بەڕێچوون، دەستیان وەدەستی کێشە و دیاردە کۆمەڵایەتییەکانی وەک ئیعتیاد، ناهومێدی لە ژیان، لێکترازانی شیرازەی بنەماڵە و دەیان کێشە و گرفتی دیکە داوه.
دەسەڵاتدارانی ئێران، وێڕای ئەم هەلومەرجە ئابووری و کۆمەڵایەتییه، لە چەند ساڵی ڕابردوو دا له باری سیاسییشەوە کەشێکی پڕ لە ترس و تۆقانیان بە سەر وڵات دا زاڵ کردوە و بە توندی بەرهەڵستی هەر چەشنە دەنگێکی نارازی بوونەتەوە. گرتن و زیندان و ئەشکەنجەی ئازادیخوازان و داواکارانی گۆڕان بە توندی درێژەی هەیە. لە کوردستان کەشوهەوایەکی بە تەواوی ئەمنییەتییان زاڵ کردوە و لەچاو ناوچەکانی دیکەی ئێران گوشارو توندوتیژی بەرامبەر بە خەڵک له و پەڕی خۆی دایه. ڕۆژ نەبووە خەڵک نەگیرێ و ئەشکەنجه نەدرێ، کاسبکاران و کۆڵبەران کە بەدوای بژێوی ژیانی ماڵ و منداڵیانەوەن، نەدرێنە بەردەسڕێژ و گیانیان لێ نەستێندرێ و ماڵیان بە تاڵان نەبرێ.
کێشە و ململانێی نێوان باڵەکانی ڕێژێم لە سەر پێگە و مەوقعییەتی ویلایەتی فەقیە و دامەزراوە جۆراوجۆرەکانی دەسەڵات و چۆنیەتیی پێوەندییەکانیان لەگەڵ قەیرانە نێوخۆییەکان و دنیای دەرەوە، بەردەوام بووە. به و جیاوازییە کە تا هاتوە دەستی سوپای پاسداران لە بەڕێوەبردن و دەستبەسەرداگرتنی بوارە جۆراوجۆرەکانی کاروباری وڵاتدا، ئاوەڵاتر کراوە. ئەمەش وای کردوە کە نارەزایەتی و بێزاریی خەڵکی وەزاڵەهاتووی ئێران بە هەموو چین و تۆێژەکانیەوە قووڵتر بێتەوە. لە گەڵ ئەوەی دەزگا سەرکوتکەرەکانی ڕێژێم بۆ بێدەنگ کردنی خەڵک و پێشگیری لە تەقینەوەی هەرجۆرە نارەزایەتییەک پێش بەهەر جموجۆڵ و خۆپێشاندانێک دەگرن و بەربەستی زۆریان لەسەر چالاکی و تێکۆشانی خەڵک و ڕێکخراوەکانی کۆمەڵگەی مەدەنی داناوە، بەڵام سەرەڕای ئەمانەش خەڵک لەسەر ویست و داخوازە ڕەواکانی خۆیان سوورن و لە هەر دەرفەتێک کە بۆیان هاتووەتە پێش، لە دژایەتیی سەرەڕۆیی و زۆرداری درێغیان نەکردوه و ئەوەندەی مومکین بووه، لە بەرامبەر دەسەڵاتداران و بڕیاربەدەستانی سەرەکیی ئەو نیزامە کە وەلیی فەقیه و سوپای پاسداران و دامەزراوە ناخەڵکیەکانن، ڕاوەستاون.
هەڵبژاردنی یازدەیەمین دەورەی سەرکۆماری و هەڵبژاردنی شووڕاکانی شارو دێ کە لە 24ی جۆزەردانی ئەمساڵدا بەڕێوەچوون، مەیدان و دەرفەتێکی دیکە بوون بۆ ململانێ و ڕووبەڕووبوونەوەی خەڵک و دەسەڵاتبەدەستانی ئەو ڕێژیمە. ئەگەر چی هەر لەئەساس دا هەڵبژاردن لە کۆماری ئیسلامیدا، ئازاد و دیموکراتیک نیە و سەرەڕای ئەوەی ڕێبەری و دام و دەزگاکانی سەر بە بەیتی ڕێبەری و شوورای نیگابان بەربەستی زۆریان لەبەردەم بەربژێرەکانی سەرکۆماری دانا و سەلاحییەتی زۆربەی هەره زۆری ئەوانیان ڕەت کردەوە، به و حاڵەش خەڵکی ئێران بە دەنگدانی واتاداری خۆیان، جارێکی دیکە پەیامی خۆیان بە گوێی دنیا گەیاند. ئەوان دەنگیان بە کاندیدایەک دا کە ئەگەرچی هەر لە هەناوی ئەو نیزامە هاتووەتەدەر، بەڵام بە پێچەوانەی خامەنەیی و توندڕەوان و کۆنەپارێزانی ئەو نیزامە، لە بەرنامەی هەڵبژاردنی خۆی دا، باسی لە ئیعتیدال و میانەڕەوی دەکرد و لە پێویستیی چاوخشاندنەوە بە سیاسەتە نێوخۆیی و دەرەکییەکانی کۆماری ئیسلامی دەدوا. دەنگدانی خەڵک بە حەسەن ڕۆحانی بۆ پۆستی سەرکۆماری هەوڵێکی مومکین لە چوارچێوەی دەرفەتێکی بەرتەسک دابوو بۆ دەرباز بوون لەهەلومەرجێکی سیاسی و ئابووریی دژوار و قەیراناوی. بەرهەمی ئیرادەی گۆڕانخوازانەی خەڵکی ئێران و نیشانەی ڕەتکردنەوەی دووبارەی ئەو سیاسەتە نیوخۆیی و دەرەکیانەی کۆماری ئیسلامی بوو کە خامنەیی بە ڕاشکاوی پشتیوان و لایەنگریی لێ کردوون.
بەڵام ئێستا و لە بەرەبەری دەستپیکردنی دەورەی سەرکۆماریی حەسەن ڕۆحانی دا پرسیار ئەوەیە کە ئایاسەرکۆماری هەڵبژێردراو، پەیامی ڕاشکاوانەی خەڵکی ئێرانی به و جۆرە کە هەیە، وەرگرتوە و خۆی لە بەرامبەریان دا بە بەرپرس و بەرعۆدە دەزانێ؟ ئایا بە وادە و بەڵێنەکانی خۆی کە بەشێکی زۆر کەم لە داخوازەکانی گەلانی ئێرانیان گرتبووە خۆ، وەفادار دەبێ؟
ئاغای ڕۆحانی و خەڵکی ئێران پێویستە ئەزموونی سەردەمی سەرکۆماریی ئاغای خاتەمی و وانەکانی ئەو سەردەم وەبیر خۆیان بێننەوە. بۆ وێنە سەرکۆماری تازە، دەبێ له بیری بێت کە هەر کات کەسانێک، لایەنی خەڵکیان گرتوه و بایەخیان بە ویست و داخوازەکانی کۆمەڵگە داوە، خەلک بە دەنگی خۆیان سەریان خستوون و گەیاندوویاننە پارلمان و سەرکۆماری. هەر کاتێکیش ئەو کەسانە، ویستی خەڵک و کۆمەڵگەیان لە پێناوی بەرژەوەندەکانی نیزام یا هەر هۆکارێکی دیکە دا، پشتگوێ خستوە و پاشەکشەیان لە وادە و بەڵێن و بەرپرسیارەتییەکانیان کردوە، بە تەنیا ماونەوە و مایەپووچ دەرچوون. خەڵکیش دەبێ لە بیریان بێت، ئەوە لەمەیداندابوون و پێداگریی ئەوان لە سەر ویست و داخوازەکانیانه کەدەکرێ هیوای پێ ببەستن نەک چاوەڕوانیی لوتف و کەرەم لە دەسەڵات و نیزامێک که هیچ کات نەیویستوە پەیامی خەڵک ببیسێ و ڕێزی لێ بگرێ، یا هەر کات ئیرادەی خەڵک سەرکەوتوە، بە کەلکوەرگرتن لەدەسەڵاتی ڕێبەری و نیهادە داسەپاوەکان،سەرکەوتنەکانی خەڵکیان بێ ئاکام کردوەتەوە.
بەم جۆرە ئەرکی خەڵک و بە تایبەتی کەسایەتی و هێز و لایەنەکانی ڕێنوێن و پێشڕەوی خەباتی خەڵک لە نیوخۆی وڵات لە دوای ئەم هەڵبژاردنە، دەچێتە نیو قۆناغێکی نوێوە کە ئەویش پاشەکشەکردنی زیاتر بە کۆماری ئیسلامی و خستنەڕووی ویست و داخوازەکانیان و ئەرکدارکردنی سەرکۆمار و دەوڵەت و مەجلیس و دامەزراوە جۆراوجۆرەکان بە گوێ لێگرتن و جێبەجیکردنیانە.
خەڵکی خەباتکاری کوردستان!
هۆگران و ئەویندارانی ڕێگا و بیر و ئامانجەکانی د. قاسملوو!
ئێمه لە هەلومەرجێکدایادی ئەو ڕێبەرە گەورەیە دەکەینەوە که ئامانجەکانی ئازادی و دیموکراسی و ڕزگاریی گەلان و دادپەروەریی کۆمەڵایەتی کە د. قاسملوو، تەمەنێک خەباتی لە پێناویان دا کرد، ناوچەی ڕۆژهەڵاتی نێوەڕاستیان ڕاپەراندوە. ڕووداوەکانی ئەم چەند ساڵەی دوایی لە شیمالی ئەفریقا و ڕۆژهەڵاتی نیوەراست ئەوەیان سەلماندەوە کە گەلان بە بندەستی و دەسەڵاتی زۆرەملێ و دیکتاتۆری قایل نابن و لەهەر جێگایەک چەوساندنەوە و ستەم هەبێ، خەبات و بەربەرەکانی و شۆرش لە دژیان سەرهەڵدەدا. ڕاپەڕینی خەڵک و ڕووخانی یەک لە دوا یەکی دیکتاتۆرەکان لە وڵاتانی میسر، تونس و لیبی، ڕاستیی ئەم قسەیە دەسەلمێنن. با ئەو ڕاستییەش ببینین و پێی خۆشحاڵ بین کە گەلانی ڕاپەڕیوی ناوچە، تەنیا بە جێگۆڕکێی ڕێژیمەکان ناوەستن بەڵکوو لە گەڵ گۆڕینی ڕێژیم و دەسەڵاتە جۆراوجۆرەکاندا، مافە بنەڕەتییەکانی مرۆڤی ئەم سەدە و هەزارەیان دەوێ. ئەمەش جێگای شانازی و خۆشحاڵییە کە نەتەوەی کورد لە هەموو بەشەکانی نیشتمانە دابەشکراوەکەی، خاوەنی بزووتنەوەیەکی لەمێژینەی دژبە دیکتاتۆری و بندەستییه. هەر وەها لە هەرکام لە وڵاتانەش کە کوردستانیان بە سەر خۆیان دا دابەش کردوه، گەلی کورد لە خەباتی گشتی و سەرانسەری لە پێناوی گۆڕان و بە دەستهێنانی ئازادی، دیموکراسی و هێنانە سەرکاری سیستەمێکی سیاسیی وڵامدەری سەردەمی ئێستا، لە ڕیزی پێشەوە دایه.
لە ڕۆژهەڵاتی کوردستان، گەلی کورد و هێزە سیاسی و خەباتکارەکانی، ئەزموونی زیاتر لە 34 سال خەبات و تیکۆشان دژی دیکتاتۆریی کۆماری ئیسلامی و قوربانیدان لە پێناوی ئازادییان هەیە و بە چۆک دا نەهاتوون. ئەگەر حیزب و ڕێکخراوە سیاسییەکان، لە هەلومەرجێکی نەخوازراوو لە دوورەوڵاتی دا درێژە بە خەبات و تێکۆشان دەدەن، لە نێوخۆی وڵاتیش، خەڵکی وشیار و زیندووی کوردستان، لە هەر ڕێگاو دەرفەتێکی تەنانەت بەرتەسکی وەک هەڵبژاردنەکانی کۆماری ئیسلامییش، بۆ سەلماندنی بوونی خۆیان و بۆ خستنەڕووی داخوازەکانیان و بۆ دەنگ هەڵبڕین دژی ستەم و هەڵاواردن و چەوسانەوە، کەلک وەردەگرن. ئەم ڕاستییە دەبێ هاندەری حیزب و ڕێکخراوە سیاسییەکان بێ بۆ تێگەیشتن لەواقیعی نێوخۆ، بۆ یەکیەتی و یەکگرتوویی و هاوکاری و هاوخەباتی لە گەڵ یەکترو بۆ ڕووبەڕووبوونەوەی کارتێکەرانه لە گەڵدەرفەتەکان و شانسەکان. ئێمە بە نۆرەی خۆمان، هاتنە مەیدانی خەڵک و تێکۆشانی دڵسۆزانی گەلەکەمان لە نێوخۆی وڵات لە چوارچێوەی شانس و دەرفەتە بەرتەسکەکان دا، بە نیشانەیی وریایی سیاسی و نەتەوەیی ئەوان دادەنێین، نەک بە دژایەتیکردنی ئەوان لە گەڵ حیزب و ڕێکخراوە سیاسیەکانی کوردستان. بە باوەڕی ئێمه هەوڵەکانی دڵسۆزانی نێوخۆ و خەبات و تێکۆشانی هێزە سیاسییەکان، دەبێ وەک دوو ڕووی جیاوازی خەباتی تێکۆشەرانی نەتەوەیەک و وەک تەواوکەری یەکتر سەیر بکرێن. پێشمان وایە لە هەر جێگایەک، یەکیان پێویستی بە پشتیوانیی ئەوی دیکە هەبوو، دەبێ درێغی لێ نەکرێ.
24 ساڵەی تیرۆری د. قاسملووی ڕێبەر بە بۆنەیەکی گونجاو دەزانین بۆ ئەوەی لە ئاست خۆشەویستی و وەفاداریی خەڵکی کوردستان بۆ ئەو ڕێبەرە مەزنە، سەری ڕێز دانەوێنین. بە ئەرکی خۆشمانی دەزانین له و یادە دا پێداگری و بەردەوامیی حیزبی دیموکراتی کوردستان لەسەر خەبات تا ڕزگاریی نەتەوەی کورد لە ژێردەستی، دووپات بکەینەوە. هەر لەم بۆنەیەشدا بە ئیلهاموەرگرتن لە ئامۆژگارییەکانی ئەو ڕێبەرە شەهیدە، و بە هەستکردن بە هەستیاربوونی قۆناغی ئێستای خەباتی سیاسی لە گەڵ کۆماری ئیسلامی، هەموو حیزب و ڕێکخراوە سیاسییەکان و هەر وەها سەرجەم خەباتکاران لە نێوخۆ و دەرەوەی کوردستان بۆ لێکنزیکبوونەوە و یەکگرتوویی بانگەواز دەکەین.

دۆستان و دڵسۆزانی حیزبی دیموکراتی کوردستان!
لەمێژە یادی شەهید بوونی ڕێبەری لێوەشاوە د. قاسملووی نەمر، لە گەڵ بیرەوەریی کۆچی دوایی هاوڕێی بەوەج، سەید سەلامی عەزیزی، ئەندامی دەفتەری سیاسیی حیزبی دیموکڕات ئاوێتە بووە. بەم بۆنەیەوە لە گەڵ شەهیدانی 22ی پووشپەڕ دا، بەڕێزەوە یادی کاک سەلامی نەمر دەکەینەوە کە 14 ساڵ لەمەوبەر ماڵاوایی یەکجاریی لێکردین.

بەرز و بەڕێز بێ یادی ڕێبەری شەهید د.عەبدولڕەحمان قاسملوو،
ڕسوایی هەمیشەیی بۆ خوڵقێنەرانی تاوانی 22ی پووشپەڕ،
سەرکەوتن بۆ خەباتی ئازادیخوازانەی گەلی کورد وبەرقەرای بۆ ئامانجه بەرزەکانی د.قاسملووی هەمیشە لە یاد.

حیزبی دیموکراتی کوردستان
دەفتەری سیاسی
22ی پووشپەڕی1392
13ی ژوئیەی 2013

خەڵکی تێکۆشەری کوردستان!
هۆگرانی ڕێگا و بیر و ئامانجەکانی د.قاسملوو لە ڕۆژهەڵاتی کوردستان!
تێکۆشەران، ئەندامان و لایەنگرانی #حیزبی دیموکراتی کوردستان#!
22ی پووشپەڕی هەموو ساڵێک وەبیرهێنەرەوەی زامێکی قووڵە کە بە دەستی ڕێبەران و دەسەڵاتبەدەستانی ڕێژیمی کۆماری ئیسلامیی ئێران لە جەستەی گەلی کورددا پێک هات. 31 ساڵ لە مەوبەر له 22ی پووشپەڕی سالی 1368ی هەتاوی (13ی ژوئیەی 1989ی زایینی)دا، د.عەبدولڕەحمان قاسملوو، سکرتێری گشتیی حیزبی دێموکرات، هاوڕێ لەگەڵ عەبدوڵلا قادریئازەر ئەندامی کۆمیتەی ناوەندی و بەرپرسی پێو ە ندییەکانی حیزب لە دەرەوەی وڵات، له ڤییەن پێتەختی وڵاتی ئوتریش شەهید کران.
دوکتور قاسملوو بە مەبەستی دۆزینەوەی ڕێگاچارەیەکی ئاشتییانە بۆ چارەسەری مەسەلەی کورد لە ڕۆژهەڵاتی کوردستان بەردەوام لە هەوڵ و تێکۆشاندا بوو. ڕێبەرانی کۆماری ئیسلامی لە ئاشتیخوازی و نیەت پاکیی د. قاسملوو کەلکیان وەرگرت و وتووێژیان کردە وەسیلەیەک بۆ گەیشتن بە ئامانجە دزێوەکەیان کە تێرۆری ئه و ڕێبەرە مەزنە بوو. ئەوان لە نەخش و دەوری کاریگەری د. قاسملوو لە بزووتنەوەی کورد و تێکۆشانی دیپڵۆماسیی ئه و بۆ ناساندنی جووڵانەوەی کورد، نیگەران و هەراسان بوون. هەر بۆیە دوکتور قاسملوویان کرد بە ئامانجی نەخشەیەکی تیرۆریستی و، بۆ جێبەجێکردنی پیلانەکەیان چەند تێرۆریستێکیان بە ناوی دیپڵۆمات بۆ شەهیدکردنی سیاسەتمەداری بەتوانای نێو گۆڕەپانی بزووتنەوەی نەتەوایەتیی کورد، و سیمای هەرە دیاری خەباتی دژی دیکتاتۆری لە ئێران، ڕاسپارد. ئامانجی ئەوان ئەوە بوو کە بە شەهید کردنی د. قاسملوو، زەبرێکی گەورە لە خەباتی نەتەوایەتی و حەقخوازانەی گەلەکەمان لە ڕۆژهەڵاتی کوردستان بدەن و، خۆیان بە یەکجاری لە دەست ئەم بزووتنەوەیە ئاسوودە بکەن. بەڵام لە گەڵ ئەوەی پیلانە تیرۆریستییەکەیان سەرکەوتوو بوو، خەیاڵ و خەونەکەیان لەبارەی بە چۆکداهاتنی ئەو بزووتنەوەیە نەهاتە دی. بە شەهید کردنی د. قاسملوو، خەباتی گەلی کورد و حیزبی دیموکرات نەک هەر کۆتایی پێ نەهات، بەڵکوو ڕێبواران و خەباتکارانی ڕێگای ئه و ڕێبەرە لێهاتووە، شیلگیرانەتر لە جاران درێژەیان بە ڕیگاکەی دا.
لێرەدا جێی خۆیەتی ئاماژە بە ڕاستییەک بکەین. شەهیدکردنی د. قاسملوو و هاوڕێیانی لە سەر مێزی وتووێژ ئەم تێرۆرەی تا ڕادەیەکی زۆر لە تێرۆرە سیاسییەکانی دیکەی کۆماری ئیسلامی، جیا کردۆتەوە. ڕاستە ئەوانی دیکەش، هەر کردەوەیەکی تێرۆریستیی و مەحکووم بوون و، بە هۆی ئەوانەوە زەبر لە هێزی خەباتکار و کەسایەتیی تێکۆشەر و بەتوانا دراوە، بەڵام کەلکوەرگرتنی کۆماری ئیسلامی لە تاکتیکی وتووێژ و قۆستنەوەی نیازپاکیی د. قاسملوو بۆ نیازێکی چەپەڵ، دزێویی ئه و تاوانەی لە هەموو سنوورێک تێپەڕاند. لێرەدا مەسەلەکە هەر ئەوە نییە کە تێرۆرەکە، تێرۆرێکی دەوڵەتییە؛ هەر ئەوەش نییە کە لە بەرزترین ئاستی دەوڵەت و نیزامی کۆماری ئیسلامیدا نەخشەی تێرۆری د. قاسملوو داڕێژڕا و بەڕێوە چوو؛ بەڵکوو پێشێلکردنی عورف و ئەخلاقی سیاسی بە زەقترین شێوەش، لە پشت تاوانەکە دەبینرێ و، سەرجەمی ئەوانە بە یەکەوە بوون بە هۆی بریندار کردنی ویژدانی گشتی و غورووری نەتەوەیی خەڵکی کوردستان.
کەسایەتیی بەرزی د. قاسملوو و دێموکراتیک و ئینسانی بوونی بیر و بۆچوونەکانی و، باوەڕی بە دیالۆگ و چارەسەری ئاشتیخوازانەی پرسی کورد و، شەهیدبوونی لەم پێناوەدا، بیرەوەریی تێرۆری ئه و ڕێبەرە و، تووڕەیی لە پیلان و تاوان بۆ لە نێوبردنی، ئەوی لە حافیزەی نەتەوەکەیدا بە نەمری هێشتۆتەوە. ڕاستە د. قاسملوو لە کاتی شەهیدکرانیدا سکرتێری گشتیی حیزبێکی سیاسیی خەباتگێڕ بوو، بەڵام له و کاتەدا کە بەرامبەر بە نێردراوانی ڕێژیمی تاران لەسەر مێزی بەناو وتووێژ دانیشتبوو، نوێنەرایەتیی پرسی ڕەوای نەتەوەیەکی دەکرد. ئه و تێرۆریستانەش کە کۆماری ئیسلامی لە بەرگی دیپڵۆمات و بە ڕواڵەت بۆ وتووێژ لەگەڵ د. قاسملوو ناردبوونی، بە سێرەگرتن لە دڵ و مێشکی ئه و کەسایەتییە، بە خەیاڵی خۆیان دەیانەویست مێشک و چاوی خەباتی ڕزگاریخوازانەی نەتەوەیەک بپژێنن. هەر بۆیە خەڵکی کوردستان، تێرۆری ڤییەن بە شتێکی گەورەتر لە کوشتنی چەند کەسی خەباتکار، بە سووکایەتی بە نەتەوەکەی خۆیانی دەزانن و ئامادە نین لەم سووکایەتییە خۆش بن.
خاڵێکی گرینگی دیکە کە قاسملوو و 22ی پووشپەڕیان کردوە بە ڕەمزێکی نەتەوەیی و خەباتگێڕانە، ئه و تێگەیشتنە نەتەوەیی و بەرگریخوازانە بەرزەیە کە بە خۆشییەوە لەنێو نەتەوەکەمان لە ڕۆژهەڵاتی کوردستاندا، سەری هەڵ داوە. هەتا دێ ئەم تێگەیشتنە لە نێو خەڵکی کوردستاندا بەهێزتر دەبێ کە خەبات و بەربەرەکانێ دژی ڕێژیمێکی زۆردار و دڕندەی وەک کۆماری ئیسلامی، پێویستیی بە یەکیەتی و هاوپێوەندیی نەتەوەیی و یەک هەڵوێستی هەیە. ئەم ڕاستییەش دەخوازێ کە بە سەر سنوور و چوارچێوە حیزبی و ڕێکخراوەیییە کاندا، زاڵ بن و د. قاسملوو و 22ی پووشپەڕ نەک وەک مڵک یا پرسی حیزبی دێموکرات، بەڵکوو وەک پرسی خۆیان چاو لێ بکەن. هەر لەم ڕوانگەیەشەوەیە کە لەم ڕۆژەدا، بێزاری و دژایەتیی خۆیان بەرامبەر بە ڕێژیمی تیرۆریستیی کۆماری ئیسلامی و، وەفاداریی خۆیان هەمبەر بە ڕێبەری شەهید د.قاسملوو، یەکگرتووانە و بە شێوەی جۆراوجۆر پێشان دەدەن.
هۆگرانی ڕێگا و ئامانجەکانی قاسملووی ڕێبەر!
ئەمساڵ لە کاتێکدا یادی تێرۆری د. قاسملوو دەکەینەوە کە حیزبی دێموکرات خەریکە لە حەفتاوپێنجەمین ساڵڕۆژی دامەزرانی خۆی نزیک دەبێتەوە. د. قاسملوو ئەگەرچی 31 ساڵە بە جەستە لە حیزبی دێموکرات و خەبات و تێکۆشانەکەی ئەستێندراوە، بەڵام ئەو کەسایەتییە بۆ ماوەی چەند دەیە ڕۆڵێکی بێوێنە و پڕ کاریگەری لە مێژووی ئەو حیزبەدا هەبووە. د. قاسملوو، دوای ساڵانێک پەرشوبڵاوی و ناکۆکیی نێو ڕێزەکانی حیزبی دیموکرات، بە هەوڵ و هاوکاریی ژمارەیەک لە هاوڕێیانی، حیزبی دیموکراتی خستەوە سەر یەک. لە ڕووی ڕێبەری و ڕێکخراوەیی و بەرنامە و پێڕەوی نێوخۆوە، ئەم حیزبەی نوێ کردەوە. لە کۆنفرانسی سێهەم و کۆنگرەی سێهەمی حیزبی دیموکراتی کوردستانیشەوە هەتا کاتی شەهید بوونی وەک سکرتێری گشتی، ئەم حیزبەی بە لێوەشاوەیی ڕێبەری کرد و لە هەموو ڕوویەکەوە بووژاندییەوە.
بۆنەی 75 ساڵەی دامەزرانی حیزب و ڕۆڵی د. قاسملوو لە مێژووی ئەم حیزبەدا، دوو ئەرکی گرنگ دەخاتە ئەستۆی ئێمە ڕێبواران و درێژەدەرانی ڕێگەی ئەو ڕێبەرە شەهیدە.
ئەرکی یەکەم، وەبیرخۆهێنانەوە و پێداگرتنەوە لە سەر ئەو ئامانج و باوەڕ و پرەنسیپ و بایەخانەن کە بوون بە بەشێکی دانەبراو و سەرەکی لە شوناس و چییەتیی حیزبی دێموکرات و، ڕێبەری شەهید د. قاسملوو زۆرترین کاریگەریی لە جێگیرکردن و نەهادینەکردنیان لەو حیزبەیدا هەبوو. پابەندی بەو ئامانج و پرەنسیپانە، شانبەشانی وەبیرخۆهێنانەوەی تایبەتمەندییە بەرزەکانی ئەو سەرکردە مێژووییە، هەم وەفاداری و ئەمەگناسییە لە ئاستی ئەو ڕێبەرە شەهیدە، هەم خزمەتە بە کولتووری دێموکراسی و شۆڕشگێڕبوون و ئازادیخوازی و سەربەخۆیی بڕیاردان لە نێو حیزبی دیموکراتدا. هەر وەها بایەخدانیشە بە پەرەپێدانی هارمۆنییانەی تێکۆشان لە ڕەهەند و بواری جۆراوجۆردا.
ئەرکی دووهەم کە لەم بۆنەیەدا دەبێ وەبیرخۆمانی بێنیەوە، پێویستیی بە ئاکام گەیاندنی خەباتێکی دوور و درێژ و پڕ لە سەروەری و قوربانیدانە کە هەزاران ڕۆڵەی نەتەوەکەمان و تێکۆشەرانی ئەم حیزبە، لە نێو ئەواندا ڕێبەرانی گەورەی وەک پێشەوا قازی محەممەد، د. قاسملوو و د. سادق شەرەفکەندی گیانیان لە پێناوی ئامانجەکانیدا بەخشیوە. ئەم خەباتە بە ئاکام ناگا ئەگەر بەر لە هەر شتێکی دیکە، سەرجەم ئەویندارانی ئەم مێژووە، تێکڕای درێژەدەرانی ئەم ڕێگایە و، کۆی ئەو تێکۆشەرانەی لە خانەی بنەماڵەی گەورەی دێموکرات دان، پێکەوە، یەکگرتووانە و شانبەشانی یەک و لە چوارچێوەی یەک حیزبدا درێژە بە تێکۆشان نەدەن. هیوا و هەوڵی ئێمە _کە دیارە بە بەرپرسایەتییەوە دەڵێین حیزبی دێموکراتی کوردستان بۆ ئەم مەبەستە پیرۆزە لە هیچ هەوڵێک درێخی نەکردوە_، ئەوەیە حیزبی دێموکرات بە یەکگرتوویی و بە ئیرادە و بڕیارێکی چاوەڕوانکراو لە ئەکتەران و بەشدارانی ئەم مێژووە پڕ شانازییە، پێ بنێتە دوا چارەکی سەدەیەک خەبات و قوربانیدانی خۆی. بەو هیوایەی هەموو بەردەنگەکانی ئەم پەیامە، هاوکار و پشتیوان بن بۆ وەدیهێنانی ئەو هیوا و چاوەڕوانییە پیرۆزە.
لەم بۆنەیەدا بە پێویستی دەزانین بە ڕێزەوە یادی هاوڕێ عەبدوڵا قادریئازەر ئەندامی کۆمیتەی ناوەندی و نوێنەری حیزب لە دەرەوەی وڵات بکەینەوە کە لە ساتەوەختی گیانبەخشینیشدا وەک زۆر چالاکی و تێکۆشانی دیکەی دەرەوەی وڵات، نزیکترین هاوڕێی ڕێبەری شەهیدمان د. قاسملوو بوو. هەروەها لەمێژساڵە یادی شەهید بوونی ڕێبەری لێوەشاوە د. قاسملووی نەمر، لەگەڵ بیرەوەریی کۆچی دوایی هاوڕێی بەوەج، سەید سەلام عەزیزی، ئەندامی دەفتەری سیاسیی حیزبی دیموکڕات ئاوێتە بووە. بەم بۆنەیەوە لە گەڵ شەهیدانی 22ی پووشپەڕ دا، بەڕێزەوە یادی کاک سەلامی نەمر دەکەینەوە کە 21 ساڵ لەمەوبەر ماڵاوایی یەکجاریی لێکردین. سڵاو بۆ گیانی پاکیان و یادیان بەڕێز.
بەرز و بەڕێز بێ یادی ڕێبەری شەهید د.عەبدولڕەحمان قاسملوو،
ڕیسوایی هەمیشەیی بۆ خوڵقێنەرانی تاوانی 22ی پووشپەڕ،
سەرکەوتن بۆ خەباتی ئازادیخوازانەی گەلی کورد و بەرقەراری بۆ ئامانجه بەرزەکانی د. قاسملووی هەمیشە لە یاد.
حیزبی دیموکراتی کوردستان
دەفتەری سیاسی
21ی پووشپەڕی 1399(12ی ژوئیەی2020)

بە ئاگاداریی بیروڕای گشتی، میدیاکان، و دەزگا پێوەندیدارەکان دەگەیەنین کە شەوی ڕابردوو سێشەمە لە سەر چوارشەمە 6لەسەر 7ی مارسی 2018، (15 لە سەر 16ی ڕەشەمەی 1396)، هاوڕێ #قادر قادری#، کادر و فەرماندەی لێوەشاوەی #حیزبی دیموکراتی کوردستان# کە بە ماشێنی خۆی بە سەردانێک چووبووە مێحوەری بالیسان_چوارقوڕنە، بە داخەوە درەنگانی شه و دەدرێتە بەر دەسڕێژ و تەرمەکەی کە زیاتر لە 20 گوللەی وێ کەوتووە، لە دەوروبەری ماشێنەکەی لە نزیک گوندی “هەرتەلێ”‌ دۆزراوەتەوە. دەردەکەوێ کە ناوبراو لە دەرەوەی ماشێنەکەی دەسڕێژی لێ کراوە. تەرمەکەی لە لایەن پۆلیس بۆ نەخۆشخانەی ڕانیە ڕاگوێزراوە و لێکۆڵینەوە لە ڕووداوەکە هەم لە لایەن پۆلیس و هەم لە لایەن دەزگای ئەمنیەتی حیزبی دیموکراتی کوردستانەوە دەستی پێ کردوە.
بە سەرنجدان به ڕابردووی درێژی تێکۆشانی قادر قادری لە حیزبی دیموکراتی کوردستاندا و بە ئاگاداری لەوە کە ئه و کادرە ناسراوەی حیزبی دیموکڕات کێشەی شەخسیی لەگەڵ هیچ کەس و لایەنێک نەبووە، هەر وەها بە وەبەرچاوگرتنی ئه و ڕاستییەش کە کۆماری ئیسلامی لە دوو ساڵی ڕابردوودا، چەندین پیلانی تیرۆریستیی لە هەرێمی کوردستان لە دژی بنکەکان و تێکۆشەرانی کوردی ڕۆژهەڵات بەڕێوە بردوون، ئێمە ڕێژیمی کۆماری ئیسلامیی ئێران و بەکرێگیراوەکانی بە ئەنجامدەری تێرۆری ئه و تێکۆشەرەی حیزبمان دەزانین.
وێڕای بەداخبوونمان لە شەهیدبوونی ئه و تێکۆشەرە بە وەجەی حیزبی دیموکرات و هاوخەمیمان لە گەڵ بنەماڵە و هاوسەنگەرانی، زانیاریی زیاتر لە بارەی ڕووداوەکە، هەر وەها لە سەر ژیان و تێکۆشانی شەهید قادر قادری، نوێترین قوربانیی تیرۆریزمی کۆماری ئیسلامی، لە بەیاننامەکانی داهاتوودا بە ئاگاداریی بیرورای گشتی دەگەیەنین.
سکرتاریای
حیزبی دیموکراتی کوردستان
#07-03-2018#

دکتۆر یاسین سەردەشتی
ئەم کتێبە لە ساڵی 2002دا لە سلێمانی بڵاوبۆتەوە

بە ئاگاداریی بیروڕای گشتی دەگەیەنین، کە کاتژمێر 10:48ی پێشنیوەڕۆی ئەمڕۆ (شەممە، 8ی سێپتامبری 2018) قەڵای دیموکرات، بنکەی دەفتەری سیاسیی حیزبی دیموکراتی کوردستان، لە کاتی بەڕێوەچوونی پلینۆمی کۆمیتەی ناوەندیدا کەوتە بەر هێرشی مووشەکی و هەوایی کۆماری ئیسلامیی ئێران. لە کاتی ئەو هێرشە و بە دوای ئەو هێرشە دا، فڕۆکەی بی سەرنشین بە ئاسمانی کۆیەدا خولاوەتەوە. هەر دوا بە دوای هێرشە مووشەکییەش بۆ سەر سکرتاریای حیزب، قەڵای دیموکرات کەوتە بەر هێرشی چەندین مووشەکی دیکە.
بە داخەوە ژمارەیەک لە تێکۆشەرانی حیزب بەهۆی ئەم هێرشەوە، شەهید و بریندار بوون. لە ڕاگەیەندراوەکانی داهاتوو دا زانیاریی زیاتر بە ئاگاداریی بیروڕای گشتی دەگەیەنین.
دەفتەری سیاسیی حیزبی دیموکراتی کوردستان
نیوەرۆی 8ی سێپتامبری 2018 17ی خەرمانانی 1397
#08-09-2018#