‘Ji bo çareseriyeke mayinde parastin pêwîst e’
Argêş Vîyan/Qamişlo

Endama Desteya Serokatiya PYD’ê Foza Yûsif diyar kir ku şerê li #Rojhilata Navîn# dimeş e şerê desthiladarî û berjewendiyên mêtingera ne û di heman demê de bibîrxist ku “li hemberî wan aloziyan rêya tekane rexistinbûyin û amadekariya şerê gelê şoreşgerî ye”
Şerê navbera Hemas-Israîl û Israîl-Libnanê berdewam dike, bandoriyek mezin li ser giştî herêma Rojhilata Navîn dike. Di heman demê de êrîşên Israîlê gelek caran li ser baregehên hêzên çekdar yên girêdayî dewleta Îranê li ser axa Sûriyê jî berdewam e. Paytexta Sûriyê Şam jî gelek caran ji milê Israîlê ve dibe armanc. Êrişên dagirkeriya tirk bê navber li ser herêmên Bakur û Rojhilatê Sûriyê didomin.
Di derheqê metirsiyên li ser herêmê û geşedanên siyasî û xebatên herêmên Bakur û Rojhilatê Sûriyê yên siyasî, diplomasî û parastinê de, Endama Desteya Serokatiya PYD’ê Foza Yûsif ji rojnameya me re axivî.
‘Ev şere li ser herêma Rojhilata Navîn bandoriyek neyinî ava dike’
Endama Desteya Serokatiya Partiya Yekîtiya Demokrat (PYD) Foza Yûsif da xuyakirin ku dewletên hegemon û desthiladar, navenda şerê cîhanê wek herêm Rojhilata Navîn hilbijartin e, li gor berjewendiyên xwe dimeşînin û wisa dest bi axiftina xwe kir: “Iro seranserê cîhanê şerekî mezin diqewim e. Ev alozî û gengeşîya di holê de, herî zêde bandora xwe li Rojhilata Navîn dike. Rojhilata Navîn ev 200 salin bûye navenda şerên desthiladarî û berjewendîyan. Di nav herêma Rojhilata Navîn de wek her çar beşên Kurdistanê jî şerek mezin jiyan dikin. Li Sûriyê giştî û bi taybet jî li Rojava ev nêzî 14 salin şerekî mezin di qewim e. Ji bo wê şerê li Bakur û Rojhilatê Sûriyê bi zanebûn hatiya hilbijartin. Heya di wê herêmê de çareseriyek siyasî, danustandinên di asta ku berjewendiyên gelê Sûriyê bingeh digire neyên kirin, em nikarin qala çareseriyeke domdar bikin. Pirsgirêkên ewlekarîyê zêde bûne. Ev şerê ku li Libnanê dimeşe û di êrîşên israîlê ya li ser Îranê dide diyarkirin ku dê bandora xwe li ser axa Sûriyê giştî jî bike. Mirov dikare vê yekê bêje ku hêzên hegemon û mêtinger Sûriyê kirine xeta agir. Rojavayê Kurdistanê jî, di nava agir de cîh digir e, Sûriye wek welatên cîran nêzî sînorên Tirkiyê û Iraqê ye. Her du welat jî her hem di milê leşkerî de û di heman demê de jî desthilatiyên ku wan welatan birêve dibin siyasetên xwe yên li hemberî gelê Kurd dûrî rêyên çareseriyêne. Dewleta Tirk ya dagirker siyaseta xwe ya heyi, her tim di aliyê şer û aloziyan de bikartîne. Gefên ku Tirkiye dixwe, êrişên Israîl li ser Îranê li ser axa Bakur û Rojhilatê Sûriyê pêktîne, pêwîste em wek gel û tevger ji bona şer û pevçûnên giran xwe amade bikin. Hin aliyên dewletên hegemon û mêtînger di ragihandinên xwe de, amadekariyên hêzên parastinê yên Bakur û Rojhilatê Sûriyê dikin mijara nîqaş ê. Kesên ku wê tiştê dibêjin xeteriya li ser Bakur û Rojhilatê Sûriyê nabînin û êrîşên dagirkeriyê yên li ser Rojava jî diparêzin. Ger ku em hezdikin aşîtîyeke mayinde pêk were, pêwîste em xwe ji bona şer jî amade bikin. Ji ber wê yekê pêwîste ku em parastina xwe xurt bikin.”
‘Ji bona parastina gelê xwe, hêzên me yên parastinê amedene’
Foza Yûsif balkişand li ser hîma xweparastinê û axaftina xwe wisa domand: “Wek hêzên me yên ewlehî û parastinê QSD, YPJ, û HPC’ê jî, ji bona êrîşekî gengaz ji milê dagirkeriya tirk li ser gelên heremê her tim di nava amedebaşiyêdene. Raste tevgerandinek heye, lê pêwîste ev yek bê xurtkirin. Divê gelê me bi giştî piştgiriyê bidin zarokên xwe yên ku di çeperên şer de ne. Ji ber vê yekê pêwîste ku civak û gelê me wek her tim berxwedanî meşandiye, di vê pêvajoyê da jî li kêleka hêzên xwe yên parastinê cih bigre û welatê xwe bi hevre biparêzin. Pêwîste hemû welatîyên ku li Bakur û Rojhilatê Sûriyê jiyan dikin, xwe wek şervanekî/e azadiyê bibîne û li ser vî bingehî erkê xwe pêkbîne, ji ber ku parastina rewa mafekî xwezayî ye. Êdî her welatek xwedîyê hêzên parastinê û ewlehîyê ne. Em jî wek pêkhateyên Bakur û Rojhilatê Sûriyê, ji şerê li herêma me diqewime ezmûn girt û em dikarin li hemberî her êrîş û tûndiya ku li hemberî me tê meşandin xwe biparêzin, ev yek jî bi saya felsefeya Rêber Apo ya yekîtiya gelên bindest e. Ev vîna gelê Rojava çeteyên DAIŞ’ê şikandin û êrîşên dewleta Tirk ya dagirker vale derxistin. Tevger û hêzên me bi şêwazekê pispor li ser ramanên Rêber Apo xwe perwerde dike. Pêwîste civaka me bi rihê avakirina Şoreşa Rojavayê Kurdistanê li gel hêzên xwe yên ewlekarîyê cih bigirin û xebatên parastinê bimeşînin”
‘Şerê ku li herêmê dimeşe, berjewendîyên dewletên mêtinger pêktîne’
Foza Yûsif axaftina xwe wisa bi dawî kir: “Ev şerê ku tê meşandin şerê desthilatiya hêzên hegemon e. Israîl hewil dide, şerê xwe yê li hemberî Hizbullahê derbasî Sûriyê jî bike. Îran jî di aliyekê da bi zêdekirina hêzên çekdar yên girêdayî xwe li Sûriyê hewil dide ku nakokiyan kûrttir bike. Di demeke beriya niha de Îranê li ser baregehên DYA yên Hesekê êriş pêkanîn. Em wek gelên Bakur û Rojhilatê Sûriyê jiyan dikin, nabin alîgirê ti kesî, ji ber ku ev şer ne diberjewendiyên gel de ye. Ev şerê ku niha dimeşe, tenê berjewendiyên dewletên dagirker bingeh digire. Lê dema ku şer li herêmê gur bû, em jî di çarçoveya şerê gelê şoreşgerî û parastina civakî de xwe biparêzin û berjewendiyên gelê me ji beriya hemû tiştî ye. Di vê mijarê de wek xebatkar û endamên Rêveberîya Xweser ya Bakur û Rojhilatê Sûriyê helwesta me zelal e. Metirsiyek wiha jî heye li holê dibe ku dewleta Tirk ya dagirker ji aloziyên ku hene sûd werbigire û êrîşekî li ser heremê pêkbîne. Ji ber gefên ku tên xwarin û êrîşên ku tên kirin di wê çarçoveyê den e. Dewleta Tirk ya dagirker hewil dide ku aloziyên herêmê li gorî berjewendîyên xwe bikar bîne û hewil dide çawa ku Serêkaniyê, Girê Spî û Efrîn dagirkir, Bakur û Rojhilatê Sûriyê giştî dagir bike û demografiya herêmê biguherîne. Ger ev alozî zêdetir bibin di her alî de dê bandora xwe li ser herêmên rizgarkirî jî bike. Ji ber vê yekê, welatiyên ku li bajarên Sûriyê yên di bin desthiladariya Hikûmeta Şamê de cih digire jiyan dikin dê bixwazin derbasî herêmên Rêveberîya Xweser ya Bakur û Rojhilatê Sûriyê bibin. Ji bona ku bandoriya aloziyan li herêmên me jî nekin pêwîste ku çareserîyekî sîyasî û yekîtiya gelên heremê pêk were. Helwesta Rêveberiya xweser ji bona çareseriyê gelekî girîng û watedar e. ji ber ku Rêveberîya Xweser di yekîtiya Sûriyê de xwedî xebatekî girînge. Her car Rêveberîya Xweser daye xuyakirin ku ji bo çareserî û guftugoyê amade ye. Lê hikûmeta Şamê xwe nêzî wan nîqaşan nake û bê bersiv dihêle. Em li vir dîsa wê peyamê ji bo aliyên peywendîdar dubare dikim û em wek gelên herêmê pêwîste yekîtiya xwe xurt bikin û li hemberî hemû êrişên siberojê yên ku diqewimin liberxwe bidin”[1]