سی و یەرەمین ساڵیاڎو شیمیایی وارانوو ھەڵەبجەی
بەبۍ گومانە تاوانباری یەکەم جە کۆکوشیەکەو ھەڵەبجەی هەر سەدام حوسەین و عەلی شیمیای و بە گردی ڕژیمە فاشیستەکەو بەعسی بێنێ. بەڵام تاوانبارێتەرێ هەنی کە ڕا وەشکەر و زەمینە ئامادەکەری بێنی پەی ئی تاوانە گەورێ. ئی تاوانبارایچە مشۊ نەپۊشېیارە و بە ئاشکرا نامۍشا بریۊ. هەم ڕژیمە داگیرکەر و نەگریسەکەو کۊماری ئیسلامی ئێرانی و هەم کەواسوورە کوردیەکایچ چی تاوانێنە دەسشا بېیەن و مشۊ ئاڎیشایچ دریا بە دادگای و بە سەزاو تاوانەو وېشا یاوا. یۊ جە یاساکاو دادگاو بە سەزایاونای تاوانباراو جەنگی و ژێنۆسایدی بە سەزایاونای ئا تاوانۋاران؛ وارانە کە زەمینە وەشکەرۍنی پەی ئی تاوانا.
عانێو کۊمارو ئیسلامی ئێرانی بە هامکاری کەوا سوورە کوردیەکا هەڵەبجەش داگیر کەرد، سوور زانێ کە سەدام و بەعسی فاشیست وېش ئامادەکەردەن پەی خۆلقنای کارەساتوو هەڵەبجەی و بە چەکی شیمیایچ ئا کارەساتیە خۆلقنۆ. ئاڎێ تەنانەت ماسکەی دژ بە چەکی شیمیایشا پەنێ بۍ و پا ماسکێوە ئامای دلێ شاروو ھەڵەبجەی. ئینەیچ نیشانێ ئانەینە کە ئاڎێ دڵنیای بێنی کە سەدام جە ھیچ تاوانکاریەو سڵ نمەکەرۊوە و چەکی شیمیایچ بەکار مارۆ ئەر ئاڎیشا ھەڵەبجەی چۆل نەکەرا. ئاڎی ھەڵەبجەشا چۆڵ نەکەرد و بەھانېشا دا دەسو سەدامیەو ئاڎیچ بێبەزەیانە تووشوو گەورەتەرین تاوانیە بی، کە دماو ھیرۆشیمای و ناکازاکی بۍ وێنێ بێ.
کۊمەڵگاو میانەتەویچ بە گردی و دەوڵەتە زلھێزەکا بەتایبەتی نەتەنیا بێدەنگیشا وەرانوەروو ئی تاوانێوە ھۆرچی، بەڵکو بە ورەتەی چەکی شیمیایی بە سەدامی ملھۆڕی بە کردەوە کەوتێ پالوو تاوانکاراو کۆکوشی ھەلەبجەی.
یاڎوو قۆربانیە بێتاوانەکاو ھەڵەبجەی بەرز و بەڕیزبۊ
ڕووسیاوی و نەمەنەی پەی تاوانباراو ھەڵەبجەی
شەرمەزاری و ڕووسیاوی پەی کۊمەڵگاو میادەوڵەتی بە تایبەت دەوڵەتە زلھێزەکا.
موختار کەریمی[1]