Şêniyên herêmên Bakur û Rojhilatê Sûriyê bersiv da #êrişên artêşa Tirk# a dagirker û çeteyên wê yên li ser herêmên wan. Şêniyan tekez kir ku ew bi axa xwe ve girêdayî ne û berxwedana wan li hemberî dewleta Tirk a dagirker didome.
Şêniyên bajar û herêmên Bakur û Rojhilatê Sûriyê ji pêkhateyên cuda #Ereb# û #Kurd# bersiva êrişên dewleta Tirk ên vê dawiyê yên li ser herêmên Bakur û Rojhilatê Sûriyê dan û têkildarî mijarê axivîn.
Elî El Seîdî ku xelkê bajarê Minbicê ye têkildarî mijarê nerîna xwe wiha anî ziman: Armanca êrişên dewleta Tirk ên li ser herêmên me û li ser giştî Sûriyê, bi taybet li ser Kobanê û Minbicê, têkbirina aramiya ku li gund û bajarên me heyî ye. Ji bo vê jî em dev ji welat û axa xwe bernadin. Ev welat welatê me ye, em ê her bimînin girêdayî bi axa xwe ve û em ê bi hemû hêza xwe parastina wê bikin.
Welatiya bi navê Xedîce El Elî ya ji Minbicê jî wiha got: Em van destdirêjiyan qebûl nakin. Dewleta Tirk zarok û mal û milkên me dike hedef. Em weke gelê Sûriyê tekez destwerdana dewleta Tirk û dagirkirina herêmên xwe qebûl nakin. Tişta ku dewleta Tirk li dijî gelên herêmê dike, sûc e.
Welatiya ji Minbicê Emîra El Casim jî bal kişand ser zêdebûna asta şer ku ji aliyê dewleta Tirk ve vê dawiyê tê kirin û got: Dewleta Tirk dixwaze erdên me dagir bike. Dixwaze Minbic û axa din a Sûriyê jî dagir bike. Em nahêlin ku Erdogan xaka me dagir bike, ji ber ku bajarê Minbicê yê me ye û em niştecihên wê yên resen in.
Emîra wiha lê zêde kir: Ev xak xaka me ye û em rê nadin ti dijminî ku bostekê jê dagir bike. Em ê li vî bajarî bimînin û li hember hemû dijminên ku hewl didin aramî û ewlehiya me têk bikin û me tune bikin, berxwedanê bidin meşandin.
ŞÊNIYÊN ŞEHBAYÊ: EM JI BOMBEBARANA DAGIRKERAN NATIRSIN
Xelîl Xelîl ku xelkê Şehbayê ye wiha got: Ji bo welat û xakê em amade ne bi hemû hêza xwe parastinê bikin.
Sîham Elo jî bêdengiya navneteweyî ya li hember êrişên dewleta Tirk a dagirker şermezar kir û wiha axivî: Em ê bi pêş ve biçin, heta ku hemû gelên herêmê û pêkhateyên heyî yên Kurd, Ereb, Tirkmen, Suryan û Asûrî azadiyê bidest bixin.
Ciwanê bi navê Ehmed El Hesen ê ji Şehbayê jî got ku dewleta Tirk di warê siyasî û aborî de îflas kiriye û ji bo wê jî rêbazê tirsandinê bi kar tîne.
Ciwanê bi navê Talet Welo yê ji kantona Şehbayê jî kiryarên dewleta Tirk a dagirker wek terorîst bi nav kir.
Berpirsa Komîteya Perwerdeya Civaka Demokratîk a bajarê Helebê Muna Gebek jî têkildarî mijarê wiha axivî: Li ser bingehê şerê gel ê şoreşgerî me gelek tecrûbe derbas kirin û me li taxa Şêxmeqsûd a ku mînaka têkoşînê ye, gelek tişt jiyan kir. Her wiha di berxwedana Efrîn û Serêkaniyê de jî.
Muna Gebek tekez kir ku divê her kes asta têkoşîna li hember van êrişan bilind bike.
Ji aliyê xwe ve, ji rêveberên Kongra Star Roşîn Mûsa jî tekezî li ser vê yekê kir: Wê hemû gel berxwedanê bike û gef û êrişên dagirkeriyê şermezar bike.
Hevseroka Malbenda Helebê ya Rewşenbîrî Leyla Xalid jî wiha got: Helwesta me wê yek helwest be, ew jî sekna li hember dijminan û berxwedana li hember her êrişek a li ser herêmên me ye.[1]
(hs)
ANHA