دواڕۆژ، #ڕێبین حەسەن#
تەنیا لەماوەی پێنج مانگی ڕابردووی ئەمساڵدا و لەمەرزی نێودەوڵەتی #باشماخ#ەوە، زیاتر لە ملیۆنێک و 700 هەزار کیلۆگرام، کەرەستە و کاڵای بازرگانی، کاری گەڕانەوە و لەناوبردنیان بۆ ئەنجامدراوە.
بەپێی ئامارێکی بەڕێوەبەرایەتی کۆمەڵگەی دەروازەی مەرزی نێودەوڵەتی باشماخ کە وێنەیەکی دراوەتە دواڕۆژ، هاتووە لەسەرەتای ئەمساڵەوە تا سەرەتای مانگی 6، ڕۆژانە بڕێکی زۆر کەرەستە و کاڵا بەمەبەستی هاوردەکردن بۆ هەرێمی کوردستان لەکۆماری ئیسلامی ئێرانەوە هێنراونەتە ناو کۆمەڵگەی باشماخ.
ئاماژە بەوەشکراوە، لەو ماوەیەدا بڕی یەک ملیۆن و 760 هەزار و 350 کیلۆگرام ماددە و کەرەستەی خراپ بوو ڕەوانەی وڵاتی سەرچاوە کە ئێرانە کراونەتەوە و بڕی 7740 کیلۆگرامیش لەکاڵا و کەرەستەی نەشیاو بۆ بەکارهێنان لەناوبراون و ئەو کەرەستە و کاڵایانەشی کە کاری گەڕانەوە یاخود لەناوبردنیان بۆ کراوە بریتین لە (خواردەمەنی، سوتەمەنی، سەوزە و میوە و ئۆتۆمبێل).
ئەوەشخراوەتەڕوو ئەو کارانە لەپاش ئەنجامدانی ڕێکاری یاسایی و پشکنین بۆ ئەو بار و کەرەستە و کاڵایانە بووە، چونکە دەرکەوتووە بۆ لایەنی پەیوەندیدار کە ئەو بارە گونجاو نییە یاخود شیاو نییە بۆ بەکارهێنان و بەپێی تایبەتمەندی عێراقی نییە و ئەو کارەش دوای پێکهێنانی لیژنە بووە کە پێکهاتوون لە نوێنەری چەند فەرمانگەیەکی پەیوەندیداری کۆمەڵگەی باشماخ بەپێی جۆر و ڕێژە و پێکهاتەی بابەتەکە کاری گەڕانەوە بۆ وڵاتی هاوردە یاخود لەناوبردنی بۆ کراوە و ڕێگە بەهاوردەکردنی ئەو بارانە نەدراوە کە لەپشکنین دەرنەچوون.[1]
#06-06-2018#