ساڵی(1936) لەگوندی(شیواشیۆک) نزیک گڕی گەش، هاتۆتە ژیان لەخێزانێکی هەژارو جوتیارو بێدەرامەت، لەتیرەی ئاغا سووری و خاوەن کەرامەت، لەبەر هەژاری و نەداری بەو هۆیەوە باردەکەن و دەگوازنەوە بۆ شاری کۆیە، وەستا قارەمان منداڵ بووە، تەمەنی چوار پێنج ساڵ بووە، لەگوندی شیواشۆک دەگوازنەوە، لەگەڕەکی قەلات لەسەر قازیلان دەگیرسێنەوە، لەماڵە گەورەی ساڵح ئاغای غەفووری، دەژیان لەگۆشەیەکی هەیوانی و یەک ژووری، وەستا قارەمان، لەبەر جەوری ڕۆژگارو زەمان، لەلادێ و شار ژیاوە، لەکۆیە گۆشەکراوە، وەک تاک و کوریژگەی شار، بەڕۆژ شاگرد، بەشەو خوێندکار، تاپۆلی پێنجی سەرەتایی خوێندووە، هاوکات کاری سەرپێی کردووە، ژیانی بەڕەنج و ژان بەسەربردووە، لەگەڵ مشارو تەشووێ تەراشی، لەپاڵ کاسبـی و پیشەی دارتاشی، هەردوو پێکەوە، بەسەریەکەوە، بەبیرو بازوو، ئیش و تێکۆشان، کەوتۆتە سەرشان، لەشاری کۆیە دوکانی دارتاشی دادەنێ، ناوی دارتاشخانەی(کوردستان)ی لێدەنی، ئەو ناوە بەمەبەستی ڕامیاری بووە، دارتاشخانەی کوردستان، دەبێتە یانەی دۆستان، ساڵی(1956) لەگوزەری نەجاران، لەڕیزی کاسبکاران، پەیوەندیدەکات بەڕێکخستنی پارتی دیموکراتی کوردستان، عەبدولجەباری مام شەوکەت، لەش پڵینگی و کەڵەگەت، بەناوی نهێنی قارەمان، دێتە مەیدانی تێکۆشان، وەک هەنگ شانەی ڕێکخستووە لەلادێ و شاری، لەشیلەو هەلاڵەی گوڵزاری کوردەواری، ماندووبوونی نەدەزانی، سەرباری دوو ژنەو زۆری خێزانی، لەژێر باری قورسی ژیان، خەباتی دەکرد بەدڵ و بەگیان، وەستا قارەمانی قارەمان، ڕۆڵەی هەڵکەوتووی دەڤەرەکەمان، سەربازێکی بزرە لەمێژووی کوردایەتی، ژیانی پڕە لەخەبات و مەردایەتی، بالا سنەوبەرەکەی، هەڵکشاوی سێبەرەکەی لەسەر دەوروبەرەکەی، بەکەسایەتی خۆی بووە گەورەو سەرۆکی، تیرەی ئاغاسووری لەکۆیەو شیواشۆکی، ئەو قارەمانە، ئەو ڕۆڵەی زەمانە، هەمیشە بەهیممەت و کۆشش، کۆمەکی کردۆتەوە لەسەرەتای شۆڕش، لەپێناو ژیان و خەباتی کوردایەتی، کەوتۆتە بەکرەجۆو سلێمانی و هەولێرو خۆشناوەتی، لەژیانی سیاسی و خەباتی خۆیدا سەرەتا دەبێتە ئەندام ناوچە، کاتێ پارتی دەبێت بەدوو پارچە، وەستا قارەمان لەگەڵ باڵی(م.س) بووە، سەرەنجام بەلێهاتوویی خۆی دەکرێتە لێپرسراوی ناوچەی کۆیە، مێژووی ڕووناکی، ڕابردوو پاکی، ئەو تێکۆشەرە گومناوە، بەدەگمەن باسی لێوەکراوە، ئەو ئەستێرە پڕتەوە، نۆبەرەکەی پێشڕەوە، ئەو کەسایەتییە ڕێزدارە، باوکی هونەرمەند(دانا عەبدولجبار)ە حەوت کوڕو پێنج کچی لەپاش بەجێماوە(پێشڕەو، چەتۆ، دانا، شەهلا، چنار، دارا، ڕۆژگار، توانا، زانا، شیلان، شادان، کامەران) ئەم نیشتمانپەروەرە، ئەو شۆڕشگێرە ڕەنجدەرە، لەڕێکەوتی(06-06-1997) دڵە پڕ گڕەکەی لەلێدان کەوت، ناکرێ ناوی بزربێ، دەبێ لەبیرمان بێ و نەمربێ، بەئۆباڵی مێژوو بەپێوەری ویژدان، دەبێ یادی بکرێتەوە، ناوی هەر بمێنێتەوە، چونکە مانگەشەوی تاریکستانە، یەک لەتێکۆشەرەکانی کوردو کوردستانە.