چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و ششەمە
سەیڎ برایم، ژەنیش نەبې؛ کوڕێش بې بە نامې (شەمسەددین). دلې قەسرێ دوورېنە مەژیوې، کابانەو یانەیش ئا نووریە بې کە باسش کریا، سفرەچیش من بېنا. ئەفەڼی موسوڵمانێ فرە نماکەر و ڕۊچەگیر بې؛ هەردەم ورتەش ئې دۊعێ مەوانې. زەکاتو پووڵ و خورماوا نەڎې؛ بەڵام ڕوانو جومعەی دوەسەڎ تاقە فلسې مەکەرې دلې کیسێوە، مەگېڵې دلې سواڵکەرەکانو وەربەرەو غۆسیرەو هەر سواڵکەرێ فلسێ یام دوې فلسېش پەنەدې. نامبانگش بە خێرۆمەڼ لوابې. جە کاتو بەخشای خێرەکېنە مەڵڵێوە بە نامې غەززالی شۊنیشەرە مەلې، جومعێشا پەڼجا فلسیێش دانې، ماچۊ: لوە بڎەش بە فەقیرا و بواچە هینو فڵانە کەسیەن. دلېبەرەنە ژەنێ کۊرەم دیڎەو پەڼجا فلسیەکەم دا و واتم سەیڎ برایمی کیاستەن و گورج گېڵانێ خزمەتش. چرپێوەش چەنی مەڵڵای کەرد، مەڵلا ماچۊ: زەڕەکەت چېش پەنەکەرد؟
واتم: بەردم پەی ژەنە کۊرەکې.
چەنەش پەرسا: کەس پەنجا فلسېش دێنی پەنە؟ ژەنەکې زەڕەکەش هەر دلې مشتېنە بې نیشانەش دا، ماچۊ: سەیڎ برایمی پەی کیاستېنا. ئەفەڼی دڵش خاترجەم بی کە نەدزیەنم، ماچۊ: تۊ کوڕێ ئەمینەنی؛ بەڵام ئەشیێ بەخشێت بە پەڼجا سواڵکەرا!
منیچ واتم: ئەفەڼی، جاڕێ تەر من خێرەو تۊ نمەبەخشووە؛ با مەڵڵا ئا هەرمانې بکەرۊن.
شەوێشا خزمەتشەنە مەگېڵېناوە پەی یانەی، پلەکانەکانە ماچۊ بگنە وەڵېم، سەرکۆتەینە مارەکۊڵێم دیڎ؛ پام نیاپۊرە، ماچۊ ئانە چېش بې؟
واتم: مارەکۊڵ بې، کوشتم.
پلەکانێ تەرەرە هوروەست و ئیسەیچ نەیاراش پا پلەکانېرە هوربوەزۊ. دلې مېمانەکاشەنە هەر باسو پاڵەوانی و نەتەرسی من بې کە تاوانم بە پا لەقې مارەکۊڵێ پان بکەروە.!
ڕوێشا دلې حۆشې دیوەخانینە گۊشم جە زیقە و هەراو ژەنا بې؛ ڕەمانې، مڎیەو توولەمارێ باریکشان دیڎەن، قلیچکەو ماریم گېرت و دلې وڵەکېنە کېشتم بەرۆ و کوشتم. ئیتر کار چانەینە نەمەن، گرڎ ڕوێ مەواچېنې ئەفەڼی تۊش گەرەکەن، نیشانەو مېمانام مەڎې: بڎیەیدې! ئا کوردەنە کە ماریچ دلې وڵېنە بەرمارۊ و مارەکۊڵیچ مەکوشۊ! ئاخری ئڼە وەڕەزش کەردا مەکیانې شۊنیم نەلېنا.
حاجی کەرامەت، چل و پەڼج ساڵې بې بەغڎانە مەژیوې؛ قەت چوار کەلیمې عەرەبیې بە خاسی فېرنەبیەبې. خاس ویرش بې کە ساڵێشا ڕووسەکې ئامێنې خانەقین و چوونکەتی شوومې بیېنې، قاتی و گرانیشان چەنی وېشان ئاردەن و هەر نانی وشکش بە ئاویۆ واردەن و شوکرې خوڎایش کەردېنې. ساعبانێ لوابې نانی گەرم بسانۊ، گوم بییەبې ناماوە، ئەفەڼی شېویا؛ تەلەفوونش پەی پۊست و بیمارسانا کەرد، سۊراغش نەبې، دەسېما چەنەشت، دمای یاڼزە ڕوا، ساعبانێ بە باوشێ نانی گەرمۆ پېڎابییۆ.
واتم: حاجی چېشت سەرئاما؟
ماچۊ: وەڵڵا گۊشم چەنەبې ساییقې بە گۊرانیې واچېنې: هەر کەس نەلۊ تەوافو سەلمان پاکی، عومرش بە زایې لوان. ویرم کۆتۆ دەمێن نەلانا پەی ئا تەوافەیە، بە پێ ملم نیا، بە دوې ڕوې یاوانې سەلمان پاک، حۆت ڕوې چاگەبېناو بە پێ ئامانێ!
جا بۊ دەمو ئەفەڼی وەربۊ و دژمانی بڎۊن!
ئەفەڼی نەوەش کۆت، من و ئەحمڎی هیندی بییەیمې بەرەوان کە هەرکەس بێ پەی لایش، بې پەرسو ئاڎی ڕا نەڎەیمې. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]