چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و یەکەمە
تۆفېق وەهبی، شالیارو کارو ڕا و بانی بې؛ یۊن جە ئەدیبە نامڎارەکانی. ڕوێشا شېعرەو (لېفە شڕەو) من پە حوزنی مەوانۊوە و ماچۊ: کەم شېعرې ئەچامنې عالېم دیڎېنې، وەشڵەی ئا شاعېرەمە دیڎێ.
حوزنی ماچۊ: ئانە ئینا بەغڎا و پاخروا و ڕووت و ئاوران؛ بکەرەش بە هەرمانکەرێ ساڎە.
ئاڎیچ ماچۊ: دەخیلەن حوزنی! پەنەش بواچە وېش بشارۊوە نەکای بگېراش!
حوزنی، ئیمتیازو مجەلەو (زاری کرمانجی)، کە جە ڕەواندز مەنویسېش و چەنەش ئەسنیابێ، وەرشگېرتۆ. بڕیارشدا کە بڎۊش دەسو منۆ.
ساعبانێ برادەرێ ئاما، ماچۊ: حوزنی کوتوپڕ مەردەن؛ با بلمې سەرقەبران. چن دیمەنێ دڵتەزن بې: جەنازەکەش سەرو خاکیۆ درېژ کریابې تاکو قەبرەکېش هورکنیۊ، بېجگە جە من و برادەرەکەی هیچ کەسێش لاوە نەبې. ویر جە قەڎرنەزانی کوردانی مەکەرېناوە، گرەوایێ بەکوڵ گېرتانې و مەرەجیۊم تەنیا کەسێ کە پەی مەرگیش گرەوابۊ، من بېنا.
حوزنی، کە بە جاسووس و هەمەکارەو ئینگلیسیانی مەزانیې، فرە بە فەقیری مەرد، بېجگە جە کتېبیانەکەیش، گرڎو دلې یانەیش، نمەڎێ دوې نمەڎې و چوار نیمکەتې دارینی بې. زاروڵەش نەبې، ژەنەکېش کوردەو تورکییەی بې، . (گیو) کتېبەکېش بەرد؛ دلېیانە پەی ژەنەکېش مەنۆ و کارەکەری یانا مەکەرې.
کاتو جەڼگینەا ئینگلیسەکې ڕادوینێشان جە شارو (حێفا) مەرزنابېرە کە (مامۊسا گۊران)، (ڕەفیق چالاک) و (شېخ حەسە) نامێ، ڕوانە دوې سەعاتې بەرنامەی کورڎی ئەچاگۆ بەرېنې ڕاوە. ویرمەن پەی یەکەم جاری جە (گەردیلان) گۊشم پەی گېرت، ڕەفېق چالاک وتارێش سەرو سیاوچارەیی کورڎی واناوە؛ بە کوڵ گرەوانې. ئاڎیچ دمای جەڼگی هورگېریا.
تووشو هەر کوردێ سەرناسی مەبیێنا، داواو هەرمانېش چەنە مەکەرېنا. دوکتور جەعفەر حۆلېش دێ ببون بە فەڕاشو مەدرەسەی فەیلی؛ نەکەرداشا. مامۊسا قادر قەزازێ بې هەرمانې فرېش دەسەنە بېنې؛ مەشناسېچم کېنا. جیاتی هەرمانې، پەڼجا فلسیێش پەی ئاردا وەرۆ! بېدەنگ جیامئاست.
سەرنام: گارسۆنو ڕستوورانو خەییامی
شەوێشا برادەرێ ئاما و ماچۊ: حېزبو پارتی ڕاشئەسپارانا، هەرمانێم دلې ڕیستورانێنە پەی ئېستەنیۆ؛ مانگی بە چوار دینارې و نان و پېخۆر. ئای ئەچا وەشییە! ڕیستوورانێ فرە گۆرە بە نامې (خەییام)، دوې کوردې بە نامې (ئەحمەڎ خواجا) و (ڕوشدی بەگ) چەنی عەرەبێ کەرڎەبېشاوە. ئەحمەڎ خواجا جە ڕەفېقانو شېخ مەحمووڎی بې؛ تاریخێش بە نامې (چیم دی؟) نویستەن. ڕوشدی، کوردێ خەڵکو حەڵەبی بې. هەرمانەو من ئانې بې کاسە و قاپە بەتاڵەکانو وەرو خەڵکی ماشوە؛ زەمینەکەی بماڵون و کاشییەکا بسەڕون؛ یاردی قاپشۊری بڎەو. وېرەگانە ویس و دوې مێزې و هەشتا و هەشت کورسیې ئاسنې بەرو پەی سەرو بانی؛ سەعات یەکو دمای نیمەشەوی باروشارە وار. سەعات دوې دمای نیمەشەوی سەرشاوە بکېشیەورە و سەعات پەڼچ دیسان دەسپەنە بکەروە. سەعات دواڼزەو نیمەڕۊی پەی سەعات و نیمێ وچان و ئیسراحەتێ بڎەو. چن کەسێ تەرې هامکارېش چەنەبېنې کە یۊشان کوردێ سابڵاخی بې بە نامې (محەممەڎی ڕەشادی) کە ئیسە زەڕەنگەرێ فرە دۊڵەمەڼەن. چن کوڕێ خەڵکو سلېمانی بېنې؛ کەباب و شەربەتەو هەچکوچا وەشکەرېنې. ئارەقیچ ئەچاگە مەورەشیې.
ڕوانە بە عام ویس سەعاتې زیاتەر هەرمانە مەکەرېناو مەمانیېنا و سەرەو وېم پەنەم نەوریې. نیمەڕۊ و شەوې واردەی مەنە و نەورەشییامان دېنې پەنە. ساعبیچەنە سەموونێ ڕەقۆبیې کە دەردەو واردەی نەوەری چەنی یەک چایی کە بە حبې سوکەرین شیرین مەکریې، جیرەمان بې. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]