$باکووری کوردستان$
- لە ناوچەی گەڤەری #جۆلەمێرگ# لە باکووری کوردستان، لە کاتی تێپەڕبوونی ئۆتۆمبێلێکی سەربازی سوپای تورکیای داگیرکەر تەقینەوەیەک ڕوویدا.[3]
- لقی یەکەمی دادگای سزا قورسەکانی بورسا، لەسەر داخوازیی داواکاری گشتیی کۆماریی بورسا، مافەکانی 'سەردان، نووسینی نامە، پەیوەندیی تەلەفۆنی و چاوپێکەوتنی پارێزەران'ی لە ڕێبەری گەلی کورد عەبدوڵا ئۆجالان قەدەغە کرد. هەمان بڕیاری قەدەغەکاریش بۆ هەریەک لە زیندانیانی ئیمرالی حامیلی یلدرم، عومەر خەیری کۆنار و وەیسی ئاکتاش دەرکراوە. پاش ئەوەی بڕیاری قەدەغەکە لەلایەن دادگای یەکەمی سزای قورسی بورساوە پەسەند کرا، پارێزەران سەریان لە دادگای باڵای دەستووریی تورکیا دا و لە دژی ئەو بڕیارە سکاڵایان تۆمارکرد.[3]
$رۆژهەڵاتی کوردستان$
- بەهۆی تۆپباران و ئۆپەراسیۆنەکانی سوپای پاسداران لە دەوروبەری شاری #سەردەشت#ی سەر بە پارێزگای ورمێ، ئاگر لە دارستانەکانی گوندی مارلۆ کەوتەوە و هاوڵاتیانیش ناتوانن کۆنترۆڵی ئاگرەکە بکەن.[4]
- چالاکێکی مەدەنیی کورد بە ناوی #ئەنوەر عەرەب# تەمەن 33 ساڵ لە لایەن هێزە ئیتلاعاتییەکانی سەر بە ئیدارەی ئیتلاعاتی سپای شاری #بۆکان# دەسبەسەر کراوە و بۆ شوێنێکی نادیار ڕاگوێزرا.[6]
- لەناوچە دەشتاییەکانی گوندی (تەکەلی) سەربە شارۆچکەی شەمزینان لە پارێزگای #هەکاری# بەتۆمەتی (سنور بەزاندن) سوپای ئێران دەستی بەسەر 970 سەرئاژەڵدا گرت و چوار شوانیشی بەو هۆیەوە دەستبەسەر کرد.[1]
$باشووری کوردستان$
- بەهەوڵی هێزەکانی دژە تیرۆری هەرێمی کوردستان، شەوی ڕابردوو ڕزگارکردنی ژمارەیەک پەنابەری کورد لە دەستی گروپە چەکدارەکانی سوریا ڕاگەیەندرا.[1]=KTML_Photo_Begin=https://www.kurdipedia.org/files/relatedfiles/2018/104087/0001.JPG=KTML_Photo_Alt=ژمارەیەک پەنابەری هەرێم لەدەست گروپە چەکدارەکانی سوریا ڕزگارکران=KTML_Style=width:30%;height:20%;float:right;=KTML_Photo_Target_Link=https://www.kurdipedia.org/files/relatedfiles/2018/104087/0001.JPG=KTML_Photo_End=
- ئەمڕۆ کاتژمێر 1:30 خولەک فڕۆکە جەنگییەکانی دەوڵەتی تورکی داگیرکەر بۆردوومانی کوێستانی سەرشێخان-ی بناری #قەندیل#-یان کرد.[4]
- بەرەبەیانی ئەمڕۆ لە ڕێگەی #کەرکووک# - #خورماتوو#، عەلی خەلیفە ناسراو بە ئەبو زەهرای عەبادی، یاریدەدەری فەرماندەی ئۆپەراسیۆنەکانی ڕۆژهەڵاتی دیجلە سەر بە #حەشدی شەعبی# کوژرا.[2]
- لە ئەمڕۆوە تا 25ی ئەم مانگە دەستدەکرێت بە تۆمارکردنی ناوی کاندیدانی ئەو لیست و قەوارە سیاسی و هاوپەیمانیەتییانەی کە پەسەندکراون و پەرلەمانی هەرێمی کوردستانیش چەندین مەرجی بۆ خۆتۆمارکردنی کاندیدان داناوە.[4]
- دادگا بەشداری #تەڤگەری ئازادی# لە هەڵبژاردنی کوردستان بەبیانووی نەبوونی مۆڵەت، ڕەتکردەوە.[2]
- تەڤگەری ئازادیی ڕایگەیاند: بڕیارەکەی دادگای هەرێم بۆ بەژدارینەکردن لە هەڵبژاردنەکانی کوردستان، یاسایی نییە.[4]
- #وەزارەتی پێشمەرگە#ی حکومەتی هەرێمی کوردستان ڕایدەگەیەنێت، تائێستا هیچ ڕێککەوتنێکی ڕەسمیییان لەگەڵ بەغدا نەکردووە لەبارەی گەڕانەوەی هێزەکانیان بۆ کەرکووک و ناوچە دابڕێنراوەکان و تەنها داوای پێکهێنانی ژووری هاوبەش کراوە.[1]
- بەرپرسی ڕاگەیاندنی یەکێتی لە کەرکووک ڕایدەگەێنێت، ئەگەر لە ژماردنەوەی دەنگەکانی کەرکووکدا گۆرانکاریی ڕووبدات، ئەوە خۆپیشاندانی سەرتاسەری ئەنجام دەدەن، هۆکارەکەشی بۆ ئەوە دەگەڕێنێتەوە کە چەندین ڕۆژە تورکمان و عەرەب گەمارۆی سندوقەکانیان داوە.[4]
- لە یەکەم ڕۆژی پرۆسەی ئەژمار و جیاکردنەوەی دەستی دەنگەکاندا، 23 سندووقی دەنگدانی پارێزگای کەرکووک کرانەوە و سەرچاوەیەک لە بنکەی جیاکردنەوەی دەنگەکان باس لەوە دەکات کە جیاوازی هەبووە لە نێوان ئەنجامە ئەلیکترۆنییەکان و ئەنجامی دەستیی دەنگەکان. کاندیدێکی یەکێتیش دەڵێت، ئەو سندووقانە لەلایەن میلیشیاکانەوە لە کۆگاکان قوفڵەکانیان شکێندراون و دەستکاری کراون.[2]
- شاندێکی هێزەکانی بەرپەرچدانەوەی خێرا لە خورماتوو بەڕەسمی سەردانی ئاسایشی خورماتوو دەکەن لە #کفری# و لە کۆبوونەوەیەکدا داوای هاوکاری لە هێزەکانی ئاسایش و پێشمەرگە دەکەن بۆ پاراستنی سنوورەکە و ڕووبەڕووبوونەوەی تیرۆر.[1]
- کۆگایەکی دیکەی چەک و تەقەمەنی هێزی پێشمەرگە لە شاری #دهۆک# سووتا.[5]
- ئاسمانی #هەولێر# بۆ ماوەی دوو کاژێر بەڕووی گەشتی ئاسمانی داخرا. بەڕێوەبەری فڕۆکەخانەی نێودەوڵەتی هەولێریش ڕایگەیاند داخستنەکە لەسەر داوای هاوپەیمانان بووە.[2]
- لە ڕێگەی #کۆیە#-#هەولێر# هاووڵاتییەک قوڕاوی بەسەری خۆیدا کرد وەک هاوخەمییەک بۆ قوربانییانی ڕێگەکە.[1]
- کاتژمێر 1ی بەرەبەیانی ئەمڕۆ هێزێکی پۆلیس چونەتە سەر ماڵی هاووڵاتییەکی کورد لە کەرکووک کە پیشەی فرۆشتنی ماسییە، شەڕ و ڕووبەڕووبوونەوە لەنێوان هاووڵاتییەکە و هێزەکە دروستبووە، بەهۆیەوە 4 بریندار لەهەردوولا کەوتوەتەوە.[1]
- کاتژمێر 11:30ی خولەکی شەو بۆمبێکی چێنراو لە گەڕەکی ئەرکەوازی #خانەقین# تەقیوەتەوە و هیچ زیانێکی نەبووە.[4]
$رۆژئاوای کوردستان$
- سەرچاوەیەک لە #عەفرین# ڕایگەیاند کە سوپای تورکیا وچەتەکانی هاووڵاتییەک بە ناوی #محەمەد ئیبیش#-ی 55 ساڵ تەمەنیان لە گوندی هەسانا بە بێ هیچ هۆکارێک ڕفاندووە و دواتر لە ژێر ئەشکەنجەدا کوژراوە.[3]
- گروپێک لە چەتەکان-ی لیوای شام 8 هاووڵاتیی بە ناوەکانی ئەمین ڕەشید داوود(44)، حۆرێک عەبدۆعەلۆ(45)، ئەمین مەحیەدین عەلۆ(32)، زیاد نووری زیاد(38)، خەبات محەمەد حەسەن(27)، خالد محەمەد ناسح(35) و دوو برا بەناوەکانی محەمەد ئەحمەد حەنان (34) و ئەحمەد حەنان (30) تەمەنیان ڕفاندووە. ئەو هاووڵاتییانەیان بردووەتە بەندیخانەی گوندی قۆبێ-ی ناوچەی ڕاجۆ-ی عەفرین و بۆ ئازادکردنیان داوای پارە لە بنەماڵەکانیان دەکەن.[3]
- شەوی ڕابردوو، لە نزیک قوتابخانەی ساڵح عەلی لە گەڕەکی ئەشرەفیەی شاری عەفرین، گروپێک چەتەی سەر بە سووپای داگیرکەری تورکیا، ماڵ و موڵکی هاووڵاتییانیان دزیوە و بەسەر خۆیاندا دابەشیان کردووە. لەکاتی دابەشکردنەکەدا لەنێو چەتەکاندا شەڕ دروست بووە. لەئاکامیشدا کوێرانە دەستیان کردووە بە تەقەکردن بەسەر یەکتردا و بە دەورووبەری خۆیاندا.[3]
$دەرەوەی کوردستان$
- بەیانیی ئەمڕۆ کاتژمێر 6، پۆلیسی ئەڵمانیا هەڵیکوتایە سەر کۆمەڵەی کوردان لە شاری بیلەفێلد. ڕاگەیەندرا کە دەیان پۆلیس بەشدار بوون لە هەڵکوتانە سەر کۆمەڵەکە.[3]
- ئەمڕۆ، پەروین بوڵدان و سەزای تەمەللی، هاوسەرۆکانی گشتیی #هەدەپە#، نامەیەکیان ئاراستەی محەمەد ئیبراهیم تاهریان، باڵیۆزی ئێران لە ئەنقەرە کرد و نیگەرانییان لەبارەی سزای #ڕامین حسێن پەناهی#یەوە دەربڕی.[4]
- #گولیزەر تاشدەمیر#، چالاکوانی سیاسیی خەڵکی باکوری کوردستان بەمەبەستی چارەسەری تەندروستیی لە نەرویج داوای مافی پەنابەریی کردبوو، شەوی ڕابردوو لەلایەن پۆلیسی نەرویجەوە لە شاری ئۆسلۆ دەستگیرکرا و ئەمڕۆ خرایە بنکەی دیپۆرتکردنەوە و بڕیارە بە زووترین کات ڕادەستی دەوڵەتی تورک بکرێتەوە.[4]
کوردیپێدیا، ڕۆژانە بێلایەنانە مێژووی کوردستان تۆماردەکات...
Tapahtumien aikajärjestys