ب هەلکەفتنا وەغەرا دويماهيێ يا خودێ ژێ ڕازی #مير تەحسين بەگ#، ميرێ ئێزدييا، بەهيداری و سەرساخيێ ل مالبات و کەسوکارێت وی و جڤاتا ڕووحانی و هەمی خوشک و برايێت مە يێت ئێزدی و گەلێ کوردستانێ بگشتی دکەم. هەڤپار و هەڤخەمێن مالباتا وی و تەڤاهييا ئێزديياينە.
مير تەحسين بەگ کو پتری حەفتێ سالێت چوويی ميراتيا ئێزدييا ل کوردستانێ و جيهانێ کر، تەڤی کو دناڤ ئێزدييادا خودان پێگەه و ڕۆڵەکێ جڤاکی و ئۆلی يێ ديار بوو، هەروسا د تەڤگەرا کوردايەتيێ و بتايبەتی ژی د شۆڕەشا ئەيلوولێدا خودانێ ڕۆل و بەشدارييەکا بەرچاڤ بوو، پشتی شۆڕەشێ ژی ژبەر هەلوێستێن خۆ دەربدەری ولاتان بوو.
مير تەحسين بەردەوام دگەل جڤاکا کوردستانێ و عێراقێ و يا دەڤەرێ ژی د پەيوەنديێدا بوويە و ڕێز و پێگەهێ وی يێ جڤاکی نە بتنێ دناڤ ئێزدييادا، بەلکی دناڤ جڤاکا کوردستانێ و يا عێراقێدا ژی ديار و بەرچاڤ بوويە و خودان تۆڕەکا بەرفرەها پەيوەندييا بوو. بەردەوام هەول دايە کو گيانێ پێکڤەژيانێ و هەڤقەبوولکرنێ دناڤ پێکهاتێن کوردستانێ و عێراقێدا خورتر و کوورتر بکەت.
بيرهاتنا وی ب خێر بيت و خودايێ مەزن ب دلۆڤانييا خۆ شا بکەت.
#نێچيرڤان بارزانی#
سەرۆک وەزيرێ هەرێما کوردستانێ
#28-01-2019#

ئەمڕۆ بەڕێز و شکۆوە يادی شەست و يەک ساڵەی هەڵگيرسانی شۆڕشی مەزنی ئەيلوول و ڕێبەری شۆڕش بارزانيی نەمر و هاوەڵانی و هەموو ئه و قارەمانانە دەکەينەوە کە لەپێناو ئازاديی گەل و وڵاتەکەياندا گيانيان بەخشی، سڵاو بۆ خانەوادەی سەربەرزی شەهيدان و هەموو ئه و پێشمەرگە و خەباتگێڕانە دەنێرين کە لە ڕۆژانی سەخت و دژواری شۆڕشدا دڵسۆزانە و خۆنەويستانە ڕەنجيان کێشا و خزمەتيان کرد.
شۆڕشی ئەيلوول، گێڕانەوەی ناسنامەی نەتەوەيی و نيشتمانيی گەلی کوردستان بوو. شۆڕشی هەموو چين و توێژ و پێکهاتەکان بوو کە لەژێر ڕابەرايەتی و سەرکردايەتييەکی يەکگرتوودا هەمووانی کۆکردەوە. لە يەکێک لە سەختترين قۆناغەکانی مێژووی گەلی کوردستان و ناوچەکەدا، بە ئيرادە و بڕوايەکی پۆڵايينەوە ڕووبەڕووی دوژمن بووەوە. دەوڵەتی عێراقی ناچار کرد دان بە مافەکانی گەلی کوردستاندا بنێت و ببێتە بنا غەيەک بۆ هەموو دەستکەوتەکانی دواتری. نموونەیەکی جوانتری شۆرش ئەوەبوو کە لە سەرکەوتندا لەخۆبايی نەبوو، بەڵکو سەرکەوتنی کردە دەرفەتێکی زیاتری لێبوردەیی و خەباتی هاوبەش و یەکخستنەوەی زیاتری ناو ماڵی کوردستانيیان.
شۆڕشی ئەيلوول بۆ دۆست و نەياران و بۆ هەموو جيهانی سەلماند کە هيچ هێز و توانايەکی سەربازی ناتوانێت ئيرادەی گەلی کوردستان بۆ ژيان و ئازادی بشکێنێت. نهێنی و هێزی سەرکەوتنی شۆڕش، تەبايی و يەکڕيزيی هەموو پێکهاتەکانی گەلی کوردستان بوو، بۆيە لەم يادەدا جەخت لە يەکڕيزی و تەبايی و کاری پێکەوەيی لەنێوان هەموو پێکهاتە و هێزە سياسييەکانی کوردستاندا دەکەينەوە. ئەوە تاقە ڕێگەی پاراستنی ماف و دەستکەوتە دەستوورييەکانی هەرێمی کوردستان و چەسپاندنی سيستەمی فيدراڵی و داهاتوويەکی باشترە.
شکۆدار بێت يادی شۆڕشی مەزنی ئەيلوول و دروود و سڵاو بۆ گيانی پاکی شەهيدان. [1]
#نێچيرڤان بارزانی#
سەرۆکی هەرێمی کوردستان
#11-09-2022#

بەڕێزان سکرتێر و ئەندامانی سکرتاریەت و بەرپرسانی لقەکانی یەکێتيی قوتابیانی کوردستان
سڵاوی زانست و خەبات:
بە بۆنەی (67)ەمین ساڵیادی دامەزراندنی یەکێتيی قوتابیانی کوردستانەوە، گەرمترین پیرۆزبایی لە خۆتان و تێکڕای ئەندامانی ڕێکخراوە تێکۆشەرەکەتان و سەرجەم قوتابیانی ئازیزی کوردستان دەکەم، ئومێدەوارم ئەم یادە هاندەرێکی بەهێز بێت بۆ زیاتر جۆشدانی خەباتی ڕێکخراوەییتان، لەپێناو خواستەکانی قوتابیانی کوردستاندا.
یەکێتيی قوتابیانی کوردستان خاوەنی مێژوویەکی پڕ لە سەروەرییە و لە پێشەنگەکانی خەباتی ڕێکخراوەیی و مەدەنیانەی کۆمەڵگای کوردستانییە و قوتابخانەی پێگەیاندنی چەندین سەرکردە و تێکۆشەری دیاری گەلەکەمانە، کە ڕۆڵی گرنگیان لە بزاڤی ڕزگاریخوازیماندا بینیوە.
ڕۆڵی ڕێکخراوەییتان لە خزمەتکردنی خواستەکانی توێژی قوتابیان و بە ئامانج گەیاندنی داواکانیان بە شێوازی مەدەنی و شارستانی بەرز دەنرخێنم، ئێوە ئەرکی گرنگی نیشتیمانی و پیشەییتان لە ئەستۆیە، بەتایبەت لە پێگەیاندنی تاکی هۆشیار و کەسایەتیی سەنگین و توانای دڵسۆز و لێهاتوو بۆ گەلەکەتان، لەگەڵ بەشدارییەکی کارا لە گەشە و بەرزکردنەوەی ئاستی خوێندن و پەروەردە لە کوردستاندا بە ڕوانگە و میکانیزمی نوێ، کە وەڵامدەرەوەی ڕۆحی سەردەم و پێشکەوتنە خێراکان و خەون و خواستی قوتابیانی کوردستان بێت بۆ پێشکەوتن و نوێبوونەوە و ئاستێکی بەرز و شیاو لە زانست و پەروەردە. گرنگە جێدەستتان بە گۆڕانە ئەرێنی و پێشکەوتنەکانی سیستمی خوێندن و پەروەردەوە دیار بێت و بە دیدگا و بەرنامەی نوێ و سەردەمیانەوە کاری ڕێکخراوەییتان ئاراستە بکەن.
قوتابیان توێژێکی گرنگ و هەستیاری کۆمەڵگان و ئومێدی ئایندەی کۆمەڵگاکەیانن، دەبێ خواست و پێویستیەکانیان بە هەند وەربگیرێن و بایەخی بەردەوام بە بەرزکردنەوەی ئاستی هۆشیاریی نیشتیمانی و هەستی بەرپرسیارێتی لە گرتنە ئەستۆی ئەرکەکانیان بە دڵسۆزی و لێهاتوویی، بدرێت. ڕێکخراوە تێکۆشەرەکەتان لەم لایەنەوە ڕۆڵی گرنگ و کاریگەری بینیوە و چاوەڕوانیم لێتان کار و هەوڵی زیاتری بەردەوامە لەم بوارەدا، لەگەڵ بەهێزکردن و بڵاوکردنەوەی زیاتری بنەماکانی لێبوردەیی و پێکەوەژیان و ئاشتیی کۆمەڵایەتی، لەپێناو ئایندەیەکی پرشنگدار و شکۆداردا بۆ گەل و نیشتیمان.
بە دڵنیاییەوە، ئێوە لە ئاستی ئەو چاوەڕوانیەدان و متمانەی تەواوم بە دڵسۆزی و توانا و لێهاتووییتان هەیە. هیوای بەردەوامی و سەرکەوتنی زیاتر بۆ یەکیتییە تێکۆشەرەکەتان دەخوازم.
بەرز و شکۆدار بێت یادی دامەزراندنی یەکێتيی قوتابیانی کوردستان.
دروود بۆ گیانی پاکی شەهیدە نەمرەکانی یەکێتيی قوتابیانی کوردستان و سەرجەم شەهیدانی ڕێگای ڕزگاریی کوردستان.
#نێچیرڤان بارزانی#
جێگری سەرۆکی #پارتی دیموکراتی کوردستان#
#17-02-2020#

لە سی و نۆ ساڵەی يادی جينۆسايد و ئەنفالکردنی هەشت هەزار مێرد منداڵ و گەنج و پياوی سڤيلی بارزانيدا، سەری ڕێز و نەوازش لەبەردەم گيانی پاکی ئەنفالکراواندا دادەنوێنين، بەوپەڕی شکۆوە ياديان دەکەينەوە.
سڵاو و ڕێز بۆ خێزان و کەسوکاريان دەنێرين کە دوای ئه و تاوان و مەرگەساته، بەرگەی ژيانێکی زۆر سەخت و تاڵيان گرت و هەزاران دايکی سەربەرز، بە تەنيا و بێچارە ئەرکی بژێو و پە ڕوەردەکردنی منداڵانيان کەوتە ئەستۆ و نەوەيەکی دڵسۆزيان پێگەياند. ئه و دايکانە مايەی شانازين و دەستيان ماچ دەکەم.
وەک چۆن هەموو ئه و تاوان و مەرگەساتانەی مێژوو نەيانتوانی ئيرادەی گەلی کوردستان بۆ ژيان و مانەوە بشکێنن، بێسەروشوێنکردن و ئەنفالی بارزانييەکانيش هێزێکی گەورەتری بەخشيە بەرخودانی گەلی کوردستان و تێکۆشانی لەپێناو ئازاديدا و تاوانبارانی ئەنفال نابوود بوون.
لەم يادەدا کە ڕوفاتی سەد ئەنفالکراوی بارزانی بە خاکی پيرۆزی نيشتمان دەسپێرين، دڵ و هۆش و خەياڵم لای دايک و هاوسەر و خوشکانی جگەر سووتاوی ئەنفالکراوان و منداڵ و کەسوکاريانە، هاوسۆز و هاوخەميانم. سوپاس و پێزانين بۆ خەڵکی جوامێر ی #هەولێر# و هەموو ئەوانەی يارمەتيی کەسوکاری ئەنفالکراوانيان دا.
سڵاو و دروود بۆ گيانی پاکی شەهيدان، ياديان هەميشە بە خێر.
نێچيرڤان بارزانی
سەرۆکی هەرێمی کوردستان
[1]

ساڵی تازە لە هەموو کوردستانييان پيرۆز بێت، هيوای ساڵێکی پڕ لە کامەرانی و سەرکەوتن بۆ هەمووان، بۆ جيهان و مرۆڤايەتی بەگشتی دەخوازم. پيرۆزباييەکی تايبەت لە خانەوادە و کەسوکاری سەربەرزی شەهيدان و لە پێشمەرگە قارەمانەکان دەکەم، بە ڕێز و شکۆوە يادی هەموو ئه و ئازيزانە دەکەينەوە کە گيانی خۆيان بە کوردستان و بە ئازادی بەخشی. هيوای سەقامگيری و چارەسەرکردنی کێشە و کۆتاييهاتنی قەيران و ئاڵۆزييەکان بۆ عێراق و ئاشتی و ئارامی بۆ هەموو گەلی کوردستان، ناوچەکە و جيهان دەخوازم.
کوردستانييانی خۆشەويست،
عێراق و ناوچەکە بە دۆخێکی ئاڵۆزدا تێدەپەڕن، ڕووداو و پێهشاتەکان کاريگەرييان لەسەر هەرێمی کوردستانيش هەيە. ئێمە بە يەکڕيزی و تەبايی و يەکهەڵوێستی، دەتوانين ڕووبەڕووی هەموو ئەگەر و پێشهاتەکان ببينەوە و پێکەوە بگەينە کەناری ئارامی. لەم پێناوەدا لەگەڵ هەموو لايەن و پێکهاتە کوردستانييەکان له هەوڵەکانمان بۆ يەکڕيزی و تەبايی بەردەوام دەبين. ئێمە بە ئومێد و گەشبينييەوە لە ئایندەیەکی گەشتر دەڕوانین.
لەسەر ئاستی عێراقيش وەک هەميشە هاوکار دەبين و لايەنه عێراقييەکان هان دەدەين کە هەمووان پێکەوە ئەرک و بەرپرسياريەتيی هاوبەشی خۆيان بەرامبەر بە وڵات جێبەجێ بکەن و هەموو کێشەکان بە ديالۆگ و لێکگەيشتن لەسەر بنەمای دەستوور چارەسەر بکەن. داوا لە هاوپەيمانيی نێودەوڵەتيش دەکەين بۆ ڕووبەڕووبوونەوەی تيرۆر، لە پشتگيری و هاوکاريکردنی هەرێمی کوردستان و عێراق بەردەوام بن.
کوردستانييانی خۆشەويست، هەموو پێکهاتە ئايينی و نەتەوەييەکانی کوردستان دڵنيا دەکەينەوە کە کوردستان وەک هەميشە وڵاتی ماف و ئازادييەکان بۆ هەمووان و لانکەی ئارامی سەقامگيری و پێکەوەژيان و لێبوردەيی و فرەيی و تەبايی و يەکترقبووڵکردن دەمێنتەوە و هەموومان پێکەوە لەم پێناوەدا کار دەکەين و ئه و بنەما و کولتوورە جوانە دەپارێزين و بەرگرييان لێ دەکەين.
ساڵی تازە لە ئاوارە و پەنابەران لە هەرێمی کوردستان، لە هەموو لايەک پيرۆز بێت، هەر لە خۆشی و کامەرانيدا بن.
نێچيرڤان بارزانی
سەرۆکی هەرێمی کوردستان
#31-12-2019#

بەڕێز جەنابی
سەرۆک #نێچیرڤان بارزانی#
هەرێمی کوردستان
کۆماری عێراق
بەڕێز جەنابی سەرۆک،
بەناوی گەلی ئەمەریکاوە، هیوای نەورۆزێکی خۆش بۆ ئێوە و گەلی هەرێمی کوردستانی عێراق دەخوازم.
ئێمە بەیەکەوە دەستکەوتی مەزنمان دژ بە #داعش# بە دەست هێناوە و بە هیواوە دەڕوانینە دەرفەتی نوێ بۆ بەهێزکردنی پەیوەندییە ئابووری و ئەمنییەکانمان لەگەڵ حکوومەتی ئێوەدا.
لەگەڵ ڕێزمدا،
دۆناڵد ترامپ[1]
#26-03-2020#

بەوپەڕی پەرۆشی و نيگەرانييەوە لە پێشهاتە سياسييەکانی عێراق دەڕوانين که تا ‏دێت بە ئاراستەی پەرتەوازەيی و قووڵتربوونەوەی زياتری قەيرانەکان و ‏دوورکەوتنەوەی ئاسۆی چارەسەر دا دەڕۆن. دۆخەکە وا خەريکە داهاتووی وڵات و ‏ئاشتيی کۆمەڵايەتی دەخاتە مەترسييەکی جیدييەوە و کۆی پرۆسەی سياسی و ‏حوکمڕانی و دامەزراوەکان پەکدەخات. ‏
خۆپێشاندانی مەدەنيی ئاشتيانە، مافێکی ڕەوا و دەستووريی پارێزرا وە، بەڵام ‏پەکخستنی دامەزراوەی دادوەری دۆخەکە ئاڵۆزتر دەکات، بۆيە داوا لە هەموو ‏لايەنەکان و لە خۆپێشاندەران دەکەين دامەزراوەکان و ئاشتيی کۆمەڵايەتی بپارێزن ‏و لە ڕەوتی ئاشتييانه و مەدەنی دوورنەکەونەوە. وڵات چيتر بەرگەی ئەم هەموو ‏قەيرانە سەخت و بارگرژييە ناگرێت و درێژەکێشانی زياتری ئاڵۆزی، دواجار بە ‏زيانی تەواوی گەلی عێراق تەواو دەبێت.‏
ئێمه لە هەرێمی کوردستان جارێکی ديکه جەخت لەوە دەکەينەوە کە وەک هەميشە ‏بەشێکين لە چارەسەر و هەموو هاوکارييەک دەکەين بۆ لێکگەيشتن و پێکهاتنی ‏لايەنە عێراقييەکان. وڵات پێويستی بە گفتوگۆيەکی جدديی نيشتمانی و ‏بەرپرسيارانەی لايەنە سياسييەکانە بۆ دۆزينەوەی چارەسەر لەسەر بنەمای ‏دەستوور، هەر ئەوەش تاکه ڕێگەی دروستە بۆ دەرچوون لە قەيران و بنبەستی ‏سياسی و گەياندنی وڵات بە کەناری ئارامی. ‏
#نێچيرڤان بارزانی#
سەرۆکی هەرێمی کوردستان. [1]

ئێوارەی ئەمڕۆ هەينی 23-09-2022 بەڕێز #نێچيرڤان بارزانی#، سەرۆکی هەرێمی کوردستان، بەشداری لە ڕێوڕەسمی يادی نەوەد و دوو ساڵەی ڕۆژی نيشتمانيی شانشينی عەرەبستانی سعووديەدا کرد کە لەلايەن کۆنسولخانەی گشتی سعووديەوه لە #هەولێر# سازدرا.
سەرۆک نێچيرڤان بارزانی به و بۆنەيەوە پيرۆزبايی لە خاوەنشکۆ شا سەلمان بن عەبدولعەزيز و جێنشينی سعوديە مير محەمەد بن سەلمان و سەرکردايەتی و حکومەت و گەلی شانشينی عەرەبستانی سعوديە کرد و هيوای سەرکەوتن و خۆشگوزەرانی بۆ خواستن.
لای خۆيەوە بەڕێز کونسولی گشتيی عەرەبستانی سعوديە لە هەولێر، خۆشحاڵی و پێزانينی خۆی و سەرکردايەتيی سعوديەی بە بەشداريی سەرۆک نێچيرڤان بارزانی له و بۆنه نيشتمانييەی وڵاتەکەياندا نيشان دا و سوپاسی هاتنی بەڕێزيانی بۆ ڕێوڕەسمەکە کرد.
لەم ڕێوڕەسمەدا ژمارەيەکی بەرچاوی بەرپرسانی باڵای هەرێمی کوردستان و ديپلۆماتکاران و نوێنەرانی وڵاتانی لە هەرێمی کوردستان ئامادە بوون. [1]

لە دووەم ڕۆژی سەردان و بەشداريکردنيدا لە پرسە و ماڵئاوايی لە شاژنی کۆچکردووی شانشينی يەکگرتوو ئێلێزابێسی دووەم، پێشنيوەڕۆی ئەمڕۆ دووشەممە 19-09-2022 بەڕێز #نێچيرڤان بارزانی# سەرۆکی هەرێمی کوردستان، لەگەڵ سەرکردە و ڕێبەرانی جيهان و بە ياوەريی بەڕێز باڵيۆزی عێراق لە شانشينی يەکگرتوو، بەشداری لە دانيشتنی پرسەی شاژندا کرد کە لە وێستمينستەر ئابێ لە پەرلەمانی شانشينی يەکگرتوو بەڕێوە چوو.
سەرۆک نێچيرڤان ئێوارەی دوێنێ يەکشەممە لەسەر بانگهێشتی فەرميی حکوومەتی بەريتانيا گەيشتە لەندەن و لەگەڵ سەرکردە و ڕێبەرانی وڵاتانی جيهان لە کۆشکی شاهانەی بەکينگهام بەشداری لە ڕێوڕەسمی پرسە و ماڵئاواییکردن لە شاژنی کۆچکردووی شانشینی یەکگرتوودا کرد و پرسە و سەرەخۆشيی خۆی و گەل و حکوومەتی هەرێمی کوردستانی بە خاوەنشکۆ شا چارلزی سێيەم و خانەوادەی شاهانە و گەل و حکوومەتی شانيشنی يەکگرتوو و وڵاتانی کۆمۆنوێلس گەياند. [1]

يادی پەنجا و دوو ساڵەی دامەزراندنی #یەکێتی زانایانی ئاینی ئیسلامی کوردستان#، بە گەرمی لە بەڕێزان سەرۆک و مەکتەبی تەنفيزيی يەکێتيی زانايان و تەواوی مامۆستايان و زانايانی ئايينی، پيرۆز دەکەم و هيوای سەرکەوتنيان بۆ دەخوازم.
لەم يادەدا بە ڕێز و پێزانينەوە له خەبات و تێکۆشانی يەکێتيی زانايان لە قۆناغەکانی شۆڕش و ئازاديدا دەڕوانين و سڵاو و دروود بۆ گيانی پاکی شەهيدانی يەکێتيی زانايان دەنێرين. ڕۆڵ و پێگە و کاريگەريی يەکێتيی زانايان و مامۆستايانی ئايينی لە کۆمەڵگەی کوردستاندا، بەتايبەتيش بۆ برەودان بە پێکەوەژيان و لێبوردەيی و ڕووبەڕووبوونەوەی توندڕەوی، بەرز دەنرخێنين.
دەستخۆشی لە يەکێتيی زانايانی ئايينی ئيسلامی کوردستان دەکەين لە کار و هەوڵەکانی بۆ بەدەستهێنانی ماف و شايستەکانی مامۆستايانی ئايينی و هەموو پشتگيرييەک بۆ خزمەت و باشترکردنی ژيان و گوزەرانی زانايان و مامۆستايانی ئايينی دووپات دەکەينەوە.
پەروەردگاری مەزن پشت و پەنای هەموومان بێت و گەل و وڵاتەکەمان بپارێزێت. [1]
#نێچيرڤان بارزانی#
سەرۆکی هەرێمی کوردستان
21ی ئەیلوولی 2022