ئامادەکردنی: #هەڵۆ بەرزنجی#

حەکیم عەبدوڵڵا کاکەوەیس، نووسەر و وەرگێڕی کوردە و ناسراوە بە حەکیم کاکەوەیس، باوکی چوار کوڕ و کچێکە.
حەکیم کاکەوەیس، ساڵی 1949 لە گوندی حەساری گەورەی نزیک شاری #کەرکووک# لەدایکبووە. ساڵی 1957 کاتێک یەکەم قوتابخانە لە گوندی دارەمان بەدووری 6 کم لە حەسار کراوەتەوە حەکیم کاکەوەیس لەو قوتابخانەیە چووەتە بەر خوێندنی سەرەتایی و قۆناغی ئامادەیی لە کەرکووک تەواوکردووە و ساڵی 1973 بەشی بیرکاری لە کۆلیژی زانست لە زانکۆی #سلێمانی# تەواوکردووە.
دوای زانکۆ تاکوو کۆتایی شۆڕشی ئەیلول #پێشمەرگە# بووە. هاوینی 1975 لە بەغدا وەکوو فەرمانبەری پرۆگرامسازی لە وەزارەتی پلاندادان دامەزراوە و تاکوو ساڵی 1980 بەردەوام بووە. =KTML_Photo_Begin=https://www.kurdipedia.org/files/relatedfiles/2009/2290/0003.JPG=KTML_Photo_Alt=حەکیم کاکەوەیس=KTML_Style=width:20%;height:20%;float:right;=KTML_Photo_Target_Link=https://www.kurdipedia.org/files/relatedfiles/2009/2290/0003.JPG=KTML_Photo_End=
پاشان لە #زاخۆ# کراوەتە سەربازی یەدەگ و دوای ماوەیەک کە شەڕی ئێراق- ئێران دەست پێدەکات، داوای لێ دەکەن ببێتە بەعسی و ئەوێی جێهێشتووە و لە ساڵی 1984 خۆی دەگەیێنێتە وڵاتی سوید و لەوێ دەگیرسێتەوە.
حەکیم کاکەوەیس، لە ساڵی 2000 بەهۆی نەخۆشی دڵەوە خانەنشین کراوە. بەهۆی نەخۆشی سوید جێ دەهێلێت و دەگەڕێتەوە بۆ زیدی خۆی لە کوردستان و لە گوندی حەسار لە کەرکووک، ژیانی خۆی بە خوێندنەوە و نووسین و وەرگێڕان بەسەر بردووە.
ئەو زیاتر لە عەرەبی و سویدی بەرهەمەکانی بۆ زمانی کوردی وەرگێڕاوە. زۆربەی بەرهەمەکانی مەسعوود محەمەد کوڕی مەلای گەورەی #کۆیە#ی بۆ زمانی کوردی وەرگێڕاوە.
بە مەبەستی وەرگرتنی چارەسەری پزیشکی چوەتە نەخۆشخانە لە بەغدا و ڕۆژی یەکشەممە 18-11-2018 لە شاری بەغدا کۆچی دوایی کرد.
$بەشێک لە بەرهەمەکان:$
لسان الکرد. نووسەر: مەسعوود محەمەد، وەرگێڕانی بۆکوردی: حەکیم کاکەوەیس، #هەولێر#: کوردستان، 2008.
حەجێکی تر بۆ بەردەرگای (خەتێ) ی زانا، مەسعوود محەمەد، وەرگێڕانی بۆکوردی: حەکیم کاکەوەیس
کۆمەڵگەی مرۆڤایەتی بۆچی بە شێتخانە دەچێت؟، #مەسعود محەمەد#، وەرگێڕانی بۆکوردی: حەکیم کاکەوەیس
ڕۆمانی گورگی ڕووتەڵان، حەکیم کاکەوەیس لە سویدییەوە بۆ کوردی وەرگێڕاوە.
ڕۆمانی کۆلارەفڕێن، بەرهەمی ڕۆماننووسی ئەفغانی خالید حسێنی، وەرگێڕانی بۆ کوردی حەکیم کاکەوەیس.
ئامادەکردن: سەرباز سیامەند[1]

#حەکیم کاکەوەیس#، هەواری خەم، ڕووباری وشەی جوان
=KTML_Link_External_Begin=https://www.kurdipedia.org/docviewer.aspx?id=182401&document=0001.PDF=KTML_Link_External_Between=کلیک بکە بۆ خویندنەوەی حەکیم کاکەوەیس، هەواری خەم، ڕووباری وشەی جوان=KTML_Link_External_End=
#ئەمجەد شاکەلی#

#ئاکۆ محەمەد#
ساڵی 2000 بوو، زۆرنەبوو بە یەکجاری لە ئەوروپا گەڕابووەوە بۆ کوردستان. کە لە گوندی وەڵزێی شارۆچکەی #چۆمان# بەسەر بەرزاییەکان دەکەوت، پێمگوت ئەوبەسەرکەوتنەت هیچ نیشانەیەکی ئەوەی تێدا نییە کە قسەی پزیشکەکەت ڕاست بێت کە پێیگوتووی دوای شەش مانگی دیکە دەمریت. کە ڕۆژی 18-10-2018 لە فڕۆکەخانەی #هەولێر# پێشوازیم لێکرد، بەداخەوە هێزی زۆر کەمببوو و دەبووایە بە دوو چەرخی لە شوێنێکەوە بچێتە شوێنێکی دیکە، گوتم هەروەک بە تەلەفۆن پێمگوتی، ئەمجارەش پێناچێت ڕاست بێت. بەڵام گوتی نا، ئەمجارە ڕاستە، دەرچوو دەستنیشانکردنی پزیشکە کوردەکەی سوێد ڕاست نەبوو (پێیگوتبوو نەخۆشی دڵت هەیە، بەڵام دەرچوو دڵی باشە و شێرپەنجەی خوێنی هەیە)، پزیشکەکە دوای پێنج ساڵ مرد، من تائێستا ماوم، بەڵام بۆچی لە مردن بترسێم، هیچ ناترسێم، گرنگ ئەوەیە ئێستا کتێبەکەم چاپبووە یان نا، گوتم من ئاگاداری کتێب نیم، دەبێ لە براکەت بپرسین.

راستە دەستنیشانکردنی نۆزدە ساڵ پێشتری نەخۆشییەکەی کاک #حەکیم کاکەوەیس# ڕاستنەبوو، بەڵام بەهۆی خۆشەویستی بێسنووری بۆ کوردستان و هاتنەوە و ژیانی بەحەزی لە کوردستاندا، زۆر کاریگەری هەبوو لەسەر تەحەممولکردنی نەخۆشییەکی کوشندە بۆ ماوەیەکی درێژ. کاک حەکیم کە لە هەولێربوو لەنێو هاوشارییەکانیدا دەژیا لە دارەتوو، کە ڕژێمی سەددام ڕووخێندرا ماڵەکەی بردە گوندەکەیان (#حەسار#) لە نزیک شاری #کەرکووک#. بۆ ئەو حەسار و #گەرمیان# و کەرکووک چەقی هەموو جیهان بوون.
کاک حەکیم، حەزی لە هەموو سیمبوول و نیشانە کوردییەکان بوو. لە کوردستان زۆرجار جلوبەرگی کوردی لەبەربوو، کە تازە گەڕابووەوە کوردستان، چەند جارێک لە کۆڕی دۆستاندا دەیگێڕایەوە : دوای گەڕانەوەم بۆ کوردستان، لەهەولێر چوومە دادگا بۆ کارێکی فەرمی، لە کۆتایی کارەکەدا دادوەر گوتی حەکیم وەرە مۆری بکە، پێمگوت دەکرێت واژۆی بکەم و پەنجەم بە مەرەکەب نەکەم، گوتی : بۆچی حەکیم چما خیندەواریشت هەیە. دادوەر ئەو قسەیەی پێگوتم هەر لەبەرئەوەی جلوبەرگی کوردیم لەبەربوو.

کاک حەکیم، کە لە نیوەی دووەمی حەفتاکاندا لە بەغدا لەسەر کۆمپیوتەرەکانی ئەوکات کاریدەکرد، بەهۆی ئەو ساڵانەی خوێندن و ژیانی لە بەغدا زیاتر شارەزای بیرکردنەوەی سیاسەتڤان و دەستەبژێری عێراق ببوو. دوای چەند ساڵێک لەبەر کاری سیاسی، ناچاربوو ڕابکات بۆ شاخ. بەڵام دوای ئەوە لە سووریا و سوێدیش لەو کۆبوونەوانەی کە بە نوێنەرایەتی پارتی سۆسیالیستی کورد (#پاسۆک#) لەگەڵ پارتەکانی ئۆپۆزیسیۆنی عێراقیدا دادەنیشت، هیچ ئایندەیەکی باشی بۆ کوردستان
لە عێراقەکەی ئەوانیشدا نەدەبینی.
کاک حەکیم عەرەبی و ئینگلیزی و سوێدییەکی باشی دەزانین و، بە کوردییەکی زۆر جوانیش دەینووسی. ئەوکاتەی لە هەردوو ڕۆژنامەی میدیا و #ڕووداو#، وتاری بۆ دەناردین، زۆر کەس پێیاندەگوتم وتارەکانی زۆر قوڵن. هەندێ وەرگێڕدراوی سیاسی کاک حەکیمم خوێندوونەتەوە، مژاری زۆر بەهێز و گونجاوی هەڵدەبژاردن. خۆیشی زیاتر حەزی لەوەبوو ڕۆمان و وەرگێڕدراوە ئەدەبییەکانی بخوێنمەوە، بەڵام من لە خوێندنەوەی ڕۆمان دوورم. (تەونی جالجالۆکە) بەڕای زۆر لەوانەی خوێندوویانەتەوە باشترین ڕۆمانە لەسەر ئەنفال نووسرابێت. خۆی زۆر لەگەڵ ئازارەکانی ئەنفالدا ژیابوو وەک گەرمیانییەک. جارێک لە کۆمەڵگەی شۆڕش لە گەرمیان، لەچەند ماڵێکی گەڕاوەکانی ئەنفال لەگەڵم بوو، لەگەڵ گێرانەوەکانی ئەو پیرەژن و پیرەمێردانەی لە بیابانەکانی عێراقەوە بەبێ کوڕ و کچەکانیان گەڕابوونەوە، دانیشتبوو بەبێدەنگی دەگریا و فرمێسک هەردوو ڕوومەتەکەی تەڕ تەڕ کردبوون.

حەکیم کاکەوەیس، هەمیشە بەکردەوە مرۆڤێکی نەتەوەیی بوو. لەبەرئەوەش هەمیشە بەهیوایەکی زۆری سەرکەوتنی نەتەوەکەی و دروستبوونی دەوڵەتێکی دادپەرەوەرانەی کوردستانەوە دەژیا. بیرکردنەوەی خۆی لە دوای تێکچوونی شۆڕشی ئەیلوولدا، لەنێو بیروباوەڕەکانی پاسۆکدا دۆزیبوونەوە، پاسۆک نەما بەڵام ئەو تاوەکو دوایین نەفەسیش هەر بیروباوەڕی پاسۆکیانەی هەبوو. کاک حەکیم دەوڵەتی کوردستانی بە ماف پێناسە دەکرد نەک خەون.

کاک حەکیم، سەربەرزی و شانازیکردنی بەخەباتکردن بۆ نەتەوەکەی بەهیچ شتێکی دیکە نەدەگۆڕییەوە، لەبەرئەوەش مافی خۆیشی وەرنەدەگرت بۆ ئەوەی ئەو سەربەرزییەی بەزیادەوە بۆ بمێنێتەوە. دوای دەستپێکردنەوەی هێرشی عێراق بۆ سەر شۆڕشی کوردستان لەساڵی 1974دا، چووبووە ڕیزەکانی شۆڕشی ئەیلوول، هەروەها لە هەشتاکانیشدا ببووە پێشمەرگە، کە لە دوای ڕاپەڕین مووچە بۆ پێشمەرگەکانی شاخ بڕایەوە، یەک مووچەی وەرگرت، بەڵام ئەو تاکە مووچەیە دنیای لە کاک حەکیم تەنگکردبوو، دەیگوت وادەزانم پێشمەرگایەتییەکەم بە بەرامبەر کردووە بۆ نەتەوەکەم، بۆیە هیچی دیکە مووچەکەی وەرنەگرت و بەوشێوەیە هەستیدەکرد زۆر ئاسوودەترە، هەرچەندە گوزەرانی هیچ باش نەبوو و زۆر دەستکورتبوو لەڕووی داراییەوە و، خۆی و خێزانەکەی بە خانەنشینی ئەو کارکردنەوە دەژیا کە لە سوێد کردبووی.

کاک حەکیم کۆچیکرد، بەڵام باوەڕەکانی ماون و حەزکردنەکەی بۆ سەربەخۆیی کوردستان لەنێو دێر بە دێری نووسینەکانیدا بەنێو خوێنەرانی ئەمڕۆ و دواڕۆژی نەتەوەکەیدا بڵاودەبنەوە.

ئامانجی کاک حەکیم لەنێو گوڵەکانی بەهاری کوردستاندان کە هەموو ساڵێک لە نەورۆزدا سەردەردێننەوە. یادت هەمیشە بەخێر و ڕووحت شادبێت کاک حەکیم.[1]

#حەکیم کاکەوەیس#
باوەڕم وایە هەتا کورد ژێردەستە و چەوساوە بێ و خاکەکەی داگیر کرابێ ٫ کوردایەتی کورد بەشێکی سەرەکییە لە عیبادەتەکەی و مرۆڤاییەتییەکەی و بەبێ کوردایەتیش کەلێن دەکەوێتە دین و ئیمان و مرۆڤایەتییەکەیەوە. ئیدی نەموسوڵمانێکی تەواوە نەمرۆڤێکی تەواوە... [1]

بەناوی خوای گەورە و میهرەبان
بۆ بەڕێز خانەوادەی بەڕێزی نووسەر و ڕۆشنبیری کۆچکردوو #حەکیم کاکەوەیس#
بەداخەوە هەواڵی کۆچی دوایی نووسەر و وەرگێڕ و ڕۆشنبیری بەهەڵوێست و نیشتمانپەروەر، کاک (حەکیم کاکە وەیس) م پێ گەیشت.
لەم بۆنە خەمناکەدا، پرسە و سەرەخۆشی ئاراستەی خانەوادە تێکۆشەرەکەتان و سەرجەم نووسەر و ڕۆشنبیرانی کوردستان و خەڵکی خۆڕاگری شاری #کەرکووک# دەکەم و خۆم بە هاوبەشی خەمتان دەزانم.
لە خوای گەورە دەپاڕێمەوە گیانی کاک حەکیم کاکە وەیس بە بەهەشتی بەرین شاد بکات و دڵنەوایی هەموولایەک بدات.
انا للە وانا الیە ڕاجعون
#مەسعود بارزانی#
#19-11-2018#

بەڕێز کاک #مەسعوود بارزانی#...
ئەمڕۆ #کەرکووک# لە مەترسیدایە و داوای هەڵوێست، بە تایبەتی لە ئێوە دەکا. ئەگەر پێتان دەکرێ بەرگری لە کەرکووک و خەڵکەکەی بکەن، پێم وایە کەرکووکییەکانیش پشتتان دەگرن و بە سەربەرزی لەم پیلانە گەڵاوە دەردەچین و ڕووی خیانەتکارانیش هەڵدەماڵدرێ. ئەگەر پێشتان ناکرێ، چۆن قەیسەری ژاپۆن لە پێناوی ژاپۆندا خۆبەدەستەوەدانی بە ئەمەریکا ڕاگەیاند، ئێوەش لە پێناوی کەرکووکدا خۆبەدەستەوەدان ڕابگەیەنن تا خەڵکی کەرکووک بۆ دەرفەتی تر بمێننەوە... هیوادارم قسەیەک یا بەلاغێک ئاڕاستەی خەڵکی کەرکووک بکەن و پێیان ڕابگەیەنن کە پشتیان بەرنادەن...
#حەکیم کاکەوەیس#
کەرکووکی
16-10-2017