سەرۆکی ئەنجومەنی باڵای سیاسی و بەرژەوەندی #یەکێتیی نیشتمانیی کوردستان# لەبروسکەیەکدا پیرۆزبایی لە یەکێتی مامۆستایانی کوردستان دەکات.

دەقی بروسکەکە...
بەڕێزان: سەرۆک و ئەندامانی سکرتاریەتی یەکێتیی مامۆستایانی کوردستان
مامۆستایانی هەڵگری مەشخەڵی پەروەردە و زانست

شەستەمین ساڵیادی دامەزراندنی یەکێتیی مامۆستایانی کوردستان لەئێوه و سەرجەم مامۆستایانی کوردستان پیرۆز دەکەم و ئەم یادەتان بە دەرفەت دەزانم تا دووپاتی بکەمەوە کە ئێوە هەڵگرو گەیەنەری پەیامێکی پیرۆزن و پشتیوانیکردنتان ئەرکێکی نیشتمانییە.
لە ماوەی (60) ساڵ تەمەندا، یەکێتیی مامۆستایانی کوردستان وەک ڕێکخراوێکی پیشەیی ڕۆڵی گرنگی بینیوە، لە خەباتی شاخ مامۆستایان هاوشانی پێشمەرگە قارەمانەکان لە ناوچە ئازادکراوەکان کچ و کوڕی گەلەکەمانیان پێدەگەیاند و نەیانهێشت پرۆسەی پەروەرده و خوێندن بفەوتێ، لەدوای ڕاپەرینیشەوە تا ئەمڕۆ سەرباری هەوراز و نشێوو قەیرانەکان، مامۆستایان بەوپەڕی لەخۆبردووییەوە کاریان کردووه و بەردەوام بوونە لە گەیاندنی پەیام زانست و پەروەردە، کە ئەمەش ڕۆڵێکی گرنگی هەبووە لە پێگەیاندنی نەوە لەدوای نەوەی گەلەکەمان.
دووبارە (60)ەمین ساڵیادی دامەزراندنی یەکێتیی مامۆستایانی کوردستان پیرۆز دەکەم.

#کۆسرەت ڕەسوڵ عەلی#
سەرۆکی ئەنجومەنی باڵای سیاسی و بەرژەوەندی
یەکێتیی نیشتمانیی کوردستان
#15-05-2022#

[1]

#04-07-2018#

15-05-2017

بۆ بەڕێزان/ سەرۆک کۆماری‌ عێراق و پەرلەمانتار و وەزیرە کوردەکانی‌ حکومەتی‌ فیدراڵ
سەرۆکایەتی‌ هەرێمی‌ کوردستان
سەرۆکایەتی‌ پەرلەمانی‌ کوردستان
سەرۆکایەتی‌ حکومەتی‌ هەرێمی‌ کوردستان
وەزارەتی‌ دارایی‌ وئابووری‌
وەزارەتی‌ پەروەردە
وەزارەتی‌ خوێندنی‌ باڵا
سڵاوی‌ پەروەرده و زانست.. (هەموتان دەزانن ئەگەر هۆیەکانی‌ ژیاندن نەبوو داهێنانیش نابێت..)
بەڕێزان..
لاتان ئاشکرایە زیاتر لە ساڵێکە کێشەی‌ دواکەوتنی‌ موچە وبینە وبەردەی‌ هەبوون ونەبوونی‌ بەرۆکی‌ مامۆستایان و فەرمانبەرانی‌ هەرێمی‌ کوردستانی‌ گرتووە، تائێستاش چارەسەرەکەی‌ بەڵێڵی‌ ماوەتەوە بەڕاستی‌ خەڵکی‌ کوردستانی‌ ماندووکردووە، وای‌ لێهاتوە لەبری‌ بیرکردنەوە لەداهێنان تەنها بیر لەچۆنیەتی‌ گوزەران و بژێوی‌ ژیان بکرێتەوە چونکە هەمومان دەزانین کە هۆکاری‌ ژیاندن نەبوو داهێنانیش نابێت.
بەڕێزان..
ئێستا لەبەرئەوەی‌ ئاسۆکە ڕون نیە بەیەکجارەکی‌ خەڵک وەڕس و بێزار بووە، هەموو لایەکیش دەزانن بارودۆخەکە زۆر هەستیارە بۆیە ئارامیان گرتوە لەسەرخۆ هەڵسوکەوتیان کردووە، بەڵام دەبێ‌ بزانین ئەمەش سنوری‌ هەیە بۆیە ناکرێت لەنیوە ڕێگەدا بەجێبهێڵرێن. کێشەکەش تەنها مانگێک نیە بەلکو دەبێ‌ چارەسەرێکی‌ یەکجارەکی‌ بۆ بدۆزرێتەوە، بۆیە داواکارین:
1.لە سەرۆک کۆماری‌ عێراق و پەرلەمانتاران و وەزیرەکان تەنها لەمەراسیمی‌ تەشریفات وێنەکانمان نیشان نەدەن یان لەسەر شاشەی‌ تیڤیەکان هەرکەس و بەئارەزوی‌ خۆی‌ خەڵکی‌ کوردستان ماندوو بکات، دەبێت بەرهەمتان هەبێت ئەم خەڵکە ئێوەی‌ ناردووە بۆ بەدەستهێنانی‌ مافەکانیان نەک دروشم و وتاردان دەبێ‌ بەتوندی‌ ڕەخنە لە حکومەت و بەڕێز عەبادی‌ بگرن بۆجێبەجێکردنی‌ داخوازی‌ و داواکانمان و ئەگەری‌ قسەکردنیتر ببڕێتەوە.
2. لەبەڕێز سەرۆکی‌ هەرێم و سەرۆکایەتی‌ حکومەتی‌ هەرێم دانانی‌ سنورێک بۆ ئه و هەموو نیگەرانییەی‌ مامۆستایان و فەرمانبەران بۆ ئەوەی‌ ژیانمان تەئمین بکرێت، ڕاستە ئێمە لەشەرێکی‌ بێ‌ ئامانداین لەگەڵ تیرۆریستان و بارودۆخەکە زۆر هەستیارە بەڵام دەشبێ‌ ڕیزەکانی‌ دواوەی‌ هێزی‌ پێشمەرگە و ڕۆڵە قارەمانەکانمان قایمتر بکەین، بۆیە زۆر پێویستە بەرونی‌ بەکۆمەڵانی‌ خەڵک بڵێن هەروەها نەخشە ڕێگەی‌ چارەسەرکردنی‌ گرفتەکان دابڕێژرێت بۆ ئەوەی‌ چیتر لەبەرامبەر ئه و پرسە گرنگە سەرگەردان نەبین هەر ڕۆژه و بەشێوەیەک مامەڵە نەکرێت.
3. لەسەرۆکایەتی‌ پەرلەمان و ئەندامانی‌ پەرلەمان دەکەین بێدەنگی‌ بشکێنن و قسەی‌ خۆیان بکەن، چونکە ئێوە نوێنەری‌ گەلن و نمایندەن ناکرێ‌ لەبەرامبەر ئه و پرسە گرنگە و چارەسەرەکان قسەتان نەبێت، هەموشمان دەزانین پێویستیمان بە موزایەدەی‌ سیاسی‌ نییە بەلکو پێویستیمان بە کردارە.
مامۆستایانی‌ بەڕێز وخۆڕاگر..
ئەوەی‌ ئێستا دەگوزەرێت هەموو لایەکی‌ بێزارکردووە، نیگەرانیەکەشی‌ لەوەوە سەرچاوەی‌ گرتوە ئاسۆکانی‌ چارەسەرییەکان ڕون و دیارنین، زۆرتان ئارام گرتوە چونکە دەزانین بارودۆخی‌ هەرێم ناسکە و ڕۆڵەکانمان هەر ڕۆژە لەبەرەکانی‌ جەنگ خوێن دەکەنە سور خەڵات بۆ پاراستنی‌ خەڵکی‌ کوردستان، لەمبارەیەوە یەکێتی‌ مامۆستایانی‌ کوردستان خۆی‌ بەداکۆکیکاری‌ سەرسەختی‌ مامۆستایان دەزانێت بەهەموو شێوەیەکیش هەوڵ لەبەرجەستەکردنی‌ مافەکان وچارەسەرکردنی‌ کێشەکان دەدات، هەربۆ ئه و مەبەستە بەنامەی‌ فەرمی‌ داوا لە یەکێتی‌ مامۆستایانی‌ جیهانی‌(EI) و ڕێکخراوی‌ مامۆستایانی‌ بەریتانی‌(NASUWT) و فیدراسیۆنی‌ مامۆستایانی‌ ئەمریکی‌(AFT)، مەکتەبی‌ ئاسیا باسفیک دەکەین هاودەنگمان بن بۆ بەرجەستەکردنی‌ مافەکانمان..
لەکۆتاییدا جارێکیتر داواکاری‌ لەهەموو لایەک دووپات دەکەینەوە بەدەم داخوازییەکانمانەوە بێن چیتر ئه و کێشانە بە چارەسەر نەکراوی‌ نەهێڵدرێنەوە.. لەگەڵ ڕێز
کۆبوونەوەی‌ ئەنجومەنی‌ تەنفیزی‌
یەکێتی‌ مامۆستایانی‌ کوردستان
19-02-2015

بەناوی خوای گەورەو میهرەبان
بەڕێزان: سکرتاریەت و ئەندامانی یەکێتی مامۆستایانی کوردستان
"54"ەمین ساڵەی دامەزراندنی یەکێتی مامۆستایانی کوردستان لە یەکەبەیەکتان پیرۆز دەکەم و ئاواتەخوازم وەک هەمیشە پێشەنگ بن و هەڵگری پەیامی پەروەردەو پێگەیاندنی نەوەیەکی تەندروست بن.
مامۆستایانی خۆشەویست:
53 ساڵی ڕابردووی خەباتتان ئەوەمان پێدەڵێ کە ئێوە هاوکاتی پەروەردەکردنی نەوەکانمان هەمیشە داینەمۆی خەبات و جۆشدانی ڕۆحی کوردایەتی بوونە لە سەردەمی شاخ و لەدوای ڕاپەڕینیش بەبێ گوێدان بەهیچ بەرژەوەندییەکی کەسی خۆتان و دابینکردنی بژێوی ماڵ و منداڵتان بەردەوام بوون لە کارە پیرۆزەکەتان و نەتانهێشت نەوەی دوای ڕاپەڕینی کورد نەخوێندەوار بێ.
ئەمڕۆش کە کوردستانمان بە قۆناغێکی هەستیاردا تێپەڕدەبێ و قەیرانی دارایی ڕووی تێکردووین لەپاڵ دواکەوتنی مووچە، کەچی مامۆستایان نەیانهێشتووە یەک ڕۆژ خوێندن لە کوردستان دوابکەوێ و شەمەندەفەری پەروەردەو فێرکردن نەوەستاوەو بەردەوامە، بۆیە لەسەر هەموومان پێویستە بە باشترین شێوە خزمەتی مامۆستایان بکەین و قەرەبووی ئەو هەموو ساڵە لە خەبات و قوربانیدان و خۆڕاگریەیان بۆ بکەینەوە.
لە کۆتاییدا وێڕای دووبارە پیرۆزباییم لە مامۆستایانی هەڵگری مەشخەڵی زانست، بە پێویستی دەزانم سەری ڕێز و نەوازش بۆ مامۆستایانی شەهید و سەرجەم شەهیدانی کوردستان دابنوێنم وپێیان بڵێم "ئارام بنون کاروانی پەروەردەکردن و پێگەیاندنی نەوەی وشیار بەردەوامەو هەموومان بەرهەمی ئەم کاروانە نەپساوەین."
کۆسرەت ڕەسوڵ عەلی
جێگری سەرۆکی هەرێمی کوردستان
14-05-2015

15ی ئایار ڕۆژێکی پرشنگدارە لەمێژووی هاوچەرخی کوردستاندا، دامەزراندنی یەکێتی مامۆستایانی کوردستان بەر لە پەنجاو هەشت ساڵ ئاماژەیەکی ئەرێنییە بۆ بزوتنەوەی زانستخوازی و پێشکەوتنی کۆمەڵی کوردەواری.
ئێمە لەمڕۆژەدا ڕێزی بێ پایانمان بۆ تەواوی مامۆستایانی کوردستان دەردەبڕین و دەنگمان دەخەینە پاڵ دەنگیان بۆ داکۆکیکردن لەسەرجەم مافەکانیان و فەراهەمکردنی سەرجەم پێداویستییەکانیان.
مامۆستایانی کوردستان بەگشتی و ڕێکخراوە تێکۆشەرەکەیان لەسەرجەم وێستگە مێژووییەکانی دۆخی میللەتەکەماندا ڕۆڵی پێشەنگیان بینیوە و هەمیشە بەزانست و پەرروەردەیەکی خەباتکارانە ڕۆڵەی کوردیان گۆشکردووە.
ئێمە لەیەکێتی نیشتمانی کوردستان، خۆمان بەپشتیوان و خەمخۆری ڕاستەقینەی مامۆستایان و پەروەردەکارانی کوردستان دەزانین و دەنگمان دەخەینە پاڵ سەرجەم داواکارییە ڕەواکانیان، پێشمان وایە دەبێت ڕۆڵی زیاتر بەمامۆستایان بدرێت و زیاتر خزمەت بکرێن، چونکە بنەمای هەموو پێشکەوتنێک لە وڵاتدا زانستە، زانستیش بەهۆی مامۆستایانەوە بۆ نەوەکانمان دەگوازرێتەوە.
لە ئێستاشدا وێڕای سەرجەم ئه و قەیران و کێشانەی بەرۆکیان بە وڵاتمان گرتووە، پەروەردەکاران ڕۆڵی پێشەنگ دەگێڕن و لەخەمی داهاتووی نەوەکانمان کەرتی پەروەردەیان بەبەهێزی هێشتۆتەوە کەئەمە جێگای ستایش و پێزانینە.
ئەگەرچی لەرابردووشدا، سەدان مامۆستای تێکۆشەر لە ڕێی زانست و خەباتدا ڕۆحی خۆیان بەم خاکە بەخشیوە و ڕووبەڕووی زیندان و ئەشکەنجە و سێدارە بوونەتەوە، لە دوای ڕاپەڕینیش بە دروشمی مامۆستایان سەری بەرزیان بۆ موچە نەوی ناکەن، داینەمۆی بەردەوامی سیستمی پەروەردە بوون لە کوردستاندا، بەڵام لە ئێستادا کە دۆخ و سەردەم گۆڕاوە، دەبێت هەرچی زووە حکومەت بەدەم داخوازییە ڕەواکانی مامۆستایانەوە بێت و سەرجەم داوا شایستەکانیان جێبەجێ بکات.
پیرۆزە یادی پەنجاو هەشت ساڵەی دامەزراندنی یەکێتیی مامۆستایانی کوردستان.
سەرۆکایەتی #یەکێتیی نیشتمانیی کوردستان#
#15-05-2020#

(ئەوکاتەی جەهل حوکم ئەکات شەق لەکەرامەتی مامۆستا ئەدرێ)
مامۆستایان، فەرمانبەران و هاوڵاتیانی کوردستان وەک ئاگادارن لەئێستادا ناڕەزایی و جوڵەو خۆپیشاندانەکان سەرجەم شارو شارۆچکەکانی گرتۆتەوە دژی ناعەدالەتی و برسیکردنی سەرجەم چین وتوێژەکان لەلایەن ئەم دەسەڵاتە شکستخواردوەی هۆکاری مەینەتی و قەیرانەکانە...سەرهەڵدانی ناڕەزایەتیەکان و خۆپیشاندانەکان لە هەولێر و بادینان دەرخەری ئەو ڕاستیەیە کە ئەم دەسەڵاتە بوەتە بار بەسەر هاوڵاتیان و هیج چاکسازییەک لەسەردەستی ڕونادات جگە لە تاڵانی و حەزێکی سوڵتانی خۆیان بۆ دەسەڵات.
ئێمە زۆر لەمێژە وتومانە دەبێت سەرجەم هێزەکان بەنیشتیمانی بکرێن و دووربن لە دەستی حیزب، دەرئەنجام لەرابردودا و بەئێستاشەوە کاری نەخوازراو ڕویداوە لەسەردەستی ئەم هێزە بەحزبیکراوانە..،، تا دەگاتە ئەوەی بەڵتەجیەکی چەکدار لەشاری هەولێر دور لەهەموو بەهاکانی مرۆڤایەتی شەق بەڕووی مامۆستادا ئەوەشێنێت...بۆیە وەک لیستی هاوبەشی یەکێتی مامۆستایان ئیدانەی ئەم کارە نائەخلاقیەی هێزەکانی حیزب ئەکەین بەرامبەر گەورەیی مامۆستاو داواکارین هەرچی زووە دادگا ڕۆڵی خۆی هەبێ و تاوانبار بەسزای خۆی بگەیەنرێ..، بەپێویستیشی ئەزانین بەناوی دەسەڵاتی شاری هەولێرەوە داوای لێبوردن لە سەرجەم مامۆستایان بکرێ.
سەرکەوتوبێ ئیرادەی تاکی کورد
ڕسوایش بۆ ئەوانەی مانای زانست تێناگەن
لیستی هاوبەشی یەکێتی مامۆستایانی کوردستان
#26-03-2018#

بەبۆنەی پەنجا و هەشتەمین ساڵیادی دامەزراندنی یەکێتی مامۆستایانی کوردستان، پیرۆزبایی لە سەرۆک و ئەندامانی سکرتاریەت و گشت ئەندامانی یەکێتی مامۆستایانی کوردستان دەکەم و هیوای سەرکەوتنیان بۆ دەخوازم.
مامۆستایانی کوردستان ڕۆڵێکی گرنگ و دیاریان لە پێگەیاندنی ڕۆڵەکانی کوردستاندا گێڕاوە و لە شۆڕشەکانی کوردستانیشدا بەشدارییەکی کارایان کردووە و هەمیشە لە سەنگەری بەرگریکردن بوون لە مافە ڕەواکانی گەلی کوردستاندا.
حکومەتی هەرێمی کوردستان ڕۆڵی مامۆستایانی کوردستان بەرز دەنرخێنێ کە سەڕەڕای هەموو دۆخە سەختەکانیش بەردەوامن لە بەخشش و درێژەدان بە کاروانی پەروەردەیی و بە جێگەیاندنی ئەرکە پیرۆزەکەیاندا. بۆیە هەموو هەوڵێک دەدات بۆ خزمەتکردنی مامۆستایان و گەشەپێدانی پرۆسەی پەروەردە لە هەرێمی کوردستاندا.
#مەسرور بارزانی#
سەرۆکی حکومەتی هەرێمی کوردستان
#14-05-2020#

بەناوی خودای بەخشندە و میهرەبان
بەڕێزان سکرتێر و ئەندامانی سکرتاریەتی یەکێتی مامۆستایانی کوردستان
بەبۆنەی پەنجاو هەشتەمین ساڵەی دامەزراندنی یەکێتی مامۆستایانی کوردستان، پیرۆزبایی خۆم ئاڕاستەی ئێوە و سەرجەم مامۆستایانی خۆشەویستی کوردستان دەکەم و هیوای سەرکەوتنتان بۆ دەخوازم.
لە مێژووی شۆڕشی ڕزگاریخوازی گەلەکەماندا، ڕۆڵی نیشتیمانپەروەرانەی مامۆستانی کوردستان هیچکات لەبیر ناکرێت. ئەوان لەپاڵ ئەرک و پیشە پیرۆزەکەیاندا چەکی بەرگریکردن لە خاک و نیشتمانەکەیان لە شان بووە و لەو پێناوەشدا دەیان شەهیدی نەمریان پێشکەش بە کوردستان کردووە.
لە سەخترین ڕۆژگارەکانی میللەتەکەماندا مامۆستایان هەمیشە پێشەنگی خۆڕاگری بوونە و نەیانهێشتووە پڕۆسەی خوێندن و زانست لە کوردستاندا بوەستێت و سەرباری بوونی قەیران و کێشەی گەورە مامۆستایانی ئازیز نموونەیەکی باڵا بوونە بۆ هاندان و پێگەیاندن و بەردەوامبوونی فێربوون و زانست.
لەم بۆنە پیرۆزەدا جارێکی دیکە سوپاسی ماندووبوون و هەوڵی سەرجەم مامۆستایانی کوردستان دەکەم و هیوای پێشڤەچوون و بەردەوامی بۆ یەکێتی مامۆستایانی کوردستان و هەموو مامۆستایانی خۆشەویستی کوردستان دەخوازم.
مسعود بارزانی
#15-05-2020#
⚠️ تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!

یەکێتیی مامۆستایانی کوردستان
هەولێر-1992