کۆمەڵانی خەڵکی کوردستان
ئەندام و کادیر و هەڤاڵانی یەکێتی نیشتیمانی کوردستان
بەداخ و پەژارەیەکی زۆرەوە هەواڵی کۆچی دوایی هەڤاڵ #عادل موراد# ئەندامی دەستەی دامەزرێنەری یەکێتی نیشتیمانی کوردستان و سکرتێری ئەنجومەنەکەمان، ئەنجومەنی ناوەندی (ی.ن.ک) ڕادەگەیەنین، بەم بۆنە خەمناکەوە پرسە و سەرەخۆشی لە خۆمان و کەسوکار و خانەوادە و هاورێ و هاوسەنگەرانی و کۆمەڵانی خەڵک بە گشتی و جەماوەری یەکێتی نیشتیمانی کوردستان بە تایبەتی دەکەین، بەڵێن دووپاتدەکەینەوە درێژە پێدەری ڕێبازە پیرۆزەکەی بین.
#18-05-2018#

مەکتەبی سیاسی(ی.ن.ک) هەواڵی کۆچی دوایی هەڤاڵ #عادل موراد# ئەندامی دەستەی دامەزرێنەران و سکرتێری ئەنجومەنی ناوەندی (ی.ن.ک) ڕادەگەیەنێت کۆمەڵانی خەڵکی کوردستان ئەندام و کادیر و هەڤاڵانی یەکێتی نیشتیمانی کوردستان بەداخ و پەژارەیەکی زۆرەوە هەواڵی کۆچی دوایی هەڤاڵ عادل موراد ئەندامی دەستەی دامەزرێنەری یەکێتی نیشتیمانی کوردستان و سکرتێری ئەنجومەنی ناوەندی ڕادەگەیەنین، کە بەیانی ئەمرۆ هەینی 18/5/2018 کاتژمێر 10:15 بەکاتی کوردستان، لەشاری کۆڵنی وڵاتی ئەڵمانیا دوای ململانێیەکی سەخت لەگەڵ نەخۆشیەکەی کۆچی دوایکرد. بەم بۆنە خەمناکەوە پرسە و سەرەخۆشی لە خۆمان و کەسوکار و خانەوادە و هاورێ و هاوسەنگەران و جەماوەری یەکێتی و کۆمەڵانی خەڵک دەکەین.
هەڤاڵ عادل موراد لە بنەماڵەیەکی نیشتیمانپەروەر لە ساڵی 1949 لە شاری بەغدا لەدایک بووە. خاوەن کەسایەتیەکی تایبەت بووە، هەر لەسەرەتای لاوێتیەوە هەستی نەتەوایەتی و خۆشەویستی بۆ خاک و نیشتیمان لە ناو دڵ و دەرونیدا چەکەرەی کردووە، ژیانی سیاسی لە پێناوی کوردایەتیدا زوو دەستیپێکردووە و لە ساڵی 1965 لە بەغدا پەیوەندی بە ڕێکخستنەکانی پارتی دیموکراتی کوردستانەوە کردوە. لە ساڵی 1966 لەبەشی کیمیای کۆلێژی پەروەردەی زانکۆی بەغدا وەرگیراو لەو ماوەیەدا سەرپەرشتی بەشێکی ڕێکخستنەکانی بەغدای کردوە.لە ساڵی 1969 بەشێکی ڕێکخستنەکان ئاشکرا بوون، هەر بۆیە ناچار بوو واز لە خوێندن بێنێ و ڕووبکاتە شاخ و ببێ بە پێشمەرگە. لە پێشمەرگایەتیدا بووە ئەندامی ناوچەی پارتی لە ناوچەی باڵەک و لە هەمان کاتدا لەبەر کەمی مامۆستای گوندەکان لە خوێندنگەی گوندی گەڵاڵە مامۆستای شۆرش بووە. پاش ڕاگەیاندنی بەیاننامەی 11 ئازاری 1970، لە کۆنگرەی یەکێتی قوتابیانی کوردستان بە سکرتێر هەڵبژێردرا و بووە جێگری لێپرسراوی ڕێکخراوە پیشیەکانی عێراق، بەهۆی فشاری ڕژێمی بەعسەوە بەرلەوەی شەڕ لە نێوان کورد و ئەو ڕژێمە لە ساڵی 1974 دەستپێبکاتەوە، بەغدای بەجێهێشت و لە ناوچەکانی ژێر دەسەڵاتی شۆڕش گیرسایەوە، لە نسکۆی 1975 ئاوارەی ئێران دەبێت و پاشان ڕوو لە وڵاتی سوریا دەکات و لەوێ پەیوەندی لەگەڵ هەڤاڵ مام جەلال دەبەستێت و بەشدار دەبێت لە دامەزراندنی یەکێتی نیشتیمانی کوردستان لە حوزەیرانی 1975. دوابەدوای ئەوە لێپرسراوێتی ڕێکخستنی ناوەوەی وڵاتی پێسپێردراوە، دواتریش بۆ دروستکردنی ڕێکخستنەکانی دەرەوە، ڕوو لە ووڵاتانی ئەورووپا دەکات و توانی بناغەیەک بۆ ڕێکخستنەکانی یەکێتی لە و وڵاتانە دابنێ، پاش گەڕانەوەی بۆ سوریا لەگەڵ ئەندامانی تری دەستەی دامەزرێنەر سەرقاڵی دابینکردنی پێداویستیەکانی دەستپێکردنەوەی خەباتی چەکداری بوو لە کوردستان و لەم ڕووەوە لێپرسراوێتی ئەرکە لۆجستیەکان و ناردنی مەفرەزە سەرەتاییەکانی بۆ ناوەوەی وڵات گرتە ئەستۆ. لە مانگی کانوونی دووەمی 1979 گەڕایەوە بۆ کوردستان و بارەگاکەی بردە خڕی ناوەزەنگ. لە مانگی شوباتدا ڕوویکردەوە سوریا و پاشان لە لوبنان لە ڕۆژنامەی (سەفیر) وەک ڕۆژنامەنوس کاریکردوە. لە ساڵی 1981 پەیوەندی بە حزبی سۆسیالیستی کوردستانەوە کردوە و لە کۆنگرەی یەکەمی ئەو حزبەدا بە ئەندامی کۆمیتەی سەرکردایەتی هەڵبژێردرا. لە ساڵی 1994 پەیوەندی بە یەکێتی نیشتیمانی کوردستانەوە دەکاتەوە و پلەی ئەندامی کۆمیتەی سەرکردایەتی پێدرا و لێپرسراوی مەکتەبی ناوەندی ڕاگەیاندنی یەکێتی تا ساڵی 2000 لەسەر ئەم ئەرکە بەردەوام بوو. لە 2003 بەشداربوو لەو هەوڵانەی کە بۆ ڕووخاندنی ڕژێمی بەعس دەدران، لەگەڵ ڕووخاندنی ڕژێمی بەعسدا چوو بۆ بەغدا و ئەرکی پەیوەندی و دبلۆماتکارانەی گرتە ئەستۆ و ماوەیەکیش لە ئەنجومەنی حکوم نوێنەری سەرۆک تاڵەبانی بوو. لە ساڵی 2004 بووە باڵوێزی عیراق لە ڕۆمانیا. لەساڵی 2010 لە کۆنگرەی سێیەمی یەکێتی نیشتیمانی کوردستان بە ئامانجی هاتنە پێشەوەی خوێنی تازە خۆی بۆ کۆمیتەی سەرکردایەتی نەپاڵاوتەوە، لەو کۆنگرەدا هەڤاڵ مام جەلال ڕێزلێنانی پێبەخشی. لە ڕۆژی3/12/2011 لەسەر داوای سەرۆک مام جەلال و بە زۆرینەی دەنگ لە کۆبوونەوەی فراوانی ئەنجومەنی ناوەندیدا بە سکرتێری ئەنجومەنی ناوەندی هەڵبژێردرا.
بەداخەوە بەیانی ئەمرۆ هەینی کاتژمێر 10:15 لە ئەڵمانیا دوای ململانێی لەگەڵ نەخۆشیەکەی دڵە گەورە و پاک و پڕ لە ئاواتەکەی بۆ بەدیهێنانی مافە ڕەواکانی گەلەکەی و پێشنگ بوونی حزبەکەی لە لێدان کەوت و بۆ دواجار ماڵئاوایی لێکردین، بە لەدەستدانی ئەم سەرکردە ماندونەناسە زیانێکی گەورە بەگەلی کورد و یەکێتی نیشتمانی کوردستان کەوت و کەلێنێکی لە ڕیزەکانی یەکێتی بەجێهێشت. هەزاران سڵاو بۆ ڕۆحی پاکی هەڤاڵی سەرکردە عادل موراد و سەرجەم خەباتگێران و شەهیدانی ڕێگای ڕزگاری و ئازادی کورد و کوردستان.
مەکتەبی سیاسی یەکێتی نیشتیمانی کوردستان
#18-05-2018#

بەڕێزان ئاشنا موراد و هەموو ئەندامانی خێزان
سڵاو و ڕێز
بە گەرمیی لە خەمی کۆچی دوایی خۆشەویستتان کاک #عادل موراد#، بەشدارین. هیوادارین هەبوونی خۆشەویستان و دۆستانی ئازیزی دیکە بە شێوەیەک خەم و پەژارەتان کەم بکاتەوە و زووتر سووکنایی بە دڵتاندا بێت و باری شانتان سووکتر بێت.
کاک عادل موراد بە لەش و جەستە کوردستانی بەجێهێشت، بەڵام خوو و ڕەووشت و ئاکار و کارەکانی، هەروەک دەیان هەزاری دیکە لە کەسایەتی نیشتیمانی کوردستان، جێگای ڕێز و پێزانین دەبێت و لە دڵی خەڵکی کوردستاندا بە نەمری دەمێنێتەوە.
تەندروستیی و تەمەنی درێژ بۆ هەمووتان دەخوازین.
هاوسەرۆکانی #کۆنگرەی نەتەوەیی کوردستان# نیلۆفەر کۆچ و ڕێبوار ڕەشید
کۆنگرەی نەتەوەیی کوردستان/ ک ن ک
#18-05-2018#

هەواڵی مەرگی هەڤاڵ و هاوڕێ و هاورێبازمان کاک #عادل موراد# تاساندمی.. کۆچی ناوادەی ئە م پياوە تيکۆشەرە کۆستێکی گەورەيە بۆ يەکێتی نيشتمانی کوردستان و ميللەتي کورد، لەدەستدانی ئەم سياسەتمەدارە لێهاتووە خەسارەتێکی گەورەيە بۆ پرسی نيشتمانی و نەتەوەييمان، پڕ بەدڵ سەرەخۆشی لە مناڵەکانی و بنەماڵە بەڕێزەکەی کاک عادل ئەکەم، هاوبەشی خەمتانم.
بەڕێزم : کاک عادل تەنها هەڤاڵێکی يەکێتيم نەبوو، بەڵکو براو هاوڕێی تەمەنيشم بوو، بەدرێژايی ويستگەکانی ژيانمان پێکەوە کارمان کردوه و، لە تاڵی و سوێری ڕۆژگارە سەختەکانی خەباتی سياسيمان پێکەوە بەشدار بوين، لەساڵانی سەرەتای حەفتاکانەوە ئەم کەڵە پياوەم ناسيوه و، تا ساتی کۆچی دواييشی هەميشە يەک ڕێبازو يەک بيرکردنەوه و يەک هەڵوێستی و وەفا بۆ يەکێتی و کوردايەتی پێکەوە کۆمانی کردۆتەوە، مايەی شانازيە بۆ من لەتەک تێکۆشەرێکی گەورەی وەکوو کاک عادل موراد لەسەر ڕێبازەکەی مام جەلالی نەمر بەردەوامی بە خەباتی نەتەوەيی ميللەتەکەمان بدەين.
کاک عادل بەدرێژايی تەمەنی سياسی خۆيەوە کە لەنيو سەدە تێپەری ئەکرد، پياوێکی خەباتگێڕ و دڵسۆز بۆ پرسی نەتەوه و، پياوێکی دەمڕاست ودەستپاک، پياوێکی هەقبێژ چاونەترس، نەيارێکی سەرسەختی ديکتاتۆريەت و ستەمکاری، پشتو پەنای خەڵکی لێقەوماو وهەژارانی وڵاتەکەم.
هەزاران سڵاو له گيانی پاکی کاک عادل مورادی گەورە سياسی و تێکۆشەری ميللەتەکەمان
نەمری و سەربەرزی بۆ کاک عادلی ئه ندامی دەسته ی دامەزرێنەری يەکێتی و ڕۆڵەی شاخەکانی کوردستان
داوا لەخوای گەورە ئەکەم بە بەهەشتی بەرينی شاد بکات سێبوری ئێوەش بداتەوه و تەمەن درێژيش بۆ مناڵەکانی لەگەڵ ئەوپەڕی ڕێزو خۆشەويستيم بۆ هەموتان..
انا لله وانا اليه ڕاجعون
براتان
دکتۆر #لەتيف ڕەشيد# هاورێ و هەڤاڵی خوالێخۆشبوو
بەغدا #19-05-2018#

سەرەخۆشی
بەداخەوە کەمێک پێش ئێستا هەواڵی کۆچی ناوادەی سیاسەتمەدار و ڕووناکبیر #عادل موراد#م بیست.
کۆچکردوو هاوڕێی زیاتر لە نیو سەدە و دۆستێکی خۆشەویستم بوو، لە ساڵانی شەستەکان و سەردەمی شۆڕشی ئەیلولەوە برایەکی گیانی بە گیانی یەکتری بووین و لە هەموو ڕووداوەکاندا خاوەنی هەڵوێستی کوردانە و پێشکەوتنخوازانە بوو.
کۆچکردوو کە یەکێک بوو لە دامەزرێنەرانی یەکێتیی نیشتمانیی کوردستان و تێکۆشەرێکی گەورەی کوردایەتی، بە ئاسانی جێگەکەی پڕ نابێتەوە.
خوا سەبووریی کەسوکاری و ئێمە و هاوڕێیانی بدات.
#فاروق مەلا مستەفا#
#18-05-2018#

بەرێزان هەڤاڵانی مەکتەبی سیاسی یەکێتیی نیشتمانیی کوردستانی تێکۆشەر،
بەڕێزان ئەندامانی ئەنجومەنی سەرکردایەتی و ئەنجومەنی ناوەندی و سەرجەم ئەندامان‌ و لایەنگرانی دڵسۆزی (ی.ن.ک)
بەڕێزان کەسوکار و خانەوادەی سەربەرزی سەرکردە و ڕوناکبیری گەورەی گەلەکەمان هەڤاڵ دکتۆر کەمال فوئاد،
‌بە داخ و پەژارەیەکی زۆرەوە، هەواڵی کۆچی دوایی هەڤاڵ (#عادل موراد#) ئەندامی دەستەی دامەزرێنەری یەکێتی نیشتیمانی کوردستان و سکرتێری ئەنجومەنی ناوەندیمان پێگەیشت نیگەرانی کردین.
بەم بۆنە خەمناکەوە بە ناوی کۆمیتەی ڕێکخستنی دانیمارکی (ی.ن.ک) و سەرجەم کادیر و ئەندام و هەوادار و دۆست و لایەنگرانمانەوە سەرەخۆشی لە خۆمان و لە ئێوەی بەرێز دەکەین، داواکارین لە خوای گەورە و میهرەبان دوا ئارامگەی بەهەشتی بەرین بێت و دواخەم و کەسەری بنەماڵە تێکۆشەرەکەیان بێت.
بەرێزهەڤال (عادل مراد) یەکێک بووە لە تێکۆشەرە ماندوونەناسەکانی دەستەی دامەزرێنەری (یەکێتیی نیشتمانیی کوردستان) و (سکرتێری ئەنجومەنی ناوەندی) مان، هەروا بەرێزیان سیاسەتمەدارو تێکۆشەرێکی ڕۆشنبیر و نیشتمان پەروه و حەق بوێژ بووە.
لە دەستدانی ئەو سەرکردە مەزنە، کەلێنێکی گەورەی جێ هێشت لەناو سەرجەم بزاڤی کوردایەتی بە گشتی و یەکێتیی نیشتمانیی کوردستان بە تایبەتی.
سڵاو و دروود لە گیانی پاکی ئه و سەرکردەیەمان… سڵاو لە گیانی پاکی سەرجەم شەهیدانی ڕێگای ڕزگاری نیشتمانی کوردستان و سەرجەم ئازادیخوازانی جیهان..
انا للە و اناالیە ڕاجعون
ماڵئاوا پیاوە مەزن وخەمخۆرەکەی یەکێتی
ماڵئاوا پێشمەرگە ڕۆشنبیرەکەی شاخ وشار
دروود بۆگیانی پاکی
کۆمیتەی ڕێکخستنی دانیمارکی
یەکێتیی نیشتمانیی کوردستان
#19-05-2018#

بەڕێزان
ئەنجوومەنی سەرکردایەتیی، مەکتەبی سیاسیی، وتەبیژی یەکیەتیی نیشتیمانیی کوردستان و ئەندامان و لایەنگران
سڵاو و ڕێز
لەگەڵتاندا لە خەمی کۆچی دوایی هەڤاڵ کاک #عادل موراد#، بەشدارین. هیوادارین هەبوونی هەڤاڵان و دۆستانی ئازیزی دیکە لە ناو یەکێتیتیی نیشتیمانیی کوردستاندا بە شێوەیەک خەم و پەژارەتان کەم بکاتەوە. دڵنیاین ئێوە لە ڕووی سیاسیی و ڕێکخستنەوە درێژە بە کار و خەباتی کاک عادل موراد دەدەن.
کاک عادل موراد بە لەش و جەستە کوردستانی بەجێهێشت، بەڵام بە دڵنیاییەوە کەسانی دیکە لە ناو یەکیەتیی نیشتیمانیی کوردستاندا بە خزمەتکردن بە ڕێبازی ئەو بەردەوامن لە تێکۆشاندا.
تەندروستیی و تەمەنی درێژ بۆ هەمووتان دەخوازین.
هاوسەرۆکانی #کۆنگرەی نەتەوەیی کوردستان# نیلۆفەر کۆچ و ڕێبوار ڕەشید
کۆنگرەی نەتەوەیی کوردستان/ ک ن ک
#18-05-2018#

هاتنی مام جەلال و عادل موراد بۆ هۆڵەندا

هەر لە ساڵی 1976دا مام جەلال و عادل موراد هاتن و کۆبوونەوەیان لەگەڵ ئەوانەمان کرد کە یەکێتی بووین. پاشانیش لەگەڵ کوردەکانی ئەوێ لەسەر بەرنامە و سیاسەتی یەکێتی و دۆخی کوردستان قسەیان بۆ کردین. ئەو ماوەیەش لەوێ بووین، چەندین ڕێپێوانمان دژی ڕژێمی عێراق کرد، بەتایبەتیش کە کاک شەهاب و هاوڕێکانیان لە سێدارە دران. هەموومان کوردەکان لە مەیدانی دام کە جێگەیەکی بەناوبانگە لە ئەمستردام و لە بەردەم تەلاری مەلیکەی هۆڵەندایە، چەندین وێنە و دروشممان دژی ڕژێمی دیکتاتۆری بەغدا بەرز کردەوە. لەگەڵ هاوڕێکاندا لە کارکردن بەردەوام بووم. هەر لە و ماوەیەشدا بوو محەممەد سابیر هاتە دەرەوە، چەند شەوێک لامان مایەوە و ئیتر نەگەڕایەوە بۆ عێراق، بە ئیفاد هاتبوو.[1]

[1]

$عادل موراد هەڵە نییە$
#هێمن عەبدوڵڵا#
#30-09-2014#
لەو شەڕە میدیایی و سیاسییەی یەکێتی و پارتی لەمڕۆژانەدا لە دژی یەکدی دەستیانپێکردووە، ڕەچاوی ئەوە نەکراوە کە وڵات لە شەڕدایە. لەوەش خراپتر، پارتی بەزۆر دەیەوێ بیسەلمێنێت کە ئەوەی ئەنجوومەنی ناوەندیی یەکێتی دەیڵێت ڕای حیزبەکە نییە و قسەی بەڕێز عادل مورادە. ڕاستییەکەشی ئەوەیە کە وەک چۆن لە ڕابردوودا سەرینەگرت، ئاواش چیدیکە ناکرێ لە ئاییندەدا پارتی و یەکێتی خۆیان هەڵبخەڵەتێنن و بڵێن هاوپەیمانیی ستراتیژیمان هەیە. چونکە ئەو هاوپەیمانێتییەی لەنێوان ئەو دوو حیزبەدا هەیە و چەندین ساڵە چەپڵەی بۆ لێدەدەرێت، وەکوو چیرۆکی پاشا بێ کراسەکە وایە. عادل مورادیش وەکوو ئەو منداڵە وایە کە هاواریکرد خەڵکینە پاشا کراسی لەبەردا نییە!
کاتی خۆی هاوپەیمانێتیی ستراتیژی بۆ دامرکاندنەوەی پاوانخوازی و دەسەڵاتویستیی دوو حیزبە گەورەکەی باشووری کوردستان بوو. ئەگەر ئەو ڕێککەوتنە نەبووایە دەیان و سەدان گەنجی دیکەی کورد دەبوونە قوربانی و دیاریش نەبوو تاوەکوو ئەمڕۆ هاتباین و شەڕی #داعش#مان کردبووایە، بەڵام ئەو ڕێککەوتننامەیە لە ساڵی 2009 بەدواوە، وردەوردە مرد. ئەوەی ئێستاش ڕوودەدات لێدانی دوایین بزمارەکانە لە تابووتەکەی.
پارتی زۆر هەڵەیە کە خۆی قایل دەکات بەوەی گوایە بەلاغی کۆتایی دوایین کۆبوونەوەی ئەنجوومەنی ناوەندیی یەکێتی، هەڵوێستی حیزبە هاوپەیمانە ستراتیژییەکەی نییە. چونکە ئەگەر وابووایە دەبووایە هەریەکە لە بەڕێزان حاکم قادر و لەتیف شێخ عومەر، دوو سەرکردەی باڵای یەکێتی، لەو کۆبوونەوەیەدا بەشدار نەبوونایە و جوابگۆی پرسیارەکانی ئەو ئەنجوومەنە نەبوونایە لەسەر دانووستاندنەکان لەسەر دانانی پارێزگارێکی نوێ بۆ #سلێمانی#. ئەنجوومەنێک سەرکردەکانی یەکێتی لە بەردەمیدا بکەونە جوابگۆیی، کەواتە شەرعیەتی هەیە و بەلاغەکانیشی دەبێ بە هێند وەربگیرێن.
ئەو بەلاغەی پارتیی قەڵسکردووە و مەکتەبی ڕاگەیاندنەکەی وەڵامیدەداتەوە، لە زۆر خاڵدا بە نەفەسێکی ناتەبایانە و توانجئامێز بەرانبەر پارتی نووسراوە. بەڵام لەو خاڵەدا کە باسی پێداچوونەوە بە پەیوەندییەکانی یەکێتی لەگەڵ حیزبە کوردستانی و ئێراقییەکان و بەتایبەتیش لەگەڵ پارتی دەکات، پێشنیازێکی خراپ و ناڕەوا نییە. چونکە مادام دەزانین ئەنجوومەنی ناوەندیی یەکێتی ئۆرگانێکی نزیکترە لە جەماوەرەوە لەچاو مەکتەبی سیاسیی ئەو حیزبە، مافی خۆیەتی قسەی جەماوەر و دەنگدەرانی حیزبەکەی بگەیەنێتە سەرکردایەتییەکەی. با واز لەوەش بهێنین کە عادل موراد چەند دەستی دەڕوات لەناو یەکێتیدا و لە باڵباڵێنیشدا سەر بە کام لایە، بەڵام خۆ ڕێی تێناچێت لە کۆبوونەوەیەکدا کە ئەندامانی ئەنجوومەنەکە تێیدا بەشداربووبن و حاکم قادر و لەتیف شێخ عومەریشی تێدابووبن، هەرچی لە بەلاغی کۆتاییدا نووسرابێت تەنیا ڕای یەک کەس بووبێت. کورد جوانی گوتووە دووکەڵ بەبێ ئاگر نابێت.
دەزانین کە داعش وایکرد باشووری کوردستان بکەوێتە هەلومەرجێکی هەستیارەوە. دەشزانین کە پارتی و یەکێتی لەو شەڕە میدیایی و سیاسییەی لە دژی یەکدی دەیکەن هیچ ڕەچاوی ئەو هەلومەرجەیان نەکردووە و حیزبایەتییان پێش کوردایەتی خستووە. ئەوەش لەو درۆ شاخدارانەدا ڕەنگیدایەوە کە میدیای سێبەری پارتی بۆ سەرکردەکانی یەکێتی درووستیان کرد و گوتیان ئەو سەرکردانە هانی مالیکییان داوە بودجە و مووچەی کوردستان ببڕێت، هەروەها لەو هێرشانەشدا بەڕوونی دەرکەوت کە لە بەلاغی کۆتایی کۆبوونەوەی ئەنجوومەنی ناوەندیی یەکێتیدا کرانە سەر پارتی. بەڵام هەرواش وەک چۆن پارتی و یەکێتی پێویستیان بە گۆڕان و یەکگرتوو و کۆمەڵە بۆ دەربازکردنی ئەم قۆناخە هەستیارە، ئاواش پێویستیان بە سەرلەنوێ پێناسەکردنەوەی پەیوەندییە دووقۆڵییەکانیانە، بۆ ئەوەی کۆتایی بەو دڕدۆنگییە بهێنن کە تەنیا توندئاژۆکانی نێو هەردوو حیزب لێی سوودمەند دەبن. [1]