کۆکردنەوە و ئامادەکردنی: ڕەحمان نەقشی

هاونیشتمانە بەڕێزەکان!
خەڵکی خەباتگێڕی کوردستان!
ئەندامان، دۆستان‌و لایەنگرانی حیزبی دێموکڕاتی کوردستان!
70 ساڵ لەمەوبەر لە ڕۆژێکی وەک ئەمڕۆدا (25ی گەلاوێژی 1324) حیزبی دێموکڕاتی کوردستان لەسەر دەستی ڕۆڵەی هەڵکەوتووی نەتەوەی کورد پێشەوا قازی محەممەدی نەمر دامەزرا بۆئەوەی بە شانازی‌یەوە ئاڵای خەباتی ڕزگاریخوازانەی گەلی کورد لە خۆرهەڵاتی کوردستان بخاتە سەر شانی ڕۆڵەکانی‌و نەوە لە دوای نەوە بە دەستی کۆمەڵێک لە فیداکارترین تێکۆشەرانی ئەم بەشە له ‌کوردستانی بسپێرێ. لەوساوە تائێستا ئەم حیزبە سەرەڕای هەموو کەندوکۆسپەکانی سەر ڕێگا، بە لێوەشاوەیی ئەرکی شۆرشگێڕانەی خۆی بە ئەنجام گەیاندوەو نەی‌‌هێشتوە ئاڵای خەباتی ئەم گەلە بکەوێتە سەر زەوی.
ئەگەر بمانەوێ بۆ ڕەمزی مانەوەو بەردەوامیی ئەم حیزبە لە مەیدانی بەربەرەکانیی پڕقوربانیی تێکۆشان‌دا بڕوانین پێش هەموو شتێک چەند هۆی سەرەکی خۆیان دەنوێنن: یەکەم،ئەوە کە پێشەواو هاوڕێکانی بە لێزانی‌و شارەزایی ئامانجەکانی کۆمەڵانی خەڵکی کوردستانیان لە بەرنامەی‌ حیزبی دێموکڕات‌دا گەڵاڵە کردوە، بەجۆرێک کە پاش تێپەڕینی نزیک بە سێ‌چارەکە سەدەش هێشتا لە هێڵە گشتی‌یەکان‌دا ئامانجی هەموو چین‌وتوێژە نیشتمانی‌یەکانی کۆمەڵی کوردەواریی تێدا بەدی دەکرێ. دووەم، ئەوە کە هەر بەوهۆیەی سەرەوە حیزبی هەموو خەڵکی کوردستان بووەو هەموو جۆراوجۆری‌یەکانی کۆمەڵ خۆیان‌و ئامانجەکانیان لەم حیزبەو بەرنامەی ئەم حیزبەدا دیتۆتەوەو هەربۆیەش لە هەموو بارێکەوە لە پشتی وەستاون. سێیەم، ئەوە کە له ‌درێژەی ڕێگادا ئەم حیزبە لە هەڵبژاردنی دروشمەکانی خەبات‌و دەست‌نیشانکردنی دۆستان‌و دوژمنانی‌‌‌دا وردو واقیع‌بین بووە. سەرەنجامیش ئەوە کە تێکۆشەرانی دێموکڕات له ‌دژواری‌یەکانی سەر ڕێگای خەبات نەپرینگاونەوەو “کەندوکۆسپ هەنگاوی پێ شل نەکردوون”.
حیزبی ئێمە لەو ڕێبازە دوورودرێژو پڕهەورازو نشێوەدا سەرکەوتنی گەورەی تاقی کردوونەوەو نوشوستیی تاڵیشی تووش هاتوون: گرنگترین ڕووداوی مێژووی خەباتی ڕزگاریخوازانەی نەتەوەی‌ کورد (دامەزرانی کۆماری کوردستان) لەسەر دەستی ئەم حیزبە پێک‌هاتوەو بەناوی ئەم حیزبەوە تۆمار کراوە، له ‌بەرامبەردا ڕووخانی کۆشکی هیوای کوردی هاتۆتە سەر ڕێ‌و سەری سەردارانی بەسەر سێدارەوە دیوە. چەندجار کەوتۆتە بەر هێرشی بەر‌بڵاوی پۆلیس‌و بەسەدان خەباتگێڕی ڕیزەکانی کەوتوونە بەندیخانەو حوکمی زیندانی درێژخایەن‌و تەنانەت ئیعدامیان بەسەردا سەپاوەو سەدانی دیکەیان پەڕیوەی هەندران بوون‌و ژیانی ئاوارەیی‌یان بەسەردا سەپاوه.‌ بەو حاڵە لە یەکێک لە ڕەشترین دەورانەکانی حکوومەتی دیکتاتۆری‌دا گۆمێ مەندی “جزیرەی ئارام”ی حەمەڕەزاشای شڵەقاندوەو بانگی “ئەی ڕەقیب هەر ماوە قەومی کوردزمان”ی بەگوێی بێ خەبەران‌دا داوە. چەندجار تووشی لێک‌دابڕان هاتوەو لەبەرامبەردا ڕووداوی وەک “وەسەریەک‌کەوتنەوەی بنەماڵەی گەورەی حیزبی دێموکڕات”ی تۆمار کردوە.
بەکورتی ئەم حیزبە سەرکەوتن‌و تێ‌شکانی زۆری دیون‌. بەڵام نە لەسەرکەوتن‌دا لەخۆ بایی بووەو نە لە نوشوستی‌دا چۆکی داداوەو تووشی بێ‌هیوایی هاتوە، هەر سەرکەوتن‌و پێشکەوتنێکی کردۆتە پردەبازی سەرکەوتنێکی دیکەو لە هەر تێشکانێک دەرسێکی خەباتگێڕانەی وەرگرتوە.
گەلی ئازادیخوازی کورد!
ئەو دەسکەوتانە کە حیزبی دێموکراتی کوردستان لە ڕێڕەوی 70ساڵە‌ی ژیانی خەباتگێڕانەی خۆی‌دا بەدەستی هێناون، بەرهەمی ڕەنج‌و تێکۆشانی تەنیا کۆمەڵێک‌و گرووپێک نین. هەرچەند بەڕواڵەت لە بەشی زۆریان‌دا ڕێبەری‌و کادرو ئەندام‌و فەرماندەرو پێشمەر‌گە فیداکارەکان خاوەنداری‌یان لێ‌دەکەن، بەڵام ئەو شانازییانە به ‌هەوڵ‌و هیممەتی چین‌وتوێژو دەستەو گرووپی جۆراوجۆری کۆمەڵی کوردەواری بەدەست هاتوون. ئەو زیندانییانە کە بەشێکی زۆر لە باشترین ساڵەکانی تەمەنیان لە چاڵەڕەشەکانی دوو ڕێژیمی پیاوکوژی پادشایەتی‌و ئاخوندی‌دا بەسەر بردوە، ئەو کەس‌وکارانەی شەهیدان‌و زیندانییانی سیاسی که ‌ڕەنجی دووری‌و تەنانەت لەدەستدانی ئازیزانیان قبووڵ کردوە، بەڵام قەت بەچۆک‌دا نەهاتوون‌و ڕێگایان نەداوە دوژمنانی ئازادی هەست بە سەرکەوتن بکەن، ئەوانە کە یەک یان چەند ئەندامی لەشیان لە مەیدانی بەربەرەکانیی چەکدارانە یان لەژێر ئەشکەنجەدا لەدەست داوە، ئەوانە کە “لەسەر وەتەن بێ‌وەتەن بوون”‌و ڕەنجی دووروڵاتی دەچێژن بەڵام قەت له ‌یادو غەمی گەل‌و نیشتمانەکەیان غافڵ نەبوون، ئەو ژنە تێکۆشەرانە کە سەرباری بەشی خۆیان لە خەبات بەشێک له ‌ئەرکی خەباتگێڕانەی پیاوەکانیشیان گرتۆتە ئەستۆ، ئەو مامۆستا ئایینی‌یە نیشتمانپەروەرانە کە له ‌تاڵترین ساڵەکانی زەبروزەنگ‌دا خۆیان ئەرکی حیزبی‌یان بەڕێوە بردوەو حوجرەو مزگەوتەکانیان کردۆتە قوتابخانەی پێگەیاندنی ڕۆڵەی بەجەرگی مەیدانی خەبات‌و بەکورتی هەموو ئەوانەی لە هەر ڕێگایەکەوە کۆمەگیان بە بەرەوپێش‌چوونی ئەم کاروانی سەروەری‌یە کردوە، هەرکامیان خاوەنی بەشێک لە شانازییەکانی مێژووی حیزبی دێموکڕاتن.
هاوڕێیانی خۆشەویست!
حیزبەکەتان حیزبی دێموکراتی کوردستان خاوەنی زۆر شێوازو نەریتی خەباتگێڕانە بووەو هەیە کە له ‌ڕابردوودا بوونە مایەی ڕێز‌و ئیعتیباری‌ ئەم حیزبەو درێژەدانیان لە تێکۆشانی لەمەودواشمان‌دا دەتوانێ کۆمەک بە چوونەسەری جێگەوپێگەی حیزب‌و سەرەنجام سەرکەوتنی ڕێڕەوی خەباتە ڕەواکەی بکا:
حیزب هیچ‌وەخت شێوەیەکی تایبەتی لە خەباتی بە تاقەڕێگا دانەناوەو ڕێزێکی زۆری بۆ خەباتی شارستانی داناوە، تێکۆشانی فکری‌و سیاسی‌و کۆمەڵایەتی بەتایبەتی نەخشی ڕووناکبیرانی بە ئەڵقەیەکی گرنگی خەباتی ڕزگاری‌خوازانەی نەتەوەکەمان زانیوە. حیزب پێی وا بووە چووکترین پاشەکشە بە ڕێژیمی دەسەڵاتدارو بەدەست‌هێنانی هەر داخوازێکی خەڵک بڕینی قۆناغێک لە خەباتە درێژخایەنەکەمانە.
ئەم حیزبە هەمیشە باوەڕی بە چارەسەری ئاشتی‌خوازانەی مەسەلەی کوردو تەنانەت چارەسەری هەموو گیروگرفتە ناوچەیی‌و نێونەتەوەیی‌یەکان لەڕێگای ئاشتی‌خوازانەوە هەبووه. بەڵام‌ هەرکات لەلایەن حکوومەتە سەرکوتکەرەکانەوە خەباتی چەکدارانەی بەسەردا سەپابێ قارەمانانە بەرگریی لە ماف‌و ئازادی‌یەکانی کورد کردوەو لەبەرامبەر زۆرو ملهوڕی‌دا تەسلیم نە بووە.
دەگەڵ ئەوەی هەمیشە باوەڕی به ‌مافی دیاریکردنی چارەنووس بۆ گەلی کورد هەبووە، واقیع‌بینانە هەلومەرجی خەباتی نەتەوەکەی خۆی هەڵ‌سەنگاندوەو دروشمی چارەسەری مەسەلەی کورد له ‌چوارچێوەی ئێران‌دا (خودموختاری یان فیدڕالیزم)ی هەڵگرتوە.
زانیویەتی کە بۆ بەدەست‌هێنانی ماف‌و ئازادی‌یەکانی کورد لە چوارچێوەی ئێران‌دا پێویستیی بە هاوخەباتی دەگەڵ گەلانی دیکەی ئێران‌و ڕێکخراوە سیاسی‌یەکانیان هەیەو لەو ڕێگایەدا هەوڵێکی زۆری بۆ لێک‌نزیک‌بوونەوەو تەنانەت هاوپەیمانی دەگەڵ حیزب‌و ڕێکخراوە سەرانسەری‌و ناوچەیی‌یەکانی ئێران داوە.
ئەم حیزبە هەمیشە باوەڕی بەوە هەبووە کە کورد نەتەوەیەکەو لەنێو چەند وڵات‌دا دابەش کراوە. بۆیە لە هەموو دەرفەتێک‌دا هەوڵی هاوکاری‌و هاودەردی دەگەڵ بەشەکانی دیکەی کوردستانی داوەو بەتایبەتی دەگەڵ باشووری کوردستان زۆر لاپەڕەی زێڕینی مێژوویی لەو بوارەدا تۆمار کردوون.
حیزبی دێموکڕاتی کوردستان لە کۆنەوە بایەخێکی شیاوی بە دیپڵۆماسی‌و هەوڵی ناساندنی مەسەلەی کورد بەدنیاو ڕاکێشانی پشتیوانیی نێونەتەوەیی بۆ لای مەسەلەی کورد داوەو لەو ڕێگایەدا سەرکەوتنی باشیشی بەدەست هێناوە. لەبیرمانە کە یەکەمین کۆنفڕانسی نێونەتەوەیی لەسەر مەسەلەی کورد له ‌پاریس بە هەوڵ‌و تێکۆشانی ڕێبەری شەهید دوکتۆر قاسملوو پێک‌هات‌و لەبەر ئەوەی پێش بەسترانی کۆنفڕانسەکە تێڕۆر کرا، ئەو کۆنفڕانسە پێشکەش بە یادی وی کرا.
خەڵکی تێکۆشەری کوردستان!
ئەگەرچی لە هەلومەرجی ئەمڕۆدا خۆرهەڵاتی کوردستان‌و بەگشتی هەموو ئێران لەژێر دەسەڵاتی دیکتاتۆریی کۆماری ئیسلامی‌دا کپ‌و بێ‌دەنگ دیارە. بەڵام بەدڵنیایی دەڵێین ئەم وەزعە ناتوانێ درێژخایەن بێ. ئەو هەورە ڕەشەی بەری ئاسمانی کوردستان‌و ئێرانی گرتوە سەرەنجام دەڕەوێ‌و خۆری ئازادی لە ئاسۆی وڵاتەکەمان وەدەر دەکەوێ. حیزبی دێموکڕات بەڵێن تازە دەکاتەوە کە به ‌ئیرادەیەکی پتەوترەوە ڕێگای وەدیهێنانی ئامانجەکانی ئێوە درێژە دەدا. بۆیە هیوامان ئەوەیە وەک هەمیشە پشتی بگرن، متمانەی پێ‌بکەن‌و ڕێگای پێشان بدەن. ئەم قافڵەیە بە هەوڵی هەمووان دەگاتە مەنزڵ‌و گومانیش نیە کە نەخشی بنەڕەتی بە هەوڵ‌و هیممەتی ئێوەیە.
له ‌70ساڵەی دامەزرانی حیزبی دێموکڕاتی کوردستان‌دا وێرای پیرۆزبایی لە هەموو خەڵکی کوردستان‌و دۆستان‌و دڵسۆزانی حیزب، سڵاوی وەفاو ئەمەگداری بۆ گیانی پاکی دامەزرێنەرو پێشەوای حیزب ‌شەهید قازی محەممەدو هەموو هاوڕێکانی دەنێرین‌و بەڵێن تازە دەکەینەوە کە تاسەر بە ڕێبازەکەیان وەفادار بین.
سڵاو لەگیانی پاکی هەموو شەهیدانی کوردستان‌و بنەماڵە سەربەرزەکانیان.
سڵاو لە زیندانییانی سیاسی قارەمانانی بەرەنگاری‌و بنەماڵە فیداکارەکانیان.
سڵاو لە هەموو خەڵکی کوردستان قەڵای هەرە قایمی دێموکرات.
سەرکەوێ حیزبی دێموکڕاتی کوردستان بۆ بەجێ‌گەیاندنی ئەرکە نیشتمانی‌و نەتەوەیی‌یەکانی.
کۆمیتەی ناوەندیی
حیزبی دێموکڕاتی کوردستان
25ی گەلاوێژی 1394 (16ی ئووتی 2015)

زۆر بەداخەوە بیستمان کە #شیفا گەردی#، ڕاگەیەندکاری لاو و بوێر و سەرکەوتووی تۆڕی میدیایی ڕووداو لە کاتی ڕووماڵکردنی هەواڵەکانی پڕۆسەی ڕزگاریی موسڵ‌دا بەهۆی تەقینەوەی مینێکی چێندراوی داعش شەهید بوو.
هەواڵی شەهیدبوونی شیفا گەردی هەموومانی خەمبار و دڵ‌بریندار کرد. ئەو لە کاتی گواستنەوەی هەواڵی سەرکەوتنەکانی هێزی پێشمەرگەی کوردستان بە دژی داگیرکەرانی کوردستان و، لە پێناو ئازادی، ئەمنیەت و ڕزگاریی نەتەوەکەی‌دا گیانی دانا.
ئێمە شەهیدبوونی شیفا گەردی بە خەمێکی گەورە و هاوبەش بۆ هەموو میدیای کوردیی دەزانین و پرسە و سەرەخۆشیی خۆمان بەو بۆنەیە ئاراستەی بنەماڵە و کەسوکاری شەهید شیفا گەردی، تۆڕی میدیایی ڕووداو و خۆمان و هاورێ و هاوکارەکانی دەکەین. هاوکات هیوادارین یونس مستەفا، ڕاگەیەندکاری دیکەی تۆڕی میدیایی ڕووداو کە لەو ڕووداوەدا بریندار بووە، بەزوویی ساغی و سڵامەتیی خۆی وەدەست بێنێتەوە.
ناوەندی ڕاگەیاندنی #حیزبی دێموکڕاتی کوردستان#
ئێوارەی شەممە، 25ی فێورییەی 2017ی زایینی
25-02-2017

هاونیشتمانە بەڕیزەکان
کۆمەڵانی خەلکی کوردستان،
کادر و ئەندام و پێشمەرگە قارەمانەکانی #حیزبی دێمۆکڕاتی کوردستان#
ئەوا جارێکی دیکەش جێژنی نەتەوایەتیی نەورۆز، جێژنی هاتنی بەهار، تازەبوونەوەی ساڵ و بووژانەوەی سروشت، جێژنی گەشانەوەی هیوا بەژیان و زیندوو بوونەوەی هێز و ورە بۆ دەستەبەرکردنی ئاواتەکان و ژیانێکی باشتر و شیاوتر، هاتەوە.
بەم بۆنەیەوە، لە لایەن دەفتەری سیاسیی حیزبی دێمۆکڕاتی کوردستانەوە، پڕ بە دڵ پیرۆزباییتان لێ‌دەکەم و ئاواتم ئەوەیە ساڵی تازەی هەتاوی بۆ ئێوە پڕ لە سەرکەوتن و شادی بێ. هەروەها هیوادارم بزووتنەوەی ڕزگاریخوازانەی نەتەوەی ئێمە بە گشتی و خەباتی خەڵکی ئێمە لە ڕۆژهەڵاتی کوردستان، بۆ گەیشتن بە ئازادی و ئامانجە ڕەوا نەتەوایەتییەکان، بە ئاکام بگا و چیدی خەڵکی ئێمە لە ژێر ستەم و ژێردەستی دا نەمێنێتەوە.
نەورۆز هەر وەک سروشت تازە دەکاتەوە، گیان و ورەیەکی تازەش وەبەر خەباتکارانی ڕێگای ئازادی دەنێ. لە کۆنەوە نەورۆز بۆ کوردان ڕەمزی خەبات و فیداکاری بە دژی سیستیمی زوڵم و ستەم بووە. ئێمە لە ساڵی نوێ دا لێبڕاوانەتر و دڵگرمتر لە پێشوو، خەباتی خۆمان لە پێناوی دابینکردنی مافەکانمان دا، بە دژی کۆماری ئیسلامیی ئێران درێژە دەدەین. ڕێکخراوەکانی حیزبی دێمۆکڕاتی کوردستان لە نێوخۆ و دەرەوەی وڵات، دڵنیاتان دەکەنەوە، کە بە ئامادەیی تەواوەوە ڕووبەڕووی ئەو بارودۆخە سیاسییە دەبنەوە، کە ئێستا لە وڵاتی ئێمە دا لە گۆڕێ دایە و لە هەر ئاڵوگۆڕ و قۆناخێکیش بۆ گەشەپێدان و بەرەوپێشبردنی ئامانجەکانمان کەلک وەردەگرن. لەو پێناوە دا خەباتی کۆمەڵانی خەڵک یان تێکۆشانی مەدەنی، کە لەو دا خەڵکی ئێمە بتوانن هەر چەشنە دەرفەتێک بە قازانجی باشترکردنی دۆخی ژیانی خۆیان بقوازنەوە و ویست و داخوازە مەدەنی و کۆمەڵایەتییەکانی خۆیان لە بەرامبەر سیستیمی دەسەڵاتدار دا بەرز بکەنەوە، بە شێوەیەکی گرینگی خەبات و ڕێگایەکی باش بۆ کردنەوەی بەشێک لە ئاستەنگەکان بەرەو سەرکەوتن دەزانین. هەر لەو کاتەش دا پێشمەرگەکانی حیزبی دێمۆکڕاتی کوردستان، زیاتر لە هەمیشە ئامادەیی ئەوەیان هەیە کە لە هەر شوێنێکی ڕۆژهەڵاتی کوردستان بەرگری لە هاونیشتمانانیان بکەن و هەر کاتێک بەرژەوەندیی وڵات و خەڵکی ئێمە بخوازێ، چەکدارانە بەرەوڕووی دوژمن ببنەوە، ئەرکی پێشمەرگایەتیی خۆیان بەجێ‌بگەیەنن و نیشتمانی خۆیان بپارێزن.
لەو بەینە دا، نابێ ئەوەمان لە بەرچاو ون بێ کە هاوکاری و یەکیەتیی کردەوەی هەموو ڕێکخراوەکانی ڕۆژهەڵاتی کوردستان مەرجی سەرەکیی دەرکەوتنی ئاسۆیەکی تەواو ڕوون بۆ خەباتی ئەو بەشەی کوردستانە و یەکیەتی و هاوهەنگاویی هەموو هێزەکان، هەم گوڕوتینێکی تەواوتر بە بزووتنەوەکەمان دەبەخشێ و هەم خەڵکەکەشمان یەکگرتووتر دەکا و بەرەو خەباتێکی شێلگیر و یەکلاکەرەوە دەیان‌بزوێنێ.
هەر لەو پێوەندییە دا پێمان‌خۆشە جارێکی دیکەش ئاماژە بکەین کە درێژەدان بە دابڕان و دوولەتی دە حیزبی دێمۆکڕات دا، نە لە بەرژەوەندیی بزووتنەوەی کورد بە گشتی دایە و نە حدک و حدکاش سوودی لێ‌دەبینن. بە پێچەوانەوە وەسەریەککەوتنەوەی بنەماڵەی دێمۆکڕات دەبێتە هۆی ئەوەی گرفتێکی گەورەی سەر ڕێگای خەباتمان بڕەوێ و دێمۆکڕاتێکی بەهێزتر لە مەیدانی خەبات دا هەبێ. ئێمە وەک حیزبی دیمۆکڕاتی کوردستان هەر وەک پێشتریش ڕامان‌گەیاندوە ئامادەین ئەو مەسەلەیە بە وەبەرچاوگرتنی ڕێزدانان بۆ مافی یەکتر، مەنتیق و ڕاستییەکانی نێو بزووتنەوەی کوردستان، چارەسەر بکەین.
بزووتنەوەی کورد بە گشتی لە هەر چوار پارچەی کوردستان، سەرەڕای هەوراز و نشێو و ئەو بارودۆخە ئاڵۆزەی بە هۆی دسستتێوەردانی زلهێزەکان، وڵاتە دراوسێکان، شەڕی داعش و هتد، لە ڕۆژهەڵاتی نێوەڕاست دا، پێک‌هاتوە، ئێستاش بە قۆناخێکی هیوابەخش دا تێ‌دەپەڕێ. هەرێمی کوردستان “باشوور”، کە تەنیا بەشێکی کوردستانە کە حکوومەتێکی فیدراڵیی تێ‌دا پێک‌هاتوە و جێگای هیوای هەموو کوردانە، بە داخەوە لەم چەند ساڵەی دوایی دا تووشی ناکۆکی و ناسازی لە نێوان حیزب و ڕێکخراوەکانی دا بووە، ئەوەش لە کاتێک دا، کە بێجگە لە شەڕی داعیش، کە زیانی گیانی و ماڵیی یەکجار زۆری لێ‌کەوتۆتەوە، قەیرانی ئابوورییش کەندوکۆسپی زۆری بۆ ئەو هەرێمە دروست کردوە، بەڵام بەو حاڵەش دەردەکەوێ هەرێمی کوردستان ئایندەیەکی سیاسیی ڕوونی لە پێشە و ڕەوتە دیپلۆماسی و پێوەندە نێودەوڵەتی و سیاسییەکان، نیشاندەری ئەوەن کە گەیشتنی کورد لەو پارچەیە، بە لووتکەی داخوازی خۆی، واتە سەربەخۆیی، لە دادێیەکی نەک زۆر دوور دا، دوورەدەست نیە.
لە باکوری کوردستان”کوردستانی تورکیە”، لە گەڵ ئەوەی کە پڕۆسەی ئاشتی لە ژێر شوێنەواری ئاڵۆزی و کێبەرکی نێوخۆیی و دەرەکییەکان دا لەبارچووە، جموجۆڵ و هەوڵەکان هەر وا گەرمن و مەسەلەی کورد هەر وا سەرباسی ڕۆژەڤی سیاسییە و ڕەوتی گەشەکردنی خۆی دەپێوێ.
لە ڕۆژاوا “کوردستانی سووریە”، کە تا پێش ئاڵوگۆڕەکانی نێو سووریە، خەڵکی ئەو بەشەی کوردستان مافی هاونیشتمانەتیشیان پێ ڕەوا نەدەبینرا، ئێستا کورد گەیشتۆتە جێگایەک کە کەوتۆتە بەر سەرنجی زلهێزەکان و لە هاوسەنگییەکان دا شوێنی دیارە. ئەو دەرفەتە نوێیانەی بە دوای ئاڵوگۆڕەکانی سووریە دا ڕەخساون، بەرهەمی گرینگ و مێژوویییان بۆ کوردی ئەو بەشە پێوە دیارە، کە هیوادارین بتوانن بە وریایی و هاودەنگی لە پێناو گەیشتن بە مافی ڕەوای نەتەوایەتیی خۆیان دا کەلکی لێ‌وەرگرن.
هاونیشتمانە بەڕێزەکان
ناوچەی ڕۆژهەڵاتی نێوەڕاست کە کوردستانی تێ‌دا هەڵکەوتوە، بە خێرایی گۆرانی بە سەر دادێ و حیزبی ئێمەش هەوڵ دەدا لە هەر ئاڵوگۆرێک کە لە وڵات و ناوچەکەمان دا ڕوو بدا، بە قازانجی ئامانجی ڕەوامان کەلک وەرگرێ. دیارە لە هەر بارودۆخێک و هەر بەراوەرد و هاوسەنگییەک دا، نەتەوەی ئێمە پشت بە هێزی خۆی و بایەخە مێژویی و نەتەوایەتییەکانی خۆی دەبەستێ، هەر وەک ئەسڵی سەربەخۆیی سیاسی بناخەیەکی جێگیر و نەگۆڕی حیزبی دێمۆکڕاتی کوردستانە.
جارێکی دیکەش نەورۆزتان پیرۆز بێ و ساڵی نوێ، ساڵی سەرکەوتن و بەختیاریمان بێ.
مستەفا مەولوودی
سکرتێری گشتیی حیزبی دێمۆکڕاتی کوردستان
نەورۆزی 1396ی هەتاوی
20-03-2017

2012

ئامادەکردن و کۆکردنەوەی: ڕەحمان نەقشی

[1]

[1]