برای بەڕێزم کاک حازم #تەحسین بەگ#
بەڕێزان تەواوی ئەندامانی بنەماڵەی بەڕێزی میر تەحسین سەعید عەلی بەگ
سڵاوێکی برایانەی گەرم...
بەخەم و پەژارەیەکی زۆرەوە هەواڵی کۆچی دوایی میر تەحسین بەگ میری ئێزیدیخان و تەواوی ئێزدییانی جیهانمان پێگەیشت، کۆچی دوایی میر تەحسین بەگ هەموو لایەکمانی خەمبارکرد، بەناوی خۆمان و ئەندامانی مەکتەبی سیاسی و کۆمیتەی سەرکردایەتی و تەواوی ئەندامانی یەکێتی نەتەوەیی دیموکراتی کوردستان YNDK پرسەو سەرەخۆشی گەرمی خۆمان ئاراستەی بەڕێزتان و بنەماڵە سەربەرزەکەتان و جڤاتی ڕۆحانی ئێزدی و تەواوی ئێزدیانی کوردستان و جیهان دەکەین و خۆمان بە هاوبەشی خەمتان دەزانین.
بێگومان میر تەحسین بەگ ڕۆڵێکی کارای هەبوو لە ئاشتەوایی کۆمەڵگا و قوڵکردنەوەی زیاتری گیانی برایەتی و بەیەکەوە ژیان لە نێو پێهاتەکانی کوردستاندا، بۆیە لەدەستدانی کەسایەتییەکی وەک میر تەحسین بەگ زیانێکی گەورەیە بۆ تەواوی پێکهاتەکانی کوردستان، ئومێد دەکەین ئەوە دواناخۆشیتان بێت و لە یەزدانی مەزن دەپاڕێینەوە میر تەحسین بەگ بخاتە بەر ڕەحمەت و دلۆڤانی خۆی و دڵنەوایی و ئارامییش بە هەموو لایەک ببەخشێت.
لەگەڵ ڕیزی دووبارەماندا.
براتان
#غەفوور مەخمووری#
سکرتێری گشتیی
یەکێتی نەتەوەیی دیموکراتی کوردستان YNDK
#28-01-2019#

بۆ خانەوادەی بەڕێزی #میر تەحسین بەگ# و سەرجەم ئێزدیانی کوردستان و جیهان
بەداخەوە ئەمڕۆ هەواڵی کۆچی دوایی (میر تەحسین بەگ) میری ئێزدیانی کوردستان و جیهانمان پێگەیشت.
بۆ ئەو کۆچە ناوادەیە، پرسە و سەرەخۆشی خۆم ئاڕاستەی خێزان و خانەوادەی کۆچکردوو و سەرجەم خوشک و برا ئێزدیەکانی جیهان بەگشتی و عێراق و کوردستان بەتایبەتی دەکەم.
کۆچی دوایی میر تەحسین بەگ خەسارەتیکی گەورەبوو بۆ ئێزدییەکان کە هەمیشە قوربانیانداوە لەپیناو ناسنامە و نەتەوەیی بونی خۆیان ڕووبەروی جینۆسایدو سەرکوتکردن بونەتەوە، لە پەروەردگار داواکارم، کۆچکردوو بە بەهەشتی بەرینی خۆی شاد بکات و سەبوری و ئارامی و دڵنەوایی بە خێزان و کەس و کار و ئێزدییەکان ببەخشیت.
#شاناز ئیبراهیم ئەحمەد#
#28-01-2019#

ئەمڕۆ #17-08-2022# لە مەکتەبى سیاسى #پارتى دیموکراتى کوردستان#، #فازڵ میرانى# سکرتێرى مەکتەبى سیاسى پێشوازى لە (میر حازم میر تەحسین بەگ)، میرى ئێزدیانى کوردستان و ئێراق و جیهان کرد.
لە دانیشتنەکەدا، کە #هۆشیار زێبارى# ئەندامى مەکتەبى سیاسى، و مەحمود ئێزدى ئەندامى سەرکردایەتى پارتى دیموکراتى کوردستان ئامادەبوون. وێڕاى بەخێرهێنانى میوانان، سکرتێرى مەکتەبى سیاسى تیشکى خستە سەر ڕەوشى ئێراق و کوردستان و دوا پەرەسەندنە سیاسییەکان و ئالەنگارییەکان.
سکرتێرى مەکتەبى سیاسى باسى مێژووى پێکەوەژیانى ئاشتیانەى نێوان سەرجەم ئایین و ئایینزاکانى هەرێمى کوردستانی کرد، کە جێگاى شانازییە، جەختى لە ڕەسەنایەتى کوردانى ئێزدى کردەوە، کە هەمیشە جەنابى سەرۆک #مەسعود بارزانى# تەئکید لەو ڕەسەنایەتی کوردانى ئێزیدى دەکاتەوە.
سکرتێرى مەکتەبى سیاسى، جەختى کرد کە پشتیوانى هەموو ئەو هەوڵ و ڕێککارە دەستوورى و یاساییانە دەکەن، کە پارێزگارى لە پێگە و نوێنەرایەتى برا ئێزدییەکان دەکات، بە گرینگی زانی ڕێککەوتنى #شەنگال# وەکوو خۆى جێبەجێ بکرێت.
لە لاى خۆیەوە میر حازم میر تەحسین بەگ سوپاسى سکرتێرى مەکتەبى سیاسى کرد بۆ ئەم پێشوازییە گەرمەى کە لێیان کرا، و باسى مێژووى پێکەوەژیانى ئاشتیانەی لە هەرێمى کوردستان کرد، و هیواى خواست کە کوردستان هەر لە پێشکەوتندا بێت. [1]

لە ساڵی 1944ەوە میری ئێزیدیەکانە، کە دوای مردنی باوکی لە تەمەنی یانزە ساڵیدا ئەو پۆستەی پێسپێردراو “مایان خاتون”ی دایکی تا تەمەنی میر گەیشتە 18 ساڵی سەرپەرشتیی دەکرد. میر سەرۆکی دنیایی ئێزیدیانە و نوێنەرایەتیان دەکات لەهەمو کۆڕ و کۆبوونەوەکان و پەیوەندییان لەگەڵ وڵاتان و تائیفە و خێڵەکاندا.
میر تەحسین جگە لەزمانی کوردی، عەرەبیی و ئینگلیزیی و فارسیی دەزانێت. ساڵی 1962 بۆ یەکەمجار چوەتە ئەوروپا و بۆ ماوەی ساڵێک لەبەریتانیاو ئەڵمانیا نیشتەجێ بووە. لەسەرەتای دەیەی 1970دا بەشداریی لە بزووتنەوەی ڕزگاریخوازی کورددا کردووە و دوای هەرەسی 1975یش ئاوارەی وڵاتی ئێران بووە، پاشان ڕوویکردووەتە لەندەن و لە ساڵی 1976ەوە تا ساڵی 1981 لەوێ ماوەتەوە، لەو ساڵە بەدواوە لەلایەن ڕژێمی سەدامەوە لێبوردنی بۆ دەرکراوە و گەڕاوەتەوە ئێراق.[1]
ڕۆژی #28-01-2019# لە نەخۆشخانەیەکی شاری هانۆڤەری ئەڵمانیا کۆچی دوایی کرد و ڕۆژی #04-02-2019# تەرمەکەی هێنرایەوە باشووری کوردستان و لە #شێخان# بەخاکسپێردرا.[2]

بەداخ و پەژارەیەکی زۆرەوە هەواڵی کۆچی دوایی بەڕێز (#میر تەحسین بەگ#)، میری کوردانی ئێزیدی-مان لە جیهان پێگەیشت، کە بەهۆی نەخۆشیەوە کۆچی دواییی کرد.
بەم بۆنە خەمناکەوە، پرسه و سەرەخۆشی لە کوردانی ئێزیدیو کەسوکارو بنەماڵەی میری ئێزیدیان دەکەین، هاوبەشی خەمو پەژارەی هەموولایەکین.
میری تەحسین بەگ، وەک میری ئێزیدیان ڕۆڵی گەورەی هەبووە لە پرسە نیشتمانیو کۆمەڵایەتیەکان، چەترێکی گەورەی پێکەوەژیانو ئاشتی بووە بۆ ئێزیدیانو هەموو پێکهاتەکان.
ڕۆحی شادبێتو ئومێدەوارین ئەوە دواناخۆشی کەسوکارو بنەماڵەکەیان بێت.
مەکتەبی سیاسی #یەکێتیی نیشتمانیی کوردستان#
#28-01-2019#
⚠️ تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!

بە خەمگینییەوە بیستمان کە دوایین نوێنەری سازیی میرایەتیی باوەڕیی کۆمەڵگەی ئێزدی #میر تەحسین بەگ# کۆچی دوایی کردووە. کۆچی میر تەحسین بەگ هەموو گەلەکەمانی خەمگین کردووە. ئێمە بۆ کۆچی دوایی میر تەحسین بەگ سەرەخۆشی لە خانەوادەکەی و تەواوی کۆمەڵگەی ئێزدی دەکەین، هاوبەشی خەم و ئازارەکانیانین.
تاکە داوای میر تەحسین بەگ ئەوە بوو کە کۆمەڵگەی ئێمەی ئێزدی لەنێو یەکێتی و هاوبەشایەتیدا بژی. کۆمەڵگەی ئێزدیمان مەگەر تەنیا بە یەکێتی کێشە ناوخۆییەکانی چارەسەر بکات، ڕێگری لە فەرمان و هێرشەکان بکات. میر تەحسین بەگ-یش بەم باوەڕی و زانابوونە هەڵسوکەوتی کرد و گرنگی بە یەکێتی و پێکەوەیی ئێزدییەکان دا. هەر بۆیە پێویستە نوێنەرانی باوەڕی و سیاسیی کۆمەڵگەی ئێزدیمان پابەند بمێننەوە بەم داوایەی میر تەحسین بەگ و له و ڕێیەدا بۆ یەکێتی و یەکبوونی کۆمەڵگەی ئێزدی خزمەت بکەن و ببنە و لە ئاستی یادەوەری ئەودا بن. هەمیشە میر تەحسین بەگ ویستوویەتی کۆمەڵگەی ئێزدیمان کە هێشتا برینەکانی فەرمانی شەنگالی نوێن، یەکێتیی خۆی بونیاد بنێت، خۆی بپارێزێت و بتوانێت ڕێ لە فەرمانی نوێ بگرێت. میر، هەمیشە پشتگیری ئەوەی کردووە و لەپێناویدا هەوڵی داوە. بۆ جێبەجێکردنی ئەم داوا و ئامانجەی میر تەحسین بەگ، ئەرکی سەرشانی هەر تاکێکی ئێزدییە کە شەنگالی خۆسەر و دیموکراتی بپارێزێت و بە ئامانجی بگەیەنێت. ئێمە بەم بۆنەیە جارێکی دیکە ئەم ئەرک و بەرپرسایەتییەی ئێزدییەکان وەبیردێنینەوە.
بە ناوی کەجەکە، جارێکی دیکە ڕایدەگەیەنین کە هاوبەشی خەمی کۆمەڵگەی ئێزدین بۆ میر تەحسین بەگ. سەرەخۆشی ئاراستەی تەواوی کۆمەڵگەی ئێزدی و نوێنەرانی باوەڕی و سیاسییان دەکەین.
#30-01-2019#