ئازیزم زەردەن...
زەردی ڕوخسارو میرزا ئۆلقاڎری، جە نەوەشی نېیەن، زەردیش جە خەمو خەفەتو دووری ئازیزیەن، جە نیشتەی تەپودووکەڵو هەناسەیشەن، ئاڎ ماچۊ: کاغەز کەی پېسە من زەردەن، کەی دەردەو هیجرانیش زانێنە، زەردی من سرووشتی نېیەن، گرەۋش جە زەعفەرانی بەردەن.
تەپو دووکەڵو هەناسەی سەردیش، پۊژنانش ساراو دەروونیش، بە مەڵامەتو ئانەیچ دڵش دلۍ دووکەڵینە گوم بېیەن، مەر یادو ئازیزی بزانۊ ئیسە ماواو مەنزڵش جە کۊن، مەر یاڎو ئازیزۍ پېسە شەماڵو سەرکاوانی، یان چوون نەسیمو سەر ڕوۊی شەتاوان، وېش دۊ بەو دەربەن سیای جەنگەڵدا، بېزۊشۆو پەیش بارۊوە، وەرنا تا مەحشەر مەر ئاهۍ سەردېش پەی هۊرکېشۊ.
ئازیزم زەردەن ئازیزم زەردەن
ڕاسەن کاغەزم وەی ڕەنگە زەردەن
قەسەم هەر به و کەس بېهەمتای فەردەن
جە ڕەنگ زەردی من نموونەش بەردەن
زەردیم زەردی ڕووی مەجنوونەکەی تۊن
زەردی ئېڎ کامەن زایفیش جە کۊن
شېوەی ڕوخسارم هەر ئەوەند زەردەن
گره و جە زەردی زەعفەران بەردەن
سەرتاپام تەمام ئالوودەی دەردەن
باغات شاڎییم خەزانش کەردەن
کاغەز کەی چوون ڕەنگ شېوەی من پېشەن
من زەردم ماچان زەردی ئه و چېشەن
یە زەڕڕەی هەواڵ زەردی من فامان
پەوکی ڕووزەردی یاران پېش ئامان
ئەر یەک ڕۊ چوون من نەونەمامی نۊ
بکېشۊ جەفای دەرد دووری تۊ
سەهلەن ڕوو زەردی سیاهی چارە
وە مەرگت قەسەم مەبۊ سەد پارە
باری هەی ئازیز دڵ پەسەندیدەم
ڕەوشەنی دیدڎەی ڕەمەق ڕەمیدەم
ئەر پەرسی عومرم چەنی ویاران
(بە وینەی) ئەحواڵ مەردەی مەزاران
دڵ چەنی زامان هەر جۊش مەدڎا جۊش
نەوینی بە چەم نەشنەوی وە گۊش
تەپو دووی دووکەڵ دووخان دەردم
کزەی دەمەی وشک هەناسەی سەردەم
پۊشان دەشت و دەر هەوارگەی دەرون
نادیار کەردەن دڵەی پەڕ جە هوون
مەر هەر یاد تۊ ئەی ئاوات وەستەم
بزانو جە کۊن دڵەی دەر بەستەم
بەیۊ چوون شەماڵ ڕۊح ئەفزای کاوان
یا خۊ چوون نەسیم لەب ڕوی شەتاوان
وېش دۊ به و دەربەند سیای جەنگەڵدا
به و ڕەشماڵ تاڵ چاڵ دووکەڵدا
جە نۊ یانەی دڵ دیسان چەنی هەم
جاڕوو دۆجاری دووخانەکەی خەم
وەرنە تا مەحشەر دڵ ئاهش سەردەن
نادیار دەم دووخانەی دەردەن
فدڎای یادت بام سا کۊن کەی تاکەی
دڵ مەبۊ وە گەرد تا یاد تۊ بەی
یادم کەر وە یاد ویەردەی جاران
وە یاد بەینەت شەرت و شۊن داران
ئەر سەد کەوە یاد قەدیمت شادم
دیسان با نەشۊ یادت جە یادم
سەڵح هەر ئیدڎەن وە یادم باری
یادت یارم بۊ پەی یادگاری
ئەر یادت ببۊ نەونەمام نۊ
ئەی هوو خەیلەوەن هام وە یاد تۊ
شەوان تا وەڕۊ یادم جە لاتەن
دەک وە ڕەحمەت بۊ مەعدومی واتەن
چ حاجەتەن دەس پەی قەڵەم بەروون
یادم نمە شی چەنیت یاد کەروون.[1]