باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و ویس و هەشتەمە
کاروانەکە، سەلمانشا ۋست گەلو وېشا، ڕانە یاوێ بە سیاماڵێ، سەلمانشا ۋرەتۍ پەنە، کابرێوە یەهوودی ئەسا، پەی چن ساڵێ خزمەتشانە بۍ، ڕوێشا سەلمان خەریکو کەندەیۆ خورماوا بۍ، ساحیبە یەهوودیەکەش بنەو دار خورماوەکەینە، چەنی کەسێ باس جە ئامای پېخامئاوەری کەرېنۍ، سەلمان وەستەرە، پەرساش چەنەشا، بەڵام خاوەنە یەهوودیەکەش یەک شەقەزللەش ماڵا پۊرە، واتش ئانە کەی کارو تۊن، بچۊ بە لای کاری وېت، بەڵام دماتەر مامۊزاکەش ئاماو سەلمانش ئەساوە، بەردش پەی مەدینەی.
کاروانیی تەمام ئیقرار کەردشان
وە شەرتی زامن سەلمان بەردشان
تا یاوان جایێ خېڵێ ڕەشماڵدار
ئیسمی ئەو وەڵات (وادی القرار)
کاروانی سەلمان فرۊشان وە پووڵ
داشان وە عوسمان یەهوودی دەمقووڵ
بە ئەمری قودرەت پادشای مەعبوود
چن ساڵ خزمەت کەرد، سەلمان بەو یەهوود
جە دمای چن ساڵ عەموزادەی ئەو
ئاما جە یەسرب وە دەوانی دەو
سەلمان جە عوسمان خەرید کەرد دەردەم
بەرد پەی مەدینە ئاوای موککەڕەم
سەلمان نیگاه کەرد بەودەشت و دەردا
بەو شار بازار کووچە و گوزەردا
جە ئەو نەخلستان بەرگی حەریردا
بەو مەکانی خاس خاکی دڵگیردا
پاسەش مەزانا، هیچ غەریب نییەن
مودام چن ڕوژێ جەی وەرتەر دییەن
هەمینی مەشغووڵ بیی وە باغەبانیی
وە خزمەتکاری وە جان ئەفشانیی
سەلمان جەو دەمدا وە جوهد و جەختێ
تا شیی وە باڵای بەرزی درەختێ
ئیتیفاق ئەو ڕوژ جەو سەرزەمینە
تەشریفی حەزرەت یاوا مەدینە
جە خورمای ڕەتب دەس کەرد بە چنین
پەی بەچە و عەیال یەهوودی بۍ دین
خواجەی ساحیبش گومڕای ناشنەفت
نیشتەبۍ بە شاڎ جە سایەی درەخت
جە ناگاه ئەو شەخس ئیبنی عەمی ئەو
پېڎابی جەو دەم بە دەوانی دەو
واتەن: مەنمانان خەزرەج وە ئەوەس
یەکسەر جە قەبا، موران دەس وە دەس
گرد ئەدەب وېنەی خواجەی غولامان
پەی شەخسی تازە جە مەککە ئامان
لافی نبووەت مەدەرۊ بە وېش
موعجیزەی تەمام جە ئەنبیای پېش
سەلمان جە باڵای ئەو درەختی بەرز
شنەفت ئەی خەبەر جە یەهوودیی وەی تەرز
نزدیک بیی جە گرد دڵ سەر وە گوزار
جە شاڎیی دەرسات وېش بوزۊ بە وار
تاکە پەلە پەی ئاما بە زەمین
پەرساش جە یەهوود پلیدی بۍ دین
وات: ئانە تۊ خوڎا نامی کۍ بەردی
کین تازە ئامان تۊ بەحسش کەردی
خواجە جە غەزەب سېلە دا وە لېش
قیامەتش دیی، ئەو بە دیڎەی وېش
واتش: ئەی فزوول تا چن بۍ عاریی
ساتۊ وەی حەرفە چە کاری داریی
بشۊ کاری وېت بکەر سەر ئەنجام
چە دەخلی داریی چەنی خاس و عام.[1]