باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و نەوەڎ و هەشتەمە
حەزرەت وتارێش پەی وانێوە، مۊچیاریش کەردۍ، باسو تاک و تەنیایی خوڎای گۆرەی، دەسەڵاتەکاش، ڕەحمو بەزەییش، قەهرو تووڕەییش، دەسەڵاتو خەلق و زەمینی و ئاسمانەکا، خاوەنو بەهەشت و دوزەخی، داواشا وەنەکەرۊن ئەمر بە مەعرووف، نەهی جە منکەر بکەران.
ئەوەڵ وات: خوڎا زاتش حەققەن
بۍ دوس و شەریک فەردی موتڵەقەن
قەدیمەن قادر عەلیمەن دانا
وینا و شنەوا گۊیا و تەوانا
سازان حەفت تەبەق ئاسمانی ساف
بەرزی بۍ ستوون بۍ چلە و تەناف
بنازوون بە سونع ڕەبولعالەمین
سازان وە تەرکیب هەفت تەبەق زەمین
هەشت بەهەشتی پاک ڕیزوانی گوڵزار
هەفت تەبەق دوزەخ تاریک فیلنار
قەرار دان بېچوون بۍ هەمتای غەففار
بەهەشت پەی موئمین دوزەخ پەی کوففار
من هەر بە خوڎای واحید مەنازوون
تەوفیق ئەو مەدۊ بە ئەو مەسازوون
هیچ نېیەن ئیللا غەیر جە حوکمی ئەو
شەو مەبۊ وە ڕوژ مەبۊوە وە شەو
بېشەریک بېڕەنگ بېقەوم و خوېش
چونکە (لا الە الا الله) ن وېش
جە ئەو تەمەڼای ئەمری زش داروون
عەتا و لوتف ئەو وە چەم مەداروون
موقەڕڕەبی حەق زاتی ئیلاهیی
بە واحیدی ئەو مدەون گەواهیی
پەی بېکەسان کەس کەریمەن کارساز
بەخشندەن بېباک دانای بۍ نیاز
خوسووس محەمەد یەکێ بەندەشەن
عەبدی جیرەخور ئەرامەندەشەن
کیاستەن پەرێ ڕای ڕاسی موستەقیم
پەی ئەمری تەبلیغ جە دینی قەدیم
حوکمی ڕیسالەت بنمانوون چەی دوون
بسازۊ مەسجید، بتخانان نگوون
ڕاست بەروو بە سەر، من چەنی ڕاسان
دوشمنم چەنی خوڎا نەشناسان
چونکم زەمانەی سابیق وېیەردەن
ڕای ئەنبیاهان تەمام گوم کەردەن
دانش کەم بېیەن، نادانی پەیدا
سەنەم پەرسی، بېیەن هوەیدا
ڕای شەقام مەسدوود گومڕاهان زیاد
ڕەنجی ناسیحان گرد دریان وە باد
هەرکەس جە فەرمان خودا و پېغەممەر
جە ڕووی نادانی بەربشۊ وە بەر
فەردای قیامەت دوزەخ جاش مەبۊ
زبانەی ئاتەش ئارامگاش مەبۊ
هەر کەس وە ڕای بەڎ نەکەردەن گوزەر
ئەمر بە مەعرووف نەهی ئەز مونکەر
بەهەشتی باقی جاویدان جاشەن
سەڎ حوری نە تۊی حەرەم سەراشەن
وەسیەتم ئېدەن دایېم پەی یاران
لوتف و خوداوەند بە چەم بداران
دیسان وەسیەتم ئېدەن جە هەستی
خاستەر هیچ نېیەن جە حەقق پەرسی
وەسیەتم ئېدەن پەی موسوڵمانان
واجیبەن کەلام خوڎا بوانان
پارېزکەن وە دڵ جوان تا وە پیر
جە گۆناحی بەڎ سەغیر و کەبیر
بتەرسین جە قەهر سەختی ئیلاهیی
تۊبەکەن تەمام گرد جە مەناهیی
مەبۊ ساعیی بان ساعەت بە ساعەت
جە غەزای کوففار جە حەج جە تاعەت
حەقق ئېوەش بە دین ئیسلام سروشتەن
ئینشاڵڵا بۍ شک جاتان بەهەشتەن
جە فیعلی شەیتان دایېم حەزەر کەن
باوەڕ بە خودا و وە پېغەممەر کەن
شەوان تا وە ڕۊ یادی خودا کەن
جە شەریکی نەفس وېتان جودا کەن.[1]