باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و حەفتا و ششەمە
ئەبوجەهل کەوت قینیرە، هوزو قوڕەیشیش هاگاڎارۍ کەردێ، ماچۊ: هەرکەسێ محەمەد و ئەبوبەکرم بە زیڼەیی یان مەردەی پەی بارۊن، سەڎ حوشترۍ عالېش خەڵات کەروون، جوانەکۍ قوڕەیشی نەمێ شمشېر، پەی تەماعۍ کەوتۍ گېڵای شۊنیشارە. کەسێ جە قوڕەیشیەکا کە (شۊنپا) ئەشناس بۍ، چەنی وېشا بەردشا، بە شۊنپاکارە لوێ، غەڵەتشان نەکەرد تاکو یاوێ وەردەمو مەڕەو سەوری.
جەو دما لەعین شیی نە جامەی قار
حوکم کەرد قوڕەیش هەم ئەحمالی شار
واتش: محەمەد مەبۊ وە تەحقیق
چەنی ڕەفیقش بووبەکری سیدیق
هەرکەسێ ئەوان پەرێم باوەرۊ
یا زیندە، یاخۊ قەتڵشان کەرۊ
من یەکسەد وشتر خاسەن شاهانە
مەبەخشوم پەنەش جە شوتر خانە
جەوانان جەلەدی قوڕەیشیی و عەرەب
دەس دا بە شمشېر بە شاڎی و تەرەب
یەکسەر پەی تەماع مەردان و نامەرد
عەزمی قەتڵی ئەو دوو فریشتە کەرد
کافرێ لەعین دېو پەر سامێ
(شۊن پا) شوناس ئەبو گورز نامێ
دەرسات ئەبوگورز چەنی وېشان بەرد
شۊنپای یاران یەکیەک مەعلووم کەرد
ساچوون ئەبوگورز ئەو شۊنە بەردش
تا پای غاری سەور غەڵەت نەکەردش
چەودەم خوداوەند تاکی تەنیای فەرد
جە قاپی ئەو غار دارێ ئیجاد کەرد
شاخ و بەڵگش گرد یەمین و یەسار
بیی بە حیجاب پەی ئەندەروونی غار
ئەمر کەرد یەکسەر عەنکەبووتی کوە
دەربی ئەو غارە تەندەن دامی نوە
تەقدیری حەقق چن کەبووتەر ئاوەرد
لانەشان سازا، گرد بەیزشان کەرد
ڕای موری نەمەن وە ئەمری بېچوون
بشۊ یا بدیۊ نە تۊی غاری دوون.[1]