باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و شەسس و یەکەمە
ئەبووبەکر تەدارەکش پەی کۊچی ئاماڎەکەرد، دوۍ حوشترېش ئەسێ پەی وېش و حەزرەتی، لوا خزمەتو حەزرەتی، داواش کەرد وەنە پەی کۊچی، حەزرەتیچ فەرماواش: جارێ پەلە مەکەر، کۊچ بە دەسو وېمان نېیەن، مەشۊم زاتو حەققی فەرمانمان پەنەکەرۊ.
ناگاە، جەو دەمدا، سیدیقی ئەکبەر
کەردش تەدارەک جە نۊ پەی سەفەر
تا شیی وە خزمەت شای خەیرولبەشەر
عەرزکەرد ڕوخسەتم بدەر پەی سەفەر
حەزرەت فەرماوا: جارێ تامڵ کەر
بزانین تەقدیر دانای دادگەر
چوونەن چە تەورەن ئیرادش چېشەن
مانیعی ڕوخسەت وە دەستی وېشەن
منیچ پەی سەفەر ئومېڎەوارم
دایېم پەی سەفەر دڵ بېقەرارم
بەڵ بە ئیتیفاق هەردوو چەنی هەم
بەرشین جە تەوردام قەومی بەینەت کەم
سیدیقی ئەکبەر کەردش تەدارەک
تەهیە ئەی سەفەر ڕاگەی موبارەک
فەوری خەرید کەرد دوو ئوشتر جەو دەم
یەکێ بە مەبلەغ چوارسەڎ درهەم
یەکی پەی حەزرەت، یەکێ هەم پەی وېش
هەردوو نیگاە داشت بۍ خەوف و ئەندېش
خزمەتشان مەکەرد، هەر سوب تا ئېوار
بەڵکە جەو سەفەر خاس بەیان وە کار
جەو تەرەف گومڕای بەڎ خەیاڵ
بۍ خەبەر جە کار زاتی بۍ زەواڵ.[1]