باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و پەنجا و پەنجەمە
دمای قسەکا ئەسعەد بن زەرارەی، حەزرەت ئاما گوفتار، فەرماواش مەشۊم شمە پابەڼۍ بیدۍ بە دینو ئیسلامیۆ، خاسە کەردۍ و دوورۍ گندێ جە خرابەی، دماتەر چن ئایەتێ جە قورئانی شەریفش پەی وانێوە، ئاڎییچۍ پەیمان و وەفاشا بەستە کە دڵسوزۍ دینەکەی و هەم محەمەدی بان.
ئیبی زەرارە عەرزش کەرد تەمام
کەوت نۊبەی حەزرەت عەلەیهی سەلام
فەرماوا ئەوەڵ شەرت پەی ڕوزگاران
قەییومی قادر پادشای شاهان
باوەڕتان ببۊ وە تای بېهەمتا
ڕەسمی عیبادەت باوەردۍ وە جا
هیچ غەیری شەریک نەسازین پەی ئەو
ڕۊشەن بەخشی ڕۊن، تاریک ئەفزای شەو
وەیتەور فەرماوان دەهەندەی داوەر
ئەمر بە مەعرووف نەهی بە مونکەر
دوەم شەرت بکەن سەخت نەبۊ لېتان
جە نەفس و هەوا و عوسیانی وېتان
وە هەر تەورێ ئەو مەحفووز مەداران
منیچ هەم بەو تەور نیگاه بداران
جەو دەم چن ئایەت جە بەحسی کوففار
حەزرەت جە قورئان وانا پەی ئەنسار
جە ناگاه ئەنسار بٲمرالله
یەکیەک عەرز کەردەن یا ڕەسوول الله
چە تەور بەیعەیت کەین ئېمە چەنی تۊ
بفەرما پېمان دیسان هەم جە نۊ
فەرما بەیعەت کەن وە جاڼساریی
بە ئەمری نەهی فەرمان بەرداریی
ئەر قسمەت منش ئاوەرد وە لاتان
گېڵیا دنیا و دین وە حوببی خواتان
هەر تەور پەی مایەی ڕەواجی وېتان
پەی ماڵ و ئەزواج ئەولادی وېتان
دڵتان پەی ئەوان هەر تەور ماوەرۊ
مەبۊ پەرێ من فیشتەر باوەرۊ.[1]