باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و پەنجا و یەرەمە
دمای ئانەی چن کەسێ جە موسوڵمان و گاورەکا شارو مەدینەی ئامێ پەی تەوافو کابەی، داواشان وەنەکەردۍ کە پەیمانێ ببەسان چەنی حەزرەتی، چونکم گەرەکشەن مەککە شاری جیابازۊو جە مەدینە شارەنە نیشتەجا بۊن، ئا قسۍ (عەباس) مامۊ پېخامئاوەری کەردۍ پەیشان.
نەلەخشا عەبباس سوخەن ئاغاز کەرد
دوڕ ئەفشانی کەرد چوون فەریزەی فەرد
فەرما کە ئەی قەوم ئەوس و خەزرەج
ئەی ئەهلی تەواف حاجیانی حەجج
بەحسی محەمەد برازادەی من
شەهەنشای میللەت گروی ئینس و جن
حەرفێ مەواچوون ئېوە خوداتان
حەرفی من دیشوار نەبۊ جە لاتان
عالەم مەزانۊ قەومش ئەفزوونەن
قوربی محەمەد جە مەککە چوونەن
ئیدیعان مەنسەب کەعبە وە وېشەن
شەریفی ڕەفیع قەومی قوڕەیشەن
ئېمە گرد یەکسەر تایفەی هاشم
ئەوها جە لامان چوون ماهی ئەنجووم
جە شەڕی ئەعدا نیگامان کەردەن
چوون بت دائیمەن سوجدەمان بەردەن
خولقش کەریمەن شانش عەزیمەن
عەزیزی ئەشراف گردین حەلیمەن
جە مەککەی شەریف عارزیی دارۊ
مەیلش ساکینی مەدینەن ئارۊ
خەیاڵش ئېدەن شای شیرین شېوە
دوور گنۊ بە قەوم، نزدیک بە ئېوە
ئەر ئېوە تەسدیق ئەو کەردەن بە دڵ
ئاوەردەن بە ئەو ئیمانی کامڵ
داعیەی هەوا خواهی ها پېتان
محەمەد ببەن وە ماوای وېتان
مەبۊ میساقێ دروست چەنی ئەو
چوون عەهدی قەدیم پەیمان کەن ئېمشەو
تاکە جەو سەبەب ئېمشەو جەی مەنزڵ
بکەرین لېتان ئیتمینان حاسڵ
مەقسوودم ئېدەن ئەو نەگنۊ زەحمەت
نەکېشۊ تەنگیی جە موڵکی غوربەت
تایەفەی یەهوود گرد جە لای ئېوەن
هام موڵک، هام جەوار، هامسایی ئېوەن
چەنی محەمەد جە ڕوژگاران
یەکیەک چوون خەنزیر عەداوەت داران
جە مەکری ئەوان، کەس ئەمین نېیەن
کەی وەی تەورە یەهوودش دییەن.[1]