باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و چل و نۊهەمە
دماتەر ئەهلو خەزرەجی دواڼزە نەفەرۍ تەرېشا کېیاستۍ پەی خزمەتو حەزرەتی، بە بۊنەو تەوافو کابەیۆ، ئامێ پەی مەککەی، چاگە یاوێ بەخزمەتو ڕەسوولی نازاری، دمای ئانەی پەیمانشا دا پەنە کە خزمەتو ئیسلامینە بان، گېڵێوە پەی ماواو وېشان.
تایەفەی خەزرەج گرد ئیمان ئاوەرد
دینی پېغەممەر وە دڵ قبووڵ کەرد
دە و دوو نەفەر خاسەی شەرەفناک
ئەهلی مەدینە مونەوەری پاک
وە عەزمی تەواف کەعبەی موعەزەم
ڕاهیی بین نە ڕاە بۍ زیاڎ و کەم
یاوان وە پابوس شای خەیرەلئەنام
فاییز بین تەمام وە دینی ئیسلام
بە قەولی حەزرەت بەیعەت کەردشان
سوجدەی زاتی پاک واحید بەردشان
جە ئەمری فەرمان خوڎا و پېغەممەر
مادامەلحەیات بەرنەشان وە بەر
ئەساسی یاران ئەو دە و دوو کەس
ئەو ئەرواحی پاک مەسیحای نەفەس
ئېدەن بەیان کەم دیسان هەم جە نۊ
بادا نامشان فەرامۊش نەبۊ
ئەوەڵ جار ئەسعەد ئیبنی عیبادە
سانی هەم ئەسعەد خودا پۍ دادە
سالیسەن هەم عەوف چوارەمین موعاز
ئەولادی غەفران مەردانی داوخواز
پەنجەمین ڕافع ششەم هەم مەنزەر
هەفتەمین یەزێد شیری شەر نەسر
هەشتەم عەتبە شیرین عامر
مەردی ڕووی مەساف نایابی نادر
نوهەم قوقەیبە باشی سەربازان
دەهەم جەدیدە شای تیر ئەندازان
یاڼزەهەم شیری چوون ئەبولهاشم
دواڼزەهەم عەویم چوون بەرقی ئەنجووم
یانە یەکایەک گرد بەیعەت کەردەن
بە خوڎا و ڕەسوول ئیمان ئاوەردەن
جە ئەمری فەرمان خوڎا و پېغەمەر
میسقالە زەڕە هیچ نەشان وە بەر
ڕوخسەت جە حەزرەت تەڵەب کەردشان
هەم پەی مەدینە تەشریف بەردشان.[1]