$بیرکردنەوە؛ لە زەمەنی (دوای-راستی)دا$
نووسینی: #ڕابەر تەڵعەت#
یەکێک لە خاسیەتەکانی سیاسەت لە وڵاتە قەیراناویی و دەسەڵاتخوازەکانی ئەم ناوچەیە، بەرهەمهێنانی زۆرترین توندوتیژیی زمانەوانیی و دەربڕین و بەرزترین وروژاندنی سۆزداریی و گۆشکردنی جەماوەرییە لە ڕێگای دەستبەردار بوون لە پرسیار و لێکدانەوەی ئەقڵانی، دوورکەوتنەوە لە ئەقڵانییەتی تاکەکەسی و چوونە پاڵ ئەقڵ و ڕەفتار و پەرچەکرداری جەماعی و جەماوەریی. لە کۆمەڵگاکانی هاوشێوەی ئێراق و کوردستان، قەیران لە چۆنیەتی مامەڵەکردن لەگەڵ قەیراندا هەیە، ئەقڵیەتی خوێندنەوە و تێگەیشتنی ناواقیعی بۆ قەیران و سیاسەت وایکردووە دەرچوون لە قەیران قورس بێت و بارگرانی کێشەکانیش لەسەر خەڵک و سیستەم چەند بەرابەر بێت.
لە سەردەمی دوای ڕاستیدا(The Post truth) ئەوەی بەدرۆی دەزانین ڕەنگە ڕاست بێ، ئەوەش کە بەڕاستی دەزانین ڕەنگە درۆ بێ. دواجار کەس نازانێ ڕووی ڕاستی و درۆ کوێیە، هەر لە بنەڕەتەوە شتێک نییە بەو ناوانە، ئەوەی هەیە بریتییە لە خەیاڵ و باوەڕی ئێمەی مرۆڤ. ئێمە تەنیا پێمانوایە، بەڵام نازانین خۆیان وان یان نا! مرۆڤایەتی بەگشتی لە قۆناغی دوای ڕاستی و ڕاستگۆییدا دەژی، هەموو ئەوەی دەیبینی و دەیبیستی، ئەگەر بە پێچەوەوە بۆی بڕوانی لەوانەیە شتێکت بۆ دەربکەوێ! بۆ نموونە دوژمنەکان لەوانەیە بە تەنیا هەڕەشە نەبن بۆ سەر یەکتر، بەڵکوو ئەکرێ مایەی مانەوە و ژیان و هێزی یەکتریش بن.
ڕەخساندنی کۆمەڵگایەکی باشتر و ژینگەیەکی باشتر بۆ ژیان؛ پێویستی بە بیرکردنەوەی زیاتر و بەرهەمهێنانی پرسیاری زیاتر هەیە. سیاسەتی باش دەتوانێ وا لە خەڵک بکات کەمتر ئازار بکێشن و باشتر بژین، سیاسەتی خراپ وا لە خەڵک دەکات زۆرتر چاوەڕوان بن و زیاتر ئازار بکێشن. مرۆڤ بۆ ژیانێکی باشتر، ڕێگاکان دەگۆڕێت و ڕێگای تر تاقی دەکاتەوە، بەڵام ئەوەی پێویستە بکرێت گۆڕینی بیرکردنەوە و تێڕوانینە بۆ ژیان و بۆ ڕووداوەکان، درووستکردنی زۆرترین پرسیارە لەسەر دیاردەکان. بۆ نموونە؛ درووستبوون و لێکهەڵوەشاندنەوەی حزبەکان، لەدایکبوونی هەموو حزبێکی تازە و دابەشبوونی خەڵک و دەنگدەرەکانیان، تەنیا تاقیکردنەوەی ڕێگایەکی تر و ڕەنگێکی تر و دەموچاوێکی دیکەیە، چونکە تێگەیشتنمان بۆ ژیان و بوونی خۆمان ناگۆڕن، بەڵکوو باوەڕمان بە و کەس و کارەکتەرانە دەگۆڕن کە کۆنتڕۆڵی ژیانی ئێمەیان بەدەستەوەیە، تەنیا گواستنەوەی ئیمتیاز و توانایی و دەسەڵاتە لە گروپێکەوە بۆ یەکێکی تر.
چی دەتوانێ ئازارەکانی مرۆڤێک کەمبکاتەوە؟ چۆن دەتوانین باشتر بژین؟ وڵامەکەی لای خۆمانە! ئەو کوردەی لە ڕێگای داهێنانێکەوە بیر لە چارەسەرکردن و بنەبرکردنی کێشەی کارەبا دەکاتەوە، ئەو دەرمانسازەی خۆی بە دۆزینەوەی چارەسەریی بۆ شێرپەنجە تەرخان کردووە، ئەو ئەندازیارەی بیر لە دابینکردنی سەرچاوەی وزەی بەدیلی نەوت و گاز دەکاتەوە، ئەو سەرمایەدارەی ئاوەر لە داهێنانەکانی ئەوان دەداتەوە و لەسەر ئەم خاکە گەشەی پێدەدات، ئەوانەن دەتوانن ژیان لەسەر ئەم سەر زەمینە باشتر بکەن، ئازارەکان کەمتر بکەنەوە و کورد بکەن بە فریادرەسی مرۆڤایەتی نەک بار بەسەر مرۆڤایەتییەوە. هیچ نیشتیمانێک بەبێ ئەم تێگەیشتنە گەشە ناکات، هیچ ڕێگایەک باشتر نییە لە و ڕێگایەی کە ئازار کەمدەکاتەوە و خۆشگوزەرانیی زیاد دەکات.
بۆ ئێمە کە لە زەمەنی (دوای-راستی) دا دەژین، وتن و نەوتنی ڕاستییەکان، نە هیچ بەهایەکیان هەیە و نە هیچیش لە %