باخچێوە بېگەرد
نویستەی: میرزا ئۆلقاڎرو پاوەی
بەشۍ: پەنجا ونۊهەمە
دمای مارە بڕیەی (ئامینۍ) پەی عەبدوڵڵای، کناچێ پاشاو شامی بە نامۍ (فاتمە)ی، کە شارەزاو کتېبە ئاسمانییەکا بۍ، هەم شارەزاو زانستو هەسارەکا بۍ، عیلمش پانەیەبۍ، کە جە نەوەکا عەبدولموتەلیبی، پېخامئاوەرو ئاخر زەمانی پېڎامەبۊن، پەوکەی بە نیازو هامسەرگیری چەنی عەبدوڵڵاو کوڕو عەبدولموتەلیبی، بە چڼ کاروانۍ جۆهەرات و ڕزق و ڕۊزی، ڕووەو شارو مەککەی جمارە:
چەو دما، شەخسێ، (فاتمە) نام، بۍ
فەرزەندی عەزیز، پادشای شام، بۍ
بە عیلمو نجوومی، تەمام هۊشیار، بۍ
خەیر و شەڕ جە لاش، تەمام دیار، بۍ
مەزانا، دنیا، ئەمنی و ئەمانەن
واڎەی، پېخامبەر، ئاخر زەمانەن
جە تەڵەب، شەخسێ ساحېب موراقېب
یەکێ، جە ئەولاد، عەبدولموتەلېب
جە ئەو زەمانە، مەبۊ، بۊ پەیدا
وەقتەن، جە عالەم، ببۊ هوەیدا
خولاسەی، کەلام، مەلیکە شامی
شای، نازەنینان، نامیدە نامی
هەفت قەتا، شوتور، خەزېنەی مەدفوون
یەغدان، گرد لەبڕېز، جە دوڕیی مەکنوون
دانەی مروارید، یاقووتی، ئەڵماس
پەسەندیدە، تەبع، جەواهېرشوناس
گەنجی جەواهېر، هەزاران، هەزار
فەرما، قەتارچی، قەتار، کریا، بار
بادیەی بەیدا، عەرەبستان، تەی کەرد
تا، مەنزڵ، وە لای شاری، مەککە بەرد
سالاری ڕەندان، دەلیلی، ڕەمکېش
هۊردا، بارەگای خەیمە، سەرای وېش
چەو دەم، عەبدوڵڵا، جە ڕاگەی شکار
موراجەعەت، کەرد، ئاماوە، پەی شار
ناگاﮪ، بانووی شام، دیلیش ئاسا
گەوهەرشوناس بۍ، هەم گەوهەرناسا
ئاخر، کەرد نە جا، والی زادەی، بەڕ
خەرامان، وە ناز، چوون لەولاوی، تەڕ
شیی گرتش جڵەو، عەبدوڵڵا، وە ناز
واتش: پیا بەر، ئەی یاری دەمساز
عەبدوڵڵا جە ئەسپ، یا، ئاوەردەوە
چەنی دوڵبەر، شیی، وە تۊی پەردەوە
تەکدا، بانی فەرش، ئاڵای ڕەنگاوڕەنگ
خەیلێ، حەیران مەند، جەی دەستگای قەشەنگ
ناگاﮪ، ئەو شەخسە، دەست بەرد پەی سەرپۊش
چوون هەور نە ڕووی مانگ، نیقاب وست نە دۊش
وېش بە عەبدوڵڵا، زەریف نمانا
چەند گەنجی گەوهەر، چەند ئەفسوون، وانا.
[1]