Gêlo Îsa
Rast e em di nava şerekî dijwar de jiyan dibin, li pêş dagirkerên gelê kurd yên sedsalan em pê re rû bi rû di şerekî de ne, ev şer şerê hebûn û tunebûna me ye, şerê dagirkirina herêma me û berevaniya wê ye, her wiha şerê tunebûn û hebûna pirojeya me ye.
Em li pişt ewqas serkeftin û destkeftiyan gavan paş ve navêjin, di siberojê de wê dewleta Tirkiyeyê jî bi tev çeteyên Itîlafa Sûrî di Efrînê de têk biçin, kesên biyanî ji vî welatî tev çeteyên xwe nikarin Efrînê bi rê ve bibin. Destwerdana li ser serweriya Efrînê ji encama li hevkirina dewletên herêmî û bi piştgirî yan bi erêkirina hinek dewletên navnetewî pêk tê, ta ku karibin herêmên di dest hêzên çekdar de wek herêmên rojhilatê Şamê radestî rêjîmê bikin û ji çekdaran vala kirin. Dewleta Tirk tev Itîlafa Sûrî di qonaxa borî de, herêmên di dest opozîsiyonê de hêdî hêdî radestî rêjîma Sûrî kirin, ev lîstokên Rûsiya, Sûriya, Êran û Tirkiyayê ne, ta ku opozîsiyona Sûrî jî li ser zemînê bê rol bihêle û vala derxe. Ev bi sponseriya dewleta Tirk bi rê ve diçe, ta ku di êrîşên wan yên li ser Efrînê de, çav jê re bên girtin, di nava lihevkirina van dewletan de divê dewleta Tirk raperîna gelê Sûrî li ser asta siyasî û leşkerî vala derxe, ji ber ku kurd û artêşa xwe ne di bin bandora opozîsiyonê de bûn û li gor berjewendiyê gelê xwe têkoşîna xwe bi rê ve dibirin. Dewleta Tirk her fişar li ser civaka nevdewletî dikir ku rola kurdan lewaz bike, helwesta rêveberiya rojava ku dikeve xizmeta kêşeya kurdî pûç bike û pirojeya kurdî lewaz bike. Bê guman ev şêwazê qirêj bi serweriya dewleta Tirkiyê ve li dijî tevahî pêkhateyên Sûriyê bi rê ve diçe. Planên li ser Efrînê di wê çarçoveyê de ye, lê li Efrînê ev şêwaz bi rê ve neçû û berxwedanek bê hampa hat diyar kirin, ji ber ku hêzên li herêmên dîtir yên Sûrî ku xwe ji herêmên cûr be cûr vekişandin berê xwe dan parêzera Idlibê û di bin sîwana çeteyan de xwe bi rê ve dibirin.
Ew çete bê proje ne, tenê teror û diziya xwe bi rê ve dibin û piştî ku derbasî navenda Efrînê bûn diha ji aliyê gel û cîhanê ve helwesta wan diyar bû , her wiha dewleta Tirk bi van kiryarên qirêj ku opozîsiyona Sûriyê tê wer dike, ji bo dawî li raperîna gelê Sûrî di bingeh de bîne. Lê belê li Efrînê rewş cuda ye, şoreşa 19'ê Tîrmehê hîna didome û şervanên azadiyê jî hîna li ser xwe ne. Gelên bakurê Sûriyeyê li gel hev li ser piyan in û nexşeya Efrînê ya şerekî demdirêje, lê rikberên Sûrî yên têkçûyî, dixwaze me jî wek xwe lewaz bikin û raperîna gelê Sûrî bê wate hîştin, ji bo ku armancên dewleta Tirkiyê û dewletên kendava erebî pêk bînin. Ji ber vê yekê jî Itîlafa Sûrî çeteyên xwe xistin bin bandora artêşa dagirker û terora xwe di herêma Efrînê de bi rê ve dibin. Her wiha bi destê van dewletan, Itîlafa Sûrî di qadên navdewletî de xwe kir nûnerê rikberên Sûrî, vîna gelê Sûrî xistin destên xwe, planên xwe yên qirêj domandin û fişar li ser tevahî hêzên welatparêz kirin. Ta ku wan bi tevahî bê rol bihêlin, karibin planên dewletên herêmê li ser gelê Sûrî pêk bînin, ji ber vê yekê jî êrîşa li ser herêma Efrînê ji wê planê pêk tê. Her wiha rikberên Sûrî vîna gelê Sûrî ji dest girtin û bi destê dijminê gelê Sûrî xistin. Armanca vî şerî ew e ku vîna me di projeya demoqratîk de û di sîstema federal de têk bibin, ta ku destkeftiyên di destên gelê me de ji dest bên girtin, ji bo ku di pêşeroja Sûrî de em wek gel careke din bê par bimînin .Çawa di heman demê de rojava dikaribû planên dewleta Tirk vala derxistana, wê bi vîna gelê me di berxwedana serdemê de careke din dagirkerên Tirk vala derxe, gelê me terora Erdoxan napejirîne şêwazên şer û êrîşkirina li ser çeteyan wê were guhertin û wê bi xwe re derbasî siberoja Sûrî bike.[1]