باخچێوە بېگەرد
ئاماڎەکەرڎەی: ئەسعەد ڕەشید
بەشې دواڼزەهەمە
میرزا ئۆلقاڎر باس جە ژیوای و ئیمانداری (جن)ەکا مەکەرۊن، هەکە تایفێوەشان لاشادان و جە دینو ئیسلامی دوورې کەوتېنێ و دمایی خوڎای گۆرەی غەزەب متېنې ملەرە. چین چین ئامێ هەتا یاوا بە عەهدو (تارەمووش)ی، کە شەیتان تەعرې و خرابې بېنې، خوڎای تەعالای دلېنە بەردې:
یا حەقق جە دەرگات، بېکەس نەبۊ بەخ
ئەو چین بې وەرچین، بنچینەی دۊزەخ
دیسان چنێ تەر، پدەر توون بە توون
تیفلانی مەعسووم، دامنەی سبحوون
هەم گروو بەستەن، کەردشان توغیان
جە مەعسوومی ویر، ڕوو وەلای عوسیان
هەر چەند خوڎاوەند، تاکی تەنیای فەرد
ئیزهاری عوسیان، ئەهلی دۊزەخ کەرد
ئەوان، خۊ فېشتەر هەر گومڕا مەبین
وە فیعلی قەبیح، ئاشنا مەبین
تا کە خوڎاوەند غەزەب گرڎ لېشان
عەزابی ئەلیم نمانا پېشان
غەرەز چینێ تەر، تایفەی بېعار
چوون مۊر و مەلەخ، ئامان، وە ڕووی کار
خوڎا تاعوون کەرد، پەرېشان نازڵ
مەلبووس بین، وە دەست ئەسفەل بین واسڵ
هەم چینێ مشتێ، وە دەوانی دەو
چینێ تەر ئاما، مەنیشت نە جای ئەو
خولاسە چین چین، شکیا، ئارەزووش
تا یاوا ئەوچین، عەهدی (تاری مووش)
تارەمووش ئەرشەد، ئۆ لادی جان بې
حوکمش وېنەی ئاو، جاریی ڕەوان بې
یەک فەرزەندێ داشت، خەیلێ مناڵ بې
تەمام نوکتەوان، ساحیب کەماڵ بې
جە ئەسڵی مەعنا، ئیبلیس نامش بې
عاقڵان تەمام، حەڵقە، دامش بې
فیتنەو خوڕەد مەند، خەیلێ شەروور بې
قولچماخ، داییم، وېش جە شەڕ دوور بې
نە عیلم، نە کەشف، نە کەرامات بې
عالمان، یەکسەر، جە عیلمش مات بې
جاری با ئیبلیس، فارغ بۊ پەی وېش
بېچارەی فەقیر، جە کار مەیۊ لېش
سا چوون، (تارەمووش) ، چەنی (بن جانی)
گشت کەمەر بەستەن، وە نافرمانی
پادشای شاهان، قەدیمی قاییم
کەریمی عەزیز، حەکیمی داییم
قەتڵ و عامی گشت، بن جانی فەرز کەرد
سەد هەزار مەلەک، ڕەوانەی ئەرز کەرد
وە یەک نیم نەفەس، ئەهلی ڕەوحانی
بڕیشان ئاسار، تۊخمی (بن جانی)
تارەمووش جە تاو، تاوی زەمهەریر
تاریان، وە توون، دووخانەی سەعیر.[1]