פריט זה לפי כורדיפדיה של תקנים עוד לא נגמר עדיין!

پێنج ساڵ لەمەوبەر، گەلی کوردستان و سەرجەم عیراقییەکان، پرۆسەی دیموکراسی و ئاشتی و پێکەوەژیان لەوڵاتەکەماندا ڕابەرێکی هەڵکەوتوو و تێکۆشەر و پێشمەرگەی زیاتر لە نیو سەدە خەباتی ڕزگاریخوازی و دیموکراسیان لە دەستدا، عیراقی دیموکرات و فیدراڵیش یەکەمین سەرکۆماری هەڵبژێردراوی بەرەو کاروانی جاویدانی و نەمری بەڕێکرد.
سەرۆک #مام جەلال# لە ماوەی زیاتر لە شەست ساڵی بێوچاندا خەباتی هەمەلایەنەی کرد بۆ سەلماندن و بەدیهێنانی مافە ڕەوا نەتەوەیی و دیموکراسییەکانی گەلی کورد و پیادەکردنی بژاردەی دیموکراسی و دادپەروەری و پێکەوەژیان لە عیراقدا.
ئەزموونی چەندین ساڵەی سەرۆک مامجەلال لە خەباتی دیپلۆماتیدا، لە مێژووی کوردایەتی هاوچەرخ و هەتا خەباتی ئازادیخوازانەی گەلانی ناوچەکەدا وێنەیەکی دەگمەنی پەیوەندییەکان بوو لە ئاستی میللەتانی ڕۆژهەڵات و ڕۆژئاوادا و بناغەی پتەوی ئەو دەستکەوتە دیپلۆماتیانە، ڕەوایی و ڕەسەنایەتی مەسەلەی کوردی لە ڕۆژهەڵاتی ناوەڕاستدا دووپات دەکردەوە.
لە دوا وێستگەی ژیانی سیاسیشیدا سەرۆک مام جەلال لە پێگەی پارێزەری دەستوورەوە هەمیشە خاڵی کۆکەرەو و ڕاگرتنی هاوسەنگی بوو، هەڵبەتە ئەمڕۆش دوای ساڵێک لە هەڵبژاردنەکانی پەرلەمانی عیراق و هەلومەرجی چەقبەستنی پڕۆسەی سیاسی لە بەغدا و لە هەرێمی کوردستانیش، زیاتر لە هەر کاتێکی تر دروستی دنیابینی سەرۆک مام جەلال لەسەر بنەماکانی تەوافق و شەراکەت و هەماهەنگی نێوان هێز و لایەنە سیاسییەکان دووپات دەبێتەوە و پێویستە ئەو بنەمایانە ببنە ڕێنوێنی تێپەڕاندنی قەیرانەکان بۆ چارەسەری کێشەکانی وڵات و پێکهێنانی حکومەتێکی کارا کە ئەولەویەتی خزمەتکردنی هاووڵاتیان و باشکردنی ژیان و گوزەرانیان بێت. هەر ئەمڕۆش یەکێتیی نیشتمانیی کوردستان بە سەرۆکایەتی هەڤاڵ بافڵ جەلال تاڵەبانی دەستپێشخەر و داکۆکیکاری سەرسەختی ئەو پرەنسیپی سازان و پێکەوەییە.
لە ساڵڕۆژی ماڵئاوایی سەرۆکی نەمر مام جەلالدا ئەوە بە بیر هەموو لایەک دەهێنینەوە کە ئەمڕۆ لە هەموو ڕۆژێک زیاتر یەکێتییەکەمان، گەلەکەمان و ڕێبازی دیموکراسی ناوچەکە و عیراق بەتایبەتی، پێویستی بە حیکمەت و ئەزموون و دونیابینی سەرۆک مام جەلالە کە لە ڕێگەیەوە سوود لە حیکمەت و ڕێبازی چەپکەگوڵەکە و پێکەوەژیان ببینین بۆ دەرچوون لە بەربەست و قەیرانەکان، چونکە ڕێباز و دونیابینی مام کەلتورێکی سیاسی و میراتێکی شۆڕشگێرانەی دەوڵەمەندە و هەموو لایەک دەتوانن دەرس و وانەی لێ وەر بگرن.
سڵاو لە ڕۆحی پاکی سەرۆک مام جەلال
قامەتی مێژوو و ستوونی پتەوی نیشتمانپەروەری
نەمری بۆ هەموو شەهیدانی یەکێتی و گەلی کوردستان
مەکتەبی سیاسیی
#یەکێتیی نیستمانیی کوردستان#
#03-10-2022#
[1]