‎بەناوی خوای گەوره و میهرەبان
‎کەسوکاری سەربەرزی شەهیدە نەمرەکان
‎پێشمەرگە قارەمانەکان
‎کەمئەندامانی سەنگەر و زیندانیانی سیاسی
‎بە خۆشحاڵییەکی زۆرەوە، لە دۆخێکی یەکجار دژوار و هەستیار، کە کوردستان و عیراق و ناوچەکە پێیدا تێپەڕ دەبێ، #یەکێتیی نیشتمانیی کوردستان# بە سەرکەوتوویی کارەکانی چوارەمین کۆنگرەی ئەنجامداو سەرۆکی ئەنجومەنی باڵای سیاسی و ئەندامانی ئەنجومەنی گشتی هەڵبژاردو توانی دەستکەوتێکی تری گەورە بخاتە سەر خەرمانی خەباتی خۆی و درێژەپێدەری ڕێبازی پیرۆزی شەهیدان و هەڤاڵ #مام جەلال# بێ.
‎بەستنی چوارەمین کۆنگرەی یەکێتیی نیشتمانیی کوردستان لەدوای کۆچکردنی مام جەلال کارێکی یەکجار قوڕس بوو، هەموومان لەبەردەم بەرپرسیاریەتی گەورەی مێژووییدا بووین، دەبوو هاوتەریب کار بۆ بەستنی کۆنگرەیەکی یەکێتییانەی سەرکەوتوو بکەین و دەستکەوتەکانیشمان بپارێزین و لە بەرامبەر خوێنی هاوسەنگەرانمان و کەسوکارە تێکۆشەرو قارەمانەکانیاندا بە ئەمەک بین، دەبوو کۆنگرەی یەکێتی ببێتە وێستگەیەکی گرنگ بۆ نوێبوونەوەی یەکێتی و هێنانە پێشەوەی خوێنی تازه و کارکردن بە فۆڕمێکی نوێی حزبایەتی کە تازەیە بۆ ناوچەکە.
‎یەکێتییە تێکۆشەرەکان...
‎زۆر کەس لای وابوو بەستنی کۆنگرە لای یەکێتییەکان بۆتە مۆتەکه و لەدوای جەنابی مام جەلال هیچ کەس ناتوانێ گرەنتی بەستنی کۆنگرەیەکی یەکێتییانەی یەکگرتوو بکات، زۆرکەسیش گرەویان لەسەر لەتبوونی یەکێتی دەکرد، بەڵام دواجار بە هەوڵ و هیمەتی هەموو دڵسۆزان، بە بەشداری سەرجەم یەکێتییەکان چ ئەوانەی لەناو هۆڵی کۆنگرە بوون و نوێنەرایەتی ناوچه و دەڤە ڕە جیاوازەکانیان دەکرد، چ ئەوانەی پەرۆش بوون بۆ سەرکەوتنی کۆنگرەکە، توانیمان لەژێر دروشمی نوێبوونەوە کۆنگرەی چوارەمی یەکێتیی نیشتمانیی کوردستان سازبکەین فۆڕمێکی تازەی حزبایەتی و سەرکردایەتییەکی نوێ بۆ یەکێتی هەڵبژێرین و هەموومان پێکەوە دەست لەناو دەست بۆ خزمەتکردنی کوردستانیان و جێبەجێکردنی بەرنامەکانی یەکێتیمان لەپێناو ئایندەیەکی ڕوون و ئاشکرادا.
‎کوردستانیانی خۆشەویست...
‎دوێنی یەکێتی حزبی گەڕاندنەوەی ئومێد و هیوا بوو بۆ کوردستان، یەکێتی بوو دڕی بە تاریکی شەوە زەنگ داو لە کات و ساتە ناخۆشەکاندا، لە ڕۆژانی هێرش و داگیرکاریدا لە چرکەساتەکانی بەرگری کردن لە دەستکەوتەکاندا، بۆ خزمەتکردنی کوردستانیان و بەرگری کردن لە مافەکانیان، بۆ بەرەوپێشبردنی دیموکراسی و مافی مرۆڤ، بۆ مافی چارەی خۆنووسین و لەپێناو کوردستانێکی سەربەخۆو دیموکراسیدا، هەمیشە یەکێتی بووەتە قەڵغان و لە سەنگەری پێشەوەی بەرگری بووە، بۆیەشە هەموو هێزو لایەنە سیاسییە کوردستانییەکان و لایەنە عیراقییەکان و وڵاتانی ئیقلیمی و جیهانیش بە ئومێدەوە لە یەکێتی دەڕوانن و چاوەڕوانن تەواوبوونی کۆنگره و گۆڕانکارییە نوێکان یەکێتی بباتە قۆناغێکی نوێی خەبات، ئێمەش لە یەکێتی نیشتمانی کوردستان وەک هەمیشە لەپێناوی بەرژەوەندییە باڵاکانی گەلەکەمان، دۆستایەتی و هاوپەیمانێتی خۆمان لەگەڵ هێزو لایەنە سیاسییە عیراقی و کوردستانییەکان لەسەر بنەمای شەراکەتی ڕاستەقینه و هاوبەشی لە بڕیاردان و پاراستنی دەستکەوتەکان و بەدەستهێنانی مافەکانمان بەردەوامی پێدەدەین و فراوانتریان دەکەین.
دووپاتیشی دەکەینەوە کە بە وەفاو ئەمەک دەبین بەرامبەر خوێنی شەهیدانمان و درێژەپێدەری ڕێبازە پیرۆزەکەی سەرۆک مام جەلال دەبین و دەبینە قەڵغانی بەرگری کردن لە کوردستان و یەکێتیش دەکەینەوە به و یەکێتییەی لەپێناوی دامەزراو خەباتی کردو قوربانیدا.
لێرەشەوە پیرۆزبایی لە سەرجەم هەڤاڵانی سەرکەوتوو دەکەم، ئەوانەی توانیان متمانەی ئەندامانی کۆنگرە بەدەست بێنن و ببنە ئەندامی ئەنجومەنی سەرکردایەتی گشتی و ئەوانەشی نەیانتوانی سەرکەون دەبێ لە جاران زیاتر دڵسۆزانە بۆ سەرکەوتن و پێشکەوتنی حزبەکەمان کاربکەین.
‎کۆسرەت ڕەسول عەلی
‎سەرۆکی ئەنجومەنی باڵای سیاسی
‎یەکێتیی نیشتمانیی کوردستان
#26-12-2019#

جەماوەری خۆڕاگری کوردستان
کەسوکاری سەربەرزی ئەنفالکراوان
لە 32 هەمین ساڵیادی ئەنفالدا، هەزاران دروود و سڵاو دەنێرم بۆ گیانی پاکی سەرجەم ئەنفالکراوان و شەهیدانی کوردستان و بەلێنیاندەدەینێ وەک هەمیشە لەسەر ڕێبازەکەیان و خەبات کردن لە پێناو مافەکانی گەلەکەمان بەردەوام دەبین.
32 ساڵ پێش ئێستا، لەوکاتەی ڕژێمی بەعس لە لووتکەی هێز و دەسەڵاتیدا بوو، لەوکاتەی ڕژێمی بەعس و دارودەستە چەوسێنەرەکەی لەکوردستان خەریکی تەرحیل و تەبعیس و تەعریب بوون، لەوکاتەی ڕۆژانە لەناو شارەکان گەنجان و لاوانی کوردیان ڕاپێچی زیندانەکاندەکرد، سەرباری ئەشکەنجەو ئازارو لەسێدارەدان، کەچی خوێنڕێژی بەعس بەوە نەوەستاو لە پڕۆسەیەکێ ڕێکخراودا دەستی کردبەئەنفالکردنی کورد.
ڕژێمی بەعسی فاشیست بە 8 قۆناغی جیاواز لە ناوچە جیاجیاکانی کوردستان دەستی کرد بە ئەنفالکردنی کورد، لەم پڕۆسە دڕندانەیەداوێڕای وێرانکردنی 5000 هەزار گوندی کوردستان، 182 هەزار هاووڵاتی کورد لە کچان و ژنان، منداڵ و پیرو پەککەوتە، گەنجان و لاوانیخستە ژێر گۆڕە بەکۆمەڵەکان و زیندە بەچاڵی کرد، خەونی سەدام حسێن و ڕژێمی بەعس پاکتاوکردن و لەناوبردنی کورد بوو، ڕژێمی بەعسڕووخاو کورد لەناونەچوو.
ئەمڕۆ، دوای تێپەڕبوونی 32 ساڵ بەسەر ئەم پڕۆسە دڕندانەیە، کیانی هەرێمی کوردستان و حوکمڕانی کوردی ئەمانەتی خوێنی شەهیدان وئەنفالکراوانە لە ئەستۆی هەموومان، ئەرکە لەسەرمان بیپارێزین و بە وەفا بین بەرامبەر خوێنیان.
کوردستانیانی خۆشەویست
32 ساڵ بەسەر ئەنفال تێپەڕ دەبێ و هێشتاش بەشی زۆری ڕووفاتی پیرۆزی ئەنفالکراوان لە بیابانەکان لەژێر گۆڕی بەکۆمەڵدان، پێویستەحکومەتی هەرێمی کوردستان و حکومەتی عیراقی هەنگاوی جدی بهاوێن بۆ دۆزینەوە و هەڵدانەوەی گۆڕە بەکۆمەڵەکان و هێنانەوەی ڕووفاتیپیرۆزی ئەنفالکراوان، پێویستیشە سەرجەم بکەرانی ئەم تاوانە نامرۆڤانەیە دادگایی بکرێن و بە سزای یاسایی خۆیان بگەن.
هاوکات دەبێ هەوڵی جدی بدەین و هەنگاوی خێرا بنێین بە ئاراستەی ناساندنی ئەم پڕۆسەیە وەک جینۆساید دژ بە گەلی کورد لە ئاستینێودەوڵەتی و ئەرکی لەپێشینەی حکومەتی عێراقیشە قەرەبووی کەسوکاری سەربەرزی ئەنفالکراوان بکاتەوە.
جارێکی تر سەری ڕێزو نەوازش بۆ ڕوفاتی پیرۆز و گۆڕی سەرجەم ئەنفالکراوان دادەنوێنم و دووپاتی دەکەمەوە کە دەبێ خزمەتکردنیکەسوکاری سەربەرزی شەهیدان و ئەنفالکراوان لە ئەولەویەتی کارەکانی حکومەت بێ.
کۆسرەت ڕەسوڵ عەلی
سەرۆکی ئەنجومەنی باڵای سیاسی و بەرژەوەندی #یەکێتیی نیشتمانیی کوردستان#
#14-04-2020#

لە باوکی ڕێناسەوە بۆ خەڵکی کوردستان...
لەگەڵتانین 30ی مانگ لە #کفری# و #کەلار#ەوە تا #زاخۆ#، کوردستان سەوزپۆش بکەن، بەره و سندوقەکانی دەنگدان بڕۆن و لە 30 مانگ هاوسەنگی هێز بۆ کوردستان بگێڕنەوە، یەکێتی ئه و هێزەیە وەک شاخە سەربەرزەکانی کوردستان سەر دانانوێنێ بۆ هیچ کەس.
گەلی کوردستانی خۆڕاگر...
یەکێتی حزبی گەله و بۆ گەله و لەپێناو گەل تێدەکۆشێ، لە چرکەساتی بێ ئومێدیدا بۆ کورد هاتە مەیدان، نەوەستا، بەردەوام بوو لە خەباتکردن تا ڕاپەڕینی بەهاری کوردان و چۆک دانان بە ڕژێمی فاشستی بەعس.
یەکێتی بەردەوام بوو، بنچینه و کۆڵەگەی دامەزراندنی پەرلەمان و حکومەتی هەرێمی کوردستان بوو، ئەوێ ڕۆژێ ئەوە یەکێتی بوو ڕاستەوخۆ حوکمڕانی کوردستانی گرتەدەست، سەرەڕای ئابڵوقه و قەیرانەکان، چۆکی دانەناو نەوەستا لە خزمەتکردنی هاووڵاتیانی کوردستان بەبێ جیاوازی و هەنگاوەکانی دەستپێکرد بۆ ئاوەدانکردنەوەی کوردستان.
تێکۆشەران...
حوکمڕانی کوردستان سەلماندی، بەبێ یەکێتی نەک هەر مەحاڵە، بەڵکو هەر نایەتەدی، ئەوە یەکێتیە خۆی بە خزمەتکارو ئاوەدانکەرەوەی هەموو کوردستان دەزانێ، یەکێتی جیاوازە لە هەموو حزبەکانی تر، یەکێتی دیموکراسی هێنایەدی و سەکۆی ئازادی دروستکرد، بەبێ یەکێتی کوردستانێکی ئازاد و دیموکرات بەردەوام نابێ، سەرکەوتی یەکێتی سەرکەوتنی دیموکراتیەتە لە کوردستان، هەموومان لەسەرمانە ئه و یەکێتییە وەک بیلبیلەی چاومان بپارێزین و گەشەی پێبدەین، نەک تەنیا لەپێناو یەکێتییەکان، بەڵکو بۆ هەموو کوردستان بەبێ جیاوازی، چونکە یەکێتی وا دروست نەبووە تەنیا بۆ یەکێتییەکان بێ، خەباتی نەکردووە تا حزبی هیچ کەسێک بێ، یەکێتی بۆ هەمووانه و دڵنیابن بۆ هەمووانیش دەبێ.
دەنگدەرانی کوردستان...
ئەمڕۆ لە هەموو کاتێک زیاتر ڕوومان لە ئێوەیە، بەجۆش و خرۆشەوە بەشداری لە هەڵبژاردن بکەن، بە ئێوە یەکێتی بەهێزتر دەبێ، دڵنیابن بە دەنگدانتان بە لیستی 105ی یەکێتی نیشتمانی کوردستان، هاوسەنگی هێز بۆ کوردستان دەگێڕینەوه و دەبینە بەربەستێکی قایم بۆ ڕێگریکردن لە دروستبوونی تاک حزب لە کوردستان، کە یەکێتی بەهێز بێ، کورد بەهێز دەبێ و شکۆی تاکی کورد پارێزراو دەبێ.
کەسوکاری سەربەرزی شەهیدان...
#پێشمەرگە# قارەمانەکان...
هاوسەنگەرانم...
ئەی ئەوانەی هەموو چرکەیەک بۆ ئەوە دەژین یەکێتی وەک جاری جاران بەهێز بکەنەوه و بۆ یارو نەیاری بسەلمێنن کە یەکێتی قەت ناکەوێ، 30ی مانگ ڕۆژ ڕۆژی ئێوەیە، زەماوەند بکەن و ڕۆحی شەهیدانمان ئاسوودە بکەن، بە دەنگەکانمان ئه و ڕۆژە دەکەینە ڕۆژی هەڵسانەوه و سەرکەوتنی کوردستان، یەکێتی ئه و جەماوەرە خۆڕاگرو قارەمانەی هەبێ قەت ناکەوێ، سەلماندیشمان کە یەکێتی جێگای هەموو تێکۆشەرانی تێدا دەبێتەوە.
دەی با هەموومان، دەست لەناو دەست، لەپێناو کورد، لەپێناو کوردستانێکی بەهێزو هاوسەنگ بۆ هەمووان، لەپێناو خزمەتکردنی تاک بە تاکی ئه و کوردستانە بەبێ جیاوازی، لەپێناو حوکمڕانیەکی تەندروست و خزمەتکاری خەڵک دوور لە قۆرخکاری بازاڕ، دەنگ بدەین بە لیستی 105ی یەکێتی نیشتمانی کوردستان، لیستی سەروەرییەکانی دوێنێ و دەستکەوتەکانی ئەمڕۆ و داهاتووێکی گەش بۆ نەوەکانی ئایندە.
کوردستیانیان...
لە دامەزراندنی یەکێتییەوە، لەپێناو دروستبوونی کیانێکی سەربەخۆ بۆ کورد، ئەوە یەکێتی بوو مافی چارەی خۆنووسینی کردە دروشمی خەبات و قوربانیدان، هەر گەنجان و لاوان و ڕێکخستنە نهێنییەکان و پێشمەرگە قارەمانەکانی یەکێتی بوون له و پێناوەدا چوونە ژێر پەتی سێداره و کۆڵیان نەدا، ئەوە هەر یەکێتی و پێشمەرگەکانی بوون لە هەموو چرکەساتەکانی مەترسی سەر کوردستان لەپێشی پێشەوە بوونه و کوردستانیان پاراستووە، هەر لە بەرەنگاری بەعسەوە تا تێکشاندنی #داعش#، ئەوە ئێمە بووین لە چرکەساتەکانی مەترسی بۆ سەر کوردستان لەپێشی پێشەوە بووین و داعش لەسەر دەستی ئێمە تێک شکێندرا، ئەوە پێشمەرگە قارەمانەکانمان بوون لە شەنگال و #مەخموور# و گوێڕ و خازرو #کەرکووک# و #جەلەولا#و سەعدیه و #خانەقین# و کوباشی بەخوێن کوردستانیان پاراست، یەکێتی بە خوێن و بە فعلی خەباتی بۆ مافی چارەی خۆنووسین کردووە، بە دەنگدانتان بە یەکێتی و بە یەکێتییەکی بەهێزی خاوەن پێگەی ڕاستەقینەی خۆی، کوردستان دەکەوێتە کەناری ئارامی، ئەوە هەر یەکێتییە دەتوانێ ئاینده و داهاتوو بۆ کورد مسۆگەر بکا، نەک هیچ کەس و لایەنێکی تر.
با پێکەوە وەک ئەوێ ڕۆژێ، چۆن پێشمەرگە قارەمانەکان و ڕێکخستنە نهێنییەکان و شانە چەکدارەکانی و هاووڵاتیان یەک تیم و یەک دەست ڕاپەڕینیان هەڵگیرساند و ئامانجەکانمان هێنایەدی، با ئەمڕۆ هەموومان بە دەنگدانمان بە یەکێتییەکەمان کوردستان سەوزپۆش بکەین و بیسەلمێنین ئەوە یەکێتییە پارێزەری ڕاستەقینەی مافەکانتان و داکۆکیکاری سەرسەختی باشکردنی ژیان و گوزەرانتانە. هەر یەکێتییە دەتوانێ و هەر بە یەکێتیش دەکرێ.
لە کۆتاییدا پێتان دەڵێین ئێمە هی ئێوەین، ئێوەش هی ئێمەن، دەبا هەموومان نەهێڵین نەیار دڵی پێمان خۆش بێ و 30ی مانگ بکەینە ڕۆژی سەرکەوتنی هەموومان.
بەڵێ بۆ دەنگدان بە لیستی 105ی یەکێتی نیشتمانی کوردستان
سوپاس بۆ خۆڕاگری و دڵسۆزی و وەفاداریتان
هەر بژین بۆ کوردو کوردستان
#کۆسرەت ڕەسول عەلی#
جێگری سکرتێری گشتی
#یەکێتیی نیشتمانیی کوردستان#
#27-09-2018#

‎بەیانیتان باش هەڤاڵانی خۆشەویست
‎ئامادەبووانی بەڕێز
‎خۆشحاڵم لەگەڵتان کۆدەبینەوە لەکات و سەردەمێکدا کە قۆناغێکێ زۆر زۆر هەستیارە، کە میللەتەکەمان پێیدا تێپەڕ دەکا، هەروەها یەکێتی نیشتمانی کوردستان لەو قۆناغە هەستیارە ئەرکی سەرشانی قوڕسە، لەبەرئەوە دەمەوێ پێتان بڵێم کە ئێمە وەک یەکێتییەکان ئەرکە لەسەرمان یەکێتی ناو یەکێتی بپارێزین و هەموومان بەیەکەوە بۆ یەکێتی نیشتمانی کوردستان کاربکەین، ئەو یەکێتییەی کە خوالێخۆشبووان #مام جەلال# و کاک نەوشیروان و. برادەرانی تر مێژوویەکی گەورەیان بۆ جێهێشتین و ئێمەش دەبێ بیپارێزین و گەشەی پێ بدەین، گەشەپێدانی ئەو دۆخەی ئێستا هەیە ئەرکی سەرشانی هەموومانە، کە ئیشی تێدا بکەین و ئێستای یەکێتی بارودۆخی زۆرباشە، چەند ساڵێک پێش ئێستا دەیانگوت یەکێتی دەبێتە دوو کەرت و ئینشقاق دەکا، بەڵام دەرکەوت یەکێتی نیشتمانی کوردستان ئەو هێزە نییە بەهیچ کەسێک بشکێت و بەهیچ کەسێکیش ناشکێت، وەک مام جەلال فەرموویەتی سەفین لەبن بێ یەکێتی لەبن نایە.
‎هەڤاڵانی بەڕێز...
‎هیوادارم یەکەم شت وەحدەتی خۆمان بپارێزین لە هەموو شوێنەکان، پاراستنی یەکڕیزی خۆمان نیشانەت سەرکەوتنمانە، ئێوەش هەمووتان لێپرسراون لە ناوچەکان و ئێستا لە سەرانسەری کوردستان لەهەموو مەڵبەندەکان لەو کۆبوونەوەیە بەشدارن، هیوادارین ڕۆڵی خۆتان ببینن و هەموومان ئیش بکەین بۆ ئەوەی یەکێتی نیشتمانی کوردستان بخەینەوە شوێنی خۆی و یەکێتی بکەوێتەوە سەر سکەی خۆی، لای ئێمە مەسەلەی یەکدەنگی و یەکگوتاری یەکێتی لە هەموو شتێک گرنگترە.
‎جێگای شانازییە کە ئەو میراتەی بۆ ئێمەیان جێهێشتووە، یەکێتی مێژووێکی گەورەیەو لە هەموو دنیا ناسراوە لە ئاستی ناوەوەو دەرەوە، ئەمانە هەمووی نیشانەی ئەوەن کە یەکێتی نیشتمانی کوردستان هێزێکی زیندووەو هەر دەشمێنێ، ئێمە لەسەر دۆخی مفاوەزاتی نێوان خۆمان و برادەرانی پارتی بۆ پێکهێنانی حکومەتی نوێ، ئەو مەسەلەیە زۆر درێژەی کێشا، ئێمە بۆ ئەوەی یەکێتی ڕیزەکانی گەلی کورد بپارێزین شانبەشانی یەکڕیزی ناو یەکێتی ئێمە ئەنجامی هەڵبژاردنمان قبوڵکرد لەپێناو یەکڕیزی و نەمانویست ئێمە هەڵوێستێکمان هەبێ و پارتی هەڵوێستێکی هەبێ، ئێمە هەردوولا هێزی سەرەکین و دوو هەڵوێستی جیاوازمان هەبێ زەرەر دەکەین، بەڵام بەداخەوە ئەوان بە نەفەسی تۆڵەکردنەوە و ڕق دەستیان بە کارەکان کرد، لەسەر ئەوەی سەرۆک کۆمار بۆ یەکێتی بووە، دوێنێ کۆبوونەوەی پەرلەمانیان کرد بەبێ یەکێتی، پێموایە ئەوەی دەیەوێ جارێکی تر دووبەرەکی و شەڕی ناوخۆ لەکوردستان دروست بکا، ئێمە دژی ئەو سیاسەتەین، چونکە یەکێتی نیشتمانی کوردستان یەکێتی خەڵکە، یەکێتی ناو ڕیزەکانی میللەتەکەمانە، لەبەرئەوە کەس ناتوانێ یەکێتی نیشتمانی کوردستان بشکێنێ یان فەرامۆش ناکرێ، یەکێتییەکان ئێمە دڵنیاتان دەکەینەوە لەگەڵ هیچ لایەنێک سازش ناکەین و ئەگەر ڕێککەوتنەکان تەوازنی تێدا نەبێ و حسابی خەبات و ماندووبوونی یەکێتی نەکات کە ئەوە بۆ ئێمە زۆر گرنگە نایکەین، دڵنیاتان دەکەینەوە و بەڵێنتان پێ دەدەین لەناوخۆمان وەزعی خۆمان چاک دەکەین، هەریەک لەئێوە بەراوردی ئێستا بەساڵێک پێشوو بکا جیاوازی زۆر زۆر هەیە، ئەو جیاوازییەش دەبێ بکەینە عەمەلی و هەموومان بەیەکەوە ئیشی تێدا بکەین.
‎بۆ کۆنگرەش، دڵنیاتان دەکەین کە کۆنگرە دەبەستین لەکاتێکی زۆر نزیکدا، بەڵام کاتێک بێ ئەو دۆخەی کوردستان تێپەڕببێ و یەکلابێتەوەو بزانین چی لێ دێ، کۆنگرە دەبەستین و وەڵامی ئەوانە دەدەینەوە کە دەڵێن ناتوانن کۆنگرە ببەستن، کۆنگرەیەک ئەنجام دەدەین یەکێتییانە بێ، نەک وەک خەڵکی تر، یەکێتیانەیەک لەئاست ڕۆڵی ئازایەتی و پیاوەتی و جوامێری و قارەمانێتی پێشمەرگەو کادیرەکان بێ، ئەوانە هەموویان شایستەی ئەوەن ڕێزیان لێ بگیرێت و دەنگیان بدرێتێ.
‎ئامادەبووانی خۆشەویست...
‎ئێمە خۆمان دەمانەوێ پاکسازی بکەین لەناو دەزگاکانی حکومەتی هەرێمی کوردستان، ئەوەی سنووری دەسەڵاتی ئەو ناوچەیەیەو یان ئەوانەی لێپرسراوەکان بەقسەیان دەکەن، دەبێ مەسەلەی فەسادو گەندەڵی نەهێڵین لەناو خەڵک، چونکە بەڕاستی ئەوە شتێکی زۆر زۆر خراپە، لە هەر شوێنێک گەندەڵی و دزی زۆر بوو، تەجاوز لەسەر موڵکی حکومەت زۆربوو ئەوا ئەو شوێنە وەزعی خراپ دەبێ، لەبەرئەوە دڵنیاتان دەکەم وەک یەکێتی سیاسەتی سەرکردایەتی و مەکتەب سیاسی ئەوەیە هاوکاری ئەو دام و دەزگایانە بکەین کە لەلایەن حکومەتەوە تەرخانکراون و لەگەل دام و دەزگاکانیش هەوڵ بدەین کە بە زووترین کات دەست بە چاکسازی و پاکسازی بکەین لەناو دام و دەزگاکانمان، ئەوەش بەوە دەکرێ هەرکەسەو لای خۆیەوە دەست پێ بکا، چونکە ئەگەر لای خۆمانەوە دەست پێ نەکەین ناتوانین داوا لە خەڵکی تر بکەین.
‎لەکۆتاییدا جارێکی تر سوپاستان دەکەم بۆ بەشداریکردنتان لەو کۆبوونەوەیە، بۆ ئەوەی ئاگاداربن لە مەرجەکانی ئێمەو پارتی لە کۆبوونەوەکان، حاکم قادر بەدرێژی بۆتان باس دەکا.
‎جارێکی تریش بەخێربێن
‎هەربژین بۆ کوردو کوردستان
‎بژی #یەکێتیی نیشتمانیی کوردستان#
#20-02-2019#

سەرلەبەیانی ئەمڕۆ شەممە 11-11-2017 باری تەندروستی #کۆسرەت ڕەسول# عەلی تێکچوو و گەیەنرایە نەخۆشخانە.
د.دارا ڕەشید لەتیمی پزیشکی تایبەتی کۆسرەت ڕەسول عەلی ڕایگەیاند کە ئێستا کۆسرەت ڕەسول عەلی لەژێر چاودێری وردی پزیشکیدایەو چارەسەری پێویستی بۆ ئەنجام دەدرێت.
هەروەها سوپاسی خەمخۆری کوردستانیانی خۆشەویست دەکەین و هەموو لایەک دڵنیا دەکەینەوە لەوەی کە ئێستا بەڕێز کۆسرەت ڕەسول عەلی لەژێر چاودێری پزیشکدایە و چارەسەری پێویستی بۆ ئەنجام دەدرێت.
نووسینگەی ڕۆژنامەوانی
کۆسرەت ڕەسول عەلی
11-11-2017

‎بەڕێزان: سکرتێرو ئەندامانی سکرتاریەتی ڕێکخراوی ئازادی لاوانی کوردستان
‎بەبۆنەی 21 ساڵەی دامەزراندنی ڕێکخراوی ئازادی لاوان گەرمترین پیرۆزبایی ئاراستەی ئەندامانی دەستەی دامەزرێنەرو سکرتێرو ئەندامانی سکرتاریەتی ڕێکخراوەکەتان دەکەم، ئومێد دەکەم ساڵی ئایندە ساڵی خزمەتکردنی زیاتری لاوان بێ و دەرفەتی یەکسان بۆ سەرجەم لاوان بڕەخسێنرێ.
‎ڕێکخراوی ئازادی لاوان یەکێک لەڕێکخراوە چالاکەکانی #یەکێتیی نیشتمانیی کوردستان#ەو لەتەمەنی خۆیدا توانیویەتی خزمەتێکی بەرچاو بەلاوان بکات و فێرگەیەکی گەورەی پێگەیاندنی کادیرو لاوی بەتوانایە بۆ نێو ڕیزەکانی یەکێتی و کۆمەڵگا، کە ئەم لاوانەو سەرجەم لاوانی تری کوردستان ڕۆڵەی داهاتووی ئەم وڵاتەن و ئایندە لەژێر چنگی ئەواندایە.
‎ئەمڕۆ، لە 21ەمین ساڵیادی ڕێکخراوی ئازادی لاوانی کوردستان پاڵپشتی و پشتیوانی تەواوی خۆمتان بۆ دووپات دەکەمەوە و ئومێد دەکەم پڕۆژەی گەورەو گشتگیرتان هەبێ بۆ خزمەتکردنی زیاتری لاوانی کوردو دۆزینەوەی دەرفەتی گونجاو و لەبار بۆ ئایندەی کارکردنیان و دەرخستنی توانا شاراوەو لەبن نەهاتووەکانی لاوانی کورد، کە هەمیشە باشترین داینەمۆی پێشخستنی کۆمەڵگاو سەرکەوتنی شۆڕشە یەک لەدوای یەکەکانی کورد بوونە.
‎کۆسرەت ڕەسول
‎سەرۆکی ئەنجومەنی باڵای سیاسی و بەرژەوەندی یەکێتیی نیشتمانیی کوردستان
#26-05-2020#
⚠️ تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!

بەناوی خوای گەورەو میهرەبان
بەڕێزان: خانەوادەو کەسوکاری خوالێخۆشبوو پرۆفیسۆر د. #جەمال نەبەز#
زۆر بەداخەوە هەواڵی کۆچی دوایی بیرمەندو ڕۆشنبیرو ڕۆشنفکرو نووسەر و ئەکادیمیستی گەورەی گەلەکەمان پڕۆفیسۆر دکتۆر جەمال نەبەزم بیست، لەناخەوە دڵگران و خەمباری کردم، دکتۆر جەمال نەبەز یەکێک بوو لە گەورە نووسەرو ڕۆشنبیرو ئەکادیمیستانی کورد، کە لە تەمەنی پڕ بەخششی خۆیدا خزمەتێکی یەکجار گەورەی بە ئەدەب و فەرهەنگ و کلتووری کرد، لەدەستدانی دکتۆر جەمال نەبەز کۆستێکی قووڵ و زیانێکی گەورەیە لە کاروانی ڕۆشنبیری و ئەدەبی کوردی، کەلێنێکە بە سانایی پڕ نابێتەوەو قوڕسە بتوانین جێدەستی پڕ بکەینەوە، بەڵام بۆ هەمیشەو تا ئەبەد بەرهەم و داهێنانەکانی لەفکرو هزری هەمووماندا دەمێنێتەوە.
لەم بۆنە خەمناک و ناخۆشەدا، پرسەو سەرەخۆشی خۆم ئاراستەی نووسەران و ڕۆشنبیرانی کوردو خانەوادەکەتە بەڕێزەکەتان دەکەم، لەخوای گەورە داواکارم کۆچکردوو بە بەهەشتی بەرینی خۆی شاد بکات و سەبووری و ئارامی بە هەموو لایەک ببەخشێ.
انا لله وانا اليه ڕاجعون
#کۆسرەت ڕەسول عەلی#
جێگری سکرتێری گشتی
یەکێتی نیشتمانی کوردستان
#08-12-2018#

لە ساڵرۆژی دامەزراندی کۆمەڵەی خوێندکارانی کوردستاندا #کۆسرەت ڕەسوڵ عەلی# پەیامێکی پیرۆزبایی ئاراستەی کۆمەڵەی خوێندکارانی کوردستان دەکات.
دەقی پەیامەکە....
هەڤاڵان و ئەندامان و لایەنگرانی کۆمەڵەی خوێندکارانی کوردستان ساڵڕۆژی دامەزراندنی کۆمەڵەی خوێندکارانی کوردستان لە ئێوە و سەرجەم خوێندکاران پیرۆز دەکەم، ئومێد دەکەم ڕێکخراوە بە گڕوتینێکی ترەوە کاربکەن و خزمەتی خوێندکاران و پڕۆسەی پەروەردە و فێرکردن و پێشخستنی ئاستی زانستی بکەن. بە شانازییەوە، ئەوێ ڕۆژێ لە #کەرکووک#ی سەری کوردستان، لەگەڵ کۆمەڵێک لە هەڤاڵانم لە ماڵی هەڤاڵ محەمەد خورشید بەیاننامەی دامەزراندنی کۆمەڵەی خوێندکارانی کوردستان و پەیڕەو و پرۆگرامی ئەو کۆمەڵەیەمان نووسی و دامانمەزراند، کە بۆ ئەوێ ڕۆژێی خەبات ڕۆڵێکی یەکجار گرنگی هەبوو لە وشیارکردنەوەی خوێندکاران و برەودان بە ڕۆحی شۆڕشگێڕی لەنێو خوێندکاراندا. لەماوەی تەمەنی خۆیدا، کۆمەڵەی خوێندکارانی کوردستان یەکێک بووە لە چالاکترین ڕێکخراوەکان بۆ خزمەتکردنی خوێندکاران و ڕەخساندنی هەلی گونجاو بۆ پێشخستنی ئاستی خوێندن و بەشداری کردن لە چالاکییە نیشتمانی و نەتەوەییەکان لەنێو خوێندکاران، بۆ ئەمڕۆش ئومێد دەکەم وەک چۆن ئەوێ ڕۆژی ئێمە بە ڕۆحێکی شۆڕشگێڕانەی کوردانەوە ئەم کۆمەڵەیەمان دامەزراند، ئاوا بەگڕوتینەوە دەست بکەنەوە بە کارکردن و خزمەتی خوێندکاران بکەن و خەبات بکەن لەپێناو بەرەوپێشبردنی تواناکانی خوێندکاران و ڕەخساندنی زەمینەی گونجاو بۆ ئەوەی خوێندکاران بە زانست و زانیاری پێشکەوتوو ببنە بەشێک لە پێشکەوتنەکانی کۆمەڵگاکەمان. دووبارە پیرۆزبایی خۆمتان لێ دەکەم و لەم یادەدا دروود بۆ گیانی پاکی سەرجەم شەهیدان بەگشتی و خوێندکارانی شەهید بەتایبەتی دەنێرم. کۆسرەت ڕەسول عەلی سەرۆکی ئەنجومەنی باڵای سیاسی و بەرژەوەندی #یەکێتیی نیشتمانیی کوردستان#. [1]

=KTML_Bold=تێبینی: ئەم بەڵگەنامەیە کێشەی رێنووس و رێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

سەرۆکی ئەنجومەنی باڵای سیاسی و بەرژوەندییەکانی #یەکێتیی نیشتمانیی کوردستان#، پیرۆزبای ساڵیادی دامەزراندنی کەناڵی ئاسمانی کوردسات لە بەڕێوەبەر و کارمەندانی دەزگاکە دەکات.
دەقی پەیامەکە...
بەڕێزان: سەرپەرشتیار و ستافی کەناڵی کوردسات
(23) هەمین ساڵەی دامەزراندنی کەناڵی کوردسات لە ئێوە و سەرجەم ڕۆژنامەنووس و کارمەندانی کەناڵەکە پیرۆز دەکەم، ئومێدی سەرکەوتن و پێشکەوتنی زیاترتان بۆ دەخوازم.
کەناڵی کوردسات لەماوەی (23) ساڵ تەمەنی خۆیدا توانیویەتی ببێتە مینبەری دەنگ و ڕەنگە جیاوازەکان، خزمەتی هەمووان بکات و بە ڕەچاوکردنی کلتووری کوردەواری بایەخ بە سێکتەرە جیاوازەکان بدات، دەخوازم لە داهاتووشدا بە هەمان ڕۆحیەتەوە بەردەوام بن و دەرفەتی زیاتر بڕەخسێنن بۆ پیشاندانی توانا و بەهرەکانی تاکەکانی کۆمەڵگای کوردەواری.
دووبارە پیرۆزبایی خۆم ئاڕاستەی هەمووتان دەکەم و ئومێدی سەرکەوتن و بەرەوپێشچوونی زیاترتان بۆ دەخوازم. [1]
#کۆسرەت ڕەسوڵ عەلی#
سەرۆکی ئەنجومەنی باڵای سیاسی و بەرژەوەندی
یەکێتیی نیشتمانیی کوردستان

بۆ- پارتی دیموکراتی گەلان- تورکیا (هەدەپە)
هەواڵی دەستگیرکردنی بەڕێزان سەڵاحەدین دەمیرتاش و فیگەن یوکسەکداغ هاوسەرۆکانی هەدەپە و نۆ پەرلەمانتاری تر لە لایەن حکومەتی تورکیاوە زۆر نیگەرانی کردووین، لە کاتێکدا گەلی کوردستان لە چاوەڕوانی دەستپێکردنەوەی پڕۆسەی ئاشتی بوون لە تورکیا بە ئامانجی چارەسەرکردنی دۆزی کورد لە تورکیا نەوەک پەنابردن بۆ بەرتەسککردنەوەی ئازادییەکان و دەستگیرکردنی سەرۆک و سەرکردەکان و پەرلەمانتار و ئەندامانی شارەوانییەکان زۆر بە توندی ئیدانەی ئەم ڕەفتارە دەکەین و دووپاتی دەکەینەوە کە مافی ڕەوای گەلان بە بەرتەسککردنەوەی ئازادییەکان و پێشێلکردنی دیموکراسی کێشەکە ئاڵۆزتر دەکات و تاکە ڕێگا لەبەردەم ئەم کێشانە گرتنەبەری ڕێگای دیالۆگی ئاشتیانەیە، بۆیە داوا لە حکومەتی تورکیا دەکەین بە زووترین کات ئازادیان بکات و لەمپەر لەبەردەم گرتنەبەری ڕێگای دیموکراسی بۆ چارەسەری کێشەی ڕەوای گەلی کورد لە تورکیا لابەرێت و پرسی ئاشتەوایی کۆمەڵایەتی و خەباتی مەدەنی پەرەی پێ بدرێت.
کۆسرەت ڕەسول عەلی
جێگری یەکەمی سکرتێری گشتی
یەکێتی نیشتمانی کوردستان
04-11-2016