جەماوەری ستەملێکراوی کوردستان!
لەهەلومەرجێکدا کە نەتەوەکەمان و هێزە دیموکراتخوازەکانی ڕۆژهەڵاتی ناوەڕاست، چاوی ئومێدیان بڕیبووە بەدیهێنانی ئامانجە ستراتیژیەکانی کوردستان، بەڵام مەخابن، ڕوداوەکان، پێشبینیەکانی یەکێتی بۆ قبوڵکردنی بەدیلی ڕیفراندۆم، سەلماندو بەهۆی مومارەسەی مافی دیموکراسی، بەهۆی بێدەنگیی دەوڵەتە دۆستەکانی جیهان لەبەرامبەر ئەو بڕیارانەی لەبەغداد دژی هەرێم و ئەو هێرشە عەسکەریانەدا، هەتا ئەمڕۆ، هەروا لەرێی کەینوبەینی جۆراوجۆرو قۆزتنەوەی ناکۆکیەکانی حزبە کوردستانیەکان و کێشمەکێشەکانی ناو یەکێتیی نیشتمانیی کوردستانەوە، پیلانی ئیقلیمی لە(16/ی ئۆکتۆبەری2017) ڕێک لەهەمان ڕۆژو مانگدا کە ساڵی (1925) کۆمەڵەی گەلان ویلایەتی موسڵی شەتەکی عێراقی داتاشراو دا، دوای (92) ساڵ سەپێنرایەوە!
لەم هەلومەرجەدا بەسەرپەرشتی جێگری سکرتێری گشتی هەڤاڵ کۆسرەت ڕەسول، مەکتەبی سیاسی یەکێتی کۆبونەوەی ئاسایی کرد.
ئەم کۆبونەوەیە، دوای ژیانئاوایی سەرۆک مام جەلال و نەمانی سایەی سەرۆکە بێهاوتاکەمانە لەسەرمان، ئەم کۆستی شکۆی نیشتیمانە، بێڕادە قورسە، بەو ئەندازەیەش ئەرکی هەمومانی پڕاوپڕ لە بەرپرسیارێتی مێژوویی، بۆ پاراستنی یەکێتی ناو یەکێتی و یەکپارچەیی هەرێمی کوردستان، کرد. بەم بۆنەشەوە، جارێکی تر، سوپاسی زۆری هەموو دەوڵەتەکان، لایەنەکان، کەسایەتیەکان، بەتایبەتی حزبە کوردستانیەکان دەکەین، کە لەناو خەمباری پێشمەرگەو کەسوکاری شەهیدان و کوڵی گریان و فرمێسکی گەلەکەمان، جارێکی تر، سەلماندیانەوە کە سەرۆک مام جەلال، هەر سەرۆکی عێراق و کوردستان و فەرماندەی پێشمەرگە نەبووە، بەڵکو جێگەی ڕێزی تەواوی جیهان بووەو لەناخی نەتەوەکەشماندا، خۆشەویستیەکی دەگمەنی هەبووە.
جەماوەری کۆڵنەدەری کوردستان!
کۆبونەوەکە، دەرهەق بە سیاسەتی نێونەتەوەیی و ئیقلیمی و عێراقی، تەواوی دژواریەکان، مەترسیە جۆراوجۆرەکان، هەڕەشەکان، بێسەروبەری بڕیاری دەستەگەری لەبری بڕیاری دەستەجەمعی ئۆرگانە ڕەسمیەکانی یەکێتی. ئەم بڕگانەی تاوتوێ کرد: 1-دۆخی گشتی و کارەساتی (16/10/2017). 2-یەکێتی ناو یەکێتی. 3-پەرلەمان و هەڵبژاردن و کۆمسیۆنی باڵا. 4-دانوستاندن لەگەڵ حکومەتی عێراق و دەستوری هەمیشەیی. 5-پەیوەندی یەکێتی و لایەنە کوردستانیەکان.
دۆخی دوای کارەساتی 16/ی ئۆکتۆبەر
1- بۆ دۆخی گشتی و کارەساتی 16/ی ئۆکتۆبەر، کۆبونەوە بەوردیی لەسەر کۆی دۆخەکە، پێش ڕیفراندۆم و خودی ڕیفراندۆم و ڕوداوە نالەبارەکانی لێکەوتەی ڕیفراندۆم، بەچاوێکی ڕەخنەگرانەی دوور لە هەرەسانی، گفتوگۆی کردو بڕیاردرا، لیژنەیەکی لێکۆڵینەوەی شارەزای بوارەکان، لەسەر تەواوی پرس و پرۆسەکە، دوور لە مزایەدەو خۆدزینەوە لەبەرپرسیارێتی، بەتایبەتی لەسەر ڕیفراندۆم و کارەساتەکە، پێکبێنێ و لەبەر ڕۆشنایی ئەنجامەکانی لێکۆڵینەوە، بە گەڕانەوە بۆ بڕیارەکانی تەواوی ئەندامانی ئەنجومەنی سەرکردایەتی لەسەر ڕیفراندۆم، باسی ڕیفراندۆم لەناو نەخشەرێگەی یەکێتی و لەناو ڕێکەوتنامەی یەکێتی و بزوتنەوەی گۆڕان، هەروەها بۆ سەرجەم کۆبونەوەکانی مەکتەبی سیاسی و سەرکردایەتی، تا دەگاتە کۆبونەوەی دوکان لە(15/10/2017) دوابۆچونی یەکێتی، ڕابگەیەنێ.
پیرۆزی یەکێتی ناو یەکێتی
2- سەبارەت بە یەکێتی ناو یەکێتی؛ کۆبونەوە پێیوایە، دەرکەوت، کۆبونەوەو چاوپێکەوتن و بەیاننامەی نابەرپرسیار، چەند زیانی لەیەکێتی گەیاندووە. بۆیە، یەکێتی ڕیزەکانی یەکێتی لەسەر بنەمای پرنسیپ و یاساو ڕێسای حزبایەتی و چاونەپۆشین لە لادان و سەرپێچی ئەو پرنسیپانە، هەتا دەسەڵاتەکان لەئۆرگانە ڕەسمیەکانی یەکێتی چڕبکرێتەوە. نەک گروپی دەستەگەری لاوەکی. ئەم ڕێساو پرنسیپانە مەرجی بنەڕەتی دەستەبەری یەکێتی ناو یەکێتین. لەمبارەوە، بڕیاری پێویست بۆ شکۆی ئۆرگانەکان و دیسپلینی ڕیزەکان، دران. چیکە لەهیچ کەسو گروپێک قبوڵناکرێ دیسپلین و پەیڕەوی ناوخۆ پێشێل بکات و بڕیاری دەستەگەری زیانبەخش، بکرێتە بنەمای لێدوانی سەرلێشێواندن.
پەرلەمان و هەڵبژاردن
3- پەرلەمان و هەڵبژاردن و کۆمسیۆن؛ کاراکردنەوەی پەرلەمان، بەهەوڵی هەموولایەک، بەتایبەتی یەکێتی، دەستکەوتێکی تەشریعی و چاودێریی گەورەیە. بۆیە پاراستنی ئەم دەستکەوتە، بەتەواوکردنی خولی ئاسایی پەرلەمان، زۆر گرنگە. بۆئەوەی لەتەنگژە یاساییەکانیش بەرەبەرە ڕزگارمان بێ، دەبێ، پەرلەمان چالاکتر ئەرکەکانی ڕاپەڕێنێ و دەسەڵاتی سیاسیش هاوکاریان بێ. ئومێدەوارین، لەسەر بنەمای ئەرک و ماف و پاراستنی ئەزمونەکەمان، تەواوی لایەنەکان بەشداری دانیشتنەکانی پەرلەمان بکەن.
دانوستان و دەستور
4- دانوستاندن لەگەڵ بەغدادو دەستوری هەمیشەیی؛ بڕیاردرا کە: دانوستاندنی بێمەرج، لەگەڵ حکومەتی بەغدادو لەسێبەری ئاشتی و ڕاگرتنی شەڕوشۆڕو پەلاماری گەلی کوردستان، ئەنجامبدرێ. بۆ ئەم ئەرکەش، وەفدی حکومەت، لەو لایەنانەی لەحکومەتدا، ئەرکەکانی حوکمڕانیی ڕادەپەڕێنن، بۆ دانوستاندن پێکبێ و لەکاتێکی شیاویشدا، بەپێی بنەماکانی دەستوری هەمیشەیی، گفتوگۆ لەگەڵ بەغداد بکەن. هەروەها توێژینەوەش بکرێ کە چ لایەک، لەدوای نوسینی دەستورەوە، بەندەکانی دەستوری پێشێلکردووە. نەک حکومەتی عێراق، تەنها لەروانگەی ئەرکەکانی دەسەڵاتەوە، دەستور شیبکاتەوەو مافە دەستوریەکان، ڕەچاونەکات. لەکاتێکیشدا، تەواوی لایەنە کوردستانیەکان و حکومەتی هەرێم، دانوستان و دەستوریان پەسەندە، چ پاساوێک بۆ حکومەتی بەغداد ماوە، درێژە بە پەلاماری عەسکەری و گەمارۆی ئابوری و ئازادی خەڵک بداتو، دەیان هەزار هاوڵاتی لانەواز بکرێ و لەم سەروبەندەی پایزو زستاندا بکەونە ژیانی کولەمەرگیی.
پەیوەندی یەکێتی لەگەڵ لایەنە کوردستانیەکان
5- یەکێتی و لایەنە کوردستانیەکان.. یەکێتی، دور لە کارو کاردانەوە، دژی تێکچونی پەیوەندی سیاسی لایەنە کوردستانیەکانە؛ بەڵکو لەم دۆخە دژوارەدا، جەخت لەسەر چارەسەرکردنی کێشەی نێوان تێکڕای لایەنەکان دەکاتەوە، هەتا پێکەوە بتوانین، چاکسازی و گۆڕانکاری لەحکومەتدا ئەنجامبدەین و کێشەکان چارەسەر بکەین و پەرلەمانیش، ئەرکی یاسارێژی و چاودێری ڕابپەڕێنێ. بەیەکیشەوە، پرۆژەی دەستور بەرەو قۆناغی کۆتایی بەرین و سیستەمی حوکمڕانی بەسیستەمی پەرلەمانی ڕاستەقینە بگۆڕین. کێشەی چۆنیەتی چارەسەرکردنی سەرۆکایەتی هەرێمیش، لەبنبەستی قۆناغی ڕابوردوو، سەرفراز بکەین و لەبەر ڕۆشنایی ڕوداوەکانی ئێستاو قۆناغی لەمەودوا، بەرپرسانە، کۆتایی بەم پرسە نیشتمانییەش بهێنین.
لەکۆتاییشدا.. یەکێتی، بە یەک ئاراستەو یەک هەڵوێست و یەک ئیرادەوە، ئەرکەکانی لەمەودوای ڕادەپەڕێنێ و بێوچان تێدەکۆشێ بەچاوێکی ڕەخنەگرانەی هەمەلایەنەوە، تەنگوچەڵەمەو کەموکوڕییەکان، لەناو حکومەت و لەناو یەکێتیدا، چارەسەر بکات. وەکو سەرۆک مام جەلال فەرمویەتی، نە بە کەس دەڕوخێین و نە کەسیشمان لێ زیادە، هەموو هەڤاڵێک ئەرکێتی یەکێتی ناو یەکێتی بپارێزێ. لەهەمانکاتدا، هەر هەڤاڵ و گروپێک ئازادن لەدەرەوەی یەکێتی ڕێبازی تر هەڵبژێرن.
- هەزاران سڵاو لەگۆڕی پاکی شەهیدانی بەرەنگاری لەکەرکوک و خانەقین و پردێ.
- سڵاو لەخۆڕاگیی و قارەمانێتی گەلەکەمان.
- سڵاو لەهێزی پێشمەرگەو لە ورەی پۆڵایینیان، کە دڵنیاین ئەم شکستە کاتییە، گیانی قارەمانێتیان بەهێزتر دەکات.
مەکتەبی سیاسی
یەکێتی نیشتمانیی کوردستان
24-10-2017