نامۍ: عەبدوڵڵا
نازنام: ئاشتی هۆرامی
نامۊ تاتەی: عەبدولڕەحمان
ساڵۊ پېڎابییەی: 1948ز.
ڕۊ مەرڎەی: #20-10-2024ز.#
یاگۊ پېڎابییەی: #تەۋېڵۍ_ هۆرامان#
یاگۊ مەرڎەی: لەندەن
ژیۋاینامە
ئاشتی هۆرامی؛ نامۍ یەرەیەش؛ عەبدوڵڵا کوڕو عەبدولڕەحمان کوڕو عەبدوڵڵایەن، ئەشناسیا بە ئاشتی ھۆرامی، ساڵەو (1948ز.) دلۍ شارەدەگاو تەۋېڵۍ، هۆرامانو پانیشتی ئامان دنیا. وانای سەرەتاییش هەر ئەچاگە تەمامنان، پەی وانای قۊناغاکا میانی، تاتەیش بەردەن پەی هەڵەبجەی، دمای تەمامنای قۊناغەکا وانای میانی و ئاماڎەیی، زانکۊ بەغڎای، بەشو سامانە سرووشتیەکانە وەرگېریان. 
ساڵەو (1971ز.) بەکالۆریۆسش ویارو نۆتېنە بەدەسئاوەردەن جە شارو بەغڎای، هەر ئا ساڵېنە کۊمپانیاو نۆتەو ئێراقی جە شارو بەسرەی پېسە ئەندازیاری هەرمانەش کەردېنە، ساڵەو (1975ز.) تاکو ساڵەو (1982ز.) جە وڵاتو بەریتانیای پېسە ئەندازیارێ جە کۊمپانیێوە نۆتی بەریتانیېنە هەرمانەش کەردېنە،
ساڵەو (1978ز.) ماستەر و دکتۆراش جە ئەندازیاریی نۆتۍ جە سکۆتلەندا بەدەسئاوەردەن.
تاکو ساڵەو (1985ز.) گۆرە ئەندازیاری ئینترای بېیەن. ساڵەو (2006ز.) پېسە شالیارو سامانە سروشتییەکانو حکوومەتو ھەرېمو کوردەسانی دەسبەکاربییەن.
ئاشتی هۆرامی،  دۋۍ جارۍ ژیوای هامسەریش مەرزنانەرە و تاتەو یەرۍ زاروڵان، ئاشتی هۆرامی ڕامیاریوانێ کورڎی بېیەن، دلۍ کابینەو نۊهەمو حکوومەتو ھەرېمو کوردەسانینە، یاردیدەرو سەرشالیارگای بېیەن پەی کاروبارو وزەی، هەم ئەندامو ئەنجوومەنو باڵاو نۆت و گازو هەرېمو کوردەسانی بېیەن، دلۍ کابینەکانو پەنجەم، ششەم، حۆتەم و ھەشتەمو حکوومەتو ھەرېمو کوردەسانینە شالیارو سامانە سروشتییەکانی بېیەن.
ساڵەو (1988 تاکو 1999ز.) ڕاوەبەرو کۊمپانیاو (دی یو کەی) بېیەن، ساڵەو (1999ز.) بېیەن بە سەرۆک و ڕاوەبەرو جابەجاکارو گرووپو (ئەی سی ئێڵ)، مانگەو ئابی، ساڵەو (2006ز.) سەرو وەرنیارو دکتۆر بەرهەم ساڵحی پېسە شالیارو نۆتۍ جە کابینەو پەنجەمی مەگېڵانۆ پەی هەرېمو کوردەسانی.
ئاشتی ھەورامی، بە مەڵامەتو نەوەشی، تاریخو (#20-10-2024#ز.) دمای نەشتەرگەریێ جە شارو لەندەنی،  تەمەنو ( 76) ساڵینە کۊچی دمایینش کەرڎەن.
ئاشتی هۆرامی، پېسە شالیارێ کارا و شارەزای جە ویارو وېشەنە هەرمانەی ئېژێش کەردېنە، ئاڎ بە ئازایی و شارەزایی وېش ژمارێ فرۍ جە کۊمپانیا نۆتییە زەبەلاحە جەهانییەکاش خزنێنە دلۍ ویارو نۆتەو کوردەسانی، کە ئانەیچە هەرمانێ قورسە و زامەتە بۍ، چوونکوم ئا کۊمپانیا زەبەلاحۍ زېیاتەر چەنی میانە دۆڵەتییەکا هەرمانە مەکەران، هەرچن کوردەسان هەرېمێ جیانەکریابۍ جە وڵاتو ئێراقی، بەڵام وەڵکۆتێ فرەش جە ویارو کەرتو نۆتېنە بەدەسئاوەرد، ڕامیاریی ناوچەیی و میاندۆڵەتی بە یاسا سنوورێش پەی ئا دەسکۆتەیە نیارەو دلۍ داڎگاو (پاریس) جە وڵاتو فەرەنسای بە یەکجاری ئا دەسکۆتېشا ئەسێوە جە حکومەتو هەرېمو کوردەسانی. چەنی ئانەیچە یاگە دەسو ئاشتی هۆرامی هەر دیارەن، بە دەرەجەی یەکەم زاتو تەمامو کۊمپانیا جەهانیەکاش ماڕا هەکە بۍ پەروا جە هەر سەردەمێ تەرەنە سەرمایەگوزاری نۆتۍ و کانزا سرووشتیەکانی دلۍ هەرېمو کوردەسانینە بکەران، کۊڵەکێ مەحکەمەی دارایی و ئابوریەش ئەشناسا بە وڵاتە زلهېزەکانی کە جە هەر ویارێ گونجیانە تەماو دەسکۆتیشان بکەران ئا سەروەتە نیشتیمانیەیەو دەسکوتێ نەتەوەیی پەی کوردی قبووڵ بکەران.
ئەسعەد ڕەشید.[1]