ناونیشان: تاڤگەی ڕق و نموونەی بەرزی لێبووردەیی
نووسەر:#ئادەم بێدار#
ڕۆژی دەرچوون:#28-04-2023#
ڕۆژی پێنجشەممە، 27ی نیسان پشێوی لە ناوەندی شنگال درووستبوو، دوای ئەو پشێوییە وەک ئاگر بەربووبێتە پووشەڵان، هەواڵی هێرشکردنە سەر مزگەوتی (رەحمان) و سووتاندنی لە سۆشیاڵ میدیا بڵاوبووەوە، گوایە ئێزدییەکان ئەو کارەیان کردووە، لێرەوە بەپێویستی دەزانم هەڵوەستەیەکی کوورت لەسەر ئەو بابەتە بکەم.
=KTML_Bold=بۆچی پشێوییەکە ڕوویدا؟=KTML_End=
ڕووداوەکە بەهۆی ئەوە بووە کە بە پاڵپشتیی هێزەکانی تەناهی شنگال، چەند خێزانێک وەک سەپاندنی بەزۆر هێندراونەتەوە شنگال، لەوکاتەدا یەکێک لە ڕزگاربووەکانی دەستی داعش بەناوی (بەدریە) تووشی شۆک دەبێت کە یەکێک لەوانەی بەزەبری هێزەکانی تەناهی گەڕێندراوەتەوە چەکدارێکی داعش بووە بە ناوی ( حاجی ئەیاد) ، بەدریە برینە ساڕێژنەبووەکەی جارێکی دیکە دەکوڵێتەوە و هەواڵی لێدەدات، ئەمەش دەبێتە هۆی سەرهەڵدانی ناڕەزایی خەڵک و دەرئەنجام خۆپێشاندانی لێدەکەوێتەوە، دیارە کە ناڕەزاییەتییەکەی کوردانی ئێزدیی شنگال دژی بەزۆر گەڕاندنەوەی چەکدارانی داعش بووە، بەڵام شوێنی ناڕەزاییەتییەکە گەیشتووەتە بەردەم مزگەوتی ڕەحمان و لەوێ کۆبوونەوەتەوە و چەند مێرمنداڵێک کە ژمارەیان کەمترە لە پەنجەکانی دەست، چەند بەردێک دەگرنە مزگەوتەکە، پێویستە لەو دیمەنە وردبینەوە.
=KTML_Bold=مزگەوت و پەرستگەکان هێڵی سوورن=KTML_End=
هەر کەس و لایەنێک و بەهەر بیانوێک، هێرش و بێڕێزی بکات بە مزگەوت یان پەرستگەی هەر ئایینێکی دیکە ئەوە کارێکی ناشەرعی، نایاسایی، نامۆ بە کولتووری کوردەواری کردووە، پێویستە ئەوە ڕوون بێت کە مزگەوت و پەرستگەکان ماڵی خوان، ئایینەکان جەخت لەسەر ڕێز و پاراستنیان دەکەنەوە، منیش وەک هەر کەسێکی دیکەی موسڵمان لەو هەرێمە هەر جۆرە بێڕێزییەک بەرانبەر مزگەوت ڕەتدەکەمەوە و دژی دەوەستمەوە، بەڵام ئیسلام و قورئان منیان فێرکردووە (ولا یجرمنکم شنآن قوم على ألا تعدلوا إعدلوا) ، لەو سۆنگەیەوە کە پێویستە ئینساف و دادگەربم بەپێویستی دەزانم چەند شتێک لێرە یاداشت بکەم.
=KTML_Bold=کوردانی ئێزدی وەک نموونەیەکی بەرزی پێکەوەژیان=KTML_End=
کوردانی ئێزدی مێژوویێکی دەوڵەمەندیان هەیە لە پێکەوەژیان و لێبووردەیی، ئەوان دوای 76 فەرمانی جینۆساید هێشتا هەر لێبوردەن، حەزیان لەکاری بە یەکەوەییە، هاوکاری خەڵکی لێقەوماو دەکەن، هەڵوێستە مرۆڤینییەکانیان شایەتی ئەوەن، کێ هەیە کچ و ژنەکانی بەکۆمەڵ کڕین و فرۆشتنیان پێوەەکرابێت بەناوی ئیسلام، بەڵام بەڕوونی بڵێن ئەوە ئیسلام لێی بەرپرس نییە!
بیربکەوە 20 ئافرەت لە خێزانەکەت بە بەرچاوی تۆوە دەستدرێژییان کرابێتەسەر و تۆش سەنگینی خۆت لەدەست نەدەیت و بڵێیت ئەوە گرووپێکی تیرۆریست لێی بەرپرسن نەک ئیسلام؟! ئەرێ ئەوە نموونەیەکی بەرزی سەنگینی و لێبوردەیی و پێکەوەژیان نییە؟
کوردانی ئێزدی هەمیشە ڕێزی زۆریان بۆ ئیسلام و موسڵمانان هەبووە، ئەوان نەک هەر ڕێز بگرە ماڵی میری ئێزدیان زەوی و موڵکی خۆیان بەخشیوەتە موسڵمانانی شێخان بۆ ئەوەی مزگەوتی لەسەر درووستبکەن، نەک هەر ئەوە بگرە خۆشیان هاوکاریی موسڵمانانیان کردووە لە بنیاتنانی مزگەوتەکە، ئەرێ چۆن ئەوانە وەک دژی مزگەوت وێنا دەکرێن؟
ئەگەر کوردانی ئێزدی شنگال هێرشیان کردبایەتە سەر مزگەوت، ئەوا چەندە گەڕاونەتەوە شنگال و مزگەوتەکەش هەر لەوێ بووە و هیچ جۆرە شتێکی بریندارکەریشیان نەگوتووە لەسەری چ جای هێرشکردنە سەر؟!
=KTML_Bold=گەڕاندنەوەی چەکداری داعش بەزۆر وەک فیتی حەرامزادە=KTML_End=
پێویستە وردبینەوە لەو شێوازی مامەڵەیەی کە حکومەتی ئێراقی فیدراڵ دەمێکە دەستی داوەتێ بەرانبەر بە دۆسیەی شنگال هەزار پرسیار دێنێتە پێشەوە، بێدەنگبوون لە ئاست تاوانێکی گەورەی جینۆسایدی کوردانی ئێزدی، هێنانەوەی خانەوادەی چەکدارانی داعش بۆ سنووری جوگرافیی ئێزدییەکان و حیساب نەکردن بۆ هەستی ئەو هەموو ئێزدییانەی جینۆساید کران؟ دادگایی نەکردنی تۆمەتباران و بگرە بەردانیان و بەئازادی سووڕانەوەیان وەک ئەوەی زۆر جار لە خەڵکی شنگال بیستوومە لە کۆڕ و کۆنفراسەکان قسەی لەسەر دەکەن جێی تێڕامانە؟ نوێترینی ئەو کارە ئیستیفزازییانەی حکومەتی فیدراڵ چاوساخی و پاڵپشتی هێزە تەناهییەکانی شنگالە بۆ هێنانەوەی بەزۆری خەڵکانێک کە چەکداری داعش بوونە و دەستیان سوورە بە خوێنی خوشک و برایانی ئێزدی، ئەرێ ئەوە نانەوەی فیتنە و ئاشووب نەبێ چییە؟
با سەرنجێکی ئەو گرتە ڤیدیۆییانە بدەین کە دەزگایەکی میدیایی وەک ئەوەی هەنگوینی لە شانە دۆزیبێتەوە هانی موسڵمانانی پێدەدات دژی کوردانی ئێزدی، ژمارەیەکی کەمی مێرمنداڵ لەناو جۆش و خرۆش و ئاپۆڕای تووڕەییان لەو ڕووداوانە بەبەر چاوی هێزێکی تەناهی بەرد دەگرنە مزگەوت و ئەوانیش دەستەوەستان ماون بەدیاریانەوە، ئەرێ ئاماژەیەکی زۆر ڕوون نییە کە دەستێکی بەهێز لە پشتی ئەو ڕووداوانەیە و مەبەستییەتی ئارامیی شنگال تێکبدات؟
هاوکات بڵاوکردنەوەی هەواڵی ناڕاست و هەڵبەستراو لەسەر ڕووداوەکە بەوەی مزگەوتەکە سووتێندراوە لەلایەن کوردانی ئێزدی، لەکاتێک وەک ئەوەی ڕووداو وێنەی مزگەوتەکەی بڵاوکردەوە کە هیچ شتێک لە حەرەمی مزگەوتەکە نەکراوە خۆی لەخۆیدا ئاماژەی ڕوونە بۆ ئەوەی هێزگەلێکی زاڵ لە شنگال دەیەوێ ڕەوشەکە تێکبدات و ئەوانەش ئامانجیان لێدانە لە هەوڵەکانی سوودانی و هەرێمی کوردستان بە ئاڕاستەی چارەسەری کێشەکان و ترسیانە لە جێبەجێکردنی ڕێککەوتنی شنگال؟ یان ئامانجی دیکەی شاراوەیان هەیە؟
چۆنییەتیی سەرەدەری لەگەڵ هەواڵێکی وا لە هەرێمی کوردستان و بێدەنگیی ناوەندەکانی سوننەمەزهەب لە ناوەڕاستی ئێراق خاڵێکی دیکەی سەرنجڕاکێشە، کە خۆی چەقی بابەتەکە خەڵکێکی سوننە مەزهەبە کەچی ئەوان بێدەنگن!
نابێ ئەو ڕووداوەش نەبەستینەوە بە ڕووداوەکانی هێرشی چەند ڕۆژەی ڕابردوو بۆ سەر لویس ساکۆ، پاتریاکی کڵێسەی کلدانی لە ئێراق و جیهان، هەروەها ڕووداوی هێرشەکەی سەر گۆڕستانێکی هەولێر و سووتاندنی قورئانی پیرۆز کە دیارە ئامانجی سەرەکیی هەرێمی کوردستان و ئەزموونەکەیەتی لە پێکەوەژیان.
=KTML_Bold=کاردانەوەی لایەنەکان=KTML_End=
ئەوەی ڕوونە ئەمجۆرە ڕووداوانە کاردانەوەی جیایان لێدەکەوێتەوە: مەڵبەندی نەینەوای یەکگرتووی ئیسلامیی کوردستان لە ڕاگەیێندراوێکدا بڵاویکردەوە، چەند کەسێکی تووندڕەوی پێکهاتەی ئێزدی هێرشیان کردووەتەسەر مزگەوتی ڕەحمان لە شنگال بە بیانووی بێ مانا، ئێمە بە تووندی ئەم تاوانە ڕیسوا و شەرمەزار دەکەین.
لە ڕاگەیێندراوێکدا وەزارەتی ئەوقاف و کاروباری ئایینی لەبارەی ئەو ڕووداوەدا هاتووە، بە تووندی سەرکۆنەی بێڕێزی و دەستدرێژیکردنە سەر مزگەوت و ھەر ناوەندێکی دیکەی ئایینی دەکات و دەشڵێت، پێشمان وایە ئەم کارە ناڕەوایە دوورە لە ئاداب و نەریتی خوڕەوشتی ڕەسەنی ئایینی و کوردەواری و ھەوڵێکی پلان داڕێژراوە بۆ تێکدانی ئاشتیی کۆمەڵایەتی و ئایینی لە ناوچەکەدا، بۆیە ھەموو ئەو لایەنانەی لێناگەڕێن دۆخی شنگال ئاسایی بکرێتەوە و بەرپرسی یەکەمی ڕووداوەکەن و کە بەردەوام ڕۆڵیان لە ئاژەوەگێڕیی دەڤەرەکەدا ھەیە.
یەکێتیی زانایانی ئایینیی ئیسلامیی کوردستان دەڵێت: لەلایەن چەند کەسێکی دانیشتووی شنگال هێرش کرایە سەر مزگەوتی (الرحمن) و کاردانەوەی خراپی بەدوای خۆیدا هێنا. دەشڵێت، مزگەوت شوێنی خواپەرستیی موسڵمانانە و هیچ کەس و دەستێک بۆی نییە لەژێر هەر پاساو و ناوێک بێت سووکایەتیی پێ بکات.
هاوکات چەند کەسایەتییەکی ئیسلامی لەناویاندا مامۆستایانی ئایینی، ڕێبەری ڕەوتێکی ئیسلامی، بانگخواز، ..هتد بە تووندی هاتنە سەر هێڵ و هێرشی زۆریان کردە سەر کوردانی ئێزدی، لەوانە: مامۆستایەکی ئایینی لە پەڕەی خۆی لە فەیسبووک نووسیوویەتی: خوای گەورە حەقیقەتی دوژمنایەتیی شەیتان پەرستانی دەرخست، بزن ئەجەلی هات و بۆیە نانی شوانی خوارد.
ڕێبەری ڕەوتێکی دیاری ئیسلامی نووسیویەتی: بێڕێزیکردنی شەیتان پەرستان بەرانبەر مزگەوت و خوا پەرستان تەنیا بچووکی و بێڕێزی و ترسنۆکیی خۆیان و مەزنێتی و گەورەیی و بەهێزبوونی زیاتر دایە و ناحەزانیشی لە لاوازبوونی زیاتر دایە.
بانگخوازێکی دیاری ئیسلامیش نووسیویەتی: لەو ڕۆژەی یەزیدییەکانی شنگال ئاوارەبوون ئەگەر ئێمە فریایان نەکەوتینایە نان نەبوو بیخۆن.. تەنانەت یەزیدییەکانی شاریا پارچە نانێکیان بۆ نەهێنان، کەچی خێرخوازان لە ڕێی ئێمە بۆ 10 ڕۆژ سێ ژەم خواردنمان بۆ حازرکردن.. کەچی بە پاڵپشتیی حەشدی شەعبی و چەکداران مزگەوت و قورئانیان سووتاند.
هەر وەک کاردانەوە بەشێکی موسڵمانان لە تۆڕە کۆمەڵایەتییەکان هاشتاگی (ٲعوذ_بالله_من_الشیطان_الرجیم و مزگەوت_هێڵی_سوورە) یان ڕاگەیاندووە.
=KTML_Bold=بۆ من زۆر جێگەی سەرنجە:=KTML_End=
لەکاتێکدا هەڵوێستەکەی وەزارەتی ئەوقاف بەرپرسانە مامەڵە لەگەڵ دۆخێکی هەستیار دەکات و میری ئێزدییەکانیش وەک لێڤەگەری باڵای کوردانی ئێزدی دژایەتی خۆی بۆ ئەو کارە دووپات دەکاتەوە، بۆ من جێگای سەرنجە بۆچی خەڵکانێک لە کوردستان ئەوەندە ڕقیان لە کوردانی ئێزدییە کە یەک هەواڵی فەیک بەسە بۆ ئەوەی ناخی ڕەشیان بەدەر بخەن، تاڤگەی ڕقیان خوڕەی بێت و تەڕ و وشک بە یەکەوە بسووتێنن؟
باشە گوناهی هەموو ئێزدییەکان چییە ئەگەر چەند مێردمنداڵێک هێرشیان کردبێتە سەر مزگەوتێک بۆ دەبێ لەسەر هەموو ئێزدی ئەژمار بکرێت؟
بۆچی ئەو هەڵوێستەی فەرمیی لێڤەگەری ئێزدی، میر حازم تەحسین بەگ، میری ئێزدییانی کوردستان و جیهان نابینن، ئەو دەڵێت: کاتێک داعش هێرشی سەر شنگال، موسڵمانان دەرگەی مزگەوتەکانیان بۆ کردوونەتەوە و کەمتەرخەمییان نەکردووە. جەخت دەکاتەوە: ئەوە لە ئەخلاقی ئێزدییەکان و میری ئێزدییدا نییە مزگەوت بسووتێنین و هێرشی بکەنەسەر. فەرماندەی فیرقەی شنگالیش جەختیکردووەتەوە کە هیچ مزگەوتێک نەسووتێندراوە.
ئایینی پیرۆزی ئیسلام کە ئایینی داگەری و ئینسافە، ئەوەی ڕەتکردووەتەوە کەسێک سزا بدرێت لەسەر تاوانی خەڵکی دیکە، لەوبارەوە خوای گەورە دەفەرمووێت: (ولا تزر وازرە وزر أخری) ، کەواتە ئەو هێرش و ڕقباراندنە بەسەر کۆی گشتیی کوردانی ئێزدی بەهۆی تاوانی چەند مێرمنداڵێک پێچەوانی ئیسلام و قورئانی پیرۆزە.
بەڕاستی شەرم دامدەگرێت خەڵکانێک بەناو و نازناوی گەورەوە ئەوەندە قین لەدڵ بن و بەدوای کەمترین هەڵەدا بگەڕێن بۆ ئەوەی ڕقیان هەڵڕێژنە سەر کۆمیونیتییەک کە گەورەترین مەرجەعی ئایینی و سیاسی و کارگێڕییان و ناوەندەکانیان وەک بنکەی ڕۆشنبیری و کۆمەڵایەتی لالش و کەسایەتییەکانیان و بەڕێوەبەرایەتیی گشتیی کاروباری ئێزدی خۆیان بێبەری کردووە لەو کارەی چەند مێرمنداڵێک و جەخت لەسەر ڕێزی مزگەوت بکەنەوە لەلایان؟!
باشە ئەگەر ئێوە ئەوەندە خەمخۆری ئیسلامن خۆ خوا زۆر بەڕوونی باسی پیرۆزیی ژیانی مرۆڤی کردووە، (من قتل نفسا بغير نفس أو فساد في الأرض فکأنما قتل الناس جميعا) ، واتە: کەسێک بەبێ تاوان کەسێکی دیکەی کوشتبێت وەک ئەوە وایە هەموو مرۆڤایەتی لەناو بردبێت. یان پێغەمبەر (د.خ) فەرموویەتی کوشتنی کەسێک لەلای خوا زۆر قوورسترە لە ڕووخانی کەعبە، باشە قەت بیر لەوە ناکەنەوە ئەگەر بەهۆی ئەو نمایشەی ئێوە خوێنی کەسێکی ئێزدی بێ تاوان ڕژا چۆن وەڵامی خوا دەدەنەوە؟ ئەرێ بەڕاست ئێوە لەو کاتەی داعش بەناوی خوا و پێغەمبەر و ئیسلام ئەو هەموو کوشت و بڕەی کرد و زۆر هەوڵمدا بە بۆنەی تێپەڕینی ساڵێک بەسەر کارەساتی شنگال لە وتاری هەینی پرۆتستۆی ئەو کارە بکەن، بۆچی زۆربەتان ئامادە نەبوون ئەوە بکەن؟!
=KTML_Bold=چەند کەس لە ئێوە ڕێپێوانی کرد دژی بەسەبایابردنی کچ و خوشکانی ئێزدیمان؟!=KTML_End=
هەڵبەت ئەوە کەمکردنەوە نییە لە هەڵوێستی زۆرینەی موسڵمانانی کوردستان لەو ڕووداوە و هاوکارییان بۆ کوردانی ئێزدی، بەڵام ئەو جۆرە کەسانە خەمی هەرە گەورەیان خۆنمایشکردنە بەوەی بەرگریی لە ئایینی خوا دەکەن و زۆر جاریش تەنیا وەک بزنسێک ئەوە بەکار دەهێنن بۆ خۆیان! [1]