ئێمە وەکو ئاژانسی ڕۆژنیوز هێشتا لە شینی (وەدات حسێن) داین، هەواڵی تیرۆرکردنی پەیامنێری (KNN) (شوکری زەینەدین)مان پێگەیشت، سەرەتا ئێمە وەکو ڕۆژنیوز سەرەخۆشی لە بنەماڵەی ڕۆژنامەنووس شوکری زەینەدین و هەموو هاوپیشەکانی و بە تایەتبەتی کەناڵی (KNN) دەکەین.
ئێمە وەحشیگەری و دووبارەبوونەوەی ئەو ڕووداوە بە تایبەت لە ناوچەی بادینان شەرمەزار دەکەین، هاوکارەکەی ئێمە وەدات حسێن عەلی-ش بەهەمان شێوەی دڕندانە لەهەمان دەڤەر لە ڕۆژی 13ی ئاب، چوار مانگ لەمەوبەر تیرۆر کرا، بکەرانی تیرۆری وەدات نەدۆزرانەوە، سزا نەدران، دادگاییش نەکران، تاریکی، تاریکاییەکی دیکە بەدوای خۆی دا دێنێ، ئەگەر ڕووداوی تیرۆرکردنی وەدات ڕوون بکرایەتەوە، ئەمڕۆ تیرۆرکردنی شوکری زەینەدین-مان نەدەبینی.
"ئەو شێوازە، شێوازێکی دیکتاتۆریانە کە ئەمڕۆ لە باکوری کوردستان ڕۆژانە دەیبینین"
لە بارودۆخێکی وەها ئاڵۆز کە قەیرانی سیاسی و ئابووری لە هەرێمی کوردستان لە بەرزترین ئاستی دایە، لە جێگەی چارەسەریی لە قاڵبی کوشتن، تیرۆر، هەڕەشە و چاوترساندن، ئەو قەیرانە قووڵتر دەکاتەوە، بە کوشتنی سۆرانی مامە حەمە، سەردەشت عوسمان، کاوە گەرمیانی و وەدات حسێن، ڕۆژنامەنووسان دەستیان لە کاری ئەخلاقی خۆیان کە گەیاندنی دەنگی ڕاستییە هەڵناگرن، بە تیرۆر کردنی شوکری زەینەدین-یش ئەو ڕاستییە لە تاریکیدا نامێنێتەوە، ئەو شێوازە، شێوازێکی دیکتاتۆرییانەیە کە ئەمڕۆ ئێمە لە باکوری کوردستان ڕۆژانە دەیبینین، ئەمڕۆ، کە ئەردۆغان بۆ شاردنەوەی سیاسەتی لەناوبردنەکەی خۆی، دەکوژێ، دەستگیردەکان، دەیانخانەتە بەندیخانەی تاکە کەسی.
"ئێمە ڕوماڵی ڕاستییەکان دەکەین، بێدەنگ نابین"
هەڵوێستی ڕۆژنامەنووس، ڕێکخراوەکانی کۆمەڵگەی مەدەنی و هەموو خەڵکی هەرێمی کوردستان بۆ وەستاندنی ئەو تیرۆرانە، کە ئەنجامدەرانیان بە چاوقایمی سەیری ناوچاومان دەکەن، گرنگە، پێویستە بە دروشمی "ئێمە ڕووماڵی ڕاستییەکان دەکەین، بێدەنگ نابین" ڕۆژنامەنووسان و هەموو کۆمەڵگەی باشووری کودستان داوای سزادانی بکوژە نەناسراوەکان بکەن، بێدەنگی لە ئاست ئەو ڕووداوانە زنجیرەی ئەو وەحشیگەرییە درێژتر دەکات.
"ئێمە بە چاوترساندن واز لە ئەرکەکامان ناهێنین"
لە کۆتاییدا ئێمە وەکو ئاژانسی ڕۆژنیوز، کە هیێشتا بکوژانی ڕۆژنامەنووسەکەی ئێمە نەدۆزراونەتەوە، داوادەکەین، کە هەرچی زووە بکوژان دەستگیر بکرێن و سزا بدرێن، ڕاشیدەگەیەنین، کە بە چاوترساندن، ئێمە ئەرکی خۆمان لە وتن و گەیاندنی ڕاستییەکان نیوەناچڵ بەجێ ناهێڵین، چونکە ئەرکی ئێمە ڕوونکردنەوەی ڕاستییەکانە.
03-12-2016

ساڵێک بەسەر ڕووداوەکانی 16ی ئۆکتۆبەردا تێپەڕدەبێت، لەو ڕۆژەدا کورد زیاتر لە 51% خاکی باشوری کوردستانی لەدەستدا و #کەرکووک# و ناوچە دابڕێندراوەکان کەوتنە دەستی سوپای عێراق و #حەشدی شەعبی#، تا ئێستا و ماوەی ساڵێکە حوکمی سەربازیی لەو ناوچانە بەردەوامە و لە ژێر دەستی سوپا و حەشدی شەعبییدان.
ڕۆژنیوز لەم دۆسیەیەدا تیشک دەخاتە سەر ڕووداوەکانی ناوچە دابڕێندراوەکان، ڕووداوی 16ی ئۆکتۆبەر و کاریگەریی و دەروهاویشتەکانی لە کەرکووک و ئەو ناوچانەی تر کە سوپای عێراق و حەشدی شەعبی دەستیان بەسەردا گرت.
کەرکووک بە یەکێک لە کۆنترین شارەکانی کوردستان و ڕۆژهەڵاتی ناوڕاست دادەنرێت، مێژووکەی دەگەڕێتەوە بۆ پێنج هەزار ساڵ پێش ئێستا، لەڕووی سامانی سروشتیی و بەتایبەت نەوتەوە، بە یەکێک لە دەوڵەمەندترین شارەکانی جیهان هەژماردەکرێت، چوار پێکهاتەی سەرەکی لە کەرکووک دەژین (کورد، عەرەب، تورکمان، ئاشور).
لەڕووی مەزهەبییشەوە دانیشتوانی شارەکە بەسەر سوننە و شیعەدا دابەش بوون، جگە لە بوونی کوردانی کاکەیی.
بەپێی سەرژمێرییەک کە لە ساڵی 2014 لە ڕێگای فۆرمی خۆراکەوە ئەنجامدراوە، ژمارەی دانیشتوانی کەرکووک زیاترە لە 900 هەزار کەس، کە نەتەوەی کورد زیاتر 50%ی دانیشتوانی شارەکە پێکدەهێنێت.
زیاتر لە 40 گەڕەک لە کەرکووک بوونیان هەیە، هەرسێ شارۆچکەی (#داقوق#، دوبز، حەویجە)-ی لەسەرە، هەروەها 16 شارەدێ و زیاتر لە 500 گوند سەر بە کەرکووکن، کە پێکهاتە و نەتەوە جیاوازەکان بەسەر شارۆچکە و شارەدێ و گوندەکاندا دابەش بوون.
کەرکووک بە چوارەم گەورەترین پارێزگا لە عێراق هەژمار دەکرێت، لە ساڵی 1927 لە کێڵگەی نەوتی باباگوڕگوڕ دەست بە دەرهێنانی نەوت کراوە، شارەکە خاوەنی چوار کێڵگەی نەوتی گەورەیە کە پێکدێن لە (باباگوڕگوڕ، زەمبور، بای حەسەن، هاڤانا)، بوونی ئەو کێڵگە نەوتییانە و سامانی سروشتی، کەرکووکی کردووەتە ناوەندێک بۆ ململانێی هێزە ناوخۆ و دەرەکییەکان.
لە دوای ڕوخانی ڕژێمی بەعس، کەرکووک لە ڕووی ئیدارییەوە سەر بە حکومەتی عێراق بووە، سەرجەم فەرمانگە حکومیەکان سەر بە ناوەند بوون، جگە لە بەڕێوەبەرایەتی پەروەردەی خوێندنی کوردیی، بەڵام کورد بەهێزترین پێکهاتەی شارەکە بووە، بە جۆرێک زۆربەی بەڕێوەبەری فەرمانگە و دامەزراوەکان کورد بوون، هەروەها دۆسیەی ئەمنیی شارەکە لە دەستی کوردا بوو، پارێزگار و سەرۆکی ئەنجوومەن پشکی کورد بوون.
باڵادەستبوونی کورد لە شارەکە، نەبووە هۆکار بۆ سەقامگیربوونی کەرکووک لە ڕووی ئەمنییەوە، ڕۆژانە تەقینەوە و حاڵەتی کوشتن و ڕفاندن تۆمار دەکران، تا ئێستاش ئەو حاڵەتانە بەردەوامییان هەیە.
لەپێش ڕووداوەکانی 16ی ئۆکتۆبەر، پێکەوەژیانی نێوان نەتەوەکان لە ئاستێکی باشدا بوو، نەتەوە و مەزهەبە جیاوازەکان پێکەوە دەژیان، ئەمەش بووبووە جوانترین نمونەی پێکەوەژیانی دیموکراتییانە، وەک نەتەوەکانی کەرکووک خۆیان باسی لێوەدەکەن ئەو پێکەوە ژیانە ڕەگی داکوتاوە و هەمیشە وەک برا و خوشک دەژین، ئەو ناکۆکییانەی کە باسی لێوەدەکرێت سیاسییەکان دروستی دەکەن و ئەوان خوڵقێنەری فیتنەوە و ئاژاوەن.
لە سەرەتای ساڵی 2014 و لەگەڵ سەرهەڵدانی چەتەکانی #داعش# و داگیرکردنی شاری #موسڵ# و بەشێک لە شار و ناوچەکانی باکور و ناوەڕاستی عێراق، بەهۆی بەرگریی نەکردنی سوپای عێراق، چەتەکانی داعش توانیان شارۆچکەی حەویجەی سەر بە کەرکووک و شارەدێکانی (زاپ، ڕیاز، ڕەشاد، عەباسیە)ی سەر بە حەویجە بخەنە ژێر کۆنتڕۆڵی خۆیانەوە، وە هەڕەشەی داگیرکردنی کەرکووکیان دەکرد.
بۆ بەرگرییکردن لە شاری کەرکووک، هێزەکانی #پێشمەرگە# بە درێژایی سنووری باشور و ڕۆژئاوای کەرکووک سەنگەری بەرگرییان لێدا و لە ناوچەکە جێگربوون و بۆ ماوەی زیاتر لە دووساڵ هاوشان لەگەڵ گەریلاکانی #هەپەگە# و یەکینەکانی ژنانی ئازادی ستار (یەژا ستار) بەرگرییان لە شاری کەرکووک کرد و چەندین جار هەوڵی داگیرکردنی کەرکووکیان لە لایەن چەتەکانی داعشەوە تێکشاند.
بڕیاری ڕیفراندۆم
ساڵی 2017، بڕیاری ئەنجامدانی ڕیفراندۆم لەلایەن هەرێمی کوردستانەوە، کاردانەوەی ناوخۆیی هەرێمی و جیهانیی بەدوای خۆیدا هێنا، حکومەتی عێراق هەڕەشەی توندی لە حکومەتی هەرێم دەکرد، جگە لەوەی کە وڵاتە زلهێزەکانی جیهان دژی ئەنجامدانی ڕیفراندۆم بوون، تورکیا زیاد لە جارێک هۆشدارییدا لە ئەنجامدانی ڕیفراندۆم، ئەمریکاش لەرێگەی ڕیکس تیلەرسن وەزیری دەرەوەی ئەوکاتیەوە نامەیەکی ئاراستەی #مەسعود بارزانی# سەرۆکی ئەوکاتی هەرێمی کوردستان کرد، داوایکردبوو ڕیفراندۆم دوابخات و واشنتۆنیش هەوڵی تەواو دەدات بۆ چارەسەرکردنی کێشەکانی نێوان هەرێم و بەغدا، ئەگەر کێشەکانیش وەکو خۆیان مانەوە، دوای ساڵێک هەرێمی کوردستان ڕیفراندۆمی سەربەخۆیی ئەنجامبدات و ئەوکات ئەمریکا پشتیوانییان دەکات، بەڵام مەسعود بارزانی سوور بوو لەسەر ئەنجامدانی ڕیفراندۆم و بڕیاری دا بە ئەنجامدانی لە 25-ی ئەیلولی 2017.
ئەنجامدانی ڕیفراندۆم لە ناوچە دابڕێندراوەکان، #یەکێتیی نیشتمانیی کوردستان#ی کردە دوو بەرەوە، جگە لە نەجمەدین کەریم، پارێزگاری ئەوکاتی کەرکووک، یەکێتی لە کەرکووک هەر زوو هۆشداری دا لە تێکچوونی دۆخی کەرکووک و لەدەستدانی شارەکە.
ئەوکات ڕەوەند مەلا مەحمود، جێگری لێپرسراوی مەڵبەندی دووی یەکێتی لە کەرکووک، لەکاتی کۆبوونەوەیەکی حزبە کوردستانیەکانی کەرکووک، ڕایگەیاند: میتی تورکیا پیلانی تێکدانی دۆخی کەرکووکی هەیە و نابێت ڕیفراندۆم لە کەرکووک ئەنجام بدرێت.
لە کەرکووک ڕیفراندۆم ئەنجامدرا.
دوای ڕیفراندۆم، کەرکووک بە دۆخێکی ناسەقامگیردا تێپەر دەبوو، ترس و دڵەڕاوکێ باڵای بەسەر کەرکووکییەکاندا کێشابوو، بەڵام فەرماندەکانی هێزی پێشمەرگە دڵنیاییان دەدا کە مەترسیی هیچ هێرشێک لەلایەن هێزەکانی عێراق و حەشدی شەعبییەوە بۆسەر کەرکووک بوونی نیە.
لە ڕۆژی 14ی ئۆکتۆبەر فەرماندە باڵاکانی پێشمەرگە و سوپای عێراق، لە نزیک گوندی مەکتەب خالید لە باشوری کەرکووک کۆبوونەوە، دواتر فەرماندەکانی هێزی پێشمەرگە دڵنیاییان دایەوە هاوڵاتیان کە هیچ مەترسییەک لەسەر کەرکووک بوونی نیە، بەڵام شەوی 15 لەسەر 16ی ئۆکتۆبەر سوپای عێراق و حەشدی شەعبی، لە گوندی بەشیر-ەوە لە سنووری شارەدێی تازە لە باشوری شاری کەرکووک دەستیان بە جوڵە کرد بەرەو شارەکە.
لە چەند شوێنێکی کەم نەبێت، ڕووبەڕووبوونەوە لە نێوان هێزی پێشمەرگە و سوپای عێراق و حەشدی شەعبی ڕووینەدا، لە کاتی ئەو ڕووبەڕووبوونەوانەدا زیاتر لە 50 پێشمەرگە شەهید بوون، ئەو ژمارە کەمە گەریلایەی کە لە سنوورەکەدا بوون هاوشان لەگەڵ هاوڵاتیانی خۆبەخشی سنوورەکە دەستیان بە بەرگریی کرد، بەڵام بەهۆی کەمیی ژمارەیان ناچار بوون پاشکەشە بکەن، هەر لەو ڕۆژەدا لە داقوق هۆگر باران، کادری پارتی کرێکارانی کوردستان-#پەکەکە# شەهیدبوو.
لە بەرەبەیانی 16ی ئۆکتۆبەر، سوپای عێراق و حەشدی شەعبی بەتەواوەتی کەرکووکیان کۆنترۆڵ کرد.
ترسی بەشێک لە کوردانی شاری کەرکووک لە سوپای عێراق و حەشدی شەعبی، وای لە بەشێک لە دانیشتوانی کوردی شاری کەرکووک کرد شارەکە چۆڵ بکەن، بەو هۆیەوە زیاتر لە 200 هەزار کەس ماڵ و حاڵی خۆیان جێهێشت و ئاوارەی هەرێمی کوردستان بوون، بەڵام دوای دوو ڕۆژ، بەشێک لە دانیشتوانی ئاوارەبووی شاری کەرکووک دووبارە گەڕانەوە سەر ماڵ و حاڵی خۆیان. لەگەڵ ئەوەدا تا ئێستا نزیکە 500 خێزانی کەرکووک نەگەڕاونەتەوە بۆ شارەکە.
دوای 16ی ئۆکتۆبەر، جگە لە شاری کەرکووک، تەواوی شارۆچکە و شارەدێکانی سەر بەو پارێزگایە، جگە لە شارەدێی قەرەهەنجیر، کەوتە دەستی سوپای عێراق و حەشدی شەعبی.
لە میانی ڕووداوەکانی 16ی ئۆکتۆبەر، نەجمەدین کەریم پارێزگاری ئەوکاتی کەرکووک و ڕێبوار تاڵەبانی سەرۆکی ئەنجوومەنی پارێزگا، شارەکەیان بەجێهێشت، دواتر بە فەرمانی حەیدەر عەبادی سەرۆک وەزیرانی عیراق، ڕاکان جبوری وەک پارێزگاری کەرکووک بە وەکالەت دەستنیشان کرا، دواتریش ئۆپەراسیۆنی دەستبەسەرداگرتنی کەرکووک ناونرا (چەسپاندنی یاسا).
هەرزوو ڕاکان جبوری، بە پشتگیریی سوپا و هێزە ئەمنییەکان، دەستی کرد بە هەڵمەتی داگیرکردنی زەویە کشتوکاڵەکانی کورد لە دەوروبەری کەرکووک، هەروەها چەندین فەرمانبەر و بەڕێوەبەری کوردی لە پۆستەکانیان دوورخستەوە، ئەمەش بەوتەی خۆی بۆ پاراستنی هاوسەنگی لە دابەشکردنی پۆستەکانی کەرکووک، بۆیە لە دوای 16ی ئۆکتۆبەرەوە کورد لە کەرکووک دةيان پۆستی باڵای لێسەندراوەتەوە.
دۆخی ئەمنیی شارەکە و ناوچەکانی دیکەی دەوروبەری لە دوای 16ی ئۆکتۆبەرەوە ناسەقامگیرە و دەیان تەقینەوە و حاڵەتی ڕفاندن و کوشتن ڕوویانداوە و قوربانییان لێکەوتووەتەوە، ناوبەناو چەتەکانی داعش جووڵە و کردداری تیرۆرستیان هەیە و سوودیان لەو بۆشاییە ئەمنییە وەرگرتووە کە لە دەوروبەری کەرکووک و بەشێک لە ناوچە دابڕێنراوەکان دروستبووە، بەتایبەت لە داقوق هەڕەشەی جدییان لەسەر گوندە کاکەییەکان دروستکردووە، بەشێوەیەک بەشێک لە دانیشتوانی کاکەیی ئەو ناوچەیە ناچاربوون بەهۆی هەڕەشەکانی داعشەوە گوندەکانیان چۆڵبکەن.
لە شارۆچکەی #خانەقین# و شارەدێی گوڵاڵەش داعش بە هەمانشێوە جموجوڵی هەیە و مەترسیی لەسەر دانیشتوان دروستکردووە، هێزە عێراقییەکان چەند جارێک لەناوچە جیاجیاکان ئۆپەراسیۆنی سەربازییان ئەنجامداوە بۆ ڕاوەدوونانی چەتەکانی داعش، هەر ئەو بۆشاییە ئەمنییەیە وای لە کورد کردووە داوا بکات هێزە کوردییەکان بگەڕێتەوە ئەو ناوچانەی لەدوای 16ی ئۆکتۆبەرەوە لەدەستیداوە.
تورکیاش بە بیانوی پاراستنی تورکمانەکانی کەرکووک، بەناوی پاسەوانەوە هێزێکی 500 کەسیی بۆ بەرەی تورکمانی پێکهێناوە، کە هەنگاوی لەو شێوەیە ڕۆڵی دەبێت لە ئاڵۆزترکردنی دۆخی کەرکووک.
هەر لە دوای 16ی ئۆکتۆبەرەوە، دۆخی خوێندنی کوردی لە کەرکووک لەبەردەم مەترسیدایە، بەو پێیەی هەردوو حکومەتی هەرێم فیدراڵ یارمەتیی بەڕێوەبەرایەتیی خوێندنی کوردی نادەن، بۆیە هەم مامۆستایانی خوێندنی کوردی هەوڵدەدەن ڕاژەکانیان بگوازنەوە سەر حکومەتی فیدراڵ، هەم خوێندکارانیش دەیانەوێت خوێندنی کوردی بەجێبێڵن و گرفتی ئەوەیان هەیە دواتر نە لە زانکۆکانی هەرێم، نە لە زانکۆکانی سەر بە حکومەتی فدراڵیش دەتوانن بخوێنن.
بەم دواییانەش حکومەتی عێراق بڕیاریدا چەند خاڵێکی گومرگی لەنێوان کەرکووک و شارەکانی تری هەرێم دابنێت، کە لەئەگەری دانانی ئەو خاڵە گومرگییانە لەرووی ئابوری و داهاتەوە زیان بە خەڵکی هەرێمی کوردستان دەگات و ئەگەری هەیە سەر بۆ بەرزبوونەوەی نرخی شمەک و کاڵا بکێشێت.
دوای 16ی ئۆکتۆبەر کەرکووک لەرووی ئیداریشەوە گرفتی گەورەی بۆ دروستبووە. تا ماوەی پێشوو ئەنجومەنی پارێزگای کەرکووک کۆبوونەوەی نەدەکرد، بەڵام لە دوو هەفتەی ڕابردوودا ئەنجومەنەکە دوو کۆبوونەوەی ڕاوێژکاریی ئەنجامداوە، بێ ئامادەبوونی ئەندامانی #پارتی دیموکراتی کوردستان# لە ئەنجومەنی پارێزگا، بەو پێیەی ئامادە نین بگەڕێنەوە کەرکووک، ڕێبوار تاڵەبانی سەرۆکی ئەنجومەنەکەش لە #هەولێر#ە و بەهەمانشێوە ئامادە نییە بگەڕێتەوە کەرکووک.
بەڵام بڕیارە پێکهاتەکانی کەرکووک دووبارە دەستبکەنەوە بە دابەشکردنەوەی پۆستە گرنگ و سەرەکییەکانی ئەو پارێزگایە، لەو چوارچێوەیەشدا کورد سوورە لەسەر وەرگرتنەوەی پۆستی پارێزگاری کەرکووک و یەکێتی بە پشکی خۆی دەزانێت، پارتیش لەگەڵ ئەوەی هیچ بەرپرس و ئەندامێکی نەگەڕاوەتەوە بۆ کەرکووک، بەڵام دەڵێت کاندیدیان دەبێت بۆ پۆستی پارێزگاری کەرکووک.[1]
#17-10-2018#

ساڵێک بەسەر 16ی ئۆکتۆبەردا تێپەڕی و هێشتا شارۆچکەی #خورماتوو#-ی سەر بە پارێزگای سەلاحەدین نەگەڕاوەتەوە دۆخی جارانی.
دوو ڕۆژ پێش ئێستا دوێنێ یەکەمین ساڵیادی ڕووداوکانی 16ی ئۆکتۆبەر بوو، کە بووەهۆی لەدەستداینی 51٪ی خاکی باشوری کوردستان.
لە ڕووداوەکانی 16ی ئۆکتۆبەری ساڵی 2017-دا کە هێزە کوردییەکان لە شارۆچکەی خورماتوو-ی سەر بە پارێزگای سەلاحەدین و ناوچە دابڕێندراوەکانی دیکە وەدەرنران و ئەو ناوچانە لەلایەن هێزە عێراقییەکانەوە دەستیان بەسەردا گیرا، دەیان تاوان دژ بە گەلی کورد ئەنجام دراون و زیانیی گیانیی و ماڵییان پێگەیاندوون، کە لێرەدا بە کورتیی دەیانخەینەڕوو.
$زیانە گیانییەکان$
لەڕووداوەکانی 16ی ئۆکتۆبەردا،حەوت ئەندامی هێزە ئەمنییەکانی کورد شەهید بوون، کە بریتین لە دوو #پێشمەرگە#ی مەڵبەندی 16ی حەمرینی یەکێتی نیشیتمانی کوردستان و ئەندامێکی ئاسایشی یەکێتی و چوار پۆلیسی بەرگریی و فریاکەوتنی لیوای پێنجی #چەمچەماڵ#، هەروەها 250 پێشمەرگە وئاسایش پۆلیس و هاوڵاتیی خۆبەخش بریندار بوون 24 کەسیش بەدیل گیران، کە دواتر ئازاد کران.
$دەستدرێژیی بۆ سەر ژنان$
لەلایەن چەکدارانی #حەشدی شەعبی#یەوە، دەستدرێژیی کراوەتە سەر چوار ژن و یەکێکیان لە دادگای بەرایی سکاڵای تۆمارکردوە، دواتر بە سوڵحی عەشایەریی بێدەنگ کراون، ئەوانی دیکەش لە بێدەنگیییدا ماونەتەوە، لەوکاتەدا لیژنەی ژنان-ی پەرلەمانی هەریمی کوردستان ڕاپۆرتی خۆیان لەسەر دەستدرێژییکردنە سەر ژنانی خورماتوو ئامادەکرد و ڕایانگەیاند، کە پێشکەش بە ئەنجومەنی نوێنەرانی عێراق-ی دەکەن، بەڵام دەرئەنجامی ئەو ڕاپۆرتە دیار نەبوو، هەروەها، لەکاتەدا باس لەوە کرا، کە ژنێک دوای ئەوەی دەستدرێژیی کراوەتەسەر، لەلایەن کەسوکارەکەیەوە کوژراوە.
$زیانە مادییەکان$
88خانوو،300 دوکان وکۆگا، 300ماڵ لەدوای تاڵانکردن سوتێندران، جگە لەوەی 12بارەگا و پێنج کەناڵێ ناوخۆی کوردیی لە شارۆچکەکە سوتێندران و لەناوبران.
$کەرتی پەروەردە$
پێش ڕووداوەکانی 16ی ئۆکتۆبەر،49 خوێندنگای ئامادەیی و بنەڕەتیی و باخچەی ساوایان هەبوون‌، لەگەڵ شەش هەزار و 900خوێندکار و 494مامۆستا، بەڵام لەدوای ڕووداوەکانی 16ی ئۆکتۆبەر، خوێندنگاکان کەمبوونەتەوە بۆ 27خوێندنگا و 374 مامۆستا و سێ هەزار و 350 خوێندکار، واتە 22 خوێندنگا و 120 مامۆستا و سێ هەزار و 550 خوێندکار کەمی کردووە و نەگەڕاونەتەوە شوێنی خۆیان.
$دانیشتوان$
سێ هەزار ماڵی کورد لە شارۆچکەی خورماتوو، بە هۆی ڕووداوەکانی 16ی ئۆکتۆبەرەوە، ئاوارە بوون و بەزۆریی ڕوویان لەسنووری ئیدارەی #گەرمیان# کرد بەهۆی نزیکیانەوه،‌ بەشێکیشیان چوونە ناوچەکانی دیکە،‌ لەئێستادا 80٪ دانیشتوانی شارۆچکەکە گەڕاونەتەوە، ئەوە ڕێژەی نەگەڕاونەتەوە 60 خێزانیان لە نێو کەمپی ئاوارەکانی تازەدێ-ن لە گەرمیان و ئەوانەی دیکەش لە گەرمیان پارێزگاکانی #سلێمانی# و#هەولێر# نشتەجێبوون.
$هۆکاری نەگەڕانەوەی ئاوارەکان؟$
ئه و هاوڵاتییە کوردانەی شارۆچکەی خورماتوو، کە تا ئێستا نەگەڕاونەتەوە، بەشێکیان خانووەکانیان ڕووخاوە وتەقێندراوە‌تەوە وسوتێنراون و بەکەڵکی ئەوە نایەن تێیاندا بژین، بەشێکی تریان لەلایەن هێزە ئەمنییەکانی حکومەتی ناوەندەوە داواکراون و تۆمەتبارن بەکاری ئاژاوەگێڕیی و ئەندام بوون لەڕیزی هێزە ئەمنییەکانی حکومەتی هەرێم و پێشمەرگەدا، هەندێکی دیکەشیان، دەڵێن، کە ژیان لە خورماتوو پارێزراو نییە و بەم دۆخەوە ناگەڕێنەوە.
$بواری تەندروستیی$
سوتاندن و ڕووخاندن و تەقینەوە وتاڵان کردن وئەتکردن، ئه و ڕووداوانەن،‌ لە 16ی ئۆکتۆبەردا کاریگەریی دەرونیان لەسەر دەروونی تاکی خورماتوو جێهێشتووە و بوگوێرەی ئەو زانیارییانەی، کە ڕۆژنیوز لە نەخۆشخانەکانەوە وەریگرتووە، بەشێکی زۆری هاوڵاتیان تووشی دڵەڕوکێ و ترس و گۆشەگیریی بوون.
$ژینگە$
بەهۆی کردەوەی سوتان وتەقاندنەوەی خانوو ودووکانەکانی کورد لەشارۆچکەکە ژینگەی گەڕەکە‌ کوردییەکان بە دووکەڵ و پاشماوەی ئه و کاولکارییانەوە پیس بووە لەبەر کەمیی خزمەتگوزاریی خاوێنکردنەوەی گەڕەکەکان، زبڵ و خاشاکێکی زۆر لە گەڕەکەکاندا کۆبوونەتەوە و سیمای شارۆچکەکەیان ناشرین کردووە، مەترسیی بڵاوبوونەوەی نەخۆشیشیان لێدەکرێت.
$پۆستە ئیدارییەکان$
پێش ڕووداوەکانی، 16ی ئۆکتۆبەر، لە شارۆچکەی خورماتوو، پۆستە ئیدارییەکان لەنێوان پێکهاتەکاندا دابەش کرابوو، کوردیش وەک پێکهاتەیەکی سەرەکیی شارۆچکەکە ئەم پۆستانەی لای بوو: قائیمقام، بەڕێوەبەری بەشی دارایی لە قائیمقامییەت، سەرۆکی شارەوانی، بەڕێوەبەری فەرمانگەی کارەبا، بەڕێوەبەری بەڕێوبەرایەتییەکانی کشتوکاڵ و فێترنەریی، بەشی دابەشکردنی نەوت، بەڕێوبەری نەخۆشخانەی گشتیی خورماتوو.
لە دوای ڕووداوەکانی 16ی ئۆکتۆبەر، پۆستی قائیمقام و سەرۆکی شارەوانی، بەڕێوبەری بەشی دارایی، بەڕێوبەری فەرمانگەی کارەبا، بەڕێوبەری بەڕێوبەرایەتیی ڤێرترنەری لە کورد وەرگیرانەوە و دران بە تورکمان، بەڕێوبەری پۆلیسی شارۆچکەکەش هەر لای تورکمانە.
واتا ئێستا کوردسێ پۆستی ئیداری لایە، ئەوانیش بەڕێوبەرەکانی بەڕێوەبەرایەتیی کشتوکاڵ و نەخۆشخانەی گشتی خورماتوو و بەشی دابەشکردنی نەوت.
سەرۆکی ئەنجومەنی شارۆچکەی خورماتوو هەر وەک جاران لای عەرەب ماوەتەوە و بەڕێوبەری بەڕێوبەرایەتیی پەروەردەش عەرەبە.
$دۆخی ئێستای خورماتوو$
سەباح جومعە، ئەندامی کوردی ئەنجومەنی شارۆچکەی خورماتوو، بەڕۆژنیوزی وت: دۆخی ئێستای ناوەندی خورماتوو لەڕووی ئەمنییەوە باشە و پێشێلکاریی زەق نییە‌، لەڕووی خزمەتگوزارییشەوە لەگەڕەکە کوردییەکان هیچ شتێک نەکراوە، بەڵام پرۆژەی ئاوەڕۆی گەڕەکەکانی تری خورماتوو دەستی پێکردووە.
هەرچەندە وەک سەباح جومعە باسی دەکات، لە ناوەندی شارۆچکەی خورماتوو پێشێلکاریی زەق لە ئێستادا نییە، بەڵام لە دەوربەری خورماتوو حاڵەتەکانی ڕفاندن و تەقینەوەی بۆمب زۆر زۆرە و ترسیان لای هاوڵاتیانی خورماتوو دروستکردووە و بەشێک لە ئاوارەکانیش وەک خۆیان باسی دەکەن، بەهۆی گەرەنتیی نەبوونی ئاسایشیان ناگەڕێنەوە بۆ شوێنی خۆیان.[1]
#18-10-2018#

ماوەیەکە لەلایەن کەسانی نەناسراوەوە چەند پەیج و ئەکاونتێک لە تۆڕی کۆمەڵایەتی فەیسبووک، بە ناو و لۆگۆی ڕۆژنیوزەوە دانراوە، جێگای نیگەرانییە، کە زۆر نابەرپرسیارانە و دوور لە پێوانە ئەخلاقییەکان هێرشە دەکەنە سەر کەسایەتییەکان، لایەنە سیاسیی و حکومییەکانی هەرێمی کوردستان.
لێرەوە ڕایدەگەیەنین، کە ڕۆژنیوز جگە لە تەنها پەیجێکی فەیسبووک، کە لە خوارەوە دانراوە، بەرپرس نییە لەهیچ پەیجێکی دیکە و ئەو شێوازە کارکردنەوە بەتوندی ڕەتدەکاتەوە، بەڵکو بەپێی یاسا ناوخۆیی و نێودەوڵەتییەکانی تایبەت بە ڕاگەیاندن، بە دروشمی خستنەڕووی ڕاستییەکان ئەرکی ئێمەیە، درێژە بە کاری خۆی دەدات.
دەستەی بەڕێوەبەریی ئاژانسی ڕۆژنیوز
#15-01-2019#

رۆژنیوز زاهیر ئیبراهیم

توندوتیژیەکانی سەر ژنان و بەتایبەت خۆسوتانی ژنان لە دەڤەری سۆران لەزیادبوندایە، وێڕای ئەوەی بەڕێوەبەرایەتی بەرەنگاربونەوەی توندویژی ئامادەنەبوو ئامار بدات بە ڕۆژنیوز، بەڵام ڕۆژنیوز لەوبارەیەوە ئامارێک کۆدەکاتوە. تەنها بەگوێرەی ئەو ئامارە ڕێژەی سوتانی ژنان لە بەرزبونەوەدایە. چەند ژن بەدەستی کەس و کاریان کوژراون، ئەمە جگە لەوەی تەنها لەیەک هەفتەدا 4 ژن بەهۆی حەب خواردنەوە هەوڵی خۆکوژیان داوە. چالاکوانێکی ژنانیش داوا دەکات هەڵوێستی جدی هەبێت لەسەر ئەو ڕەوشەی بەرۆکی ژنانی گرتۆتەوە.

بەگوێرەی تەنها ئەو ئامارەی ڕۆژنیوز کۆیکردۆتەوە، لەمانگی 10 و 11 لە خەلیفان و مێرگەسۆر ئەوە ڕاگەیەندرا کە دوو ژن خۆیان کوشتووە، بەڵام بەپێی زانیاریەکان دوای لێکۆڵینەوەی پۆلیس دەرکەوت کە هەردووکیان کوژراون، بەڵام وەک دەگوترێت یاسا وەک پێویست سزای ئەو کەسانەی نەدا بۆ ئەوەی ڕێگە لەدووبارەبوونەوەی ئەو جۆرە تاوانانە بگرێت.

رێژەی سوتان یان خۆ سوتاندنی ژنان ڕۆژبەرۆژ لە زیادبوندایە، بەگویرەی تەنها ئەو زانیاریانەی بەناو لامانە، لە 11 مانگی ڕابردوو تەنها لە دەڤەری سۆران زیاتر لە (10) ژن سوتاون یان خۆیان سوتاندووە، کە بەبەراورد لەگەڵ ساڵی ڕابردوو ڕێژەی سوتان زیادی کردووە، هاوکات لەنێو سوتاوەکانیشدا کچانی خوارتەمەنی 18 ساڵی تیادایە. هەوەها لەقەزای ڕواندز لەماوەی هەفتەیەکدا سێ ژن خۆیان سوتاند، لەمانە کچێکی (18) ساڵان بەهۆی زۆری ڕێژەی سوتانەکەی گیانی لەدەستداو ئەوانی تریش دوای مانەوە لە ژێرچاودێری پزیشک چارەسەریان بۆکراوە. دواین ژن کەخۆی سوتاند لە گوندێکی سەر بەناحیەی وەرتێ بوو لە ناوەراستی مانگی یانزە، لای پۆلیس وە سکاڵاش تۆمارناکەن.
رۆژنیوز ئاشکرای دەکات لەکاتی سوتانی ژنان لەلایەن کەس و کاریانەوە هەوڵدەدرێت هۆکاری سوتانەکەیان پەردەپۆش بکرێت، بەڵام دوای بەدواداچوون و لێکۆڵینەوەی پۆلیس دەردەکەوێت ژنان خۆیان خۆیان سوتاندووە. بەڵام دەربارەی هۆکاری خۆ سوتاندنەکەیان ژنان ترسیان هەیە ڕاستی خۆسوتانەکەیان لای دادوەر و پۆلیس ئاشکرا بکەن.
هەروەها پەنابردن بۆ حەب خوارد یەکێکی ترە لەو ڕێگایانەی لەلایەن ژنان و کچانەوە بەمەبەستی هەوڵی خۆکوژی پەنای بۆ دەبرێت و لە قەزای سۆران ڕێژەیەکی زۆر لە ژنان و کچان پەنایان بۆ حەب خوردن بردوە، ئەمەش وەک کاردانەوەیەک دژی هەرەشە و کێشە کۆمەڵایەتیەکان، تەنیا لەماوەی هەفتەیەکدا 4 ژن لە نەخۆشخانەی فریاکەوتنی سۆران بەهۆی خواردنی ڕێژەیەکی زۆری حەب داخیل کران، سەرچاوەیەک لە نەخۆشخانەی فریاکەوتنی سۆران بە ڕۆژنیوی ڕاگەیاند کە ئەم ساڵ حاڵەتی حەب خواردن زۆر بوو، هەر بەپێی ئەو ئامارەی کۆمانکردۆتەوە 8 ژن بەرێگای حەب خواردن هەوڵی خۆکوشتنیان دا.
بەپێی لێکۆڵینەوەکەی ڕۆژنیوز لەسەر ڕەوشی ژنانی لەدەڤەری سۆران، هەر لە 11 مانگی ڕابردوو کچێکی تەمەن (16) ساڵان خۆی خنکاند.

بەپێی بەدواداچوونەکەی ڕۆژنیوز لەماوەی ڕابردوو تائێستا دەیان ژن هاتوونەتەلای بەرێوەبەرایەتی بەرەنگاربونەوەی توندونیژی سۆران بەمەبەستی بەهاناوەچوونی کێشەکانیان. لەسنوری دەڤەری سۆران بەهۆی بەکارهێنانی توندوژتیژی و ئەشکەنجەدانیان، ژمارەیەک ژن سکاڵایان دژی هاوسەر و کەس و کاریان تۆمارکردووە، بەتایبەت لە ڕێگای بەرێوەبەرایەتی بەرەنگاربوونەوەی توندوتیژی سۆران. سەرچاوەیەکیش لە بەرێوەبەرایەتی نەهێشتنی توندوتیژی ڕایدەگەینێت کە چەندین پیاو بەتۆمەتی هەرەشەوتوندوتیژی دژی ژنان دەستگیرکراون.
لەدەڤەری سۆران ژمارەیەک ژن لە هاوسەرەکانیان جیابوونەتەوە، ئەمەش بەهۆی بوونی کێشەی کۆمەڵایەتی و نەگەیشتن بە چارەسەری وەبەشێک لەو ژنانەش کە لە مێردەکانیان جیابوونەتەوە خاوەنی مندڵ بوونە. هۆکاری ئابووری و بێ باوەڕی (دڵپیسی) لەلایەن هاوسەرەکانیان لە بەرامبەریاند، کاریگەری زۆری لەسەر جیابوونەوەی هاوسەرەکان هەبووە.
یەکێکی تر لەهۆکارەکانی لێکجیابوونەوەی هاوسەرەکان و دواجار شکست هێنان لە پرۆسەی هاوسەرگیری و زیادبوونی خۆکوشتن. زوو بەشوودانی کچانە، بەپێی ئەو بەدواداچوونەی ڕۆژنیوز بەشێک لەو ژنانەی خۆیان سوتاندووە، یان خۆیان کوشتووە لەخوار تەمەنی 18ساڵی بەشوودراون، یەکێک لەو ژنانەی بەم دوایانە خۆی سوتاند تەمەنی 16ساڵ‌َ بووە و خێزانداربووە. هاوکات ژنێکی تر تەمەنی 18ساڵ بووەکاتی کوژراوە، ئەو ژنە خێزانداربووە و خاوەنی منداڵێک بووە.
ئەگەرچی چەندین ڕێکخراو چالاکوان لە دەڤەرەکەدا لەبارەی مافەکانی ژنانەوە کاردەکەن، بەڵام کاردانەوەیان لەلایەن ڕێکخراوەکانی ژنان و ئافرەتانەوە وەک دەوترێت بەگوێرەی پێویست نیە، بەگوێرەی بەدواداچونەکانمان تەنانەت لەئامارەکانیشدا زانیاریان نیە، هاوکات یەکلایی کردنەوەی کێشە کۆمەڵایەتیەکانیش بەڕێگای عەشایری و مەکتەبی کۆمەڵایەتی حزبەکان بۆتە هۆی نیگەرانی، چونکە وەک دەوترێت ڕێگای بۆ زیادبوونی تاوان دژی ژنان لەم دەڤەرە خۆش کردووە.
مینا تەها چالاکوانی کۆمەڵگەی مەدەنی‌و مافی ژنان دەربارەی ڕەوشی ئافرەتان لە سۆران، وتی " بەداخەوە بەم دوایانە چەندین ڕووداوی دڵتەزێن ڕووبەرووی ژنان بۆتەوە لەدەڤەری سۆران کە ناخۆشترین حاڵەتیش خۆسوتاند و کوشتنی ژنانە بەبیانووی جۆراوجۆر، وەک لە ئامارەکان دەردەکەوێت کەرێژەی سوتان وکوشتنی ژنان لەکوردستان بەگشتی ودەڤەری سۆران بەتایبەتی مایەی نیگەرانیە.
مینا پێیوایە چەندین هۆکاری کۆمەڵایەتی و ئابووری و ئاینیی لەپشت خۆسوتاندن وکوشتنی ژنانەوەیە، ئەم هۆکارانە تارادەیەک ڕێگە خۆشکەرەن بۆ بە ئەنجام گەیاندنی ئەو کردەوەیانە، وەک چۆنیەتی ژیانی ژنان و باری ئابوری و ئاستی ڕۆشنبیری و کۆمەڵایەتی ‌و کلتوری کۆمەڵگا ‌و بە یاساکردنی دیاردە ناباوەکانی کۆمەڵایەتی. ئەو چالاکوانە وتیشی" کاریگەری کلتوری نەتەوەکانی سنوری و هەروەها زاڵ بوونی ویستە جەستەییەکان‌و غەریزەییەکانی مرۆڤ‌و ناهوشیاری کۆمەڵایەتی ‌و پەروەردەی ناتەندروست‌و نزم بوونی ئاستی ڕۆشنبیری تاک سەرچاوەی تاوانەکانن.
راشیدەگەیەنێت کە پێویستە ڕێکخراوەکانی ئافرەتان ولایەنە پەیوەندیدارەکان بەجدی کار لەسەر هۆشیارکردنەوەی ژنان بکەن و هەڵوێستی جدیان هەبێت لەسەر ئەو ڕەوشەی بەرۆکی ژنانی گرتۆتەوە.
هەرسەبارەت بە ڕەوشی ژنان لەدەڤەری سۆران بەرپرسێکی ئافرەتان بۆ ڕۆژنیوز باسی لەوەکرد کێشە کۆمەڵایەتیەکان هۆکاری سەرجەم ئەوگرفتانەن کە ڕووبەرووی ژنان بوونەتەوە. زیبا تەها بەرپرسی ئەنجوومەنی قەزای ئافرەتانی سۆران. وتی" دیاردەی خۆسوتاندن و کوشتنی ئافرەتان لەدەڤەری سۆران تەشەنەی کردووە، ئێمە وەک ڕێکخراوی ئافرەتان هەوڵی زۆرمانداوە لە ڕێگای کۆروسمینا بۆ وشیاکردنەوەی ئافرەتان.
ئەو چاڵاکوانە دەڵێت " پیاوان غەدری زۆرلە ئافرەتان دەکەن زۆر کێشە هەیە چارەسەرکردنی ئاسانە و پێویستی بە لێک تێگەیشتن هەیە، نەک پەنابردن بۆ کوشتن و ئەشکەنجەدان. زیبا تەها وتیشی "رێکخراوەکان کاریان کردووە، بەڵام لەئاست زۆری کێشەکان نەیان توانیوە ڕێگە لە کێشەکان بگرن.
رۆژنیوز بۆ قسەرکردن لەسەررەوشی ژن لەو دەڤەرە، هاوکات ڕۆڵی بەرێوەبەرایەتی بەرەنگاربوونەوەی توندوتیژی دژ بە ئافرەتان، ڕاید خۆشەوی عزیز بەرێوەبەری بەدواداچوون و نەهێشتنی توندوتیژی دواند. ئەو بەرپرسە نەی شاردەوەکە ڕەوشی ژنان لەماوەکانی ڕابردوو لەسۆران زۆر خراپە و چەندین حاڵەتی جیاجیای توندوتیژی تۆمارکراوە.
خۆشەوی عزیز ئەگەرچی ئامادە نەبوو ئاماری ڕەوشی ژن بە(رۆژنیوز) بدات، باسی لەوەکرد کە تەنها ساڵانە ئامار دەدەن. وتی" لە سنوری دەڤەری سۆران هەموو جۆرەکانی کێشەی ژن تۆمارکراوە، هەروەها هەموو جۆرەکانی توندوتیژی و خۆسوتاندن و کوشتن و ئەشکەنجەدان هەبووە.
خۆشەوی وتیشی "ساڵانە لەدەڤەری سۆران ئامارەکان لەیەکترەوە نزیکن، تەنیا کێشەی خۆسوتان نەبێت کە لەزیادبووندایە، ئەمەش پێویستی بەکاری جیدی هەیە بۆ وشیارکردنەوەی ئافرەتان، چونکە هەموو کێشەیەک قابیلی چارەسەرە.
بەرێوەبەری بەرەنگاربوونەوەی توندوتیژی دژ بە ئافرەتان لە سۆران. ڕاشیگەیاند" حاڵەتی خۆخنکاندن هەبووە، بەڵام توندوتیژی سێکسی زۆر کەمە. هەروەها ئاشکرای کرد ڕێژەی سکاڵا زۆرە و زۆرکەسیش دەستیگرکراوە، زۆرجاریش کێشەکان لای خۆمان چارەسەری دەکەین و ژن و پیاوەکان ئاشت دەکەینەوە.
ناوبراو وتیشی "هەر ئافرەتێک هەڕەشەی کوشتنی لەسەر بێت، ئێمە بەدواداچوونی بۆ دەکەین.
ئەو بەڕێوەبەرە پێیوایە ڕێکخراوەکان وەک پێویست نەیان تواینوە ڕۆڵی باش بگرێن لەکەم کردنەوەی کێشە کۆمەڵایەتیەکان.

دوای ئاشکراکردنی دیارنەمانی بڕی 18 ملیارد دینار، کە بۆ دروستکردنی یەکەی نیشتەجێبوون بۆ کەسوکاری #شەهیدانی هەڵەبجە# تەرخانکرابوو، #دەستەی دەسپاکی هەرێم# بەهاوکاریی ڕێکخراوی هەڵوێست دەستی بە بەداوداچوون کرد و دەرکەوت، کە 18 ملیارد دیناری دیکە بۆ پەردەپۆشکردنی ئەو گەندەڵییە تەرخان کراوە و ئەویش دیارنەماوە.
ڕۆژنیوز لە 17-03-2016 لە ڕاپۆرتێکدا لەسەر زاری ڕیباز کەمال، سەرۆکی ڕیکخراوی هەڵوێست-ەوە، دیارنەمانی بڕی 18 ملیارد دینار-ی ئاشکراکرد، کە لەساڵی 2010 دینار بۆ دروستکردنی یەکەی نیشتەجێبوون بۆ کەسوکاری شەهیدانی کیمیابارانی هەڵەبجە تەرخانکرابوو، کە خرابووە سەر حسابی سندوقی نیشتەجێ ‌بوون و لەوێشەوە خرابووە سەر حسابی تایبەتی کۆمپانیای (بەڕێز) بۆئەوەی ئه و کۆمپانیایە یەکەی نیشتەجێبونەکان دروستبکات، دەستەی دەسپاکی حکومەتی هەرێم و ڕێکخراوی هەڵوێست دەستیان بە بەداوداچوون کرد و دەرکەوت، کە 18 ملیارد دیناری دیکەش دیار نەماوە.
ڕێباز کەمال، سەرۆکی ڕێکخراوی هەڵوێست بە ڕۆژنیوزی وت: لەدوای بڵاوبونەوەی هەواڵی بەدواداچوونەکانی ئێمە و دیارنەمانی 18 ملیارد دینار لە ڕێگەی ڕۆژنیوزەوە، دەستەی دەستپاکی هەرێم پەیوەندی پێوەکردین و داوایان لێکردین، کە بەڵگە و دیکۆمێنتەکانی ئەو دۆسیەیان ڕادەست بکەین، بەڵام ئەوەی جێگەی سەرسوڕمانە ئەوەیە لەکاتی سەردانمان بۆدەستەی دەسپاکی بۆمان دەرکەوت کە لەساڵی 2013 لیژنەیەک لە ئەنجومەنی وەزیران و وەزارەتی شەهیدان پێکهێنراوە بۆ دابینکردنی بڕی 18 ملیار دیناری دیکە لەجیاتی 18 ملیارد دینارەکەی پێشووتر، بەڵام 18 ملیاردی دووەمیش دیار نەماوە.
ڕێباز کەمال، ئەوەشی خستەڕوو، بەڵگەکانی خەرجکردنی بڕی 18 ملیاری دووەم لای دەستەی دەسپاکی پارێزراوە، بەڵام نە بۆ 18 ملیاردی یەکەم و نە بۆ 18 ملیاردی دووەم هیچ یەکێک لە کەسوکاری شەهیدانی هەڵەبجە لێی سودمەند نەبووە.
سەرۆکی ڕیکخراوەکە، جەختیکردەوە، کە دەست لەو دۆسیەیە بەرنادەن و وتی: وەک ڕێکخراوی هەڵوێست بێ‌ هەڵوێست نابین و بەهەماهەنگی لەگەڵ دەستەی دەستپاکی لە هەوڵی کۆکردنەوەی بەڵگە و زانیاریداین لەسەر ئەو دۆسیەیە و ئاشکراکردنی ئەو کەس و لایەنانەی لەو دۆسیەیەدا تێوەگلاون.
ناوبراو، لە ڕێگەی ڕۆژنیوزەوە داوای لە کۆمەڵەی قوربانیان و ئیدارەی پارێزگای هەڵەبجە کرد، کە ئەوانیش لای خۆیانەوە هەوڵەکانیان بخەنەگەڕ بۆ یەکلایی کردنەوەی ئەو دۆسیەیە و ئاشکراکردنی ئەو کەس و لایەنانەی لەپشت دیارنەمانی ئەو پارانەی کەسوکاری شەهیدانەوەن.
لەبارەی هۆکارەکانی دیارنەمان و خەرجنەکردنی ئەو 36 ملیارد دینارە کە بۆ کەسوکاری شەهیدانی کیمیابارانی هەڵەبجە تەرخانکراوە، ڕۆژنیوز پەیوەندی بە فواد عوسمان، وتەبێژی وەزارەتی کاروباری شەهیدانەوە کرد، بەڵام بەبیانووی ئەوەی کە گوایە ئەو دۆسیەیە پەیوەندی بە یاساوە هەیە و ڕێڕەوی یاسایی خۆی وەرگرتووە ئامادە نەبوو هیچ زانیارییەک ئاشکرا بکات.
ڕێکخراوی هەڵوێست ڕێکخراوێکی بێ‌ لایەنی کۆمەڵگای مەدەنییە و لەساڵی 2009 دامەزراوە و بارەگای سەرەکیان لەشاری هەڵەبجەیە، کاری سەرەکی ڕێکخراوی هەڵوێست ئاشکراکردنی ئەو گەندەڵی و سەرپێچیانەیە کە وەزارەت و دامودەزگا حکومیەکان ئەنجامی دەدەن بۆ ڕای گشتی و دواتر گەیاندنی گەندەڵی و سەرپێچییەکانە بەلایەنی پەیوەنیدار.
رۆژنیوز
22-06-2017