Hevpeyvîn Bi Salihê Heydo Re

Wêneyê #Salihê Heydo# wî dide nasîn ku ew kî ye, û tim ew bi vî rengê kurdewarî û filoklorî tê xwiyanî kirin ,û di festîvalan de û di civatên kurdewarî de ew wisa hazir dibe û tim cemawer li benda wî ne, ta ku
ew raje maykê, û helbestan bi xwîne.
Îro em li civata wî ne, ji bo em û hûn baş wî nas bikin.
Salih
Helbestevan Salihê Heydo kî ye?
Navê min Salihê Heydo ye di 1957 an de, li gundê Hisê Oso yê liser şarûçkê bajarê amûdê hatime dinê , di malbateke kurdewarî de û sirûştekî kurdînî de perwerde bûme .
malbateke guhvedêrê kultûr û hunera kurdî bû , û bavê min timî di wê demê de helbestên Melayê Cizîrî û Ehmedê xanî û Feqhê Teyran ji me re dixwendin , yê bi tenê bû ku radyoya wî hebû di wê hêlê de.
Di wê radyoyê de me guhdariya weşana izgiha Êrîvanê dikir .
Û min xwendina xwe ya seretayî li gundê xwe bi dumahî kir û qunaxa amadekarî li bajarê Hisiça xwend .
Bavê min yekemîn kes bû ku wêrîn dane min ji bo fêrbûna zimanê xwe yê zikmakî û hezkirina Helbest û stirana kurdî û gelek gotin di stiranên Êrîvanê de hebûn wî ji me re şîrove dikirin.
We kengî dest bi helbestê kir?
Di sala 1968an de min yekemîn Helbest nivîsî û di sala 1976an de yekemîn helbesta min hate weşandin di govara Gulistanê de , û ta îro.
Berhemên we yê çapkirî çi ne?
Berhemê min a yekê dîwana
kêferat 1985. Helbest
Serpêhatiya perîşan û memê Şivan 1985.
Dastana helbestî.
Birîna kûr 1988.
Serpêhatiya Tûmazê kildanî û Axayê Şêrwanî 1996.
Evîna welêt 1998.
û gurûpek ji çîrok û pêkenînên gelêrî ne.
Û hink karên helbestî bendewarî çapê ne.
Ji kengî ve Salihê Heydo bal kişand ser kultûr û hunera kurdî?
Di sala 1970yî de.
Ka tûrê xwe vala bike, te çi daye hev ji kultûr û huner kurdî?
Berhevkirina 2000 stiran ji kevnetorê kurdî bi şîroveya wan ve (dîrok,aheng,herêm).
Nimûne: dankut, cotkarî pûş û qirşa, bêlûte, hûrzê
digel 98 CDyî bi deng û reng di erşîvê min de ne .
wêne, girtina 7000 wêneyên cil û bergên kurdî ji (keç ,pîrek, zilam, xort) ji hemî herêmên kurdan.
Herweha 4000 pendên kurdî.
Û 500 çîrokên foliklorî .
300mamikên kurdî
100 stiranên kurdî yên zarokan .
100 zûbêjî.
Û hejmareke mezin ji cil û bergên kurdî ,li alî sazkirina gelek pêşengehên cil û bergên li gelek bajarên kurdan.
Gelo helbesstên Salihê Heydo bûne stiran.
Bi rastî pir in û bibûrin ku ez hin navên wan ji bîr bikim. Ji wan:
Adilê Hiznî, Se’îd Gabarî, Welat, Bengîn, Selah Osê û gelek ji komên kurdî.
Salihê Heydo di jiyana xwe de pêrgî kî ji nivîskar û helbestvanên kurd hatiye?
Bi piraniya wan re mîna: Celîlê Celîl, Ordîxanê Celîl, Eskerê Poyîk, Tosinê Reşîd Ev yên Rûsa bûn. Şêrgo Bêkes, Hesen Silîvanî, D.arif çeto, Kejal Ehmed, Bilind Ibrahîm Li Iraqê. Mezher Xaliqî û Tîrêj Ormiyê li Êran . Cegerxwîn, Tîrêj, Osman Sebrî, Keleş, Bêbuhar, Rêwî, Emerê la’lê, Ehmedê Şêx salih li Sûrî
di geriyana xwe de ji bo kevnetorê kurdî ku vêce pêrgî kesina têm ne alîkarin û vî erkê giring paşguh dikin tevlî ku bi tiştekî xwe na xisirin.
Ev Peyvên teka teka çi wateyê di din te?.
Helbest: Afrandin û hestekî nazik e.
jin: Hemî tişt e (spehîbûn û afrandin û jiyana xweş).
Mûzîk: Xwarina giyan e.
Pêkenîn: Arazûyeke dastanî ye.
Jiyan: Êşkence û derd e.
Mirin: Jê bi kîn im, lê feryad jê nabe.
Tîrêj: Deynasorê helbesta kurdî.
Cegerxwîn: Şoreş e.
M, şêxo: Dildarê xemgîn.
Sipas li ser vê derfeta han.
We sipas dikim li ser vê hevpeyvînê, hêvîdar im di karê xwe de serkeftî bin, hêviya min pêşerojeke berze ji we re û serkeftin ji karê we re jî.
Hevpeyvîn:Ehmed bavê alan
Ev hevpeyvîn di rojnameya Nûdemê de weşiyayî ye.[1]