=KTML_Bold=Nivîsîna dîroka jinê=KTML_End=
Fermandara QSD’ê Rojda Felat derbarê girîngiya rola şervanên jin ên di Pêngava “Cenga Mezin” de axivî û got: “Jin bi destê jinê tên rizgarkirin. Ji ber vê yekê Reqa wê bibe mînakeke ku hîn di dîrokê de nehatiye dîtin. Berxwedan û têkoşîna jinên Rojava di dîroka cîhanê de wê dîroka jinê binivîsine.”
Pêngava rizgarkirina nava bajarê Reqayê “Cenga Mezin” ku bi pêşengiya QSD’ê li hemberî çeteyên DAIŞ’ê tê meşandin, bi serketinên nû didome. Pêngava ku herî zêde şervanên jin ji bo tolhildana jin û zarokên Êzîdî tê meşandin, roj bi roj ber bi serketinên mezin ve diçe. Fermandara QSD’ê Rojda Felat rewşa dawî ya li Reqayê nirxand. Rojda Felat diyar kir ku ev demek e ku dest bi pêngava rizgarkirina navenda bajarê Reqayê kirine û got, “Em di nava tevgereke bi lez de pêngava rizgarkirina navenda bajarê Reqayê didin meşandin. Ne di milê şerkirinê de, di warê rizgarkirina jinên ku di destê DAÎŞ’ê de mane û bi taybetî jinên Êzîdî û jinên Ereb ku di bin zilma DAIŞ`ê de ne. Em weke jin, nêzîkatiyên me li ser vê bingehê ne ta ku em karibin vê îdeolojiya qirêj ku îro li ser jinê tê meşandin, bi dawî bikin.”
=KTML_Bold=Li Tebqayê tabûrên jinên Ereb tên ragihandin=KTML_End=
Rojda Felatê behsa rizgarkirina sivîlan û her wiha tevlîbûna jinên Ereb a nava şervanan de kir û got: “Her ku diçe cihên di bin destê DAIŞ’ê de tên rizgarkirin. Beşdarbûna jinên Ereb a nav refên me jî zêde dibe. Jixwe, mînaka wê jî rizgarkirina Tebqayê ye ku di demeke nêz de wê tabûrên jinên Ereb lê bê ragihandin. Di milê Reqayê de jî xwesteka beşdarbûnê zêde ye û bi germahiyeke mezin jin tevlî nav refên me dibin. Sivîlên ku tên rizgarkirin jî bi kêfxweşiya rizgarkirinê me pêşwazî dikin û dibêjin, wan her tim dixwest ku YJŞ, YPJ û YPG`ê li wan guhdarî bikin. Lê çeteyan nedihişt û li wan qedexe dikir. Ev dide xuyakirin ka çiqas rêxistina me weke jin bandoreke xwe ya kûr çêkiriye.”
‘Em ê serketinên mezin bidest bixin’
Rojda Felatê got, armanca wan rizgarkirina jinên di destê çeteyên DAIŞ’ê de ye û wiha domand: “Ev çend sal in jinên Şengalê û gelek jinên ji aliyê çeteyên DAIŞ’ê ve dîl hatine girtin, rastî hemû pêkanînên dijmirovahiyê hatine. Ji ber wê, tevahiya jinên tên rizgarkirin, armanca wan a destpêkê tolhildan e. Bi vê armancê jinên Şengalê jî cihê xwe di nava hemleya rizgarkirina Reqayê de digirin û berxwedaneke mezin dikin. Ev yek jî weke tola komkujiya li Şengalê ye. Jinên ku heta niha di destê DAIŞ´ê de ne ku ew jin ji Mûsilê, Tebqa û gelek cihên din anîne Reqayê, wê îro bi destê jinan bên rizgarkirin. Em di vê baweriyê de ne ku em ê serketinên mezin jî bi dest bixin.”
=KTML_Bold=Çarşefên reş û tarîkirina jiyanê=KTML_End=
Rojda Felatê diyar kir ku ew ê êdî wan çarşefên reş li ser jinan nehêlin û jin wê bi berxwedana xwe wan çarşefan biqetînin û wiha pê de çû: “Em ê hêdî hêdî van çarşefên reş li ser jinan rakin. Çeteyên DAIŞ’ê gelek zilm li jinan kir. Ji bo wê jin zû bi zû nikarin vê trawmaya kûr ji ser xwe biavêjin. Em ê di milê civakî, civîn û nîqaşan de hewl bidin vê yekê bi wan bidin fêmkirin. Ew çarşefa reş ji bo ku jinan di tariyê de bihêlin û mêjiyê wan reş bikin, li wan hatiye pêçan. Berçavkek jî xistine ber çavên jinan da ku nehêlin ew jin li derdora xwe binêrin. Eger jin karibin vê çarşefê ji ser xwe bavêjin wê bi hêza xwe, enerjî û jîrbûyîna xwe gelek tiştan biafirînin.”
‘Jin bi destê jinê tê rizgarkirin`
Fermandara QSD’ê, Rojda Felatê anî ziman ku ew bi berxwedan û têkoşîna jinan gelek bi bawer in û got, jin bi destê jinê rizgar dibin û wiha dawî li axaftina xwe anî: “Rizgarkirina Reqayê wê bibe mînakeke pirr mezin. Ji ber ku hîn ti caran mînakên bi vî rengî di dîrokê de çênebûne. Ji ber ku jin bi destê jinê tên rizgarkirin. Jin wê bi xwe hînî parastina xwe bibin. Ji bo vê jî wê Reqa bibe mînakeke ku hîn di dîrokê de nehatiye dîtin. Berxwedan û têkoşîna jinê di dîroka cîhanê de wê dîroka jinê binivîsine.”
BERÇEM CÛDÎ/ŞÛJIN/REQA
[1]