دواڕۆژ، #هانا چۆمانی#
بەڕێوەبەری بەرەنگاربوونەوەی توندوتیژی دژ بە ژنان ڕایدەگەیەنێت بەشێک لەو ژنانەی لەدەستی #داعش# ڕزگاربوون و بەشێک لەو مناڵانەی وەچەی داعشن، دایک و باوک و خوشک و براکانیان وەریانناگرنەوە و ڕێکخراوە نێودەوڵەتییەکانیش هیچ بەرنامەیەکی بۆیان نییە.
لەمیانی بەڕێوەچوونی کۆنفرانسی ڕۆژی جیهانی نەهێشتنی توندوتیژی سێکسی لەکاتی ململانێکاندا، کوردە عومەر، بەڕێوەبەری بەرەنگاربوونەوەی توندوتیژی دژ بە ژنان لە وەزارەتی ناوخۆی حکومەتی هەرێم ڕایگەیاند، دەبێت نەتەوەیەکگرتووەکان و کونسڵخانەکان و ڕێکخراوەکانی تری جیهانی تایبەت بە مافی مرۆڤ ئاگاداری ئەوەبن و بزانن کە بەسەدان ژن و منداڵی ڕزگاربووی دەستی داعش بەبێ کەسی ماونەتەوە و قبوڵناکرێنەوە، ئەوەش کارەساتی مرۆیی دروستدەکات، بۆیە دەبێت پلانیان بۆی هەبێت.
وتیشی ناکرێت هەر کۆنفرانس و کۆبوونەوە بکرێت، نوسین و بەیاننامە دەربکرێت، دەبێت بەرنامەیەکی تایبەت هەبێت بۆ ئەو کەسانەی کە قوربانیی شەڕی تیرۆر و کۆمەڵایەتین، دەبێت بەرێگای جیاجیا بە خانەوادەکانیان ئاشتبکرێنەوە یان دەبێت مافەکانیان بەرێگای تر بۆ دەستەبەربکرێت.
کوردە عومەر ڕونیشکردەوە و وتی ئێمە سەدان حاڵەتمان لایە کە ئەوانە بەدەست کۆمەڵێک کێشەوە دەناڵێنن و تائێستا چارەنوسیان دیارنییە، بۆیە پێویستە نەتەوەیەکگرتووەکان بەرنامەی خۆی بۆ ئەوانە ئاشکرابکات.
لەبارەی بوونی بەرنامە و پلانی تایبەت بۆ ئەو ژن و منداڵانەی کە لەدوای شەڕی داعش ڕزگاربوون، ڕامانتان بالاگریشنان، نوێنەری (UNFPA) لە عێراق لە لێدوانێکی تایبەتدا بە دواڕۆژی ڕاگەیاند، بێگومان ئێمە هەر لەسەرەتاوە کە کارەساتەکە ڕویدا پلانمان هەبووەو داناوە، بۆ ئەوانەی لەدەستی داعش ڕزگاریان بووەو بەدوای ئەو ژن وکچ و منداڵانەشدا گەراوین کە قوربانیی شەر و ململانێکان بوون لە ناوچەکە، بەتایبەت ئەوانەی پێشتر وەک کۆیلەی جەنگ مامەڵەیان لەگەڵ کراوە.
وتیشی تیمی تایبەتمان دروستکردوە بۆ گەڕان و پشکنین، هەروەها هاوکاریی و ئاگاداربوونی ئەو ژن ومنداڵانەی لەدەستی داعش ڕزگاریان دەبێت، ئێستا لە سەرنسەری عێراقدا بە هەرێمی کوردستانیشەوە 156 حاڵەت هەن کە لەلایەن بنەماڵەکانیانەوە قبوڵناکرێن.
رونیشکردەوە، بێگومان ئێمە ئاگاداریان دەبین و هاوکارییان دەکەین، نەخۆشخانە و شوێنی تایبەتییشمان بۆ دروستکردون، هاوکارییەکانیشمان بەردەوام دەبێت و چاودێری وردیان دەکەین بە هاوکاری حکومەتی عێراق و هەرێم.
هاوکات خەیری بوزانی، نوێنەری ئێزدییەکان لە وەزارەتی ئەوقاف و کاروباری ئایینی حکومەتی هەرێمی کوردستان، لەمیانی کۆنفڕانسەکەدا وتی داواکارین تا زووە حکومەتی هەرێم هەوڵەکانی بخاتە گەڕ بۆ هێنانەوەی ئەو ژن و کچە کوردە ئێزدییانەی لای داعشە بیانییەکانن.
بەوتەی بوزانی، ئەو خێزانانەی داعش، ئەوروپی و ئەمریکی و کەندەیی و ڕوسی و عەرەبن، بۆیە ئەگەر نەدۆزرێنەوە ڕەنگە بۆ هەمیشە بێسەروشوێن دەبن.
وتیشی حکومەتی عێراق بڕیاریداوە سەرجەم داعشە بیانییەکان و خێزانەکانیان ڕادەستی وڵاتانیان بکاتەوە، گەر وا بێت سەدان کچی کوردی ئێزیدی کە داعش ڕفاندوونی، یان لەوێ لەدایکبوون لەگەڵ ئەو خێزانانە تێکەڵکراون و بەناوی ئەوانەوە کراون، دەبرێنە ئەو وڵاتانە.
بوزانی ڕوونیشکردەوە، ئەگەر بەر لە گەڕانەوەی ئەو خێزانانە بۆ وڵاتانیان ئەو ژن و کچانە ڕزگار نەکرێن، ئەوا حکومەتی عێراق ئەوانیش هاوشێوەی ئەندامانی خێزانە داعشە بیانییەکان ڕادەستی وڵاتانیان دەکاتەوە، لەکاتێکدا نە ئەندامی ئەو خێزانانەن و نە خەڵکی ئەو وڵاتانەشن.[1]
#25-06-2018#