بسم الله الرَّحْمَنِ الرَّحِیمِ
إِنْ أُرِيدُ إِلاّ الإِصْڵاحَ مَا اسْتَطَعْتُ ۆمَا تَوْفِيقِيَ إِلاّ بِاللّهِ
بەیاننامەی ڕاگەیاندنی باڵی ئیسڵاحی یەکگرتووی ئیسلامی کوردستان
بەیاننامەی ژمارە یەک
ئێمە گردبوونەوەیەکی سیاسی و میدیایین لە چوارچێوەی ئامانج و ستراتیژییەکانی یەکگرتووی ئیسلامی کوردستان کاردەکەین، ئامانجمان چاکسازی و ڕاستکرنەوەی چەمکە سیاسی و کۆمەڵایەتی و فقهییەکانە بە زمانی برایەتی و لە چوارچێوەی ئازادی بە دادپەروەرانە، قسە لە سەر پرس و بابەتە هەنووکەییەکانی نێو یەکگرتووی ئیسلامی کوردستان و وڵاتەکەمان دەکەین.
باڵی ئیصلاح نایەوێ ڕێکخستن لە نێو ڕێکخستن دروستبکات و هەوڵی پەرتەوازیی ماڵی یەکگرتوو بدات، کە ئەو ماڵە هەموومان فرمێسک و خوێنمان بۆ ڕشتووە و بە شەونخوونی (قلیل مستچعفون) بەمرۆژگارە گەیشتووە.
دەستەی سیاسی باڵی ئیصلاح وەکو باڵاترین ناوەندی وەرگرتنی بڕیاڕ و هەڵوێستە کە لە چەندین براو خوشکی دەڤەرە جیاجیاکانی کوردستان و هەندەران پێکهاتووە، لە هەولێری پایتەخت جمووجۆڵی سیاسی و میدیایی لە ڕۆژی (06-12-2015) دەستی بەکارەکانی کردووە و خۆی ڕاگەیاندووە.
رەخنەکانمان دوورن لە زمانی تەخوین و تەکفیر و سڕینەوە و ڕەتکردنەوە، هەوڵەکانمان بۆ بەرزکردنەوەی ئاستی جەماوەری یەکگرتوو و بەرگرتن و وەڵامدانەوەی هەموو هێرش و پەلاماردانێکی سیاسی و حیزبییە بۆ سەر یەکگرتوو.
باڵی ئیسلاح جگە لەم ماڵپەڕە (www.eslah.org) و تۆڕە کۆمەڵایەتیە بەستراوەکانی بەم ماڵپەڕە هیچ وتەبێژێکی فەرمی و شاندی دانوستاندن و نوێنەری نییە، بەڵکو دەستەیەکی سیاسی باڵای لە پایتەختی هەرێم بە نوێنەرایەتی خوشک و براکانی دیکەمان گوزارشت لە هەڵوێستەکانی ئەم باڵە دەکەن لە ڕێگەی ئەم ماڵپەڕ و پەیجەشەوە هەڵوێست و دیدگای خۆی بەیان دەکات.
ئامانج و ستراتیژ
ئامانجی ئێمە هەمان ئامانج و ستراتیژە پەسەندکراوەکەی کۆنگرەی شەشەمی یەکگرتووی ئیسلامی کوردستانە و پێمان وایە ئەگەر زەمینەی کارکردن بۆ بەدیهێنانی ئەو ئامانجانە بڕەخسێ یەکگرتوو دەباتەوە حاڵەتی تەندروست و ئاسایی خۆی و دەتوانێت نموونەیەکی سەر مەشقی کاری ئیسلامخوازیی و ئیسلاحخوازیی پێشکەشبکات و نابێتە پڕۆژە و ئەجێندای هیچ هێزێکی سیاسی.
باڵی ئیسڵاح و پێشمەرگە
باڵی ئیسلاح پاڵپشتی بێ مەرجی هێزی پێشمەرگەی کوردستانە وەکو سەنگەری بەرگریی گەلی کوردستان لە پاراستنی ئاسایش و سەقامگیری سیاسی وڵاتە دژی تووندڕەویی و پەرگیریی ئایینی و نەتەوەیی و مەزهەبییە لەگەڵ پاراستنی بەها باڵا مرۆیی و ئەخلاقییەکانی کۆمەڵگەی کوردییە.
ئێمە نەیار و دوژمنی کەس نین خۆمان بە تەواوکەری پرۆژەی یەکگرتوو دەزانین و ئێمە جەستەیەکین لە کاروانی پڕ شکۆی خوشک و براکانمان، ململانێی سیاسی لە چوارچێوەیەکی یاسایی و لە ژێر چەتری دامەزراوە شەرعییەکانی کوردستان دەکەین و گەشە بە دەستکەوتنەکانی گەلەکەمان دەدەین.
یەکگرتوو پارسەنگی هێزی ئیقلمی و قەڵغانی مەددی ئیسلامی ئێرانیزم و هیلالی شیعیە (تشیع)، بەربەستی بەردەم فیکری وشکی سەلەفی جیهادی و وەهابییە، یەکگرتوو موتروبەی فکیری نیشتمانی و نەتەوەییە و کارگەیەکی گەورەی بەهەمهێنانی کەسی موسڵیح و دڵسۆزە.
پێکهاتە و پەیکەری باڵی ئیسڵاح
ئەنجومەنی گشتی باڵی ئیسڵاح
1. کۆمسیۆنی سیاسی
2. کۆمسیۆنی ئیرشاد و پەروەردە
3. کۆمسیۆنی میدیایی
4. کۆمسیۆنی پەرلەمان و حکومەت و ئەنجومەنە خۆجییەکان
کۆمسیۆنی سیاسی
ئەم کۆمسیۆنە بەرپرسێکی دەبێت کە ڕاستەوخۆ ئەندامی ئەنجوومەنی گشتی باڵی ئیسلاحە، سەرپەرشتی و ئیدارەی دۆسییە سیاسییەکانی ناوەخۆی حزب و کوردستان و عێراق دەکات، ڕوونکردنەوە و پرۆژەو بەرچاو ڕۆشتنی دەداتە سەرکردایەتی و ئۆڕگانەکانی یەکگرتوو بۆ هەر پێشات و ڕووداوێکی سیاسی چ لە ڕێگای ماڵپەڕ یاخود لە کەناڵەکانی تر.
کۆمسیۆنی بانگەواز و پەروەردە
ئەم کۆمسیۆنە بەرپرسێکی دەبێت کە ڕاستەوخۆ ئەندامی ئەنجوومەنی گشتی باڵی ئیسلاحە، بە شادەماری کارەکانی ڕەوتی ئیسڵاح دەدەندرێت، کار بە پێداچوونەوە و هەڵسەنگاندنی کاری بانگەواز و پەروەردەی یەکگرتووی ئیسلامی کوردستان دەکات، لە ڕێگای ئەو میکانیزمانەی ڕەوتی ئیسڵاحی دیاری دەکات پرۆپۆزەڵ و بەرنامەی گونجاو دەخاتە بەردەم مامۆستایان و پەروەردەکارانی یەکگرتوو بۆ هاوتاکردنی پرۆگرامەکانی پەروەردەو پێگەیاندنی کادیرانی یەکگرتوو لە سەر بنەمای میانڕەوی لە فیکرو کردەوە دەدات کە هەڵهێنجاوی ستراتیژی و ئامانجەکان و پەیڕەوی ناوخۆی یەکگرتوو بێت دوور لە تووندڕەوی مەزهەبی و ئایینی و خۆبەستنەوە بە مەزهەب و ڕێبازێکی دیاریکراوی وشک و لەقالبدراوە.
ئەم کۆسیۆنە کار پەرەوەردەیەکی ئیسلامی خۆماڵی و ڕەسەن کە هەڵقوڵاوی واقعی خاک و خەڵکی کوردستان بێت ئەمەش لە ڕێگای کردنەوەی دەرگای ئیشتیهاداتی ئەهلی عیلم، هانی بەهێز کردنی ئوسرە دەعوییەکان دەدات کە وەکو یەکەم یەکەی پێکهێنانی کادیری حیزبە.
باڵی ئیصڵاح پشتگری ئەو بۆچوونانە ناکات کە باس لە جیاکردنەوەی دەعوە و سیاسەت دەکەن بەڵکو کار لە جێکردنەوە ئەو دوو پرسە گرنگ پەیوەست بە ژیانی ڕۆژانە و دوا ڕۆژی ئەم جەمعە دەکات ئەویش لە چوارچێوی میکانیزم و ڕێوشوێنی گونجاو کە ئایندە بە پرۆژەی چڕو پڕ دەیخاتەروو.
کۆمسیۆنی میدیایی
ئەم کۆمسیۆنە بەرپرسێکی دەبێت کە ڕاستەوخۆ ئەندامی ئەنجوومەنی گشتی باڵی ئیسلاحە، سەرپەرشتی ماڵپەڕو شۆشیاڵ میدیا دەکات و چاودێری میدیاکانی یەکگرتووی ئیسلامی کوردستان دەکات، بەرنامەو پڕۆژە بۆ چاککردن و بەرەوەپێشبردنی دەزگا ڕاگەیاندنەکانی حیزب دەدات. ڕوونکردنەوە بەرچاو ڕۆشنی لە سۆشیاڵ میدیا لە سەر پرس و بابەتە هەنکوییەکان دەدات و فیتباکی ڕووداوەکانیش ئەڕشیف دەکات. بەربەرچی ئەو شاڵاو پەماردانەی میدیاکانی حیزبەکان بۆ سەر یەکگرتوو دەداتەوە کار لە سەر بەرزکردنەوەی توانا مرۆییەکانی ڕاگەیاندنی یەکگرتوو دەدات.
کۆمسیۆنی پەرلەمان و حکومەت و ئەنجوومەنە خۆجییەکان
ئەم کۆمسیۆنە بەرپرسێکی دەبێت کە ڕاستەوخۆ ئەندامی ئەنجوومەنی گشتی باڵی ئیسلاحە، چاودێری پەرلەمانتارانی یەکگرتووی ئیسلامی کوردستان لە پەرلەمانی کوردستان و ئەنجومەنی نوێنەرانی عێراق و ئەنجومە خۆجییەکانی هەولێر، سلێمانی و کەرکووک، دهۆک و هەڵەبجە و وەزیرەکانی حکومەتی هەرێمی کوردستان و حکومەتی فیدراڵی و سەرجەم باڵیۆزو پلە تایبەتەکان دەکات.
چاودێری جێبەجێکردنی بەرنامەی ئیصڵاح و سەروەری یاسا دەکات و بەدواداچوو بۆ ڕاستکردنەوەی کەمکورییەکانی حوکمڕانی کوردستان لە یاساو پرۆژە خزمەتگوزارییەکان و دابینکردنی بەرنامەو ماستەرپلان و پرۆژە یاسا بۆ فراکسیۆنەکان و تیمەکانی ناو حکومەت دەکات تا سەرکەتووانە ئەرکاکانی سەرشانیان ڕاپەڕێنن و خزمەتگوزارێکی هاونیشتمانیان بن، ئیصڵاح ڕەخنەگر و خاوەن قسەی بێ ناوەڕۆک نابێت بەڵکو لە ڕێگەی کۆسیۆنەکانەوە پاڵپشت و هاوکارێکی باشی نوێنەرانی یەکگرتوو لە دامودەزگاکانی دەوڵەت و حوکمڕانی دەبێت بۆ بەدەستهێنانی متمانەی زیاتری هاونیشتمانیان.
ڕاگەیاندنی باڵی ئیصڵاح لەمڕۆژەدا لە (06-02-2015) هاوکاتە لەگەڵ ساڵیادی هەڵکوتانە سەر بارەگانی یەکگرتووی ئیسلامی کوردستان لە دەڤەری بادینانی سەربڵند و شەهیدکردنی چوار لە سەکردە و کادیرانی یەکگرتوو لە ساڵی (06-12-2005)، کە شەهیدانمان شەهیدی کاروانی چاکسازی و فرە ڕەنگی و ئازادی بوون.
باڵی ئیسڵاحی یەکگرتووی ئیسلامی کوردستان
هەولێری پایتەخت
06-12-2015