Bu başlık Kurdipedia Standartlar göre eksiktir , düzenlemeye ihtiyaç vardır

خەڵکی بەشەرەفی کوردستان
ئێمە وەک کۆنگرەی دەنگە ناڕازییەکان تەنها بانگەشەی خۆپیشاندانێکی ناتوندوتیژ و هێمنانەمان کرد لەپێناوی گۆڕینی ئاراستەی ئەو توندوتیژیی و پەلاماردانەی کە دەسەڵات ماوەی چەند ڕۆژێکە لەشار و شارۆچکەکان دەستی دابویە و خوێنی چەندین گەنجی گیرفان بەتاڵی ڕشتبو، بەڵگەش بۆ ئەمە بەشداریکردنی مامۆستایانی ناڕازیی بو کە چەندین ساڵە بەبێ توندوتیژی و پشودرێژانە بەردەوامن لەخۆپیشاندان، بەڵام بەداخەوە دەسەڵات پێش کۆبونەوەی خەڵک و دەستپێکردنی خۆپیشاندانەکان، بەکۆکردنەوەی هێزێکی بێشومار و نمایشکردنی دەبابە و مودەڕەعە و چەکی قورس و بڵاوەپێکردنی هێزی چەکدار بەناو شارەکاندا، نیازی خراپی خۆی بەرامبەر خەڵک نیشاندا.
دوێنێش لەکاتی گەیشتنی بەشێک لەرێکخەرانی خۆپیشاندانەکان، لەچەندین لاوە هێزی دەمامکدار و ئەمنی پەلاماریان دان و بەشێوەیەکی ناشارستانی و ناسەردەمیانە دەستگیریانکردن، دوای کۆبونەوەی خەڵکیش بەتەقەکردن و ڕشتنی گازی فرمێسکڕێژ وەڵامی داواکاری هێمنانەی مامۆستایان و فەرمانبەران و گەنجی گیرفان بەتاڵیان دایەوە و بونەهۆی نانەوەی پشێوی.
سەرەڕای ئەوەش، ئەوەی زیاتر خەڵکی کوردستانی نیگەران کرد، بڵاوکردنەوەی ڕاگەیەنراوی لیژنەی باڵای ئەمنی سلێمانی بو کە بەزمانێکی بەعس ئاسا و هەڕەشە ئامێز هەمو دەرگاکانی خۆپیشاندان و ناڕەزایەتی هێمنانەیان بەیانوی ئەو پشێوی و نائارامییەی کە بەچەکەکانی خۆیان دروستیان کردوە داخست.
لێرەوە ڕایدەگەیەنین، سلێمانی و شاروشارۆچکەکانی زمانی هەڕەشەی قبوڵنەکردوە و نایکات، خوێنی دەستگیرکراوەکان و سەلامەتییان لەئەستۆی پارێزگاری سلێمانی و لیژنەی باڵای ئەمنیدایە، داوای ئازادکردنی بەپەلەیان دەکەین.
دوپاتیشیدەکەینەوە، تا موچەی مامۆستا و فەرمانبەر بدرێت بەبندیواری حزبی، تا ئابوری و داهاتوی گەنجانی ئەم وڵاتە بکرێتە قوربانی مەرامی حزبی و بنەماڵەیی، خۆپیشاندان و ناڕەزایەتی بەردەوام دەبێت.
کۆنگرەی دەنگە ناڕازییەکان

هاونیشتمانیانی کوردستان گەنجانی خەباتگێر
دوای زیاتر لەچارەکەسەدەیەک لەحوکڕانی ناتەندروست پڕگەندەڵی کوردی ڕۆژ لەدوای ڕۆژ بەهۆی خۆپەرستی و حوکمی بنەماڵەیی قەیران لەدوای قەیران زیاد دەکرێت بۆ خەڵکە بەش مەینەتەکەی کوردستان، جێگەی شەرمە لاوو پیر لەسەر داواکردنی مافەکانیان زیندای دەکرێن و ئەشکەنجە دەدرێن وە لەسەرشەقامەکان بەگولەی خۆماڵی! شەهید دەکرێن بۆیە چیدی بەردەوامی دان بەخراپی ئیدارەدان و زوڵم و ستەم و پێشێل کردنی مافەکانمان قبوڵکراو نیە و داوادەکەین
یەکەم
دەست بەجێ سەرجەم گیراوەکانی خۆپیشاندانەکان ئازاد بکرێن و چیدی بەتۆمەتی خۆپیشاندان هیچ ئازادی خوازێک دەستگیر نەکرێت
دووەم
شەهید کردنی مافخوراوانی گەلەستەم دیدەکەمان مەحکوم دەکەین و داواکارین بکوژانی شەهیدانی ئازادی وماف و شکۆ
بەسزای یاسایی بگەیەنرێن ماف بۆ خانەوادەی شەهیدەکان بگەڕێنرێتەوە ئەمە دوادڵۆپی خوێنی کورد بێت بەدەستی کورد بڕێژرێت.
سێیەم
فشار و ناڕەزایەتیەکان بەردەوامیان دەبێت تا ئەوکاتەی گەل مافەکانی بەدەست دێنێت و مافیا و تاڵانچی وگەندەڵەکانی ووڵات بەسزای یاسایی خۆیان دەگەن و یاسا سەروەر دەبیت و شکۆی مرۆڤ پارێزراو دەبێت
چوارەم
داوا لەهەموو چین و توێژە جیاوازەکان دەکەین هاوکاربن پێکەوە دەست لەناودەست ئەم خەباتە مەدەنیە پیرۆزە بەردەوامی پێ بدەین تاسەرکەوتن وە بەدوری خەین لەدەستی چەپەڵی تێکدەرانەی تێکدەران بەرژەوەندی خواز.
لەکۆتایدا داوا لەگەنجە خوێن گەرمەکانی نیشتمان دەکەین دان بەخۆیاندا بگرن و وریایانە تر هەنگاوبنێن ئاگادربن دەسەڵات پەلکێشی ناو توندوتیژیان نەکات تا بیانووی سەرکوتکردنی هەبێت داوا لەهەموو هێزە ئەمنیەکان دەکەین کە پارێزەری مافەکانی خەڵک بن و جارێکی تر لوولەی تفەنگەکانتان بەڕوی هاوڵاتی یە مافخوراوەکاندا بەرز نەکەنەوە.
دروود بۆ ڕۆحی پاکی شەهیدانی ئازادی و ماف وشکۆ شیفا بۆ بریندارەکان،
نەفرەت لە یەکترکوژی و گەندەڵی و تاڵانچێتی
ئەنجومەنی فشار
12-12-2020