$باکووری کوردستان$
- ئاژانسی ئیخلاسی تورکی بڵاوی کردەوە، دوێنێ لە چیای (باسیان) لە هەرێمی کوردستانەوە بە موشەک هێرش کراوەتە سەر بنکەیەکی سەربازی تورکیا لە شارۆچکەی #شەمزینان# و لە ئەنجامدا سێ سەرباز کوژراون و سەربازێکیش بریندار بووە.[1]
$رۆژهەڵاتی کوردستان$
- کاتژمێر 11ی شەو، بە هۆی تەقینەوەی یەکێک لە گوللە تۆپە بەجێماوەکان لە گوندی شێخ سڵە لە ناوچەی سەلاسی باوەجانی، کوژران و برینداربوونی 6 ئەندامی بنەماڵەیەکی لێ کەوتەوە.[4]
- هاووڵاتییەکی کورد، بە ناوی ڕەحمان قوربانی کوڕی ڕەمەزان خەڵکی شاری نەڵۆس سەر بە شاری #شنۆ# لە لایەن هێزە ئیتلاعاتییەکانەوە دەسبەسەر و بە شێوەیەکی گوماناوی لە گرتووخانەی ئیدارەی ئیتلاعاتی ئەو شارەدا گیانی لەدەست دا.[4]
$باشووری کوردستان$
- کونسوڵی ئێران لەبارەی دروستبوونی گرفتی ئاو لە #پشدەر# و #قەڵادزێ# ڕوونکردنەوە دەدات و ڕایدەگەیێنێ، ئاوی ڕووباری #زێی بچووک# نەگیراوەتەوە و پشکی هەرێمی کوردستانیش لە ئاوی خواردنەوە پارێزراو دەبێت. سەرۆکی ئەنجوومەنی پارێزگای سلێمانیش دەڵێت، کونسوڵ بەڵێنی داوە گرفتی ئاو دروست نەبێت.[2]
- دادگای باڵای فیدڕاڵی عێراق دوا مۆڵەتی داوەتەوە حکومەتی هەرێمی کوردستان سەبارەت بە دۆسیەی هەناردەی نەوتی هەرێم و دانیشتنی تایبەتی به و دۆسیەیەش دواخست.[1]
- یەکەم کاروانی نەوتی #کەرکووک# ڕادەستی ئێران کرا.[1]
- شاندێکی چوار حیزبە ناڕازییەکە (#بزووتنەوەی گۆڕان#، #هاوپەیمانی بۆ دیموکراسی و دادپەروەری#، #یەکگرتووی ئیسلامیی کوردستان# و #کۆمەڵی ئیسلامیی کوردستان#) بە سەرۆکایەتیی #بەرهەم ساڵح# بەمەبەستی بەدواداچوونکردن لەبارەی ساختەکاری هەڵبژاردن و دەنگە دزراوەکانیان لە بەغدان.[2]
- لە ڕۆژانی ڕابردوو، فۆرمی خۆراکی 371 خێزانی عەرەب لە پارێزگاکانی ناوەڕاست و باشووری عێراق بۆ پارێزگای کەرکووک گوازراونەتەوە.[2]
- شەوی ڕابردوو لە گردی کەڤۆرکەی هەرێمی برادۆستی باشووری کوردستان له و شوێنەی کە هێزەکانی تورکیای داگیرکەری لێن، تەقینەوەیەک ڕوویدا. ڕاگەیەندرا کە لە تەقینەوەکەدا سەربازێک کوژراوە و زۆر سەربازیش بریندار بوون.[3]
- وتەبێژی پۆلیسی پارێزگای دیالە ڕایدەگەیەنێت، لە سنوری هەردوو شارۆچکەی میقدادییە و ناحیەی #جەلەولا# 12 تۆمەتباریان دەستگیرکردووە کە ژمارەیەکیان چەکداری #داعش#ن.[1]
$رۆژئاوای کوردستان$
- هێزەکانی سووریای دیموکراتی - قەسەدە کۆنفڕانسێکی ڕۆژنامەوانی ساز کرد و دەستپێکردنی هەڵمەتی ڕزگارکردنی شارۆچکەی دشیشا و پاراستنی سنووری سووریا و عێراقی ڕاگەیاند.[3]
$دەرەوەی کوردستان$
- ڕێبەری باڵای کۆماری ئیسلامی ئێران ڕایگەیاند، هەر وڵاتێک مووشەکێک لە تاران بگرێت، ئەوان بە 10 مووشەک وەڵامی دەدەنەوە. ڕاشیگەیاند، دەبێت ئاژانسی وزەی ئەتۆمی وڵاتەکەی بە خێرایی دەست بە زیادکردنی پیتاندنی یۆرانیۆم بکات.[2]

ناوەندی ڕاگەیاندنی هێزەکانی پاراستنی گەل - #هەپەگە# دەربارەی چالاکییەکانی گەریلا لە 29ی ئایار\8ی جۆزەردان تا 3ی حوزەیران\13ی جۆزەردان، ئەمڕۆ ڕاگەیەندراوێکی بڵاوکردەوە. هەپەگە ئاشکرای کرد کە لە ئەنجامی چالاکییەکانی گەریلا لە باشوور و باکووری کوردستان، 15 سەرباز و کۆنترا (دژەگەریلا)یەک کوژران.
ڕاگەیەندراوی هەپەگە:
هێزەکانمان لە چوارچێوەی هەڵمەتی شۆڕشگێڕیی شەهید پیرۆز و شەهید ئاگری-دا، ڕۆژی 3ی حوزەیران\13ی جۆزەردان لە دژی سوپای کۆماری تورکیای داگیرکەر چالاکیی بەهێزیان ئەنجامدان. له و چوارچێوەیەدا:
لە شەمزینان سەربازێک کوژرا
هێزەکانمان کاتژمێر 3 لە دژی ئه و سەربازانەی داگیرکەر کە لە دەوروبەری سەربازگەی بەزەلێی ناوچەی شەمزینانی جۆلەمێرگ دەستیان بە ئۆپەراسیۆن کرد، لە گردی شکێرە ڕەش چالاکییەکیان ئەنجامدا. ژمارەی ئه و سەربازانەی له و چالاکییەدا کوژران و بریندار بوون ڕوون نەبوویەوە. هێزەکانمان هەمان ڕۆژ کاتژمێر 15:20 لە دژی یەکینەیەکی هەمان ئۆپەراسیۆن چالاکییەکیان ئەنجامدا. لە چالاکییەکەدا سەربازێک کوژرا و یەکێکی دیکەش بریندار بوو. هێزەکانی داگیرکەر لە دوای چالاکییەکە تەرم و سەربازەبریندارەکانی خیان بە کۆپتەری سکۆرسکی لە هەرێمەکە گواستەوە.
لە بەزەلێ هێرش کرایە سەر یەکینەیەکی سەربازی؛ 4 سەرباز کوژران و 3 سەربازیش بریندار بوون
هێزەکانمان (یەکینەکانی ژنی ئازاد - یەژا ستار) کاتژمێر 17:40، لە ناوچەی بۆخازا چەتا-ی ناوچەی بەزەلێی شەمزینان هێرشیان کردە سەر یەکینەیەکی سوپای کۆماری تورکیای داگیرکەر. لەم چالاکییەدا کە گورزی توند لە شوێنێکی حەوانەوەی یەکینەکەی دوژمن درا، 4 سەرباز کوژران و 3ی دیکەش بریندار بوون. هێزەکانی داگیرکەر لە دوای چالاکییەکە بە ئۆبوس و هاوەن تۆپبارانی هەرێمەکەیان کرد.
کاتژمێر 5:30، هێزەکانمان لە دژی سوپای کۆماری تورکیای داگیرکەر لەسەر گردی کۆردینەی ناوچەی چەلێی جۆلەمێرگ چالاکییەکیان ئەنجامدا. گورزی توندیان لە سەنگەر و شوێنەکانی حەوانەوەی دوژمن دا. ژمارەی سەربازە کوژراو. بریندارەکان ڕوون نەبوویەوە.
3 سەربازی تورکیا لە برادۆست کوژران
هێزەکانمان کاتژمێر 8:30 هێرشیان کردە سەر داگیرکەرانی گردی ئەڤدلکۆفیی هەرێمی برادۆستی دەڤەری سیدەکان لە باشووری کوردستان. لە شوێنێکی نزیکەوە گورزیان لە سەنگەر و شوێنەکانی حەوانەوەی دوژمن دا و لە ئەنجامدا 3 سەنگەر تێکدران و 3 سەربازی دوژمن کوژران.
2 چالاکی لە دهێ
لە چوارچێوەی هەڵمەتی شۆڕشگێڕیی شەهید دەلال ئامەد و شەهیدانی بەستا-دا، هێزەکانمان ڕۆژی 3ی حوزەیران\13ی جۆزەردان کاتژمێر 17 لە گردی سەربازگەی شوخا-ی ناوچەی دهێی سێرت چالاکییەکیان ئەنجامدا. لە چالاکییەکەدا سەربازێک کوژرا.
هێزەکانمان هەمان ڕۆژ کاتژمێر 17 لە چوارچێوەی هەڵمەتی شۆڕشگێڕیدا، لە نزیک گوندی ئەسکی ئەرووحی دهێ چالاکییەکیان لە دژی وێستگەیەکی تۆڕی پەیوەندییەکان ئەنجامدا. لە چالاکییەکەدا وێستگەکە ڕووخێندرا.
لە شرناخ و ئامەد 6 سەرباز و کۆنترایەک کوژران
2ی حوزەیران\12ی جۆزەردان، سوپای کۆماری تورکیای داگیرکەر لە مەیدانی چەمێ خەچکێ-ی ناوچەی قلابانی شرناخ دەستیان بە ئۆپەراسیۆن کرد. هێزەکانمان لە چوارچێوەی هەڵمەتی شۆڕشگێڕیی شەهید دەلال ئامەد و شەهیدانی بەستا-دا، ڕۆژی 3ی حوزەیران\13ی جۆزەردان کاتژمێر 8:15 لە نزیک دۆڵی گۆسن لە دژی یەکینەیەکی سوپای کۆماری تورکیای داگیرکەر چالاکییەکیان ئەنجامدا. لەم چالاکییەدا ئەوەندەی ڕوون بووەتەوە سەربازێکی دوژمن کوژراوە. ئۆپەراسیۆنەکە 3ی حوزەیران\13ی جۆزەردان بەبێ ئەنجامی کۆتایی پێهات.
29ی ئایار\8ی جۆزەردان کاتژمێر 13، هێزەکانمان دەستیان گرت بەسەر کامیۆنێک کە کەلوپەلی سەربازییان بۆ سەربازگەی هەگاسۆری ناوچەی هێنێی ئامەد دەبرد. شۆفێری کامیۆنەکە لە دوای ئەوەی لە لایەن هێزەکانمانەوە هۆشداری پێدرا، ئازاد کرا. هێزەکانی داگیرکەر لە دوای چالاکییەکە لە هەرێمەکە دەستی بە ئۆپەراسیۆن کرد. 30ی ئایار\9ی جۆزەردان ئۆپەراسیۆن بەره و مەیدانی ئاپێ مووسای لجە بەرفرەوان بوو و هەمان ڕۆژ کاتژمێر 19:30 لە دژی یەکینەیەکی دوژمن چالاکی ئەنجامدرا. لە شوێنێکی نزیکەوە گورز لە یەکینەکەی دوژمن درا و ئەوەندەی ڕوون بوویەوە کۆنترا (دژەگەریلا)یەک و 2 سەرباز کوژران. سوپای کۆماری تورکیای داگیرکەر لە دوای چالاکییەکە بە کۆپتەری کۆبرا بۆمبارانی هەرێمەکەی کرد و کوژراو و بریندارەکانی خۆیشی بە کۆپتەری سکۆرسکی لە هەرێمەکە گواستەوە. ئۆپەراسیۆنەکە ڕۆژی 31ی ئایار\10ی جۆزەردان بەبێ ئەنجام کۆتایی پێهات.
31ی ئایار\10ی جۆزەردان کاتژمێر 9:30 هێزەکانمان لە دژی یەکینەیەکی دوژمن کە لەسەر ڕێگەی نێوان ناوچەکانی لجە و هێنێی ئامەد ڕێگەی دەپشکنی، چالاکییەکیان ئەنجامدا. لەم چالاکییەدا 3 سەرباز کوژران و یەکێکی دیکەش بریندار بوو. سوپای کۆماری تورکیای داگیرکەر لە دوای چالاکییەکە، ڕێگەی نێوان لجە و هێنێ-یان داخست و دەستیان بە ئۆپەراسیۆن کرد. ئۆپەراسیۆنەکە 2ی حوزەیران بەبێ ئەنجام کۆتایی پێهات.[1]
#04-06-2018#