دواڕۆژ، #بورهان یەحیا#
رێڤەبەرییا ئەندازەیا پارکان ل سالا 2017ێ 168 هزار مەترێن دووجار یێن ئەردی ب گول و فریزی و داروباری چاندینە و نوکە رێژەیا کەسکاتیێ ل #دهۆک# 11% یە.
ئسماعیل مستەفا بەرپرسێ راگەهاندنا سەرۆکاتییا باژێڕڤانییا دهۆک بۆ دواڕۆژ رۆهنکر؛ ل سەنتەرێ باژێڕێ دهۆک 30 باغچە و ناڤەندێن جاددەیان هاتینە چێکرن و باغچەیەک ژلایێ وەلاتییانڤە، 6204 گولێن ژ جۆرێ ریل ڤینکا بۆکس و شمشار فیکس تورکی کو دبێژنێ دارتراشۆک هاتینە چاندن، هەژمارا چولێن هەردەم یێن جۆرێن بیبۆ رۆز، ئاستر، داوودی و یلسمین کو هاتینە چاندن پتری 432 هزار دانەیان بوویە.
ئاماژەکر؛ پتری 10 هزار تەنێن بەرمایک و زێدەهی و پیساتیێن ناڤ باغچە و ناڤەندێن چاندێ دا هاتینە هاڤێشتن و 185 هزار گولێن بوهاری هاتینە چاندن و 170 هزار گولێن هاڤینێ و نێزیکی 7 هزار کیلۆیێن فریزیێ.
زێدەتر هاتییه، پتری 23 هزار مەترێن سێجا یێن دیوارێ بنیاتی کو دبێژنێ پەرژانێ گیایی هاتینە دانان و ب گۆەری نەخشەیێ بنیاتی کو بۆ دهۆک هاتییە دارشتن رێژەیا کەسکاتیێ دێ بیتە 13% و هەتا نوکە رێژەیا هاتینە ئەنجامدان 11% یە.‌[1]
#01-02-2018#

دواڕۆژ، #بورهان یەحیا#
رێڤەبەرییا بەنکا خوینێ ل رێڤەبەرییا گشتییا ساخلەمییا پارێزگەها #دهۆک# راگەهاند؛ ل سالا بۆری 5610 کەسان سەرەدانا وان کرینە و 22306 بتلێن خوینێ هاتینە بەخشین.
رێڤەبەرییا بەنکا خوینێ د راگەهاندنەکێ دا ئاماژەکر؛ ل سالا بۆری 30538 بتلێن خوینێ بۆ نەخۆشخانەیان هاتینە ڤەگوهاستن، دگەل هندێ 54 هەوێن خوینبەخشینێ هەبووینە و خزمەتێن بەری مارەکرنێ بۆ بەرهنگارییا نەخۆشیێن خوینێ بۆ 27397 کەسان هاتینەکرن.
زێدەتر هاتییە؛ ل سنۆرێ دهۆک 170 کەس تووشی کۆلبوونا ڤایرۆسێ جەگەرێ ببوون و 17 ژوان کۆلبوونا ڤایرۆسێ جۆرێ (C) بوون و 223 کەس تووشی تەلاسیمایێ ببوون و 112 کەس ژی تووشی کێمبوونا خوینێ یا مەنجەلی ببوون.[1]
#02-02-2018#

دواڕۆژ، بورهان یەحیا
رێڤەبەرێ کۆمپانییان ل سنۆرێ پارێزگەها #دهۆک# خویاکر کو؛ هەژمارا وان کۆمپانیێن بیانی کو ل دهۆک کار دکەن دگەهیتە نێزیکی 300 کۆمپانییان کو بەشەک ژوان وەلاتیێن کورد تێدل هەڤپشکن.
شێروان حیتۆ رێڤەبەرێ کۆمپانییان ل سنۆرێ پارێزگەها دهۆک بۆ دواڕۆژ رۆهنکر کو؛ پترییا ڤان کۆمپانیێن بیانی یێن تورکینە لێ بەشەک ژوان ئیرانی و وەلاتێن دی ژی تێدا هەنە و هەتا نوکە بەردەوامن لسەر کارێ خۆ و ب چ رەنگەکی ترسا چۆلکرن و دائێخستنا کۆمپانیێ لجەم وان پەیدا نەبوویە لێ ب بەردەوامی گازندەیێ ژ کێمبوونا کاری و ئالۆگۆرییا بازرگانی و سستبوونا بازاڕی دکەن و دگەل هندێ ژی جۆرە دوودلییەک لجەم وان پەیدابوویە دەما کو بەحسێ گرتنا دەرگەهێ ئیبراهیم خەلیل دکەن.
ناڤبۆری دا دیارکرن کو؛ ب گۆرەی یاسایا کۆمپانییان ل هەرێم و ئیراقێ ئاساییە ئەگەر وەلاتییەکێ کورد یان ئیراقی ببیتە هەڤپشک دگەل کۆمپانییەکێ بیانی یان دو کەس ژ دوو وەلاتێن بیانی هەڤپشکێن کۆمپانییەکێ ل هەرێمێ بن و دشێن ب ئاسایی و پشتی ئەنجامدانا رێکارێن یاسایی ئەرکێن خۆ جێبەجێ بکەن، ئەڤ 300 کۆمپانیێن بیانی ب بەردەوامی و دووماهییا سالێ دهێن و مۆلەتێن خۆ نوو دکەن لێ دیار نینە کا چەند ژوان ب پراکتیکی کارێن بازرگانیێ دکەن.
رێڤەبەرێ کۆمپانییان ل پارێزگەها دهۆک ئاماژەکر کو؛ ب گۆرەی داتایێن نەراستەوخۆ پارەیەکێ مەزن دناڤ ڤان کۆمپانییان دا بۆ کاروبارێن بازرگانی دهێتە مەزاختن ئەڤجا چ ئه و کۆمپانی بچووک یان مەزن بیت وەک کارگەهێن چێکرنا چپسان هەتا دگەهیتە کارگەهێن پیشەسازی و کۆمپانیێن ڤەگوهاستنا کەلوپەلان و هەر جۆرە هەڕەشەیەک بۆ سەر هەرێمێ دێ کارێ ڤان کۆمپانییان ئێخیتە د مەترسیێ دا و ب ڤی رەنگی ژبلی وان وەلاتیێن کورد ژی دێ زیانێ بینن.[1]
19-11-2017

دواڕۆژ، بورهان یەحیا
ب گۆرەی دوماهی ئامارێن دەست ب کارگێرییا پارێزگەها دهۆک کەفتینە هەتا نوکە 36 هزار کەس ژ 4 کەمپێن سەرەکیێن پارێزگەها دهۆک زڤرینە سەر جهێن خۆ ل لایێ چەپێ مووسل یێ رزگارکری.
ئەکرەم ئیبراهیم ژ راگەهاندنا پارێزگەها دهۆک بۆ دواڕۆژ رۆهنکر کو؛ هاریکارێ‌ پارێزگەرێ‌ دهۆکێ‌ بۆ کاروبارێن مرۆڤایەتی ب بەردەوامی چاڤدێرییا رەوشا ئاوارەیان ل سنۆرێ پارێزگەها دهۆک دکەت و ب گۆرەی وان دووڤچۆنێن هاتینەکرن دیار بوویە کو هەتا نوکە 6156 خێزان کو دبنە 36 هزار کەس ژ کەمپێن (نێرگزلیێ‌ – قەیماوا – ماملیان – بەردەرەش) و ژ دەرڤەی کەمپان و جهێن دی زڤرینە بۆ جهێن خۆ ل لایێ چەپێ باژێڕێ مووسل.
ناڤبۆری دیارکر کو؛ ل مەها شەش دەست ب بەلاڤکرنا گازا سپی بۆ سەر ئاوارە و پەنابەرێن ناڤ هەموو کەمپێن پارێزگەها دهۆک هاتییەکرن و بۆ هەر خێزانەکی 40 لتر دهێنەدان و ئەڤ پرۆسە دێ بۆ هەموو مەهان یا بەردەوام بیت.
ژێدەرێ ژ راگەهاندنا پارێزگەها دهۆک ئاماژەکر کو؛ دەزگەهێ بورها کو سەر ب پارێزگەها دهۆکە دێ قارەمانییەکا تەپاپێ بۆ 28 رێکخراوێن یۆئێن و نەمیری رێکئێخیت و مەرەم ژێ پتر نێزیکبوونا ڤان رێکخراوانه و ل رێکەفتی 20/6 کو رۆژا جیهانییا پەنابەرانە دێ چالاکیێن جودا لناڤ کەمپان و جهێن دی هێنە گێران.
ئەکرەم ئیبراهیم رۆهنکر کو؛ ب پشتەڤانییا رێکخراوا (UNDP) رێکا کۆمەلگەها خانکێ‌ کو کەمپا خانکێ‌ یا مەزن لسەرە دێ‌ هێتە چێکرن و دێ‌ بیتە جۆت ساید ب درێژاهیا 1,700کم و کۆژمەیێ‌ بۆ هاتییە تەرخانکرن (500) هزار دۆلارن و لڤان رۆژان پرۆسەیا لسەر ئێک کێمکرنا چێکرنێ‌ دێ‌ هێتە راگەهاندن.
ناڤبۆری خویاکر کو؛ ل ڤان رۆژان دێ هاریکاریەکا دراڤی ل سەر 2000 خێزانێن ئاوارە و پەنابەران ب رێکا رێکخراوا (JRC) یا ئەلمانی و هەیڤا سۆرا عیراقی ود ەزگەهێ‌ (BRHA) دێ‌ هێنە بەلاڤکرن.
05-06-2017

رێڤەبەرێ چاکسازییا سنێلان و ژنان ل #دهۆک# راگەهاند: نوکە 40 کچ و ژن ل چاکسازییا دهۆک گرتینە کو چەند ژوان ب گۆنەها تیرۆرێ هاتینە گرتن.
زەکی سالح، رێڤەبەرێ چاکسازییا سنێلان و ژنان ل دهۆک بۆ دواڕۆژ گۆت:کچ و ژنێن ل چاکسازییا وان ژبەر گۆنەهێن جۆدا هاتینە گرتن وەک تیرۆر، دزی خیانەتا هەڤژینیێ و چەند گۆنەهێن دی.
ناڤبۆری خوەیاکر:ژمارەکا وان ژنان بیانینە، لێ هەموو د ئێک ئاڤاهیدانە بتنێ هولێن وان یێن نڤستنێ جۆدانە.
دازانین:بتنێ رێکخراوێن خاچا سور و رێکخراوا مافێن مرۆڤی ل هەرێما کوردستانێ ما ف هەیە سەرەدانا گرتییان بکەن و تا نوکە وان رێکخراوان د سەرەدانێن خوەدا چو تێبینی لسەر رەوشا گرتییان نەبووینە.[1]
#27-10-2018#

دواڕۆژ، #بورهان یەحیا#
سەرۆکاتییا باژێڕڤانییا #دهۆک# خویاکر کو؛ ل سالا 2017ێ ب شێوەیەکێ گشتی 144 پڕۆژە ب داهاتێ ناڤخۆ و هاریکارییا پارێزگەه و وەزارەتێ بجه ئیناینە و نێزیکی 500 زێدەگاڤی ژی راکرینە.
ئیسماعیل مستەفا بەرپرسێ راگەهاندنا سەرۆکاتییا باژێڕڤانییا دهۆک بۆ دواڕۆژ رۆهنکر کو؛ پتری 154 هزار مەترێن دووجار هاتینە قێرکرن، 21 تەنێن بەرمایکێن جهێن گشتی و مالان هاتینە ڤەگوهاستن، 48 مەترێن دووجار هاتینە کۆنکریتکرن و سەخبێرکرن، 44 هزار مەترێن دووجار یێن جاددەیان هاتینە تێکەلکرن، 20 هزار مەترێن سێجار دیوارێن پالپشت هاتینە چێکرن، 51 هزار مەتران بۆریێن ئاڤێ هاتینە راکێشان، 411 مەتر سۆلین و ئاڤرێژ، کێربستۆن 21 هزار مەتر، بەلاڤکرنا 170 هزار مەترێن دووجار بەرێن شکەستی.
ناڤبۆری دیارکر کو؛ نێزیکی 500 زێدەگاڤیێن سەر باژێڕڤانیێ هاتینە راکرن و خرابکرن و ژوان 56 ژۆر هاتینە خرابکرن، 82 راکرنا کەپران، خراپکرنا 158 پەڕژانان، 112 ترومبێل هاتینە دەستەسەرکرن، خرابکرنا 90 بیستانان، 79 باغچە هاتینە خرابکرن.
ئسماعیل مستەفا ئاماژەکر کو؛ 4 پارچەیێن ئەردی بۆ دەستەیا وەبەرهێنانێ ل دهۆک هاتینە تەرخانکرن، 268 بڕیارێن جڤاتا باژێڕڤانیێ هاتینە جێبەجێکرن، 275 مامەلەیێن خەملاندنێ هاتینە ئەنجامدان و 73 بڕیارێن لژنەیا خومالیکرنا خانیێ، زێدەگاڤی هاتینە جێبەجێکرن.[1]
#12-01-2018#

دواڕۆژ، #بورهان یەحیا#
رێڤەبەرێ گشتیێ پەروەردا پارێزگەها #دهۆک# راگەهاند؛ نوکە 55 هزار قوتابیێن باژێڕێن ناڤەراستا ئیراقێ و 25 هزار یێن ئاوارەیێن ناڤخۆ ل قوتابخانەیێن دهۆک دخوینن.
عومەر عەلی رێڤەبەرێ گشتیێ پەروەرا پارێزگەها دهۆک بۆ دواڕۆژ دیارکر ل دەمێن بۆری 120 هزار قوتابیێن باژێڕێن ناڤەراست و ژۆرییا ئیراقێ ل قوتابخانەیێن سنۆرێ پارێزگەهێ دخواند و نوکە ژی 25 هزار قوتابیێن ئاوارە یێن ناڤخۆیێن هەرێمێ ژی لناڤ قوتابخانەیێن کەمپان درێژی ب خواندنا خۆ ددەن.
رۆهنکر نوکە ل سنۆرێ پارێزگەهێ 25 هزار قوتابیێن ئاوارە و پەنابەر یێن دەرڤەی هەرێم و سنۆرێن کێشە لسەر ل 44 قوتابخانەیان بەردەوامیێ ب خواندنا خۆ ددەن کو ل ڤان قوتابخانەیان دوو دەوامی یان سێ دەوامی لێ دهێتەکرن، لێ ژ نەچاریێ یە.
ئاماژەکر ل دەمێن بۆری بتنێ 127 ژلایێ وەزاەرتا پەروەردا ئیراقێ ل سنۆرێ پارێزگەهێ هاتینە نووژەنکرن و یێن دی هەموو ب رێکا وەزارەتا پەروەردا هەرێمێ ب هەڤکاری دگەل رێکخراوێن بیانی و ب هەماهەنگی دگەل بۆردێ کاروبارێن مرۆڤایەتی ل دهۆک (BRHA) هاتینە نووژەنکرن.[1]
#27-04-2018#

دواڕۆژ, شیمال بەرچى
سەرۆکێ کۆمەلا ژین یا پەککەفتیێن دەست و پێیان ل #دهۆک# راگەهاند, رەوشا ئابۆریى یا زێدەتر ژ 6000 هزار وەلاتیێن پەککەفتی گەلەک خرابە.
نەسرەددین بۆتى سەرۆکێ کۆمەلا ژین بۆ دواڕۆژ راگەهاند؛ نوکە حکومەتا هەرێما کوردستانێ و رێکخراوێن بیانى هاریکاریا پەککەفتیێن ئەندام د رێکخراوا مەدا ناکەن, لەورا رەوشا ژیانا وان گەهشتیە ئاستەکێ گەلەک نزم.
خوەیاکر, ل گۆڕەى یاسایێن حکومەتا هەرێما کوردستانێ زۆرداریەکا مەزن ل پەککەفتیان هاتیە کرن کو ل گۆڕەى یاسایێ نابیت کەسەک ببیتە ئەندامێ کۆمەلامە ئەگەر رێژەیا پەککەفتیبوونا وى ژ 65% کێمتر بیت.
د ئەڤ سالەدا پەککەفتیان بتنێ 4 موچە وەرگرتینە کو هەر موچەیەک 60 هزار دیناربوون, دوهى ژى 7 رێکخراوێن پەککەفتیان ل سلێمانیێ داخواز کربوون بۆ گەهاندنا گلیێن خوە ژ حکومەتێ سەرۆکێ جڤاتا وەزیران ببینن.[1]
#22-11-2016#

دواڕۆژ، بورهان یەحیا
رێڤەبەرییا گشتییا کاروبارێن مینان ل پارێزگەها #دهۆک# زەڤییەکێ 60 هزار مەترێن دوو جار پاقژکرن و رادەستى خودانێن وێ کرن و راگەهاند کو هەتا نوکە 64% ژ زەڤیێن مینرێژکریێن دهۆک نەهاتینە پاقژکرن.
مەسعوود مەلا شەفیق رێڤەبەرێ گشتیێ کاروبارێن مینان ل پارێزگەها دهۆک ل رێورەسمێن رادەستکرنا زەڤییا پاقژکرى ل دهۆک راگەهاند زەڤییا کانى مشکێ ل ناحیا زاویتە و نێزیک گوندێ بابلۆ ب رووبەرێ 60550 مەترێن دوو جار هاتییە پاقژکرن و تێدا 27 مین و 5 تەقەمەنى هاتبوو دیتن و بۆ دەمێ 5 مەهان کار تێدا هاتبووکرن و پێشتر هەر ل زاویتە سێ زەڤیێن دى ژى هاتبوونە پاقژکرن و نوکە ژى کار لسەر دوو زەڤیێن دى بەردەوامە.
ئاماژەکر پار لسەر ئاستێ پارێزگەھا دھۆ ک ژ ئەنجامێ هەبوونا مینان 5 روودان ھەبووینە کو د ئێک ژ وان دا کەسەک گیانێ خۆ ژ دەست دایە و 4 کەسێن دی بریندار بووینە و ل سالا 2018ێ ژى ب روودانەکێ دا کەسەک ب مینێ گیانێ خۆ ژ دەست دایە.
دیاکر لدووڤ دووماھی ئاماران ل سەرانسەری پارێزگەھا دھۆک 762 زەڤیێن مینرێژکرى تۆمارکرینە و هەتا نوکە نێزیکی 330 زەڤیان ھاتینە پاقژکرن و نێزیکی 430 زەڤی ماینە کو نەھاتینە پاقژکرن، ب ڤى رەنگى رێژەیا زەڤیێن پاقژکرى ل سنۆرێ پارێزگەھا دھۆک 36%ێ یە.
ناڤبۆرى راگەهاند ل رێڤەبەرییا کاروبارێن مینان ل دهۆک شەش تیمێن کارێن دەستی ھەنە، دگەل تیمەکا تەقاندنێ و تیمەکا کارێ میکانیکی و دوو تیمێن رووپیڤێ و دوو تیمێن ھشیارکرنێ و رێکخراو ژى هاریکارییا وان دکەن و ب تایبەت رێکخراوا (MAG) کو ستافەکێ گەلەک بەرفرەھ و رێکوپێک ھەیە و ھەمی گاڤا پالپشت بووینە و ئەوان ژی 23 تیمێن کارێ دەستی و 15 تیمێن کارێ ھشیاری و 6 تیمێن کارێ میکانیکی و 3 تیمێن سە یێن پەیداکەرێن مینان دگەل کار دکەن.[1]
#05-04-2018#

دواڕۆژ، بورهان یەحیا
د پڕۆژە یاسایا بودجەیا ئیراقێ یا 2019ێ ئاڤاکرنا نەخۆشخانەیا شێرپەنجەیا زارۆیان ل پارێزگەها دهۆک ب کۆژمەیێ 7 ملیار دیناران بوویە بڕیار.
د. جەمال کۆچەر پەرلەمانتارێ کورد ل پەرلەمانێ ئیراقێ بۆ دواڕۆژ رۆهنکر :بەشەک ژ بودجەیا هندەک وەزارەتان وەکو بەرگری، ناڤخۆ و ساخلەمى بۆ چەند پڕۆژەیێن تایبەت بۆ پارێزگەهێن پێدڤى هاتە ڤەگوهاستن و وەکو پەرلەمانارێن کورد یێن پارێزگەها دهۆکێ کۆژمەیێ 7 ملیار دینار بۆ ئاڤاکرنا نەخۆشخانەیا شێرپەنجە یێ زارۆیان ل دهۆک دەستنیشانکرن و هاتە پەسەندکرن.
دیارکر :وەزارەتا ئاڤەدانکرنێ ل ئیراقێ کو وەزیرێ وێ کوردە داخواز کرییە ئه و پارە بۆ وان بهێتە هنارتن بۆ هندێ ئێکسەر بۆ ڤى پڕۆژەى تەرخان بکەن و بۆ دهۆک بهنێرن بۆ هندێ چ کێشە بۆ پەیدا نەبیت.
پەرلەمانتارێ کورد جەمال کۆچەر خویاکر :پڕۆژە یاسایا بودجەى ل پەرلەمانى پەسەند بوو لێ پێدڤییە ژلایێ ئەنجوومەنێ وەزیران و سەرۆک کۆمارى ڤە بهێتە پەسەندکرن دووڤدا دێ کەڤیتە بوارێ جێبەجێکرنێ..[1]
#25-01-2019#