ئاساو بە نۊبە
مەولۊی بەلخی
ڕوێو دیندارېو لوانە ئاساو
چڕیش ئاسەوان، پڕتافیە بە تاو
واتش مشناسیم، واتش لالۊ نا
واتش درۊزن، بۍ دین، ڕوو سیا
منەنا زاهېد، دینداری پتەو
ملکەچ لەشم پەیش، ڕوحم سۊح و شەو
یاڎش کەردەنش گمیای سۊحوو من
بەردەنش عەرشی ئەعلا ڕۊحوو من
تا کەروو دوعاو کەسېوه زوو زوو
منیشۊ وە خاڵ حەزش موو بە موو
واز کەرە باریم بارەش گورج و تاو
گەنمەکام هاڕە زوو جە ئاسیاو
ئاساویت کەروو بە کاخێوە بەرز
سەراپا پۊشووت جامە هەزار تەرز
ڕەنجبەر، کارەکەر پەی تۊ زوو بە زوو
ماروو خزمەتت کەری ئارەزوو
واتش: ئەولیاو خوڎاینی خۊ تۊ
من چکۊ و ئانە تۊ ماچیش جە کۊ؟
عەمرم بە مەینەت سەراپا دام سەر
تازە قەسەرەو تۊ پەی من نمەی بەر
هەر کەسېو لامەو مەنەن حورمەتش
نمازوو هیچ کەس فوتیۊ نۊبەتش
نۊبەت یاوا تۊ بارت واز کەروو
هەرچیت ئاردەبۊ ئاساوش بەروو
داڎش هۊربڕی، زاهید: هەی جەناب
ئاساوت وڕنوو یەک دەم، بۊ خەراب
دوعایێو وانوو هەرت هەر شەلۊ
نەتاوۊ گەزێو بارت پەی بەرۊ
ئاسەوان قاقا واتش: ئەهل هەق
بۍ هۊ مەڕېزنە تەوېڵتەو عەرەق
ئەر دوعات تاوۊ بوڕنۊ ئاساو
گەنمەکات هاڕە و کەرەش نان و ئاو.
شارۊ[1]