Darîn Silê/#Til Temir#
Walatiyên Til Temir li dijî plan û êrişên dewleta tirkî gotin, divê em gelê herêmê bi hev re bajarên dagîrkirî rizgar bikin, planên dewleta dagîrker pûç bikin û rê nedin dagîrkeriya wê.
Derbarê êrişên dagîrkeriya Tirkî yên ser herêmên bakur û rojhilatê Sûriyê de, herwiha berxwedana gel û hevgirtina wan li dijî êrişan, welatiyên bajarê Til Temir ji me re axivîn û diyar kirin ku ti carî dev ji xaka xwe û erkê xwe yê walatparêziyê bernedin.
Hevserokê Şaredariya Gel ya bajarê Til Temir Mihemed Baqî Kûtê da zanîn ku dewleta tirkî ya dagîrker ji ber binketin û lewazbûna xwe êrişên xwe yên li dijî herêmên bakur û rojhilatê Sûriyê girantir kirine û axaftina xwe wiha domand: “Ji ber ku dewleta Tirkî ya dagîrker li herêmên parastina medya bi ser neket û derbên giran ji gerîlayên azadiyê xwarin, êrişên xwe yên li dijî herêmên bakur û rojhilatê Sûriyê zêde kirine. Herwiha ji ber ku çiraya kesk di pêkanîna êrişeke nû de negirt, êrîşên xwe yên ku bi ruya sîxuran dike zêde kirine. Bi balafirên bêmirov welatiyên herêmê, kesayetên fermandar û leşkeran dike amanc û hewl dide vîna gelê herêmê bişkîne û wan dûrî welatparêziyê bixe. Lê welatparêzî di xwîna me de ye, ne dagîrkeriya Tirkî, ne jî hêzên cîhanê nikarin me dûrî welatparêziyê bixin.”
`Wê serkeftin ya me be`
Mihemed Kûtê got, em dizanin ku armanca dewleta dagîrke ne Kurd tenê ne, lewra gelek pêkhate li ser vê xakê bi Kurdan re dijîn. Her kes dizane ku dagîrkeriya Tirkan dijmina dîrokî ya tevayiya gelên herêmê ye. Ji ber wê dema ku êriş dike cudayiyê naxe navbera ti kesî û nabêje ev Kurd, Ereb yan jî Sûriyan e. Ji ber wê jî armanca wê diyar e, dixwaze tevayiya gelê herêmê qir bike û destkeftiyên dîrokî yên vî gelî ji holê rake. Herwiha dixwaze herêmê ji welatiyên wê vala bike û xaka me bixe binê desthilatdariya xwe. Lê bila baş bizane ku ti caran xeyalên wê pêk nayên. Lewra gelê herêmê bi saya fikir û felsefeya Rêber Abdullah Ocalan û projeya Neteweya Demokratîk, li hev civiyane û milbimil em berxwedan û berevaniyê di ber xaka xwe de dikin. Hêza me îradeya me ye, wê serkeftin ya me be.”
`Ji bo berjewendiyên xwe naxwazin aramî û ewleyî li herêmê çêbe`
Mihemed Baqî Kûtê li ser bêdengiya hêzên navnetewî bi taybetî Amerîka û Rûsya wiha got: “Hebûna Rûsya û Amerîka li herêmê ji bo berjewendiyên wan e. Rewşa herêmê û gelê wê ji wan re ne xem e. Xema wan ya sereke pêkanîna berjewendiyên wan e. Ji bo wê jî tevayiya kiryarên hovane yên dewleta Tirkan ya dagîrker ku li dijî gelê herêmê pêk tîne, hevpariya wan nîşan dide. Ji bo wê jî diyar e ku naxwazin aramî û ewleyî li herêmê çêbe. Lewra eger aramî li herêmê pêk were, berjewendiyên wan namînin û êdî nikarin weke niha tev bigerin.”
Mihemed Kûtê behsa amadekariyên ji bo rewşên awarte kir û diyar kir ku amadekarî di çarçoveya çend xalan de tê kirin û wiha pê da çû: “Yek ji amadekariyên ku em li ser dixebitin rêxistinkirina gel û avakirina komîteyên taybet bi gel re ye. Perwerdekirina komîteyên tenduristiyê ya beşa lezgîn û diyarkirina erkên wan di rewşa awarte de. Herherwiha amadekirina hin komîteyên gel yên xweparastinê, da ku li kêleka hêzên leşkerî parastina bajar, zarok, pîr û kalan bikin.”
`Bi hev re herêmên dagîrkirî rizgar bikin û planên Tirkiyê pûç bikin`
Ji bo rizgarkirina tevayiya bajarên dagîrkirî û derxistina dagîrkeran ji herêmên bakur û rojhilatê Sûriyê Mihemed Kûtê di dawiya axiftina xwe de bang li gelê herêmê kir ku, bi hev re herêmên dagîrkirî rizgar bikin û planên dewleta Tirkan pûç bikin. Herwiha rê nedin dagîrkeriya Tirkan ku armaca xwe pêk bîne û bi yekdengî û bi ruhe hevaltî û biratiya gelan tev bigerin.
`Hevgirtina gelê herêmê destkeftiyên şoreşê diparêze`
Endamê Meclisa bajarê Til Temir Dildar Yûsif jî bal kişand ser hevgirtina gelên herêmê û wiha dirêjî da axaftina xwe: “Hevgirtina gelên herêmê destkeftiyên şoreşê diparêze. Herwiha bi saya yekîtî û hevgirtina gelan, gelek hêz û yekîneyên leşkerî li herêmê hatine avakirin; wekî Hêzên Sûriyeya Demokratîk, Yekîneyên Parastina Jinan, Hêzên Ewlekariya Hundir, herwiha meclis û komînên taxan. Ev tev destkeftiyên vê şoreşê ne û bi saya xwîna şehîdan hatine bidestxistin. Ji bo ku em van destkeftiyan biparêzin, divê em nekevin binê bandora şerê taybet û Şerê Gelê Şoreşgerî xurt bikin. Eger em Şerê Gelê Şoreşgerî pêş bixin û li kêleka şervanên xwe bisekin, emê azadiya xwe bi dest bixin û herwiha emê xeyal û palanên Tirkan jî têk bibin. Divê bê zanîn ku serkeftina me azadiya Rêber Apo ye.”[1]