Organîzator Cejna Sarûhan, diyar kir ku wê li dijî qedexekirina lîstika “Tartuffe” ya şanoyê ku li Mêrsîn û Edenê hat qedexekirin doz vekin. Şanoger Elvan Koçer jî helwesta şaredariyên CHP’î rexne kir.
Lîstika Le Tartuffe ya lîstikvan û nivîskarê lîstikan ê fransî Moliere ku Şanoya Bajar a Amedê bi navê “Tartuffe” adebteyî kurdî kiribû, di 5-6’ê hezîranê de bi hinceta “ewlehiya cemaweriyê” ji aliyê walîtiyên Mêrsîn û Edenê ve hat qedexekirin. Lîstikvana Şanoya Bajar a Amedê Elvan Koçer û organîzatora lîstika ku wê li Mêrsînê bihata leyîstandin Cejna Sarûhan,diyar kirin ku wê derbarê qedexeyê de doz vebikin.
ŞAREDARIYÊN CHP’Ê ARESTEYÎ WALÎTIYÊ KIRIN[1]
Lîstikvan Elvan Koçer, diyar kir ku ji bo cihên girtî pêwistî bi destûra walîtiyê nîne û wiha got: “Rexmî vê jî şaredariyên Mêrsîn û Edenê “destûra walîtiyê” ji me xwestin. Me ji wan re got ku daxwaza wan ne qanûnî ye. Bi israr gotin ku heta belgeya destûrê neyê wê destûr nedin û eywanan venekin. Li Edenê lîstika me hat astengkirin. Lê Mêrsînê destpêkê serlêdana organîzator hat erêkirin û kodek dan. Gotin hûn dikarin bi vê kodê serlêdana xwe bikin. Organîzator bi Şaredariya Mêrsînê re peyamn çêkir û eywanê girt. Ji bo eywanê qapora jî hat dayîn. Ji bo vê em jî rojek berê hatin Mêrsînê. Rexmî ku betlaneya fermî ye jî roja yekşemê saet di 23.00’an de li me geriyan û gotin ku lîstik hatiye qedexekirin.”
REXMÎ QEDEXEYÊ JÎ EWRAQA FERMÎ NÎNE
Di berdewama axaftina xwe de Koçer, destnîşan kir ku bi israr prosedurê bi bîra şaredariya CHP’î xistine lê muzakereyên wan bêencam mane û ev tişt anî ziman: “Rexmî ku biryar ji aliyê Walîtiya Mêrsînê ve hat girtin jî me ji walîtiyê ewraq negirt. Em çûn walîtiyê. Gotin, ‘Rast e me qedexe kiriye’. Dema ku me hincetê pirsî ji me re hincetê negotin. Hê jî şaredarî û walîtiyê derbarê qedexeyê de ewraqeke fermî nedane me. Tenê belgenameyeke ku emniyetê amade kiriye heye. Ev neyartiya li çand, huner û zimanê kurdî ye.”
WÊ DOZ VEBIKIN
Hunermend Cejna Sarûhan ku organîzatoriya lîstikê ya Mêrsinê kir jî destnîşan kir ku cara yekemîn bi rewşeke wiha re rû bi rû dimîne û got ku di bingeha qedexekirina lîstikê de bêtehemûliya kurdî heye û li dijî qedexekirinê doz vebike û heta dawiyê dê dozê bişopîne.