ئامادەکردنی: #زریان سەرچناری#
سلێمانی 2018
خادیم 1895 - 1971
لە ڕێگەی عەشقیا دڵ شۆڕشێ بەرپا نەکا چ بکا؟
لە دووریتا هەموو شەو ئاﮪ و واوەیلا نەکا چ بکا؟
ڕەمی چاوی غەزالان حەلقەی زنجیرە بۆ پێی دڵ
ئەگەر دێوانە ڕوو هەردەم لە ڕووی سەحرا نەکا چ بکا؟
لە نەشئەی مەی بوو عاشق شاهدی عەهدی (أَلسْتُ)ی دی
وجودی ئاو و خاکی خۆی ئەگەر سەهبا نەکا چ بکا؟
لە فەیزی سوحبەتی پیری موغان بوو کیمیای دەست کەوت
لە یومنی مەی ئەگەر خۆی یەکه و تەنها نەکا چ بکا؟
لە مەوجی مەی لە ساغیردا جامالی دولبەری دیوە
ئەگەر سەر دانەنێ هەم سڕڕی خۆی ئیفشا نەکا چ بکا؟
لە سەحرایی جنوون دڵ مەشقی وەحشەتییە هەموو کاتێ
لە جوستوجۆ سۆراغی خەیمەیی لەیلا نەکا چ بکا؟
لە بۆ قەتڵی منی مسکین بە تەحریکی برۆی دولبەر
ئیشارەت گەر بە مەوجی چاوەکەی شەهلا نەکا چ بکا؟
دڵی موفلیس خەریداری جەمالی یوسفە ئیمڕۆ
لە بازاڕی محەببەت عیشق ئەگەر سەودا نەکا چ بکا؟
لە جامی وەحدەتا مەخمووری ڕەحراحی ئەزەل بێ دڵ
بە مەوجی جیلوە گەر دەیجووریان بەیزا نەکا چ بکا؟
هجومی بۆ دڵی (خادیم) کە هێنا جیلوەیی عیشقی
لە بازاڕی محەببەت خۆ ئەگەر ڕیسوا نەکا چ بکا؟
....
بە یادی تۆ لە دڵدا گەر کیفاحی ئەم نەکەم چ بکەم؟
بە فیکری دووری تۆ دەردی جودایی کەم نەکەم چ بکەم؟
لە چارەی دەردی دڵ ئیمڕۆ تەبیبی حازیقن عاجز
بە زامی تر ئەگەر زامی جگەر مەرهەم نەکەم چ بکەم؟
تەعەللوف ڕێی ویساڵی حەزرەتی مەعشوقی لێ گرتم
کەوا بۆ تەرکی خویش و باب و خاڵ و عەم نەکەم چ بکەم؟
ئەگەر بۆ کەعبەیی وەسڵی ڕوخی ڕێگەم نەدا دولبەر
لە بارانی سوروشکم دیدە وەک زەمزەم نەکەم چ بکەم؟
خەلەل بۆ عەیشی تەنهایی ئەدا هەمدەم بە جوز دولبەر
لە خەڵوەتدا خەیاڵی عەکسی ئەم هەمدەم نەکەم چ بکەم؟
بناغەی خانەی عەیشم لە هیجرانا ڕوو لە وێرانە
بەسەنگی سەبر ئەگەر بنچینەی مەحکەم نەکەم چ بکەم؟
موجەڕەد بوونە ڕێگەی وەسڵی ئەو شۆخە لە دونیادا
کە تەرکی سوزەنی وەک عیسای مەریەم نەکەم چ بکەم؟
بە ڕەشماری دوو زولفی زامی دڵ زەهراوییە (خادیم)
بە تریاقی لەبی دولبەر عیلاجی سەم نەکەم چ بکەم؟
....
پێنج خشتەکی لەسەر شیعری مەحوی
لە بازاڕی مەحەببەت شۆڕشێ بەرپا نەکەم چ بکەم؟
لە دەرسی عەشقەوە گەر دەفتەرێ ئینشا نەکەم چ بکەم؟
وەکو مەجنون بە جارێ خۆم ئەگەر ڕیسوا نەکەم چ بکەم
بە نووری بادە کەشفی زوڵمەتی تەقوا نەکەم، چ بکەم؟
بە شەمعێکی وەها چاری شەوێکی وا نەکەم، چ بکەم؟ [1]