#بافڵ تاڵەبانی# سەرۆکی #یەکێتیی نیشتمانیی کوردستان# پەیامێک بۆ دەنگدانی تایبەتی هێزەکانی پێشمەرگە و ناوخۆ و پۆلیس و ئاسایش بڵاودەکاتەوەو ڕایدەگەیەنێت: سبەینێ ڕۆژێکی مێژووی و گرنگە و بچنە سەر سندوقەکانی دەنگدان و بڕیارە ڕاستەکە بدەن و داهاتووی خۆتان دیاریبکەن.
دەقی پەیامی سەرۆک بافڵ...
خوشک و برا و هاوڕێکانم
هێزە قارەمانەکانی پێشمەرگە، ناوخۆ، پۆلیس و ئاسایش
سبەی ڕۆژێکی مێژوویی و گرنگە بۆ گۆڕانکاریی گەورە لە پرۆسەی حوکمڕانی و کۆتاییهێنان بە عەقڵییەتی خۆسەپێنی، تاکڕەوی و جیاکاری. سبەی ڕۆژێکە تاوەکو بڕیارە گرنگ و یەکلاکەرەوەکە لەبارەی چارەنووسی خۆتان و نەوەکانتان بدەن. ئەو ڕۆژەیە کە دەتوانن بە دەنگەکانتان کۆتایی بە غەدر و نادادیی ئەم حوکمڕانییە چەوتە بهێنن کە هەمووشتێکی بۆ گرنگە ژیان و گوزەرانی ئێوە نەبێت. بچنە سەر سندووقەکانی دەنگدان و بیرتانبێت ئەوەی لە بەغدا شەڕی مووچە و قووتی ئێوەی دەکرد، ئەوەی سنووری بۆ تاکڕەوییەکان دانا و دژی جیاکاری و گەندەڵییەکان وەستایەوە، ئەوەی خەمی ئێوە و نەوەکانتانی دەخوارد ئێمەبووین نەک ئەوانەی تا قوڕگیان گەندەڵییە و جوامێرییەکانی ئێوە دەکەنە قوربانیی بەرژەوەندییەکانی خۆیان، کاتێکیش لێیان دەقەومێ، ئینجا ئێوەیان بیردەکەوێتەوە.
سبەی ڕۆژێکی گرنگە و بڕیارە ڕاستەکە بدەن، بە دەنگەکەت داهاتووی خۆت و منداڵەکانت دیاری دەکەیت، بڕیار دەدەیت ئەم تاکڕەوی و خۆسەپێنییە بەردەوامبێت یاخود بەجارێک ڕایاندەماڵن. مەهێڵن لەوەزیاتر یاری بە چارەنووستانەوە بکرێت و قووتی منداڵەکانتان لەژێر دەست و ڕەحمەتی خۆسەپێناندا بێت. ئێوە دەنگ بدەن و شەڕی داهاتوو بۆ ئێمە جێبهێڵن، ئێمە دەزانین چۆن فێریان بکەین کە ژیانی خەڵکەکەمان زۆر لەوە پیرۆزتر و گەورەترە کە ئەوان بیری لێدەکەنەوە. ئێوە کچان و کوڕانی ڕۆژی سەخت و قوربانیدانن، مەهێڵن جگە لە خۆتان کەسیتر بەرهەمی ڕەنج و ماندووبوونتان بخوات، ئێوە شایستەی ژیانێکی شەرەفمەندانەتر و شایستەترن، شایستەی ئەوەن منداڵەکانتان بە سەربەرزییەوە بژین و خێزانەکانتان لە سەقامگیریدابن. بەڵێن و کردارمان یەکن، ئێوە بڕۆن دەنگبدەن و زامنکردنی ژیانتان و شەڕکردن لەسەر مافەکانتان لەسەر ئێمەیە، ئەمە بەڵێنی ئێمەیە و دەشزانن ئەوەی دەیڵێم جێبەجێی دەکەم.
دروود و سڵاو بۆ ڕۆحی شەهیدان، سوپاس و ستایش بۆ ماندووبوون و خۆڕاگریتان. [1]
براتان
بافڵ جەلال تاڵەبانی
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=