[1]

ئەمڕۆ دووشەممە، 11-03-2024، سەرۆک بارزانی لە 54ەمین ساڵیادی ڕێککەوتننامەى (11)ى ئاداری 1970 پەیامێکی بڵاوکردەوە و دەڵێت، جەخت لە پەیامی ئاشتیخوازانە و پێکەوەژیانی گەلی کوردستان دەکەینەوە و ئەوەش دووپات دەکەینەوە کە گەلی کوردستان بۆ گەیشتن بە مافەکانی قوربانییەکی بێهەژماری داوە و لەڕێگەی چەسپاندنی دۆزە ڕەواکەیدا لە خەبات و تێکۆشانی خۆی بەردەوام دەبێت.

=KTML_Bold=دەقی پەیامەکەی مەسعود بارزانی:=KTML_End=
بەناوی خودای بەخشندە و میهرەبان
#ڕێکەوتننامەی 11ی ئازار# بەرهەمی شۆڕشی ئەیلول بە ڕابەرایەتیی بارزانیی نەمر و خەبات و قوربانیدانی پێشمەرگە و سەرجەم چینوتوێژەکانی کوردستان بوو لە بەرانبەر ستەم و زۆرداریی دەستەڵاتدارانی عێراق. بەرهەمی ئەو خەباتە تۆکمەیە بوو کە لەپێناو گەڕاندنەوەی ماف و مسۆگەرکردنی دیموکراسی و شەراکەت و پێکەوەژیان دەستی پێکرد و حکوومەتی ئەوکاتی عێراقی ناچار کرد دان بە بەشێک لە مافەکانی گەلەکەماندا بنێت.
لە پەنجا و چوارەمین ساڵیادی ڕێککەوتننامەی یازدەی ئاداردا جەخت لە پەیامی ئاشتیخوازانە و پێکەوەژیانی گەلی کوردستان دەکەینەوە و ئەوەش دووپات دەکەینەوە کە گەلی کوردستان بۆ گەیشتن بە مافەکانی قوربانییەکی بێهەژماری داوە و لەڕێگەی چەسپاندنی دۆزە ڕەواکەیدا لە خەبات و تێکۆشانی خۆی بەردەوام دەبێت. [1]

#مەسعود بارزانی#
#11-03-2024#
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

مەسروور بارزانی لە ساڵیادی #ڕێکەوتننامەی 11ی ئازار#، دەڵێت، خەڵکی کوردستان هەرگیز ڕێگە نادات عێراق بگەڕێنرێتەوە بۆ سەردەمی دیکتاتۆری و تاکڕەوی.
ئەمڕۆ دووشەممە، 11-03-2024، مەسروور بارزانی، سەرۆکی #حکومەتی هەرێمی کوردستان#، پەیامێکی لە ساڵیادی ڕێککەوتننامەی 11ی ئاداری 1970 بڵاوکردەوە.
=KTML_Bold=ئەمەی خوارەوە دەقی پەیامەکەیە:=KTML_End=
ئەمڕۆ پەنجا و چوار ساڵ بە سەر ڕاگەیاندنی ڕێککەوتننامەی یازدەی ئاداری 1970 تێدەپەڕێت کە دەستکەوتێکی مێژوویی شۆڕشی مەزنی ئەیلوول بوو بەڕابەرایەتی بارزانیی نەمر.
شۆڕش و خۆڕاگری و قوربانیدانەکانی گەلی کوردستان، حکوومەتی ئەوکاتی عێراقی ناچار کرد دان بە بەشێک لە مافە ڕەواکانی گەلی کوردستاندا بنێت. بە تایبەتی ڕێککەوتن لەسەر هەموارکردنەوەی دەستووری کاتی و داننان بەوەی عێراق لە دوو نەتەوەی سەرەکی (عەرەب و کورد) پێکهاتووە و دەستووریش دان بە مافە نەتەوەییەکانی گەلی کورد دەنێت.
بەڵام دواجار ڕژێمی ئەو سەردەمەی عێراق، لە ڕێککەوتننامەکە پاشگەز بووەوە و پەنای بردەوە بۆ شەڕ و دژایەتیکردنی خەڵکی کوردستان و سەرەنجام عێراقی دووچاری ماڵوێرانی و کارەساتی گەورە کرد کە تا ئێستاش خەڵکی عێراق، باجەکەی دەدەن.
لەم یادەدا، جەخت لە پێویستی و گرنگیی پاراستن و ڕێزگرتن لە مافە دەستوورییەکانی گەلی کوردستان و قەوارەی دەستووری هەرێمی کوردستان دەکەینەوە. خەڵکی کوردستان هەرگیز ڕێگە نادات مافەکانی پێشێل بکرێت و ستەم و زۆرداری لێ بکرێت و عێراق بگەڕێنرێتەوە بۆ سەردەمی دیکتاتۆری و تاکڕەوی. [1]

#مەسرور بارزانی#
سەرۆکی حکوومەتی هەرێمی کوردستان
#11-03-2024#
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

ئەمڕۆ دووشەممە، 11-03-2024، نێچیرڤان بارزانی، سەرۆکی هەرێمی کوردستان لە 54ەمین ساڵیادی #ڕێکەوتننامەی 11ی ئازار#ی 1970 پەیامێکی بڵاوکردەوە و دەڵێت، ڕێککەوتننامەکە بەرهەمى تێکۆشان و قوربانیدانى گەلى کوردستان بوو کە حکوومەتى عێراقى ناچار کرد دان بە بەشێک لە مافە ڕەواکانیدا بنێت، هەروەها بووە بناغەى هەموو دەسکەوتەکانى دواترى گەلى کوردستان.

=KTML_Bold=دەقی پەیامەکەی سەرۆکی هەرێمی کوردستان:=KTML_End=
ئەمڕۆ یادى شکۆدارى (54) ساڵەى ڕێککەوتننامەى (11)ى ئازارى 1970 دەکەینەوە کە لەنێوان دەسەڵاتى ئەوساى عێراق و شۆڕشى مەزنى ئەیلوولدا بە ڕابەرایەتیى بارزانیى نەمر واژۆ کرا. ڕێککەوتننامەکە وەرچەرخانێکى چارەنووسساز و یەکەم بەڵگەنامەى فەرمى بوو لە مێژووى هاوچەرخدا. بەرهەمى تێکۆشان و قوربانیدانى گەلى کوردستان بوو کە حکوومەتى عێراقى ناچار کرد دان بە بەشێک لە مافە ڕەواکانیدا بنێت، هەروەها بووە بناغەى هەموو دەسکەوتەکانى دواترى گەلى کوردستان.
لەم یادەدا مێژووى پڕ لە نەهامەتیى دەوڵەتى عێراق بە بیرى هەمووان دەهێنینەوە کە لۆژیکى هێز و بیر و سیاسەتى نکۆڵیکردن لە مافەکانى گەلى کوردستان و پێکهاتەکانى عێراق بەگشتى، چ زیانێکى لە وڵات داوە؟ پاشگەزبوونەوەى دەسەڵاتى ئەوساى عێراق لە ڕێککەوتننامەکە، شەڕ و ماڵوێرانى و کارەسات و ناسەقامگیریى بەردەوامى بۆ عێراق و گەلانى بەدواى خۆیدا هێنا کە لێکەوتەکانى تا ئەمڕۆش بەردەوامن.
با لە هەرێمى کوردستان ئەم یادە بکەینە دەرفەتى لێکگەیشتنى هاوبەشى لایەنە سیاسییەکان بۆ تێپەراندنى کێشە و ناکۆکى تا پێکەوە ڕووبەڕووى ئاڵنگارییەکان ببینەوە و دەسکەوت و مافە دەستوورییەکان و قەوارەى فیدراڵیى هەرێمى کوردستان بپارێزین. لە عێراقیش پەند و وانە لە ڕابردوو و مێژووى پڕ لە ئازارى وڵات وەربگرین، دەستوور جێبەجێ بکەین و سیستمى فیدراڵى و مافەکانى هەموو گەلان و پێکهاتەکانى عێراق بپارێزین و بە ڕوانینێکى هاوبەش بەره و داهاتوو هەنگاو بنێین.
سڵاو لە یادى ڕێککەوتننامەى (11)ى ئازار و دروود بۆ گیانى پاکى شەهیدان. [1]

#نێچیرڤان بارزانی#
سەرۆکى هەرێمى کوردستان
#11-03-2024#
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

کۆسرەت رەسوڵ عەلی لە ساڵیادی راپەڕین و رزگارکردنی شاری #هەولێر#-دا پەیامێک بڵاودەکاتەوە و تێیدا رایدەگەیەنێت:هەولێرییەکان سەلماندیان هەولێر شارێکی زیندووەو هەر بە زیندوویی دەمێنێتەوەو هەرگیز ستەمکاری قبوڵ ناکات.

=KTML_Bold=دەقی پەیامەکە=KTML_End=
(33)هەمین ساڵیادی ئازادکردنی هەولێری قەڵاو منارە، هەولێری تێکۆشەران و قارەمانان لە خەڵکی کوردستان بەگشتی و هەولێرییە سەربەرزەکان بەتایبەتی پیرۆز دەکەم و ئومێد دەکەم ئەم یادو رۆژە پیرۆزە هەوێنی ئاشتەوایی و تەبایی نێوانمان بێت.
ئەوپەڕی شانازییە بۆ من، ئەوێ رۆژێ بەرەی کوردستانی سەرپەرشتی ئازادکردنی هەولێریان پێ سپاردم، بە بەرنامەیەکی ورد کارمان کردو بەهاوکاری شانە چەکدارەکان و رێکخستنە نهێنییەکان و هەولێرییە تێکۆشەرو قارەمانەکان کە پشتیوانێکی گەورە بوون بۆ لەناوبردنی ستەمکاری، توانیمان هەولێر کە گەورەترین مۆڵگەی دام و دەزگاکانی #بەعس# بوو ئازاد بکەین و لە بەعس پاکی بکەینەوە، بۆیە ئەو رۆژە هەموو کەس شانازی دەکرد هەولێری بی.
ئەوێ رۆژێ هەولێرییەکان سەلماندیان هەولێر شارێکی زیندووەو هەر بە زیندوویی دەمێنێتەوەو هەرگیز ستەمکاری قبوڵ ناکات.
ئەمڕۆش کە یادی ئەم رۆژە مێژووییە دەکەینەوە دووپاتی دەکەمەوە کە هێشتا ئامانج و ئاواتەکانمان نەهاتۆتەدی، پێویستە خەبات بەردەوام بێ بۆ بەدیهاتنی ئاواتە بەدینەهاتووەکانمان و هەموومان دەست لەناودەست لەپێناو خزمەتکردنی زیاتری کۆمەڵانی خەڵکی کوردستان و پاراستنی دەستکەوتەکانمان، ئەرکی هەموومانە خزمەتی خەڵکی خۆمان بکەین و خەبات بکەین لەپێناو ژیانێکی شایستەو شەرەفمەندانە بۆ گەلی کوردی قارەمان و خۆڕاگر، ئەو گەلەی بۆ هیچ دوژمنێک سەری دانەنواندووەو داشینانوێنێ.
دووبارە پیرۆزە ساڵڕۆژی ئازادکردنی هەولێر، سەری رێزو نەوازش بۆ شەهیدانی کوردو کوردستان دادەنوێنم. [1]

#کۆسرەت ڕەسوڵ عەلی#
#11-03-2024#
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=