لقی سلێمانی سەندیکای ڕۆژنامەنووسان ئۆفەرێکی ئاسیا سێڵ بۆ ئەندامانی دابین دەکات
توانیمان ڕەزامەندی کۆمپانیای ئاسیا سێڵ وەربگرین بۆ دابەشکردنی سیم کارتێک بە ئۆفەرێکی تایبەت و نوێ و پڕ خزمەتگوزاری.. بەقسەکردنی کراوە بۆ ئاسیا سێڵ و برَێکی دیاریکراو بۆهێڵەکانی ترو ئینتەرنێت، تەنها بەبڕی 6000 دینار بۆ هەر مانگێک..
بەڵام لە بەر ئەوەی تەنها 500 پێنج سەد سیم کارتی تایبەتمان بەم ئۆفەرە دراوەتێ، ئێمەش ژمارەی ئەندامەکانمان زۆر لەوە زیاترە بۆیە ناچارین تەنها ئەو ئەندامانە بخەینە ئۆفەرەکەوە کە پێناسی 2018 یان نوێ کردوەتەوە یان دەیانەوێت لەم هەفتەیەدا نوێی بکەنەوە..
بۆیە پێویستە ڕەچاوی ئەم خاڵانەش بکەین:
1-وەرگرتنی سیم کارتی نوێ لەرێگای تیمێکی تایبەت بە ئاسیا سێڵەوە دەبێت کە ڕۆژی 15/4/2018 واتە یەک شەممەی داهاتوو دێنە بارەگای لقی سلێمانی سەندیکاو لەوێ فۆرمی تایبەت بە ئەندامان پڕ دەکەنەوە و پەنجە مۆرو وێنەیان دەگیرێت.
2-هەر ئەندامێک (کارا، بەشدار، مەشقکار) دەتوانێت تەنها یەک سیم کارت وەربگرێت.
3-هەر ئەندامێک دەیەوێت بەشدار بێت لە وەرگرتنی ئەو سیم کارتانە دەبێت ڕۆژی یەک شەممە 15/4 پێناسەی (باری کەسێتی یان کارتی نیشتمانی) و پێناسەی سەندیکای ڕۆژنامەنووسانی پێبێت.
4-هەر ئەندامێک دەبێت 7.250 حەوت هەزارو دووسەدو پەنجا دینار بدات بۆ سیم کارتەکەو ڕاژەی بەشداری یەک مانگ..
5-سیم کارتەکان لە سەر ناوی کەناڵ تۆمار ناکرێن، بەڵکو لەڕێگەی سەندیکاوە دەدرێن بە کەسە ڕۆژنامە نووسەکان.
6-بۆ زانیاری زیاتر دەتوانن بەم ژمارەی کورد تێل
0533190958
تێل بکەن بۆ بارەگای لقی سلێمانی سەندیکا
رۆژانە لە سەعات 3 ی پاشنیوەڕۆ تا 6.30 ی ئێوارە
جگە لە پشوە ڕەسمییەکان و ڕۆژانی شەممە و پێنج شەممە
گەڕەکی بەختیاری/ بەرامبەر باخچەی مناڵانی پەری
#08-04-2018#

22-04-2017

ڕۆژنامەنووسانی ئازیز
ئەمڕۆ لێرە کۆبوینەتەوە بۆ ڕێزگرتن لە (120) ساڵەی ڕۆژنامەگەری کوردی، بۆ یادکردنەوەی مێژوو، سیمبوڵ و ڕێنسانسێک و شۆڕشێکی ڕاگەیاندن، فکری، نیشتمانی و نەتەوەیی لەسەر دەستی میقداد مەدحەت بەدرخان و بنەماڵەکەی، بە دەرچوونی یەکەمین ڕۆژنامەی کوردستان لە 22 نیسانی 1898.
ئەم ڕێنسانسە فەرهەنگییە لە هەلوومەرجێکدا خۆی ڕاگەیاند، کە وڵاتانی زلهێز و نەیارانی گەلی کورد لەوپەڕی بەهێزیدا بوون، یان لەلایەن دەوڵەتە زلهێزەکانەوە پشتیوانی سیاسی و سەربازی، تەنانەت فەرهەنگی و ڕۆژنامەوانیش دەکران.
بەڵام لەو هەلوومەرجە دژوارەی سەردەمی ئیمپڕاتۆریەتی عوسمانی و سەفەوی، سەردەمی ترس و فۆبیا و خەفەقانی ئەواندا، نەک ڕێگەیان نەدەدا کورد تەعبیر لە خواستەکانی خۆی بکات، تەنانەت بە دەیان نوسەر، ڕۆشنبیر و سیاسی کوردیان تیرۆر کرد و تەنانەت هەوڵی تیرۆرکردنی میقداد بەردخانیان دا بۆیە بە ناچاری پەنای بردە بەر دەرەوە و لە تاراوگە ڕۆژنامەکەی دەرکرد.
ڕۆژنامەنووسانی ئازیز و خۆشەویست
بەڵام ئەم هەوڵانەی وڵاتانی داگیرکار بەرامبەر گەلی کورد، هەرگیزاو هەرگیز بە ئێستاشەوە نەیتوانی و ناتوانێ ئەم خەون، خولیا و مافە سادە بۆ ژیان و تێکۆشان و ڕۆژنامەوانی و ئازادی لێ زەوت بکات و لێ بسێننەوە، باشترین بەڵگە و فاکت، هەر ئەو ئامادەگییەی ئێوەیە لەم مەیدانەدا، ئەو ئەفراندنەیە، کە ڕۆژنامەنووسان و میدیاکاران لە دوای ڕاپەرین بونیادیان ناوە بە دەرکەوتنی، ئەو سەدان کەناڵە، کە لە هەرێمی کوردستان پەخش دەکەن و ئەو هەزاران ڕۆژنامەنووس و میدیاکارانەیە، کە ڕۆڵی گەورەیان هەبوو لە فەراهەمکردنی ئازادیدا.
ڕۆژنامەگەری کوردی ڕۆڵی گەورەی بینیوە و هەنگاوی گەورەی ناوە لە پراکتیزەکردنی دیموکراسی و فەراهەمکردنی ئازادیدا و یەکێک بوە لە پایەکانی دیموکراسی و فەراهەمکردنی خواستەکانی خەڵک.
بەڵام ئەوەش ڕاستە، کە هێشتا یاساکانی کاری ڕۆژنامەنوسی ژمارە (35) ساڵی 2007 و یاسای مافی بەدەستهێنانی زانیاری ژمارە (11) ساڵی 2013، یاسای مافی خانەنیشینی ڕۆژنامەنووسان جێبەجێنەکراوە و کاری ڕۆژنامەنووسی وەکو پیشە سەیر ناکرێت و بە حرفیەیی نەکراوە.
هێشتا تیرۆری ڕۆژنامەنووسان بەردەوامە و بکوژەکانیان دیاری نەکراون و بە سزای تاوانەکانیان نەگەیشتوون، خوێنی بە ناحەق ڕژاوی (عەبدولستار تاهیر شەریف، سۆران مامە حەمە، سەردەشت عوسمان، کاوە گەرمیانی، ویداد حوسێن) ونە و بکەرانیان مەعلوم نین، وەڵامێک بە خانەوادە و کەسووکاری چاوەڕوانی ئەم قەڵەمە ئازاد و ئازادانە نییە.
هێشتا ئاماری پێشێلکارییەکان مایەی نیگەرانییە و ساڵ بە ساڵ ڕێژەکانیان زۆرتر و زیاتر کەڵەکە دەبن و ڕێگری و ئاستەنگ لەم ناوچە یان ئەو ناوچە بۆ ڕۆژنامەنووسان دێتە پێش و ڕێز لە پیشەی ڕۆژنامەنووس ناگیرێت.
ئامارەکان دەڵێن لە #01-01-2008# تا 22/4/2018 (1383) پێشلێلکاری بەرامبەر زیاتر لە (1000) ڕۆژنامەنووس ئەنجامدراون، بەبێ ئەوەی کەمترین کەس و لایەنی پەیوەندیدار سزا درابن، ئەمەش ساڵ بە ساڵ نیگەرانی ئێمە لە وەزارەتی ناوخۆ و لایەنە ئەمنییەکان زۆرتر دەکات.
ڕۆژنامەنووسانی ئازاد و خاوەن قەڵەم
ئەنجوومەنی سەندیکای ڕۆژنامەنووسان، نیگەرانە لەو پێشێلکاریانە و بەتایبەتی بەمدواییە لە کاتی خۆپیشاندانەکانی مامۆستایان لە هەرێمی کوردستان ڕوویدا، بەتایبەت لە شاری هەولێر زۆرترین پێشێلکاری ڕوویدا و سوکایەتی بە بەشێک لە ڕۆژنامەنووسان کرا.
بۆیە بەڵێن دەدەین بەردەوام لە پشت خواست و داواکانتانەوە بین بۆ پاراستنی مافەکانتان و بەدیهێنانی ئازادی و زۆرتر و فەراهەمکردنی خواست و داواکارییەکانتان.
کەناڵەکانی ڕاگەیاندن و میدیاکارانی بەڕێز
ئەمساڵ لە کاتێکدا یادی (120) ساڵەی ڕۆژنامەگەری دەکەینەوە، کە خەریکی بانگەشەی هەڵبژاردنین بۆ ئەنجوومەنی نوێنەرانی عێراق.
بۆیە جیالەوەی پێویستە کەناڵەکانی ڕاگەیاندن و میدیاکاران بەپێی پرەنسیپەکانی کاری ڕۆژنامەوانی مامەڵە بکەن و ڕێز لە فکر و ئایدۆلۆژیای جیاواز یەک بگرن، پێویستە هانی خەڵکی کوردستان بدرێت وەکو پرسێکی نیشتمانی و نەتەوەیی سەیر بکرێت و لە هەمانکاتدا لەسەر حکومەتی عێراق و هەرێم و لایەنەکان پێویستە ڕێز لە میدیاکاران بگرن و هاوکاریان بکەن و پێشێلکاریان دەرهەق ئەنجام نەدەن، بەتایبەت لە ڕۆژی دەنگداندا، کە ئەزمونێکی خراپمان هەیە لە مامەڵەی دەزگا ئەمنییەکانی بەغدا و هەولێر لەگەڵ ڕۆژنامەنووساندا.
ڕۆژنامەنووسانی بەڕێز
بۆ چارەسەری گرفتەکانی بەردەم ڕۆژنامەنووسان لە کوردستان داوا دەکەین، بە پەلە کۆنگرەی سەندیکای ڕۆژنامەنووسان شەفاف و ڕوون ببەسترێت بۆ چاکسازی لە سەندیکای ڕۆژنامەنووسان.
هیوادارین یادی (120) ساڵەی ڕۆژنامەگەری کوردی، ببێتە سەرەتایەکی باشتر بۆ کوردستان و بەتایبەتی بۆ ڕۆژنامەنووسان و بۆ چاککردنی بارودۆخی سەندیکاکەتان.
بەرز و بەڕێز بێت یادی (120) ساڵەی ڕۆژنامەگەری کوردی
ئەنجوومەنی #سەندیکای ڕۆژنامەنووسانی کوردستان#
#22-04-2018#

دەقی پەیامەکەی #سەندیکای ڕۆژنامەنووسانی کوردستان#:
رۆژی 13ی ئاداری 2022، بێ هیچ پاساوێک هێرشی موشەکی کرایە سەر هەولێر، پایتەختی هەرێمی کوردستان، کە خۆشبەختانە زیانی گیانی نەبووە و جگە لە برینداربوونی دوو هاوڵاتی سڤیل و هەندێک زیانی ماددی.
ئەنجوومەنی سەندیکای ڕۆژنامەنووسان سەرکۆنەی ئەم هێرشە موشەکییە دەکات و هەروەها پشتیوانی خۆی بۆ دەزگای میدیایی کوردستان 24 دەردەبرێت کە زیانی مادی زۆری پێکەوتووە، هیوای سەلامەتی و بەردەوام بوونیان لە ئەرکی پیشەییان بۆ دەخوازین.
هەروەها ئەنجوومەنی سەندیکا داوا لە حکومەتی هەرێم و حکومەتی فیدراڵی دەکات بە هەماهەنگی کار بۆراگرتنی ئەم هێرشە بێ پاساوانە بکەن و هەوڵی خۆیان لە کەناڵە یاساییە نێودەوڵەتییەکاندا بخەنە گەڕ، بۆ ئەوەی چیتر هاووڵاتیانی ئاشتیخوازی هەرێمی کوردستان نەکرێنە ئامانج و هاوکات بەرپرسیارێتی حکومەتی فیدراڵییە ڕۆڵی خۆی بگێرێت بۆ دووبارە نەبوونەوەی ئەم جۆرە هێرشانە بۆ سەر هاوڵاتیانی سیڤیل و شاروشارۆچکەکانی هەرێمی کوردستان.
ئەنجوومەنی سەندیکای
رۆژنامەنووسانی کوردستان
13/3/2022[1]

⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!

بۆ ڕای گشتی ناوخۆ و دەرەوە
#سەندیکای ڕۆژنامەنووسانی کوردستان# بڕیاری داخستنی کەناڵەکانی میدیا شەرمەزار دەکات.
دەستەی ڕاگەیاندن و گەیاندنی عێراق بە ژمارە 7/4/5/9714 لە بەرواری 23/10/2017 بڕیاری ڕاگرتنی پەخشی هەردوو کەناڵی (RUDAW) و (K24) لە سەرانسەری عێراق داوە، کە گوایە مۆڵەتیان نییە و بەرنامەکانیان هاندانی تووندوتیژی ڕق و کینەیە و ئاشتەوایی کۆمەلایەتی تێکداوە. بڕیارەکەشیان بۆ وەزارەتی بەرگری و ئەنجوومەنی ئاسایش عێراق و دەزگای موخابەراتی عێراق و ژووری عەمەلیاتی سوپای عێراق ناردووە.
سەندیکای ڕۆژنامەنووسانی کوردستان ئەمجۆرە بڕیارانە شەرمەزار دەکات، لە هەمانکاتدا لە نەبوونی بۆشایی یاسایەکی تایبەت بە ڕێکخستنی پەخشی ڕادیۆ و تەلەڤزیۆن دژی هیچ ڕێکارێک نییە ئەگەر مەبەستی ڕاستەقینە ڕێکخستنی ئەم بوار ەبێت، بەڵام زۆر ڕاشکاو دیارە ئەم بڕیارە بە پلەی یەکەم بڕیارێکی سیاسییە و مەبەست لێی سزادانی میدیاکانی کوردستان و هەموو دەنگێکە دیموکراتی و ئازادیخوازە. هەروەکو لە مادەکانی (36) و (40) دەستوری عێراقدا هاتووە، ئازادی بیروڕا و ڕۆژنامەگەری لە لایەنی دەوڵەتەوە گەرەنتی بکرێت و ناکرێ پێشێلکاری و ڕێگە لەو ئازادییە بگیرێت تەنها بە بڕیاری دادگا نەبێت، کەچی جێبەجێکردنی بڕیارێکی سیاسی لە ڕێگەی هێزی سەربازی و دەزگای موخابەراتەوە جگە لەوەی دەخالەتی ناقانوونییە لە هەرێمێکی دەستووری دانپیانراودا، ناکۆکیشە لەگەڵ ئەو پرانسیپانەی کە دەبێت عێراقێکی دیموکراتی لەسەر بنیاتبنرێت. دەستەی ڕاگەیاندن و گەیاندنی عێراق بەڵگەی چییە کە ئەو دوو کەناڵە لە بەرنامەکانیان دژی ئاشتەوایی کۆمەڵایەتی و چاندنی تۆوی دووبەرەکین، بەبێ ئەوەی ئەو بانگەشەیە لەلایەن دادگایەکی پسپۆڕی بێلایەن و بە بەڵگە و دیکۆمێنتەوە ساغکرابێتەوە، هەروا بە ئاشکرا دووفاقی و مۆرکی سیاسی بەو بڕیارەوە دیارە کە ئەم دەستەیە هەموو ئەو کەناڵ و میدیا یانەی عێراق نایبینێ کە لە بەغداوە پەخشدەکرێن و هەوڵ و تەیاری خەڵک دەکەن بە پەخشکردنی ڕق و کینەی تایفی و نەتەوەیی دژی هەرێمی کوردستان.
سەندیکای ڕۆژنامەنووسانی کوردستان، داوادەکات حکومەتی بەغدا هەوڵی بەرتەسککردنەوەی ئازادی میدیا نەدات و دەستەی ڕاگەیاندن و گەیاندنی عێراق لەڕێگەی ڕێنمایی و یاسا و کار ئاسانی کار و پیشەی ڕۆژنامەنووس و میدیایی ڕێکبخات، دوور لە دەزگای موخابەراتی و عەسکەری تایبەت.
هاوپێچ/ وێنەیەک لە بڕیارەکەی عێراق
ئەنجوومەنی سەندیکای ڕۆژنامەنووسانی کوردستان
29-10-2017
وێنەیەک بۆ/
- ڕێکخراوەکانی مافی مرۆڤ و ئازادی ڕۆژنامەنووسی و کۆمەڵگەی مەدەنی، ناوخۆو دەرەوە.
- بالیۆز و قونسوڵگەری وڵاتان.
- دامودەزگاکانی پەرلەمان و حکومەتی عێراق و هەرێمی کوردستان

#29-10-2019#

بۆ تەواوی دەزگاکانی ڕاگەیاندن
ئێوارەی ئەمڕۆ ئەنجوومەنی #سەندیکای ڕۆژنامەنووسانی کوردستان#، لە کۆنگرەیەکی ڕۆژنامەوانیدا، ئاماری پێشێلکارییەکانی ئەمدواییەی کە دەرحەق بە ڕۆژنامەنووسان کراون لە ماوەی خۆپیشاندانەکان، دەخاتەڕوو.
شوێن: بارەگای سەندیکای ڕۆژنامەنووسانی کوردستان
کات: 4ی ئێوارە
رێککەوت: پێنج شەممە #29-03-2018#

لە ساڵی 1998دا دامەزراوە
sule.sandika@gmail.com
ناونیشانی ئێستا2022: سلێمانی/ بەختیاری/ بەرانبەر باخچەی ساوایانی پەری. [1]

روونکردنەوەیەک لە سکرتێری لقی #سلێمانی# سەندیکای ڕۆژنامەنووسانی کوردستان ەوە
چەندین جارە کە ڕۆژنامەنووسەکانی سنووری لقەکەمان لەرێگەی پۆست و بڵاوکردنەوەی بۆچوونەکانیان لەرێگەی تۆڕە کۆمەڵایەتیەکانەوە، بەیاسای ژمارە 6 ی ساڵی 2008 یان مادده و بڕگەکانی تری یاساکانی عیراق دادگایی دەکرێن و بەتایبەت ماددەی دوەمی مۆبایل کە دەستگیر کردن و دەستبەسەرکردنی تێدایە و دادوەرە بەڕێزەکان بە پەیرەوکردنی بڕگه و ماددەکانی ئەم یاسایە لەهەندێک حاڵەتدا کار دەکەن..
کێشەی ڕۆژنامەنووس #بەرهەم ساڵح# کە لە تۆڕی کۆمەڵایەتی فەیسبووک پۆستێکی لەسەر نەخۆشخانەی بەخشین بڵاوکردبوەوە و پاشان سڕیبوویەیوە، بەڵام پارێزەرانی نەخۆشخانەکە بەیاسای خراپ بەکارهێنانی ئامێرە ئەلکترۆنیەکان سکاڵایان لەسەر تۆمار کردبوو کە لە ڕاستیشدا وایه و لە یاسای ژمارە 35 ساڵی 2007 بەهیچ جۆرێک باس لە تۆڕە کۆمەڵایەتیەکان نەکراوە، بۆیە دادگاکان بە ناچاری پەنا بۆ یاسایەک دەبەن کە پەیوەست نیە بە میدیاو میدیاکاران..
ئەمڕۆ سێشەممە 11/12 لەگەڵ نوێنەری یاسایی لقەکەمان پارێزەر شیلان عەزیز سەردانی بنکەکانی پۆلیس و دادوەری بەڕێزمان کردو لە بنەمای کێشەکەیان کۆڵیەوە کە بەرهەم ساڵح ڕاستە لە فەیسبووک نووسینی بڵاوکردوەتەوە بەڵام لەبەر ئەوەی :
یەکەم/ ڕۆژنامەنووسە و کاری ڕۆژنامەنووسی دەکات
دوەم/لە وردەکاری یاساو شێواز و ڕێساکانی یاسا بەرکارەکان شارەزا نەبوە..
بۆیە هیوادارین تەنها یاساکەیمان بۆ بگۆڕن بە یاسای کاری ڕۆژنامەنووسی و بەکەفالەت بتوانین لە گرتن و گواستنەوە بیهێنینە دەرەوە ئەگینا دەبێت تا ڕۆژی 17 ی مانگ واتە یەک شەممەی داهاتوو لە زیندان بمێنێتەوە..
بە سوپاسەوە دادوەری بەڕێز بە سۆزو بەزەیی خۆی گوێی بۆ داواکاری پارێزەرو سکرتێری لقق گرتو وەک ڕۆژنامەنووسێک بەرهەم ساڵح ی ناوبرد و ماددەکەی بۆ کردەوە بە ڕۆژنامەگەری.. بۆیە عەسری ئەمڕۆ بە کەفالەت ئازاد کراو گەڕایەوە ناو ماڵ و منداڵی خۆی..
بەداخەوە هەر ئەم ئێوارەیە هەواڵی دەستگیرکردنی ڕۆژنامەنووسێکی ترمان پێگەیشت بەناوی بەرزان ئەیوب کە لەسەر پۆستێکی تری تۆڕە کۆمەڵایەتیەکان دەستگیر کراوە بەڵام هێشتا نەچووینەتە ناو وردەکاری کێشەکەوە تا بزانین وردەکاریەکان چین..
لەسەروبەندی ئەم کەیسه و کەیسی پێشوومان و ئەوانەش کەلەداهاتوودا هاوشێوەن، چەند داوایەک لە ڕۆژنامەنووسە بەڕێزەکانمان دەکەین بەهیواین ڕەچاویان بکەن، تا ئێوەش و ئێمەش بتوانین کارەکان لەچوارچێوەی یاسادا چارەسەر بکەین:-
1- تا یاسایەیەک یان ڕێنمایی تایبەت بە تۆڕە کۆمەڵایەتیەیکان دەردەچێت، هیوادارین کەناڵە ڕەسمیە مۆڵەتدارەکان بەکار بهێنن بۆ گەیاندنی بیرو بۆچوونەکانتان نەک تۆڕە کۆمەڵایەتیەکان.
2- بۆ ئەندامانی لقەکەمان و ئه و ڕۆژنامەنووسانەش کە کاری میدیا دەکەن و ئەندام نین، ئەگەر کەیسەکانتان پەیوەست بوو بە کاری میدیاییەوە تکایە سەندیکاو نوێنەری یاساییمان ئاگادار بکەنەوە تا لە وردەکاریی ئاگادار بین و کەیسەکانتان لەناو بنکەکانی پۆلیس و دادگاکاندا چارەسەر ببن..
3-ئەرکی سەرشانمانە بەرگری لە ڕۆژنامەنووسان بکەین لەچوارچێوەی یاساو ڕێساکاندا، بەڵام بەداخەوە هەندێک کەناڵ و کەسو لایەن، ئه و کەیسانەی ئێوە دەقۆزنەوه و بە لا ڕێدا دەیانبەن بەمەبەستی تایبەتیی خۆیان، هاوکات کارەکەی ئێمه و کێشەکانی ئێوەش ئاڵۆزتر دەکەن..
4-کە ئەندامێکمان دەستگیر دەکرێت پێویستە هەوڵ بۆ ئازادکردنی بدەین لەچوارچێوەی یاسادا، نەک بە دەرکردنی بەیاننامه و دیداری میدیاییو بەلارێدا بردنی کەیسەکان، هاوکات بەناوی ڕەخنه و بەیاننامەوە هێرش بکرێتە سەر ئەم لایەن و ئه و لایەن، یان دادگاو بنکەکانی پۆلیس تۆمیتبار بکەن (ئەوەش بەمەبەستی تایبەتی خۆیان)..
5-داواکارین ئەندامان و ڕۆژنامەنووسانمان هەردوو یاسای کاری ڕۆژنامەنووسی و یاسای بەدەستهێنانی زانیاری بخوێننەوە (بۆ ئەوانەی کە نەیانخوێندوەتەوە) تا لە بڵاوکردنەوەی بابەتەکاندا دووچاری ئه و حاڵەتانە نەبن وەک ئەوانەی لەم چەند هەفتەیەی ڕابردوودا ڕوویاندا..
6-ماوەیەکە کەیسەکانتان ئەوەندە زۆر بوون وەختە بڵێم خەریکە فریای بەهاناوە چوونتان ناکەوین، چونکە لقی سلێمانی تەنها یەک پارێزەری خۆبەخشی هەیە کە نوێنەری یاسایی لقمان دەکات، ئەگەر کار وا بڕوات دەبێت ڕێگاچارەیەکی تر بدۆزینەوە..
7-بەمافی خۆمانی دەزانین بەناوی هەموومانەوە سوپاسی خوشکی پارێزەرمان شیلان عەزیز ڕەفیق بکەین کە زیاتر لە پێنج ساڵە خۆبەخشانە نوێنەرایەتی لقمان دەکات و سەرکەوتوانە کارەکانتان بۆ بەرێوە دەبات بەبێ هیچ بەرامبەرێک..
هیوادارین هەموو لایەک ساغ و سەلامەت بن
کاروان ئەنوەر
سکرتێری لقی سلێمانی سەندیکای ڕۆژنامەنووسانی کوردستان
#11-12-2018#

ئێوارەی ئەمرۆ لە سەنتەری ڕۆشنبیری شاری #کەرکووک# لە ژێر دروشمی (پارێزگاری لە ژیانی ڕۆژنامەنووسان، پارێزگاریکردنە لە ئازادی ڕادەربڕین) مەراسیمێک سازکرا و ڕاپۆرتی 6 مانگی ڕابردووی پێشێلکاری بەرانبەر ڕۆژنامەنووسان ئاشکراکرا.
لە مەراسیمەکەدا نەقیبی گشتی سەندیکای کوردستان و نەقیبی کەرکووک و ڕۆژنامەنووسانی شاری کەرکووک ئامادەی مەراسیمەکە بوون.
لە مەراسیمەکەدا نەقیبی گشتی سەندیکای ڕۆژنامەنووسانی کوردستان گوێی لە بارودۆخ و ڕەخنەی ڕۆژنامەنووسانی شاری کەرکووک گرت، پاشان ئەو ڕۆژنامەنووسانەی پێشێکاری بەرامبەریان کراوە لە ماوەی 6 مانگی ڕابردوودا خەڵات کران.
کوێ ئەو پێشەلکاریانەی بەرامبەر دەزگاکانی ڕاگەیاندن کراوە 28 پێشێلکاری بوون کە 23 پێشێلکاریان، پێشێلکاری ڕاپۆرتی بوون.
10 حاڵەتی دەستگیرکردن، 9 حاڵەتی ڕێگەنەدان بە ڕووماڵکردن، 5 حاڵەتی هێرش و سوکایەتی، 1 حاڵەتی لێدان، 1 حاڵەتی داخستنی کەناڵ، 1 حاڵەتی هەڕەشە، 1 حاڵەتی داوای پرکردنەوەی فۆرمی زانیاری کەسی و ئەمنی هەبوون.[1]
#23-02-2020#