خوێندکار پێویستی بە دوو ڕۆژی پشوو نییە
#پەروین عارف#

بەڕێز وەزیری پەروەردە،
خوێندکار پێویستی بە دوو ڕۆژی پشوو نییە.
خوێندکار پێویستی بە:
• مامۆستای کارامە و دڵسۆزە، ئەو مامۆستایەی پێویست نەکات بچێتە سەر شەقام بۆ مووچەکەی.
• پێویستی بە مامۆستایەکە ڕێزی لێبگیرێت، بەر شەق نەدرێت.
• ئەو مامۆستایەی کە بە وانەبێژیی قایل بووە، لێ، بە چوار مانگ جارێک حەقی خۆی وەردەگرێت!
• خوێندنگەیەک کە مەترسیی لەسەر ژیانی نەبێت (دیواری ڕزیو نەروخێت بە سەریا) .
• زیاتر لە 3000 خوێندنگە پێویستە درووستبکرێت لە کوردستان.
• دوو دەوامی و سێ دەوامی سەری لە هەمووان شێواندووە.
• باسی خوێندنگەکانی دەرەوەی شار ناکەم، تەنیا ئەوە نەبێت، لە یەکێکیاندا، دوکانێک کراوە بە پۆل!
• خویندکاری هەژار بەبرسییەتی وانە نەخوێنێت (لە ساڵانی پەنجاکاندا، شیری گەرم، پاروو، حەبی ڕۆن ماسی دەدرا بە منداڵان (حوکمی خۆماڵیش نەبوو) .
• جارێکیتر هێز بدرێتە بەر خوێندنگە حکومییەکان و پەرەی پێبدرێت، لەبەرانبەر خوێندنگە تایبەتەکان (ئەم بابەتە لێرەدا بە تێر و تەسەلی حەقی خۆی وەرناگرێت) .
• زمانی دایک پێویستی بە ئاوڕدانەوەیە لە پەروەردەدا.
• سەیرکردنی مامۆستاکان بە یەک چاو بۆ بەڕێوەبردنی خوێندنگەکان و کارەکانی تر و وەلا نەخستنی مامۆستای بە ئەزموون و کارامە، بۆ هەر هۆکارێک بێت.
ئەمە تەنیا بەشێکە لە خەرمانی پێویستییەکانی پەروەردە، لە ڕاستیدا، پەروەردە، هەموو ساڵێک پێویستی بە کۆنفرانسی هاوینە هەیە بۆ دەستنیشانکردنی زۆربەی کەموکووڕییەکان.
لە سونگەی خەمخۆری و دڵسۆزییەوە دەبێت، دەستبخرێتە سەر هەموو برینەکان. [1]
#16-07-2023#
تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!