باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و پاڼزەهەمە
ساڵەی یەرەمەی کوچی، فاڕایۆ عائېشەی، ئەڎاو ئیماندارا:
جە ساڵەی یەرەمەی کوچیەنە، حەزرەت مەیلو عائیشەیش کەرد، جوبرەئیل فەرمانش پەنەکەرد کە مەشۊم ئیتر عائیشەی فاڕیۆ، مەشۊم بە وەسڵش شاڎ بی، چوونکم مەنکووحەی وېتەن موبارەک بۊ لېت. حەزرەت هەواڵش دا ئەبووبەکری، ئاڎییچ ژەنەکېش هاگاڎارە کەردە کە عائیشەی پېسە ۋەیوێ نازارۍ ڕازناوەو بەراش پەی خزمەتو شای بوراق سواری.
شای بوراق سوار ڕەسوولی مورسەل
حەبیبی حەزرەت دانای لەم یەزەل
تا یەکشەو شەوقێ نە دڵ ئاوەردش
مەیلی عائېشەی سیدیق کەردش
ناگاە جوبرەئیل چوون بۊی مائلوەرد
ئاینەی ڕوخسەتش پەی حەزرەت ئاوەرد
واتش: یا حەبیب دڵدەر واچوون پېت
پادشای شاهان سەلام کەردەن لېت
ئەمرش وەی تەورەن بینای بانی سەر
مەبۊ عائیشەی سیدیقی ئەنوەر
ئېشەو باوەرە بە وەسڵش شاڎ بۊ
ئەهلی عەزاب گرد یەکسەر ئازاد بۊ
چوونکە ئەو مەیلش بە عەیش و نوش بۊ
باکوورەی دوزەخ ئېشەو خامۊش بۊ
والیدی شیرین گردی موئمینین
ئېد تەییبان و ئەو هەم تەییبین
خوڎا مەزانۊ دیڎەش ها نە ڕېت
مەنکووحەی وېتەن موبارەک بۊ لېت
جەو دما حەزرەت پاکی پېغەممەر
کیانا وە لای سیدیقی ئەکبەر
خوداوەند لوتفش ئەرزاتی کەردەن
جوبرەئیل ڕوخسەتی شاڎیی ئاوەردەن
مەبۊ تۊ بە مەیل بە میهرەبانی
ئېشەو عائیشە پەرێم بکیانی
سیدیقی ئەکبەر شای ئەمیر قومان
فەوری فەرماندا وە ئومی ڕەمان
واتش: عائیشەی سیدیقەی نازار
بەرەش وە خزمەت شای بوراق سوار
چوون ئومی ڕەمان تەدارەک کەردش
چەنی دوو سێ ژەن عائیشە بەردش
یاوناش وە پای تەختی پېغەممەر
دەستی عائیشە شای مەلەک مەنزەر
نیاش نە ڕووی دەست موستەفای ئەمین
واتش: خوداوەند سەما و سەرزەمین
سایەی تۊ جە فەرق ئەو نەکەرۊ کەم
ئەو پەروانە بۊ، تۊ خاستەر جە شەم
نەبۊ جە لاتان پەژارە و تەخەف
خەیر و موقەددەم بین جە هەردوو تەرەف
ئومی ڕەمان و ماباقی خوېشان
هەرکام ڕوونیا وە یانەی وېشان.[1]