باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و دواڼزەهەمە
گفتوگۊ مېیانو ئەبوجەهلی و مامۊیش وەلیدی کوڕو موغەیرەی جە سەرەمەرگەنە:
مامۊ ئەبوجەهلی سەرهمەرگەنە بۍ، ئەبوجەهلی پەشتەو سەرەیشەنە مدرابۍ، پەرساش ئېش و نېشت جە چېشیەن، جەرگت یان دلۍ لەمت؟. ئاڎییچ ماچۊ: ئېشو من هینو بەڎەنیم نییەن، بەڵکم ئېشو (محەمەد)یەن، تەرسوون دمای وېم ئایېنو محەمەدی ئاشکرا ببۊن جەی سەرزمینە، مەککەیچ هەم ببۊن وېنەی مەدینە، ئڼا من تەرسم جە مەرگ نییەن.
وەلیدی بەڎبەخت لەعینی بەڎکار
ئیبنی موغەیرە پەلید و ناخار
عومری خەبیسش وە ئاخر یاوا
فەریادش مەکەرد سوبح تا خورئاوا
جە غەرغەرەی مەرگ هەر جەزعش مەکەرد
پەی پەی مەکېشا هەناسانی سەرد
تا ئەبوجەهل پەرسا کە ئەی عەم
پەی چېش تۊ سەبەب جە چېشەن
پەنەم واچە ڕاست دڵ وەئەندېشەن
وات: وەلله ئېشم نە تۊی جەرگ نییەن
خەبەری عەم جە خەوف پەرێ مەرگ نییەن
لاکین مەتەرسوون چەرخی ڕوژگار
دینی محەمەد کەرۊ ئاشکار
زاهیر بۊ تەمام جەی سەرزەمینە
مەککە هەم ببۊ وېنەی مەدینە
وەرنا من باکم جە مەردەی نییەن
چونکم زاد و مەرگ جە ئەزەل بییەن
جە داخی ئەی پیر دېوانەی ئەحمەق
سەڵەوات بۊ پەرێ ڕەسوولی بەرحەقق
تا نەبۊ سیفات کەردش دەلالەت
وات: خۊفت نەبۊ بویەر جەو حاڵەت
من زاهیر هەرگیز جە مەککەی تاهیر
دینی محەمەد هیچ نەبۊ زاهیر
ئەجەل پەی مەرگش ناگاه بیی نازڵ
ڕۊحش وە مالیک دوزەخ بیی واسڵ.[1]